២២. ទាស្ស ទំ វា មិមេស្វ+ទ្វិត្តេ

អទ្វិត្តេ វត្តមានស្ស ទាស្ស ទំ ហោតិ វា មិមេសុ. វគ្គន្តំ, ទម្មិ ទេមិ, ទម្ម ទេម. ឦការេ ទីយតិ ឥច្ចាទិ. អនាគតត្ថេ ឥញាគមេ សរណោបាទិ, ទទិស្សតិ, ទទិស្សន្តិ. ទជ្ជិស្សតិ, ទជ្ជិស្សន្តិ. លវិករណេ ទស្សតិ, ទស្សន្តិ. អជ្ជតនេ-អទទិ, អទទិំសុ, អទជ្ជិ, អទជ្ជិំសុ, អទាសិ, អទំសុ. អនជ្ជតនេ-អទទា, អទទុ. កាលាតិបត្តិយំ-អទទិស្ស អទជ្ជិស្ស, លេ អទស្ស, ទស្សំសុ. ឯយ្យាទិម្ហិ-ទទេ ទទេយ្យ ទជ្ជេ ទជ្ជេយ្យ. ‘‘ដា’’តិ ពហុលាធិការា ទជ្ជាទេសា បរស្ស ឯយ្យស្ស ដា, ទជ្ជា, ទជ្ជុំ ទជ្ជេយ្យំ ទទេយ្យុំ. ត្វាទីសុ-ទទាតុ, ទទន្តុ, ទជ្ជតុ, ទជ្ជន្តុ, លស្សេ+ការេ ទេតុ, ទេន្តុ ឥច្ចាទិ. សព្ពត្ថ កម្មេបិ យោជនីយំ.

ធា=ធារណេ, ត្យាទិម្ហិ ចគ្គហណេន ទ្វិត្តេ បុព្ពាការស្ស រស្សត្តេ លលោបេ ‘‘ចតុត្ថទុតិយានំ តតិយបឋមា’’តិ បុព្ពធការស្ស ទការេ ច កតេ ទធាតិ, ទធន្តិ. បិបុព្ពោ, ‘‘តទមិនា’’ ទិនា អាស្ស លោបោ, ‘‘ធាស្ស ហោ’’តិ ទ្វិត្តេ បរស្ស ធាស្ស ហការោ, ទ្វារំ បិទហតិ, បិទហន្តិ. លស្សេ+ការេ និធេតិ, និធេន្តិ. កម្មេ-វិធីយតិ, វិធីយន្តិ ឥច្ចាទិ. ធស្សតិ, បិទហិស្សតិ, បរិទហេស្សតិ. អធាសិ, បិទហិ. អធស្ស, បិទហិស្ស. ទធេ ទធេយ្យ, បិទហេ បិទហេយ្យ. ទទាតុ, បិទហតុ, និធេតុ, និធេន្តុ ឥច្ចាទិ. (ជុហោត្យាទយោ).

ភូវាទិ ច ជុហាទិ ច, ហុវាទិធាតវោ ចិ+មេ;

សវុទ្ធិកភូវាទីហិ, តិធា ភេទំ ឧបេន្តិ តេ.

(ភូវាទិនយោ.)

អធុនា វិករណបភេទបកាសនត្ថំ រុធាទីនំ អដ្ឋគណានំ កានិចិ រូបានិ ឧទាហរិយន្តេ –

រុធ=អាវរណេ, ត្យាទយោ ហោន្តិ. ឯវ+មុបរិបិ សព្ពគណេសុ.