អង្គុត្តរនិកាយេ
សំគាយនស្ស បុច្ឆា វិស្សជ្ជនា
បុច្ឆា – បឋមមហាសំគីតិកាលេ អាវុសោ ធម្មសំគាហកា មហាកស្សបាទយោ មហាថេរវរា បោរាណសំគីតិការា បឋមំ វិនយបិដកំ សំគាយិត្វា សុត្តន្តបិដកេ ច ទីឃមជ្ឈិមសំយុត្តសង្ខាតេ តយោ និកាយេ សំគាយិត្វា តទនន្តរំ កិំ នាម បាវចនំ សំគាយិំសុ.
វិស្សជ្ជនា – បឋមមហាសំគីតិកាលេ ភន្តេ ធម្មសំគាហកា មហាកស្សបាទយោ មហាថេរវរា បោរាណសំគីតិការា បឋមំ វិនយំ សំគាយិត្វា សុត្តន្តបិដកេ ច ទីឃមជ្ឈិមសំយុត្តសង្ខាតេ តយោ និកាយេ សំគាយិត្វា តទនន្តរំ នវហិ ច សុត្តសហស្សេហិ បញ្ចហិ ច សុត្តសត្តេហិ សត្តបញ្ញាសាយ ច សុត្តេហិ បដិមណ្ឌិតំ វីសតិភាណវារសតបរិមាណំ អង្គុត្តរនិកាយំ នាម បាវចនំ សំគាយិំសុ.
បុច្ឆា – អង្គុត្តរនិកាយេបិ អាវុសោ ឯកកនិបាតោ ទុកនិបាតោ តិកនិបាតោតិអាទិនា និបាតបករណបរិច្ឆេទវសេន ឯកាទសវិធា. តត្ថ កតរំ និបាតបករណំ សំគាយិំសុ.
វិស្សជ្ជនា – អង្គុត្តរនិកាយេ ភន្តេ ឯកាទសសុ និបាតបករណបរិច្ឆេទេសុ ឯកកនិបាតំ បឋមំ សំគាយិំសុ.
១. រូបាទិវគ្គ
បុច្ឆា – ឯកកនិបាតេបិ អាវុសោ រូបាទិវគ្គោ នីវរណប្បហានវគ្គោ អកម្មនិយវគ្គោតិអាទិនា វគ្គភេទវសេន ពហុវិធា. តត្ថ កតរំ វគ្គំ បឋមំ សំគាយិំសុ.
វិស្សជ្ជនា – ឯកកនិបាតេ ភន្តេ រូបាទិវគ្គោ នីវរណប្បហានវគ្គោតិអាទិនា វីសតិយា វគ្គេសុ រូបាទិវគ្គំ បឋមំ សំគាយិំសុ.
បុច្ឆា – សាធុ សាធុ អាវុសោ, មយម្បិ ទានិ អាវុសោ តតោយេវ បដ្ឋាយ សំគាហនត្ថាយ សំគីតិបុព្ពង្គមានិ ធម្មបុច្ឆនវិស្សជ្ជនកិច្ចានិ អាវហិតុំ សមារភាម. តេនាវុសោ ភគវតា ជានតា បស្សតា អរហតា សម្មាសម្ពុទ្ធេន អង្គុត្តរនិកាយេ ឯកកនិបាតេ រូបាទិវគ្គេ បុរិមានិ បញ្ច សុត្តានិ កត្ថ កំ អារព្ភ កថញ្ច ភាសិតានិ.
វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ រូបាទិគរុកានំ បញ្ចន្នំ បុរិសានំ អជ្ឈាសយវសេន ‘‘នាហំ ភិក្ខវេ អញ្ញំ ឯករូបម្បិ សមនុបស្សាមិ, យំ ឯវំ បុរិសស្ស ចិត្តំ បរិយាទាយ តិដ្ឋតិ, យថយិទំ ភិក្ខវេ ឥត្ថិរូបំ, ឥត្ថិរូបំ ភិក្ខវេ បុរិសស្ស ចិត្តំ បរិយាទាយ តិដ្ឋតី’’តិ ឯវមាទិនា ភគវតា ភាសិតានិ.
នាហំ ភិក្ខវេ អញ្ញំ ឯករូបម្បិ សមនុបស្សាមិ, យំ ឯវំ បុរិសស្ស ចិត្តំ បរិយាទាយ តិដ្ឋតិ, យថយិទំ ភិក្ខវេ ឥត្ថិរូបំ, ឥត្ថិរូបំ ភិក្ខវេ បុរិសស្ស ចិត្តំ បរិយាទាយ តិដ្ឋតិ.
បុច្ឆា – តត្ថេវ អាវុសោ បច្ឆិមានិ បញ្ច សុត្តានិ ភគវតា កត្ថ កំ អារព្ភ កថញ្ច ភាសិតានិ.
វិស្សជ្ជនា – តស្មិំយេវ ភន្តេ សាវត្ថិយំ សម្ពហុលេ ភិក្ខូ អារព្ភ រូបាទិគរុកានំ បញ្ចន្នំ ឥត្ថីនំ អជ្ឈាសយវសេន ‘‘នាហំ ភិក្ខវេ អញ្ញំ ឯករូបម្បិ សមនុបស្សាមិ, យំ ឯវំ ឥត្ថិយា ចិត្តំ បរិយាទាយ តិដ្ឋតិ, យថយិទំ ភិក្ខវេ បុរិសរូបំ, បុរិសរូបំ ភិក្ខវេ ឥត្ថិយា ចិត្តំ បរិយាទាយ តិដ្ឋតី’’តិ ឯវមាទិនា ភគវតា ភាសិតានិ.
នាហំ ភិក្ខវេ អញ្ញំ ឯករូបម្បិ សមនុបស្សាមិ, យំ ឯវំ ឥត្ថិយា ចិត្តំ បរិយាទាយ តិដ្ឋតិ, យថយិទំ ភិក្ខវេ បុរិសរូបំ, បុរិសរូបំ ភិក្ខវេ ឥត្ថិយា ចិត្តំ បរិយាទាយ តិដ្ឋតិ.
នីតត្ថវសេន, នេយ្យត្ថវសេន
បុច្ឆា – ឥមស្មិំ អាវុសោ រូបាទិវគ្គេ ភគវតា នីតត្ថវសេន កិំ កថិតំ, នេយ្យត្ថវសេន បន កិំ ញាបិតំ.
វិស្សជ្ជនា – ឥមស្មិំ ភន្តេ រូបាទិវគ្គេ ភគវតា នីតត្ថវសេន វដ្ដំ កថិតំ. នេយ្យត្ថវសេន បន វិវដ្ដម្បិ ញាបិតំ.
២. នីវរណប្បហានវគ្គ
បុច្ឆា – ទុតិយោ បន អាវុសោ នីវរណប្បហានវគ្គោ ភគវតា កត្ថ កថញ្ច ភាសិតោ.
វិស្សជ្ជនា – សាវត្ថិយំ ភន្តេ ‘‘នាហំ ភិក្ខវេ អញ្ញំ ឯកធម្មម្បិ សមនុបស្សាមិ, យេន អនុប្បន្នោ វា កាមច្ឆន្ទោ ឧប្បជ្ជតិ, ឧប្បន្នោ វា កាមច្ឆន្ទោ ភិយ្យោភាវាយ វេបុល្លាយ សំវត្តតិ, យថយិទំ ភិក្ខវេ សុភនិមិត្តំ, សុភនិមិត្តំ ភិក្ខវេ អយោនិសោ មនសិករោតោ អនុប្បន្នោចេវ កាមច្ឆន្ទោ ឧប្បជ្ជតិ, ឧប្បន្នោ ច កាមច្ឆន្ទោ ភិយ្យោភាវាយ វេបុល្លាយ សំវត្តតី’’តិ ឯវមាទិនា ភគវតា ភាសិតោ.
បុច្ឆា – ឥមស្មិំ បន អាវុសោ ទុតិយេ នីវរណប្បហានវគ្គេ ភគវតា កិំ កថិតំ.
វិស្សជ្ជនា – ឥមស្មិំ បន ភន្តេ ទុតិយេ នីវរណប្បហានវគ្គេ ភគវតា វដ្ដម្បិ វិវដ្ដម្បិ កថិតំ.
៣. អកម្មនិយវ
បុច្ឆា – តេនាវុសោ…បេ… សម្មាសម្ពុទ្ធេន អង្គុត្តរនិកាយេ ឯកកនិបាតេ តតិយេ អកម្មនិយវគ្គេ កីទិសី ធម្មទេសនាយោ ទេសិតា.
វិស្សជ្ជនា – តតិយេ ភន្តេ អកម្មនិយវគ្គេ ‘‘នាហំ ភិក្ខវេ អញ្ញំ ឯកធម្មម្បិ សមនុបស្សាមិ, យំ ឯវំ អភាវិតំ អកម្មនិយំ ហោតិ, យថយិទំ ភិក្ខវេ ចិត្តំ, ចិត្តំ ភិក្ខវេ អភាវិតំ អកម្មនិយំ ហោតិ. នាហំ ភិក្ខវេ អញ្ញំ ឯកធម្មម្បិ សមនុបស្សាមិ, យំ ឯវំ ភាវិតំ កម្មនិយំ ហោតិ, យថយិទំ ភិក្ខវេ ចិត្តំ. ចិត្តំ ភិក្ខវេ ភាវិតំ កម្មនិយំ ហោតី’’តិ ឯវមាទិកា ភគវតា ធម្មទេសនាយោ ទេសិតា.
៤. អទន្តវគ្គ
បុច្ឆា – ចតុត្ថេ បនាវុសោ អទន្តវគ្គេ ភគវតា កីទិសី ធម្មទេសនាយោ ទេសិតា.
វិស្សជ្ជនា – ចតុត្ថេ ភន្តេ អទន្តវគ្គេ ‘‘នាហំ ភិក្ខវេ អញ្ញំ ឯកធម្មម្បិ សមនុបស្សាមិ, យំ ឯវំ អទន្តំ មហតោ អនត្ថាយ សំវត្តតិ, យថយិទំ ភិក្ខវេ ចិត្តំ, ចិត្តំ ភិក្ខវេ អទន្តំ មហតោ អនត្ថាយ សំវត្តតិ. នាហំ ភិក្ខវេ អញ្ញំ ឯកធម្មម្បិ សមនុបស្សាមិ, យំ ឯវំ ទន្តំ មហតោ អត្ថាយ សំវត្តតិ, យថយិទំ ភិក្ខវេ ចិត្តំ, ចិត្តំ ភិក្ខវេ ទន្តំ មហតោ អត្ថាយ សំវត្តតី’’តិ ឯវមាទិកា ភគវតា ធម្មទេសនាយោ ទេសិតា.
៥. បណិហិតអច្ឆវគ្គ
បុច្ឆា – បញ្ចមេ អាវុសោ បណិហិតអច្ឆវគ្គេ ភគវតា កីទិសី ធម្មទេសនាយោ ទេសិតា.
វិស្សជ្ជនា – បញ្ចមេ ភន្តេ បណិហិតអច្ឆវគ្គេ ‘‘សេយ្យថាបិ ភិក្ខវេ សាលិសូកំ វា យវសូកំ វា មិច្ឆាបណិហិតំ ហត្ថេន វា បាទេន វា អក្កន្តំ ហត្ថំ វា បាទំ វា ភេច្ឆតិ, លោហិតំ វា ឧប្បាទេស្សតីតិ នេតំ ឋាន វិជ្ជតិ. តំ កិស្សហេតុ, មិច្ឆាបណិហិតត្តា ភិក្ខវេ សូកស្ស. ឯវមេវ ខោ ភិក្ខវេ សោ វត ភិក្ខុ មិច្ឆាបណិហិតេន ចិត្តេន អវិជ្ជំ ភេច្ឆតិ, វិជ្ជំ ឧប្បាទេស្សតិ, និព្ពានំ សច្ឆិករិស្សតីតិ នេតំ ឋានំ វិជ្ជតិ, តំ កិស្ស ហេតុ, មិច្ឆាបណិហិតត្តា ភិក្ខវេ ចិត្តស្សា’’តិ ឯវមាទិកា ភគវតា ធម្មទេសនាយោ ទេសិតា.
៦. អច្ឆរាសង្ឃាតវគ្គ
បុច្ឆា – អច្ឆរាសង្ឃាតវគ្គេ អាវុសោ បឋម ទុតិយសុត្តានិ ភគវតា កថំ ភាសិតានិ.
វិស្សជ្ជនា – អច្ឆរាសង្ឃាតវគ្គេ ភន្តេ ភគវតា ‘‘បភស្សរមិទំ ភិក្ខវេ ចិត្តំ, តញ្ច ខោ អាគន្តុកេហិ ឧបក្កិលេសេហិ ឧបក្កិលិដ្ឋំ, តំ អស្សុតវា បុថុជ្ជនោ យថាភូតំ នប្បជានាតិ, តស្មា ‘អស្សុតវតោ បុថុជ្ជនស្ស ចិត្តភាវនា នត្ថី’តិ វទាមិ. បភស្សរមិទំ ភិក្ខវេ ចិត្តំ, តញ្ច ខោ អាគន្តុកេហិ ឧបក្កិលេសេហិ វិប្បមុត្តំ, តំ សុភវា អរិយសាវកោ យថាភូតំ បជានាតិ. តស្មា ‘សុតបតោ អរិយសាវកស្ស ចិត្តភាវនា អត្ថី’តិ វទាមី’’តិ. ឯវំ ខោ ភគវតា ភាសិតានិ.
តតិយសុត្ត
បុច្ឆា – តត្ថេវ អាវុសោ តតិយសុត្តាទីនិ ភគវតា កថំ ភាសិតានិ.
វិស្សជ្ជនា – តត្ថេវ ភន្តេ តតិយសុត្តាទីនិ បញ្ចសុត្តានិ ‘‘អច្ឆរាសង្ឃាតមត្តម្បិ ចេ ភិក្ខវេ ភិក្ខុ មេត្តាចិត្តំ អាសេវតិ, ភាវេតិ, មនសិករោតិ. អយំ វុច្ចតិ ភិក្ខវេ ភិក្ខុ អរិត្តជ្ឈានោ វិហរតិ សត្ថុសាសនករោ ឱវាទបតិករោ អមោឃំ រដ្ឋបិណ្ឌំ ភុញ្ជតិ, កោ បន វាទោ យេ នំ ពហុលីករោន្តិ. យេកេចិ ភិក្ខវេ ធម្មា អកុសលា អកុសលភាគិយា អកុសលបក្ខិកា, សព្ពេតេ មនោបុព្ពង្គមា, មនោ តេសំ ធម្មានំ បឋមំ ឧប្បជ្ជតិ, អន្វទេវ អកុសលាធម្មា, យេកេចិ ភិក្ខវេ ធម្មា កុសលា កុសលភាគិយា កុសលបក្ខិកា, សព្ពេតេ មនោបុព្ពង្គមា, មនោ តេសំ ធម្មានំ បឋមំ ឧប្បជ្ជតិ, អន្វទេវ កុសលា ធម្មា’’តិ ឯវំ ខោ ភន្តេ ភគវតា ភាសិតានិ.
អដ្ឋមសុត្ត
បុច្ឆា – តត្ថេវ អាវុសោ អដ្ឋម នវម ទសមសុត្តានិ ច វីរិយារម្ភាទិវគ្គេ ទសសុត្តានិ ច កល្យាណមិត្តាទិវគ្គេ បឋមសុត្តញ្ច ភគវតា កថំ ភាសិតានិ.
វិស្សជ្ជនា – តត្ថេវ ភន្តេ អដ្ឋម នវម ទសមសុត្តានិ ច វីរិយារម្ភាទិវគ្គេ ទសសុត្តានិ ច កល្យាណមិត្តាទិវគ្គេ បឋមសុត្តញ្ច ‘‘នាហំ ភិក្ខវេ អញ្ញំ ឯកធម្មម្បិ សមនុបស្សាមិ, យេន អនុប្បន្នា វា អកុសលា ធម្មា ឧប្បជ្ជន្តិ, ឧប្បន្នា វា កុសលា ធម្មា បរិហាយន្តិ, យថយិទំ ភិក្ខវេ បមាទោ, បមត្តស្ស ភិក្ខវេ អនុប្បន្នា ចេវ អកុសលា ធម្មា ឧប្បជ្ជន្តិ, ឧប្បន្នា ច កុសលា ធម្មា បរិហាយន្តី’’តិ ឯវមាទិនា ភន្តេ ភគវតា ភាសិតានិ.
ទុតិយសុត្ត
បុច្ឆា – កល្យាណមិត្តាទិវគ្គេ អាវុសោ ទុតិយ តតិយសុត្តានិ ភគវតា កថំ ភាសិតានិ.
វិស្សជ្ជនា – កល្យាណមិត្តាទិវគ្គេ ភន្តេ ទុតិយ តតិយសុត្តានិ ‘‘នាហំ ភិក្ខវេ អញ្ញំ ឯកធម្មម្បិ សមនុបស្សាមិ, យេន អនុប្បន្នា វា អកុសលា ធម្មា ឧប្បជ្ជន្តិ, ឧប្បន្នា វា កុសលា ធម្មា បរិហាយន្តិ, យថយិទំ ភិក្ខវេ អនុយោគោ អកុសលានំ ធម្មានំ អននុយោគោ កុសលានំ ធម្មាន’’ន្តិ ឯវមាទិនា ភគវតា ភាសិតានិ.
ឆដ្ឋសុត្ត
បុច្ឆា – តត្ថេវ អាវុសោ ឆដ្ឋសុត្តាទីនិ ច បមាទាទិវគ្គេ បឋមសុត្តញ្ច ភគវតា កថំ ភាសិតានិ.
វិស្សជ្ជនា – តត្ថេវ ភន្តេ ឆដ្ឋសុត្តាទីនិ ច បមាទាទិវគ្គេ បឋមសុត្តញ្ច ‘‘អប្បមត្តិកា ឯសា ភិក្ខវេ បរិហានិ យទិទំ ញាតិបរិហានិ. ឯតំ បតិកិដ្ឋំ ភិក្ខវេ បរិហានីនំ យទិទំ បញ្ញាបរិហានីតិ. អប្បមត្តិកា ឯសា ភិក្ខវេ វុទ្ធិ យទិទំ ញាតិវុទ្ធិ. ឯតទគ្គំ ភិក្ខវេ វុទ្ធីនំ យទិទំ បញ្ញាវុទ្ធិ. តស្មាតិហ ភិក្ខវេ ឯវំ សិក្ខិតព្ពំ ‘បញ្ញាវុទ្ធិយា វទ្ធិស្សាមា’តិ. ឯវញ្ហិ វោ ភិក្ខវេ សិក្ខិតព្ព’’ន្តិ ឯវមាទិនា ភន្តេ ភគវតា ភាសិតានិ.
បមាទាទិវគ្គ
បុច្ឆា – តេនាវុសោ…បេ… សម្មាសម្ពុទ្ធេន បមាទាទិវគ្គេ ទុតិយសុត្តាទីនិ កថំ ភាសិតានិ.
វិស្សជ្ជនា – នាហំ ភិក្ខវេ អញ្ញំ ឯកធម្មម្បិ សមនុបស្សាមិ, យោ ឯវំ មហតោ អនត្ថាយ សំវត្តតិ, យថយិទំ ភិក្ខវេ បមាទោ. បមាទោ ភិក្ខវេ មហតោ អនត្ថាយ សំវត្តតិ. នាហំ ភិក្ខវេ អញ្ញំ ឯកធម្មម្បិ, យោ ឯវំ មហតោ អត្ថាយ សំវត្តតិ, យថយិទំ ភិក្ខវេ អប្បមាទោ, អប្បមាទោ ភិក្ខវេ មហតោ អនត្ថាយ សំវត្តតីតិ ឯវមាទិនា ភន្តេ ភគវតា ភាសិតានិ.
ទុតិយ បមាទាទិវគ្គ
បុច្ឆា – ទុតិយេ បនាវុសោ បមាទាទិវគ្គេ បឋមសុត្តាទីនិ ភគវតា កថំ ភាសិតានិ.
វិស្សជ្ជនា – ទុតិយេ ភន្តេ បមាទាទិវគ្គេ អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គម្បិ សមនុបស្សាមិ, យំ ឯវំ មហតោ អនត្ថាយ សំវត្តតិ, យថយិទំ ភិក្ខវេ បមាទោ. បមាទោ ភិក្ខវេ មហតោ អនត្ថាយ សំវត្តតិ. អជ្ឈត្តិកំ ភិក្ខវេ អង្គន្តិ ករិត្វា នាញ្ញំ ឯកង្គម្បិ សមនុបស្សាមិ, យំ ឯវំ មហតោ អត្ថាយ សំវត្តតិ, យថយិទំ ភិក្ខវេ អប្បមាទោ. អប្បមាទោ ភិក្ខវេ មហតោ អត្ថាយ សំវត្តតីតិ ឯវមាទិនា ភន្តេ ភគវតា ភាសិតានិ.
ទសសុត្ត
បុច្ឆា – តត្ថេវ អាវុសោ តេត្តិំសមាទីនិច ទសសុត្តានិ អធម្មវគ្គេ ច ទសសុត្តានិ ភគវតា កថំ ភាសិតានិ.
វិស្សជ្ជនា – តត្ថេវ ភន្តេ តេត្តិំសមាទីនិ ទសសុត្តានិ ច អធម្មវគ្គេ ទសសុត្តានិ ច យេ តេ ភិក្ខវេ ភិក្ខូ អធម្មំ ‘‘ធម្មោ’’តិ ទីបេន្តិ, តេ ភិក្ខវេ ភិក្ខូ ពហុជនអហិតាយ បដិបន្នា ពហុជនអសុខាយ ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សានំ. ពហុញ្ច តេ ភិក្ខវេ ភិក្ខូ អបុញ្ញំ បសវន្តិ, តេ ចិមំ សទ្ធម្មំ អន្តរធាបេន្តីតិ ឯវមាទិនា ច, យេ តេ ភិក្ខវេ ភិក្ខូ អធម្មំ ‘‘អធម្មោ’’តិ ទីបេន្តិ, តេ ភិក្ខវេ ភិក្ខូ ពហុជនហិតាយ បដិបន្នា ពហុជនសុខាយ ពហុជនោ ជនស្ស អត្ថាយ ហិតាយ សុខាយ ទេវមនុស្សានំ. ពហុញ្ច តេ ភិក្ខវេ ភិក្ខូ បុញ្ញំ បសវន្តិ, តេ ចិមំ សទ្ធម្មំ ឋបេន្តីតិ ឯវមាទិនា ច ភន្តេ ភគវតា ភាសិតានិ.
ឯកបុគ្គលវគ្គ
បុច្ឆា – ឯកបុគ្គលវគ្គេ អាវុសោ ភគវតា កីទិសី ធម្មទេសនាយោ ទេសិតា.
វិស្សជ្ជនា – ឯកបុគ្គលវគ្គេ ភន្តេ ភគវតា ឯកបុគ្គលោ ភិក្ខវេ លោកេ ឧប្បជ្ជមានោ ឧប្បជ្ជតិ ពហុជនហិតាយ ពហុជនសុខាយ លោកានុកម្បាយ អត្ថាយ ហិតាយ សុខាយ ទេវមនុស្សានំ. កតមោ ឯកបុគ្គលោ, តថាគតោ អរហំ សម្មាសម្ពុទ្ធោ, អយំ ខោ ភិក្ខវេ ឯកបុគ្គលោ លោកេ ឧប្បជ្ជមានោ ឧប្បជ្ជតិ ពហុជនហិតាយ ពហុជនសុខាយ លោកានុកម្បាយ អត្ថាយ ហិតាយ សុខាយ ទេវមនុស្សានន្តិ ឯវមាទិកា ភគវតា ធម្មទេសនាយោ ទេសិតា.
ឯតទគ្គវគ្គ
អញ្ញាសិកោណ្ឌញ្ញ វត្ថុ
បុច្ឆា – ឯតទវគ្គេ អាវុសោ អាគតេសុ ឯកចត្តាលីសាយ ថេរេសុ អាយស្មា អញ្ញាសិកោណ្ឌញ្ញត្ថេរោ កថំ ភគវតា ឯតទគ្គដ្ឋានេ ឋបិតោ.
វិស្សជ្ជនា – ឯតទគ្គវគ្គេ ភន្តេ អាគតេសុ ឯកចត្តាលីសាយ មហាថេរេសុ ‘‘ឯតទគ្គំ ភិក្ខវេ មម សាវកានំ ភិក្ខូនំ រត្តញ្ញូនំ យទិទំ អញ្ញាសិកោណ្ឌញ្ញោ’’តិ, ឯវំ ខោ ភន្តេ អាយស្មា អញ្ញាសិកោណ្ឌញ្ញត្ថេរោ ភគវតា ឯតទគ្គដ្ឋានេ ឋបិតោ.
អគ្គសាវកវត្ថុ
បុច្ឆា – តេនាវុសោ ភគវតា…បេ… សម្មាសម្ពុទ្ធេន អង្គុត្តរនិកាយេ ឯកកនិបាតេ ឯតទគ្គវគ្គេ អាគតេសុ ឯកចត្តាលីសាយ មហាថេរេសុ អាយស្មា ច សារិបុត្តត្ថេរោ ធម្មសេនាបតិ បឋមោ អគ្គសាវកោ អាយស្មា ច មហាមោគ្គល្លានត្ថេរោ ទុតិយោ អគ្គសាវកោ កថំ ឯតទគ្គដ្ឋានេ ឋបិតោ.
វិស្សជ្ជនា – អាយស្មា ភន្តេ សារិបុត្តត្ថេរោ ធម្មសេនាបតិ ‘‘ឯតទគ្គំ ភិក្ខវេ មម សាវកានំ ភិក្ខូនំ មហាបញ្ញានំ យទិទំ សារិបុត្តោ’’តិ. អាយស្មា បន មហាមោគ្គល្លានត្ថេរោ ‘‘ឯតទគ្គំ ភិក្ខវេ មម សាវកានំ ភិក្ខូនំ ឥទ្ធិមន្តានំ យទិទំ មហាមោគ្គល្លានោ’’តិ. ឯវំ ខោ ភន្តេ ភគវតា ឯតទគ្គដ្ឋានេ ឋបិតោ.
ឥទំ តេ អាសនំ វីរ, បញ្ញត្តំ តវនុច្ឆវិំ;
មម ចិត្តំ បសាទេន្តោ, និសីទ បុប្ផមាសនេ.
យេ វត លោកេ អរហន្តោ វា អរហត្តមគ្គំ វា សមាបន្នា, អយំ តេសំ ភិក្ខុ អញ្ញតរោ.
យំនូនាហំ ឥមំ ភិក្ខុំ ឧបសង្កមិត្វា បញ្ហំ បុច្ឆេយ្យំ.
យេ ធម្មា ហេតុប្បភវា,
តេសំ ហេតុំ តថាគតោ;
អាហ តេសញ្ច យោ និរោធោ,
ឯវំវាទី មហាសមណោ –
លភេយ្យាម មយំ ភន្តេ ភគវតោ សន្តិកេ បព្ពជ្ជំ, លភេយ្យាម ឧបសម្បទំ.
ឯតទគ្គំ ភិក្ខវេ មម សាវកានំ ភិក្ខូនំ មហាបញ្ញានំ យទិទំ សារិបុត្តោ.
ឯតទគ្គំ ភិក្ខវេ មម សាវកានំ ភិក្ខូនំ ឥទ្ធិមន្តានំ យទិទំ មហាមោគ្គល្លានោ.
មហាកស្សបវត្ថុ
បុច្ឆា – អាយស្មា បន អាវុសោ មហាកស្សបត្ថេរោ បឋមមហាសំគីតិកាលេ បាមោក្ខសង្ឃនាយកភូតោ ភគវតា កថំ ឯតទគ្គដ្ឋានេ ឋបិតោ.
វិស្សជ្ជនា – អាយស្មា ភន្តេ មហាកស្សបត្ថេរោ បឋមមហាសំគីតិកាលេ សង្ឃបាមោក្ខភូតោ ‘‘ឯតទគ្គំ ភិក្ខវេ មម សាវកានំ ភិក្ខូនំ ធុតវាទានំ យទិទំ មហាកស្សបោ’’តិ. ឯវំ ខោ ភន្តេ ភគវតា ឯតទគ្គដ្ឋានេ ឋបិតោ.
អនុរុទ្ធត្ថេរវត្ថុ
បុច្ឆា – តេនាវុសោ…បេ… សម្មាសម្ពុទ្ធេន អង្គុត្តរនិកាយេ ឯកកនិបាតេ ឯតទគ្គវគ្គេ អាគតេសុ ឯកចត្តាលីសាយ មហាថេរេសុ អាយស្មា អនុរុទ្ធត្ថេរោ កថំ ឯតទគ្គដ្ឋានេ ឋបិតោ.
វិស្សជ្ជនា – អាយស្មា ភន្តេ អនុរុទ្ធត្ថេរោ ‘‘ឯតទគ្គំ ភិក្ខវេ មម សាវកានំ ភិក្ខូនំ ទិព្ពចក្ខុកានំ យទិទំ អនុរុទ្ធោ’’តិ ឯវំ ខោ ភន្តេ ភគវតា ឯតទគ្គដ្ឋានេ ឋបិតោ.
សីវលិវត្ថុ
បុច្ឆា – អាយស្មា បន អាវុសោ សីវលិត្ថេរោ ភគវតា កថំ ឯតទគ្គដ្ឋានេ ឋបិតោ.
វិស្សជ្ជនា – អាយស្មា ភន្តេ សីវលិត្ថេរោ ‘‘ឯតទគ្គំ ភិក្ខវេ មម សាវកានំ ភិក្ខូនំ លាភីនំ យទិទំ សីវលី’’តិ ឯវំ ខោ ភន្តេ ភគវតា ឯតទគ្គដ្ឋានេ ឋបិតោ.
សម្មាសម្ពុទ្ធោ វត សោ ភគវា, យោ ឥមស្ស ឯវរូបស្ស ទុក្ខស្ស បហានាយ ធម្មំ ទេសេតិ.
សុប្បដិបន្នោ វត តស្ស ភគវតោ សាវកសង្ឃោ, យោ ឥមស្ស ឯវរូបស្ស ទុក្ខស្ស បហានាយ បដិបន្នោ.
សុសុខំ វត និព្ពានំ, យត្ថិទំ ឯវរូបំ ទុក្ខំ ន សំវិជ្ជតិ –
‘‘ឯតទគ្គំ ភិក្ខវេ មម សាវកានំ ភិក្ខូនំ លាភីនំ យទិទំ សីវលិ’’ ហុ –
អានន្ទាថេរវត្ថុ
បុច្ឆា – អាយស្មា បន អាវុសោ អានន្ទត្ថេរោ ធម្មភណ្ឌាគារិកោ បឋមមហាសំគីតិកាលេ ធម្មវិស្សជ្ជកថេរភូតោ កថំ ភគវតា ឯតទគ្គដ្ឋានេ ឋបិតោ.
វិស្សជ្ជនា – អាយស្មា ភន្តេ អានន្ទត្ថេរោ ធម្មភណ្ឌាគារិកោ បឋមមហាសំគីតិកាលេ ធម្មវិស្សជ្ជកភូតោ ‘‘ឯតទគ្គំ ភិក្ខវេ មម សាវកានំ ភិក្ខូនំ ពហុស្សុតានំ យទិទំ អានន្ទោ. ឯតទគ្គំ ភិក្ខវេ មម សាវកានំ ភិក្ខូនំ សតិមន្តានំ យទិទំ អានន្ទោ. ឯតទគ្គំ ភិក្ខវេ មម សាវកានំ ភិក្ខូនំ គតិមន្តានំ យទិទំ អានន្ទោ. ឯតទគ្គំ ភិក្ខវេ មម សាវកានំ ភិក្ខូនំ ធិតិមន្តានំ យទិទំ អានន្ទោ. ឯតទគ្គំ ភិក្ខវេ មម សាវកានំ ភិក្ខូនំ ឧបដ្ឋាកានំ យទិទំ អានន្ទោ’’តិ ឯវំ ខោ ភន្តេ ភគវតា បញ្ចសុ ឯតទគ្គដ្ឋានេសុ ឋបិតោ.
សតសហស្សេន មេ កីតំ,
សតសហស្សេន មាបិតំ;
សោភនំ នាម ឧយ្យានំ;
បដិគ្គណ្ហ មហាមុនិ –
‘‘ឯតទគ្គំ ភិក្ខវេ មម សាវកានំ ភិក្ខូនំ ពហុស្សុតានំ. សតិមន្តានំ. គតិមន្តានំ. ធិតិមន្តានំ. ឧបដ្ឋាកានំ យទិទំ អានន្ទោ’’ –
ឧបាលិវត្ថុ
បុច្ឆា – តេនាវុសោ ភគវតា…បេ… សម្មាសម្ពុទ្ធេន អង្គុត្តរនិកាយេ ឯកកនិបាតេ ឯតទគ្គវគ្គេ អាគតេសុ ឯកចត្តាលីសាយ មហាថេរេសុ អាយស្មា ឧបាលិត្ថេរោ បឋមមហាសំគីតិកាលេ វិនយវិស្សជ្ជកភូតោ កថំ ឯតទគ្គដ្ឋានេ ឋបិតោ.
វិស្សជ្ជនា – អាយស្មា ភន្តេ ឧបាលិត្ថេរោ បឋមមហាសំគីតិកាលេ វិនយវិស្សជ្ជកភូតោ ‘‘ឯតទគ្គំ ភិក្ខវេ មម សាវកានំ ភិក្ខូនំ វិនយធរានំ យទិទំ ឧបាលី’’តិ ឯវំ ខោ ភន្តេ ភគវតា ឯតទគ្គដ្ឋានេ ឋបិតោ.
វិនយោ វាសយោ មយ្ហំ,
វិនយោ ឋានចង្កមំ;
កប្បេមិ វិនយេ វាសំ,
វិនយោ មម គោចរោ.
មហាបជាបតិគោតមីថេរីវត្ថុ
បុច្ឆា – ឯតទគ្គវគ្គេ អាវុសោ អាគតាសុ តេរសសុ ថេរីសុ មហាបជាបតិ គោតមីថេរី កថំ ភគវតា ឯតទគ្គដ្ឋានេ ឋបិតា.
វិស្សជ្ជនា – ឯតទគ្គវគ្គេ ភន្តេ អាគតាសុ តេរសសុ ថេរីសុ មហាបជាបតិគោតមីថេរី ‘‘ឯតទគ្គំ ភិក្ខវេ មម សាវិកានំ ភិក្ខុនីនំ រត្តញ្ញូនំ យទិទំ មហាបជាបតិ គោតមី’’តិ ឯវំ ខោ ភន្តេ ភគវតា ឯតទគ្គដ្ឋានេ ឋបិតា.
‘‘ឯតទគ្គំ ភិក្ខវេ មម សាវិកានំ ភិក្ខុនីនំ រត្តញ្ញូនំ យទិទំ មហាបជាបតិគោតមី’’ –
បុច្ឆា – ខេមាថេរី បន អាវុសោ អគ្គសាវិកា ភគវតា កថំ ឯតទគ្គដ្ឋានេ ឋបិតា.
វិស្សជ្ជនា – ខេមាថេរី ភន្តេ បឋមា អគ្គសាវិកា ‘‘ឯតទគ្គំ ភិក្ខវេ មម សាវិកានំ ភិក្ខុនីនំ មហាបញ្ញានំ យទិទំ ខេមា’’តិ ឯវំ ខោ ភន្តេ ភគវតា ឯតទគ្គដ្ឋានេ ឋបិតា.
‘‘យេ រាគរត្តានុបតន្តិ សោតំ,
សយំកតំ មក្កដោវ ជាលំ,
ឯតម្បិ ឆេត្វាន វជន្តិ ធីរា;
អនបេក្ខិនោ សព្ពទុក្ខំ បហាយ’’ –
‘‘ឯតទគ្គំ ភិក្ខវេ មម សាវិកានំ ភិក្ខុនីនំ មហាបញ្ញានំ យទិទំ ខេមា’’ –
បុច្ឆា – ឧប្បលវណ្ណា បន អាវុសោ ថេរី ទុតិយអគ្គសាវិកា ភគវតា កថំ ឯតទគ្គដ្ឋានេ ឋបិតា.
វិស្សជ្ជនា – ឧប្បលវណ្ណា ភន្តេ ថេរី ទុតិយអគ្គសាវិកា ‘‘ឯតទគ្គំ ភិក្ខវេ មម សាវិកានំ ភិក្ខុនីនំ ឥទ្ធិមន្តីនំ យទិទំ ឧប្បលវណ្ណា’’តិ ឯវំ ខោ ភន្តេ ភគវតា ឯតទគ្គដ្ឋានេ ឋបិតា.
‘‘ឯតទគ្គំ ភិក្ខវេ មម សាវិកានំ ភិក្ខុនីនំ ឥទ្ធិមន្តីនំ យទិទំ ឧប្បលវណ្ណា’’ –
បដាចារាថេរីភិក្ខុនីមវត្ថុ
បុច្ឆា – តេនាវុសោ ភគវតា…បេ… សម្មាសម្ពុទ្ធេន អង្គុត្តរនិកាយេ ឯកកនិបាតេ ឯតទគ្គវគ្គេ អាគតាសុ តេរសសុ ថេរីសុ បដាចារានាម ថេរី កថំ ឯតទគ្គដ្ឋានេ ឋបិតា.
វិស្សជ្ជនា – ឯតទគ្គវគ្គេ ភន្តេ អាគតាសុ តេរសសុ ថេរិកាសុ បដាចារា ថេរី ‘‘ឯតទគ្គំ ភិក្ខវេ មម សាវិកានំ ភិក្ខុនីនំ វិនយធរានំ យទិទំ បដាចារា’’តិ ឯវំ ខោ ភន្តេ ភគវតា ឯតទគ្គដ្ឋានេ ឋបិតា.
‘‘ឧភោ បុត្តា កាលង្កតា,
បន្ថេ មយ្ហំ បតី មតោ;
មាតាបិតា ច ភាតា ច,
ឯកចិតកស្មិំ ឌយ្ហរេ’’ –
‘‘ចតូសុ សមុទ្ទេសុ ជលំ បរិត្តកំ,
តតោ ពហុំ អស្សុជលំ អនប្បកំ;
ទុក្ខេន ផុដ្ឋស្ស នរស្ស សោចនា,
កិំ ការណា អម្ម តុវំ បមជ្ជសិ’’ –
‘‘ន សន្តិ បុត្តា តាណាយ,
ន បិតា នាបិ ពន្ធវា;
អន្តកេនាធិបន្នស្ស,
នត្ថិ ញាតីសុ តាណតា;
ឯតមត្ថវសំ ញត្វា, បណ្ឌិតោ សីលសំវុតោ;
និព្ពានគមនំ មគ្គំ, ខិប្បមេវ វិសោធយេ’’ –
‘‘យោ ច វស្សសតំ ជីវេ,
អបស្សំ ឧទយព្ពយំ;
ឯកាហំ ជីវិតំ សេយ្យោ,
បស្សតោ ឧទយព្ពយំ’’ –
‘‘ឯតទគ្គំ ភិក្ខវេ មម សាវិកានំ ភិក្ខុនីនំ វិនយធរានំ យទិទំ បដាចារា’’ –
ធម្មទិន្នាថេរីភិក្ខុនីមវត្ថុ
បុច្ឆា – ធម្មទិន្នា បន អាវុសោ ថេរី ភគវតា កថំ ឯតទគ្គដ្ឋានេ ឋបិតា.
វិស្សជ្ជនា – ធម្មទិន្នា ភន្តេ ថេរី ‘‘ឯតទគ្គំ ភិក្ខវេ មម សាវិកានំ ភិក្ខុនីនំ ធម្មកថិកានំ យទិទំ ធម្មទិន្នា’’តិ ឯវំ ខោ ភន្តេ ភគវតា ឯតទគ្គដ្ឋានេ ឋបិតា.
‘‘យស្ស បុរេ ច បច្ឆា ច,
មជ្ឈេច នត្ថិ កិញ្ចនំ;
អកិញ្ចនំ អនាទានំ,
តមហំ ព្រូមិ ព្រាហ្មណំ’’ –
‘‘ឯតទគ្គំ ភិក្ខវេ មម សាវិកានំ ភិក្ខុនីនំ ធម្មកថិកានំ យទិទំ ធម្មទិន្នា’’ –