៦៩. សព្ពាទយោ វុត្តិមត្តេតិ

ឥត្ថិវាចកា សព្ពាទយោ វុត្តិមត្តេ បុមេវ ហោន្តិ. ឯវំ បុព្ពុត្តរា, អបរទក្ខិណា, បច្ឆិមុត្តរា. បុព្ពា ច សា ទក្ខិណា ចេតិ វា.

៩. ព្យតិហារលក្ខណោ យថា – ‘‘តត្ថ គហេត្វា តេន បហរិត្វា យុទ្ធេ សរូបំ’’តិ សុត្តេន សមាសេ កតេ កេសេសុ ច កេសេសុ ច គហេត្វា យុទ្ធំ បវត្តំ កេសាកេសី, ទណ្ឌេហិ ច ទណ្ឌេហិ ច បហរិត្វា យុទ្ធំ បវត្តំ ទណ្ឌាទណ្ឌីតិ ហោតិ. ឯត្ថ ច ‘‘ចី វីតិហារេ’’តិ ចីបច្ចយេ ‘‘ចិស្មិំ’’តិ អាការោ, ឯវំ មុដ្ឋាមុដ្ឋី.

សោភណោ គន្ធោ សុគន្ធោ, សោ អស្ស អត្ថីតិ សុគន្ធីហិ អត្ថិអត្ថេ ឦបច្ចយេន សិទ្ធំ. យស្មា ច ភទ្ទាយ កាបិលានិយា អបទានេ ‘‘បុនោ បត្តំ គហេត្វាន, សោធយិត្វា សុគន្ធិនា’’តិ វុត្តំ, តស្មា វុត្តិយំ ឥការន្តស្ស អភាវទីបនត្ថំ ‘‘សុគន្ធិ ទុគ្គន្ធីតិ បយោគា ន ទិស្សតី’’តិ វុត្តំ. សុគន្ធិនាតិ ឯកវចនេ រស្សោ.