១៦៥. តុំ+យានា

ត្វាស្ស វា តុំ+យានា ហោន្តិ សមាសេ ក្វចិ. អភិហរណំ កត្វា អភិហដ្ឋុំ, អភិហរិត្វា, បាទិសមាសោ, ‘‘បុច្ឆាទិតោ’’តិ តស្ស ឋោ បររូបាទិ ច. អនុមោទនំ កត្វា អនុមោទិយាន អនុមោទិត្វា វា, កានុពន្ធេបិ ‘‘វា ក្វចី’’តិ វិកប្បត្តា ‘‘លហុស្សុបន្តស្សា’’តិ ឱការោ. ក្វចា+សមាសេបិ ពហុលាធិការា, ទដ្ឋុំ, ទិសតោ ត្វាស្ស តុមាទេសេ ទិសស្ស ទស. អញ្ញត្រ ‘‘ទិសា វាន+វា ស ចា’’តិ ត្វាស្ស វាន+វា ស ហោន្តិ, ទិស្វា. ឯវំ លភនំ កត្វា លទ្ធា ធនំតិអាទីសុ តស្ស ធោ ភវតិ.

ឥតិ បយោគសិទ្ធិយំ ខាទិកណ្ឌោ សត្តមោ.