២៩. តេន កតំ កីតំ ពទ្ធ+មភិសង្ខតំ សំសដ្ឋំ ហតំ ហន្តិ ជិតំ ជយតិ ទិព្ពតិ ខនតិ តរតិ ចរតិ វហតិ ជីវតិតិ

កតាទីស្វ+ត្ថេសុ ណិកោ. កាយេន កតំ កាយិកំ, វាចសិកំ, មានសិកំតិ សកាគមោ. វាតេន កតោ អាពាធោ វាតិតោ, សេម្ហិកោ, បិត្តិកោ. សតេន កីតំ សាតិកំ, សាហស្សិកំ, វត្ថេន កីតំ វត្ថិកំ, កុម្ភិកំ, សោវណ្ណិកំ, ឃាតិកំ. មូលតោវ បច្ចយោ, អមូលវាចិត្តា ទេវទត្តេន កីតោតិ ន ហោតិ, តទត្ថាប្បតីតិយា. វរត្ថាយ ពទ្ធោ វារត្តិកោ, អាយសិកោ, បាសិកោ, សុត្តិកោ. ឃតេន អភិសង្ខតំ សំសដ្ឋំ វា ឃាតិកំ, គោឡិកំ, ទធិកំ, មារីចិកំ. ជាលេន ហតោ ហន្តីតិ វា ជាលិកោ, ពាលិសិកោ. អក្ខេហិ ជិតំ អក្ខិកំ ធនំ, សាលាកិកំ, តិន្ទុកិកោ, អម្ពផលិកោ. អក្ខេហិ ជយតិ ទិព្ពតិ វា អក្ខិកោ. ខណិត្តិយា ខនតីតិ ខាណិត្តិកោ, កុទ្ទាលិកោ. ទេវទត្តេន ជិតំ, អង្គុល្យា ខនតីតិ ន ហោតិ, តទត្ថានវគមា. ឧឡុម្បេន តរតីតិ ឱឡុម្បិកោ, ឧឡុម្បិកោតិ ឥកោ. កុល្លិកោ, គោបុច្ឆិកោ, នាវិកោ. សកដេន ចរតីតិ សាកដិកោ, រថិកោ. បរប្បិកោតិ ឥកោ. ខន្ធេន វហតីតិ ខន្ធិកោ. អំសិកោ, សីសិកោតិ ឥកោ. វេតនេន ជីវតីតិ វេតនិកោ, ភតិកោ, កយិកោ, វិក្កយិកោ, កយវិក្កយិកោតិ ឥកោ.