៤៩. ក្យស្ស ស្សេ

ក្យស្ស វា លោបោ ហោតិ ស្សេ. សុខំ តយា អនុភវិស្សតិ, អនុភវិស្សន្តិ. អនុភវិស្សសិ, អនុភវិស្សថ. អនុភវិស្សាមិ, អនុភវិស្សាម. អញ្ញត្រ អនុភូយិស្សតិ, អនុភូយិស្សន្តិ ឥច្ចាទិ. ឯវំ បរច្ឆក្កេ. ភាវេ-ភូយិស្សតិ ភូយិស្សតេ.

កត្តរិ-បចិស្សតិ, បចិស្សន្តិ ឥច្ចាទិ. កម្មេ-បចិស្សតិ ឱទនោ ទេវទត្តេន, បចីយិស្សតិ, បច្ចិស្សតិ. បច្ចិស្សន្តិ ឱទនា បចីយិស្សន្តិ, បចីយិស្សរេ, បច្ចិស្សរេ, បច្ចិស្សន្តិ.

គមិតោ កត្តរិ-សោ គច្ឆិស្សតិ, តេ គច្ឆិស្សន្តិ. ត្វំ គច្ឆិស្សសិ, តុម្ហេ គច្ឆិស្សថ. អហំ គច្ឆិស្សាមិ, មយំ គច្ឆិស្សាម. គច្ឆិស្សតេ, គច្ឆិស្សន្តេ. គច្ឆិស្សសេ, គច្ឆិស្សវ្ហេ. គច្ឆិស្សំ, គច្ឆិស្សាម្ហេ. សគ្គំ គមិស្សតិ, គមិស្សន្តិ. គមិស្សសិ, គមិស្សថ. គមិស្សាមិ, គមិស្សាម ឥច្ចាទិ. កម្មេ-គច្ឆិយិស្សតិ, គច្ឆិយិស្សន្តិ ឥច្ចាទិ. ក្យលោបេ គមិស្សតិ, គមិស្សន្តិ ឥច្ចាទិ. តថា ឃម្មិស្សតិ ឃម្មីយិស្សតិ, ឃម្មិស្សន្តិ, ឃម្មីយិស្សន្តិ ឥច្ចាទិ.