២. នីវរណប្បហានវគ្គ

បុច្ឆា – ទុតិយោ បន អាវុសោ នីវរណប្បហានវគ្គោ ភគវតា កត្ថ កថញ្ច ភាសិតោ.

វិស្សជ្ជនា – សាវត្ថិយំ ភន្តេ ‘‘នាហំ ភិក្ខវេ អញ្ញំ ឯកធម្មម្បិ សមនុបស្សាមិ, យេន អនុប្បន្នោ វា កាមច្ឆន្ទោ ឧប្បជ្ជតិ, ឧប្បន្នោ វា កាមច្ឆន្ទោ ភិយ្យោភាវាយ វេបុល្លាយ សំវត្តតិ, យថយិទំ ភិក្ខវេ សុភនិមិត្តំ, សុភនិមិត្តំ ភិក្ខវេ អយោនិសោ មនសិករោតោ អនុប្បន្នោចេវ កាមច្ឆន្ទោ ឧប្បជ្ជតិ, ឧប្បន្នោ ច កាមច្ឆន្ទោ ភិយ្យោភាវាយ វេបុល្លាយ សំវត្តតី’’តិ ឯវមាទិនា ភគវតា ភាសិតោ.

បុច្ឆា – ឥមស្មិំ បន អាវុសោ ទុតិយេ នីវរណប្បហានវគ្គេ ភគវតា កិំ កថិតំ.

វិស្សជ្ជនា – ឥមស្មិំ បន ភន្តេ ទុតិយេ នីវរណប្បហានវគ្គេ ភគវតា វដ្ដម្បិ វិវដ្ដម្បិ កថិតំ.