១. រូបាទិវគ្គ

បុច្ឆា – ឯកកនិបាតេបិ អាវុសោ រូបាទិវគ្គោ នីវរណប្បហានវគ្គោ អកម្មនិយវគ្គោតិអាទិនា វគ្គភេទវសេន ពហុវិធា. តត្ថ កតរំ វគ្គំ បឋមំ សំគាយិំសុ.

វិស្សជ្ជនា – ឯកកនិបាតេ ភន្តេ រូបាទិវគ្គោ នីវរណប្បហានវគ្គោតិអាទិនា វីសតិយា វគ្គេសុ រូបាទិវគ្គំ បឋមំ សំគាយិំសុ.

បុច្ឆា – សាធុ សាធុ អាវុសោ, មយម្បិ ទានិ អាវុសោ តតោយេវ បដ្ឋាយ សំគាហនត្ថាយ សំគីតិបុព្ពង្គមានិ ធម្មបុច្ឆនវិស្សជ្ជនកិច្ចានិ អាវហិតុំ សមារភាម. តេនាវុសោ ភគវតា ជានតា បស្សតា អរហតា សម្មាសម្ពុទ្ធេន អង្គុត្តរនិកាយេ ឯកកនិបាតេ រូបាទិវគ្គេ បុរិមានិ បញ្ច សុត្តានិ កត្ថ កំ អារព្ភ កថញ្ច ភាសិតានិ.

វិស្សជ្ជនា – សាវត្ថិយំ ភន្តេ សម្ពហុលេ ភិក្ខូ អារព្ភ រូបាទិគរុកានំ បញ្ចន្នំ បុរិសានំ អជ្ឈាសយវសេន ‘‘នាហំ ភិក្ខវេ អញ្ញំ ឯករូបម្បិ សមនុបស្សាមិ, យំ ឯវំ បុរិសស្ស ចិត្តំ បរិយាទាយ តិដ្ឋតិ, យថយិទំ ភិក្ខវេ ឥត្ថិរូបំ, ឥត្ថិរូបំ ភិក្ខវេ បុរិសស្ស ចិត្តំ បរិយាទាយ តិដ្ឋតី’’តិ ឯវមាទិនា ភគវតា ភាសិតានិ.

នាហំ ភិក្ខវេ អញ្ញំ ឯករូបម្បិ សមនុបស្សាមិ, យំ ឯវំ បុរិសស្ស ចិត្តំ បរិយាទាយ តិដ្ឋតិ, យថយិទំ ភិក្ខវេ ឥត្ថិរូបំ, ឥត្ថិរូបំ ភិក្ខវេ បុរិសស្ស ចិត្តំ បរិយាទាយ តិដ្ឋតិ.

បុច្ឆា – តត្ថេវ អាវុសោ បច្ឆិមានិ បញ្ច សុត្តានិ ភគវតា កត្ថ កំ អារព្ភ កថញ្ច ភាសិតានិ.

វិស្សជ្ជនា – តស្មិំយេវ ភន្តេ សាវត្ថិយំ សម្ពហុលេ ភិក្ខូ អារព្ភ រូបាទិគរុកានំ បញ្ចន្នំ ឥត្ថីនំ អជ្ឈាសយវសេន ‘‘នាហំ ភិក្ខវេ អញ្ញំ ឯករូបម្បិ សមនុបស្សាមិ, យំ ឯវំ ឥត្ថិយា ចិត្តំ បរិយាទាយ តិដ្ឋតិ, យថយិទំ ភិក្ខវេ បុរិសរូបំ, បុរិសរូបំ ភិក្ខវេ ឥត្ថិយា ចិត្តំ បរិយាទាយ តិដ្ឋតី’’តិ ឯវមាទិនា ភគវតា ភាសិតានិ.

នាហំ ភិក្ខវេ អញ្ញំ ឯករូបម្បិ សមនុបស្សាមិ, យំ ឯវំ ឥត្ថិយា ចិត្តំ បរិយាទាយ តិដ្ឋតិ, យថយិទំ ភិក្ខវេ បុរិសរូបំ, បុរិសរូបំ ភិក្ខវេ ឥត្ថិយា ចិត្តំ បរិយាទាយ តិដ្ឋតិ.

នីតត្ថវសេន, នេយ្យត្ថវសេន

បុច្ឆា – ឥមស្មិំ អាវុសោ រូបាទិវគ្គេ ភគវតា នីតត្ថវសេន កិំ កថិតំ, នេយ្យត្ថវសេន បន កិំ ញាបិតំ.

វិស្សជ្ជនា – ឥមស្មិំ ភន្តេ រូបាទិវគ្គេ ភគវតា នីតត្ថវសេន វដ្ដំ កថិតំ. នេយ្យត្ថវសេន បន វិវដ្ដម្បិ ញាបិតំ.