២៨. តំ ហន្ត+រហតិ គច្ឆតុ+ញ្ឆតិ+ចរតិ

ទុតិយន្តា ហន្តីតិ ឯវមាទីស្វ+ត្ថេសុ ណិកោ ហោតិ. បក្ខិនោ ហន្តីតិ បក្ខិកោ, សាកុណិកោ, មាយូរិកោ, មច្ឆេ ហន្តីតិ មច្ឆិកោ, មេនិកោ. មិគេ ហន្តីតិ មាគវិកោ, វការាគមោ. មិគស្ស ‘‘តទមិនា’’ទិនា មគវាទេសេបិ មាគវិកោ. ឱរព្ភិកោ, ហារិណិកោ. សូករិកោតិ ឥកោ. សត+មរហតីតិ សាតិកំ, សន្ទិដ្ឋិកំ, ឯហិ បស្ស វិធិំ អរហតីតិ ឯហិបស្សិកោ. ឯត្ថ ត្យាទ្យន្តសមុទាយតោ អនុករណត្តា វា តទ្ធិតស្ស អភិធានលក្ខណត្តា វា ពហុលំវិធានេន វា បច្ចយោ. សាហស្សិកោ, កុម្ភិកោ, ទោណិកោ, អទ្ធមាសិកោ, កហាបណិកោ, អាសីតិកា គាថា, នាវុតិកា. សហស្សិយោតិ ឥយោ. បរទារំ គច្ឆតីតិ បារទារិកោ, មគ្គិកោ, បញ្ញាសយោជនិកោ, បថិកោ. ពទរេ ឧញ្ឆតីតិ ពាទរិកោ, សាមាកិកោ. ធម្មំ ចរតីតិ ធម្មិកោ, អធម្មិកោ.