៦៧. ហនា ឆ+ខា

ហនា ស្សាស្ស ឆ+ខា វា ហោន្តិ. បដិហំខាមិ បដិហនិស្សាមិ. ហំឆេម ហនិស្សាម. អហនិ, អហនិំសូតិអាទិ សព្ពត្ថ យោជេតព្ពំ. ហុវាទយោ

ហុ=ហវនេ. ត្យាទីសុ លោ. ‘‘បរោក្ខាយញ្ចា’’តិ ចគ្គហណេន ហុ ហុតិ ទ្វិត្តំ, ‘‘កវគ្គហានំ ចវគ្គជា’’តិ ហស្ស ជោ, លលោបោ វុទ្ធិ ច, ជុហោតិ អគ្គិំ, អញ្ញត្រ ‘‘យវា សរេ’’តិ វការោ, ជុហ្វតិ. ជុហោន្តិ. ជុហ្វន្តិ. ជុហោសិ ជុហ្វសិ, ជុហោថ ជុហ្វថ. ឥច្ចាទិ. កម្មេ – ‘‘ទីឃោ សរស្សា’’តិ ទីឃេ ហូយតិ តេន អគ្គិ ឥច្ចាទិ. ជុហិស្សតិ, ជុហិស្សន្តិ. អជុហវិ អជុហោសិ, អជុហវុំ អជុហវិំសុ អជុហវំសុ អជុហោសុំ. អជុហិស្ស, អជុហិស្សំស្សុ. ជុហេ ជុហេយ្យ. ជុហោតុ, ជុហោន្តុ ឥច្ចាទិ.

ហា=ចាគេ, បុរេ វិយ ទ្វេភាវឆាទេសលោបេ ‘‘រស្សោ បុព្ពស្សា’’តិ បុព្ពស្ស អាស្ស រស្សោ. ជហាតិ ឥច្ចាទិ. កម្មេ – ‘‘អញ្ញាទិស្សា+ស្សី ក្យេ’’តិ ក្យេ អាស្ស ឦ, ហីយតិ ឥច្ចាទិ. ជហិស្សតិ. អជហាសិ, ‘‘ទីឃា ឦស្ស’’ ឥតិ សិ, បជហិ, អជហិំសុ អជហំសុ, បជហិំសុ បជហុំ. កម្មេ-បហីយិ បហីយិត្ថ. ស្សាទិ+ឯយ្យាទិ+ត្វាទីសុបិ ញេយ្យា.

ទា=ទានេ, ទ្វិភាវរស្សត្តានិ, លលោបោ, ទទាតិ, ទទន្តិ ឥច្ចាទិ. ‘‘គមវទា’’ ទិនា ទជ្ជាទេសេ ទជ្ជតិ, ទជ្ជន្តិ ឥច្ចាទិ. លស្សេ+ការេ ទានំ ទេតិ ឥច្ចាទិ.