បយោគសិទ្ធិ និគមនំ

១. យេ នន្តតន្តរតនាករមន្ថនេន,

មន្ថាចលោល្លសិតញាណវរេន លទ្ធា;

សារាមតា+តិសុខិតា សុខយន្តិ ច+ញ្ញេ,

តេ មេ ជយន្តិ គុរវោ គុរវោ គុណេហិ.

២. យស្ស សាធុគុណុព្ភូត-កិត្តិ សព្ពត្ត បត្ថដា;

មោគ្គល្លានោ មហាបញ្ញោ, ជយតី សោ ហ សព្ពទា.

៣. បរមប្បិច្ឆតា+នេក-សន្តោសូបសមេសិនំ;

សុចិសលេខវុត្តីនំ, សទា+រញ្ញនិវាសិនំ.

៤. សាសនុជោតការីន+មាចេរត្ត+មុបាគតំ;

ឧទុម្ពរគិរីខ្យាតា+យតនំ យតិបុង្គវំ.

៥. មេធង្ករោតិ អាខ្យាត-នាមធេយ្យំ តបោធនំ;

ថេរំ ថិរទយា មេធា-និធានំ សាធុ បូជិតំ.

៦. សិស្សំ សហាយ+មាគម្ម, កល្យាណមិត្ត+មត្តនោ;

សោធេតុំ សាសនំ សត្ថុ, បរក្កម+មកាសិ យោ.

៧. សង្ឃរក្ខិតនាមេន, មហាថេរេន ធីមតា;

និវាសភូតេនា+នេក-គុណាន+ប្បិច្ឆតាទិនំ.

៨. មោគ្គល្លានព្យាករណ-បយោគក្កមសាធកា;

ឯត្តាវតា កតា ឯសា, បយោគសិទ្ធិ និដ្ឋិតា.

៩. តេនេវ រចិតា សាធុ, សាសនោទយការិនា;

ខុទ្ទសិក្ខាយ ដីកា ច, តថា សម្ពន្ធចិន្តនា.

១០. សុសទ្ទសិទ្ធិំ យោ យោគ-និច្ឆយំ សព្ភិ វណ្ណិតំ;

អកា សុពោធាលង្ការំ, តថា សម្ពន្ធចិន្តនំ.

១១. សត្ថសញ្ចិតបុញ្ញេន, និព្ពានសាធកំ ហិតំ;

សាធេន្តោ លោកនាថស្ស, សទ្ធម្មោ តិដ្ឋតំ ចិរន្តិ.

ឥតិ សង្ឃរក្ខិតមហាសាមិថេរបាទវិរចិតា

បយោគសិទ្ធិ និដ្ឋិតា.

(វិសេសលក្ខណំ). យថាវុត្តានំ បន បយោគសិទ្ធិនិគមន គាថានំ ឯកាទសន្នំ បុព្ពេយេវ វក្ខមានា ឥមា គាថាយោ ទិស្សន្តិ បោរាណេ សីហឡមូលបយោគសិទ្ធិបាឋេ. តា ច គាថាយោ បច្ឆា សីហឡមូលបយោគសិទ្ធិសំសោធកេន មេធង្ករោតិ គរូហិ គហិតនាមធេយ្យេន ថេរេន បក្ខិត្តាតិ វេទិតព្ពា, តស្មា មយំ តា គាថាយោ សព្ពបច្ឆាយេវ ឥមស្មិំ-ឋានេ ឋបេម. តា បន គាថាយោ កតមាតិ ចេ –

១. ចាគវិក្កមសទ្ធានុ-សម្បន្នគុណសាមិនោ;

បរក្កមនរិន្ទស្ស, សីហឡិន្ទស្ស ធីមតោ.

២. អត្រជេនា+នុជាតេន, ភូបាលកុលកេតុនា;

ទិសន្តបត្ថដោទារ-វិក្កមេន យសស្សិនា.

៣. ភុវនេកភុជវ្ហេន, មហារាជេន ធីមតា;

ចតុបច្ចយទានេន, សតតំ សមុបដ្ឋិតោ.

៤. ‘‘ជម្ពុទោណី’’តិ វិខ្យាតា –

វាសេ និវសតោ សតោ;

សុមង្គលមហត្ថេរ –

សាមិនោ សុចិវុត្តិនោ.

៥. វំសេ វិសុទ្ធេ សំជាតោ,

បន្ថសេនាសនេ រតោ;

បរិយត្តិមហាសិន្ធុ –

និយ្យាមកធុរន្ធរោ.

៥. អប្បិច្ឆាទិគុណូបេតោ, ជិនសាសនមាមកោ;

វនេរតមហត្ថេរោ, មេធង្ករសមវ្ហយោ.

៦. បាដវត្ថាយ ភិក្ខូនំ, វិនយេ សុវិសារទោ;

បយោគសិទ្ធិំ សោធយិ, សទា សប្បញ្ញគោចរំ.

៧. ឥមំ លិខិតបុញ្ញេន, មេត្តេក្យំ ឧបសំកមិ;

បតិដ្ឋហិត្វា សរណេ, សុប្បតិដ្ឋាមិ សាសនេតិ.

បយោគសិទ្ធិសិទ្ធំ.