៩១. យ្វាទោ ន្តុស្ស

យោអាទីសុ ន្តុស្ស អ ហោតិ. គុណវន្តឥតិ អការន្តា ដា+ដេអាទេសា ហោន្តិ, គុណវន្តា. ‘‘ដដាអំ គេ’’តិ ដាទយោ, ភោ គុណវ គុណវា គុណវំ, គុណវន្តោ គុណវន្តា. ‘‘ន្តស្ស ច ដ វំ+សេ’’តិ អំសេសុ ន្តស្ស ដោ វា, គុណវំ គុណវន្តំ, គុណវន្តេ. ‘‘តោ+តា+តិ+តា ស+ស្មា+ស្មិំ+នាសូ’’តិ តាអាទយោ ហោន្តិ, គុណវតា គុណវន្តេន, គុណវន្តេហិ គុណវន្តេភិ. ‘‘លក្ខណិកបដិបទោត្តេសុ បដិបទោត្តស្សេវ គហណំ, ន លក្ខណិកស្សា’’តិ ញាយា ‘‘ន លក្ខណិកស្សា’’តិ វុត្តព្យត្តិបក្ខ+មនបេក្ខិត្វា ‘‘អតោ’’តិ រស្សាការជាតិយា បេក្ខិតត្តា គុណវន្តេនាតិ ‘‘អតេនា’’ ត្យ+នេន សិជ្ឈតិ. ជាតិ=សាមញ្ញំ, ព្យត្តិ=វិសេសោ. គុណវតោ គុណវស្ស គុណវន្តស្ស, ‘‘តំ នំម្ហិ’’តិ នំម្ហី តំ វា, គុណវតំ គុណវន្តានំ. គុណវតា គុណវន្តា គុណវន្តម្ហា គុណវន្តស្មា. គុណវតិ គុណវន្តេ គុណវន្តម្ហិ គុណវន្តស្មិំ, គុណវន្តេសុ. ‘‘ន្តស្ស ច ដ វា’’តិ យោគវិភាគា យោសុ ច ន្តុស្ស វា ដាទេសេ កតេ យោស្ស ដា, ‘‘ចក្ខុមា អន្ធិតា ហោន្តិ’’, ‘‘វគ្គុមុទាតីរិយា ភិក្ខុ វណ្ណវា’’ ឥច្ចាទី ហោន្តិ.

ឯវំ គណវា កុលវា ផលវា យសវា ធនវា សុតវា ភគវា ហិមវា ពលវា សីលវា បញ្ញវា ឥច្ចាទី.