៥. បណិហិតអច្ឆវគ្គ

បុច្ឆា – បញ្ចមេ អាវុសោ បណិហិតអច្ឆវគ្គេ ភគវតា កីទិសី ធម្មទេសនាយោ ទេសិតា.

វិស្សជ្ជនា – បញ្ចមេ ភន្តេ បណិហិតអច្ឆវគ្គេ ‘‘សេយ្យថាបិ ភិក្ខវេ សាលិសូកំ វា យវសូកំ វា មិច្ឆាបណិហិតំ ហត្ថេន វា បាទេន វា អក្កន្តំ ហត្ថំ វា បាទំ វា ភេច្ឆតិ, លោហិតំ វា ឧប្បាទេស្សតីតិ នេតំ ឋាន វិជ្ជតិ. តំ កិស្សហេតុ, មិច្ឆាបណិហិតត្តា ភិក្ខវេ សូកស្ស. ឯវមេវ ខោ ភិក្ខវេ សោ វត ភិក្ខុ មិច្ឆាបណិហិតេន ចិត្តេន អវិជ្ជំ ភេច្ឆតិ, វិជ្ជំ ឧប្បាទេស្សតិ, និព្ពានំ សច្ឆិករិស្សតីតិ នេតំ ឋានំ វិជ្ជតិ, តំ កិស្ស ហេតុ, មិច្ឆាបណិហិតត្តា ភិក្ខវេ ចិត្តស្សា’’តិ ឯវមាទិកា ភគវតា ធម្មទេសនាយោ ទេសិតា.