និគម បរមត្ថទីបនី

១៧២. ចារិត្តេន កុលាចារេន សោភិតេ ញាតិ មិត្ត ធន ភោគសម្បត្តិយា វិសាលេ កុលេ ឧទយោ វឌ្ឍិ យស្ស សោតិ ចារិត្តសោភិតវិសាលកុលោទយោ. តេន. សទ្ធាយ អភិវុឌ្ឍានំ បរិសុទ្ធានញ្ច អត្តនោ សីលសុតចាគាទិគុណានំ ឧទយោ វឌ្ឍិ ឯតស្មិន្តិ សទ្ធាតិវុឌ្ឍបរិសុទ្ធគុណោទយោ. តេន. នម្បវ្ហយេនាតិ នម្បនាមកេន ឧបាសកេន. បណិធាយាតិ ភុសំ និធាយ ហទយេ ថបេត្វា ឧបាទាយ បដិច្ច. បរានុកម្បន្តិ បរេសំ អត្តនោ មន្ទពុទ្ធីនំ បច្ឆិមជនានំ អនុកម្បំ អនុទយំ ការុញ្ញំ បណិធាយាតិ សម្ពន្ធោ. បត្ថិតន្តិ អភិយាចិតំ. បុញ្ញេន តេន វិបុលេនាតិ តេន វិបុលេន អភិធម្មត្ថ សង្គហបករណស្ស ករណបុញ្ញេន. តុមូលសោមន្តិ ឯវំ នាមកំ វិហារំ. វុត្តញ្ហិ ខុទ្ទសិក្ខាដីកាយំសីហឡទីបេ តុមូលសោមវិហារេ សង្ឃស្ស បាកវត្តំបិ តាល បណ្ណំ វិក្កិណិត្វា ករីយតិ. ន ហិ តត្ថ បណ្ណេន អត្ថោ អត្ថិ. សព្ពេបិ ឥដ្ឋកច្ឆន្នា បាសាទាទយោតិ. ឯសោ កិរ វិហារោ អាទិតោ អភយគិរិរញ្ញោ អគ្គមហេសិភូតាយ សោមទេវិយា ការាបិតត្តា យាវជ្ជតនាបិ សោមវិហារោត្វេវ បញ្ញាយិត្ថ. តុមូលសទ្ទោ បន វិបុលសទ្ទបរិយាយោ.

អថេត្ថ វត្តតិ សទ្ទោ, តុមូលោ ភេរវោ មហា;

ហត្ថិនាគេ បទិន្នម្ហិ, សិវីនំ រដ្ឋវឌ្ឍនេតិ.

អាទីសុ

វិយ. សោច វិហារោ សដ្ឋិមត្តេហិ មហាបរិវេណេហិ សណ្ឋិតោ ហោតីតិ អតិវិយ វិបុលោ មហន្តោ វិត្ថិណ្ណោ ហោតិ. តស្មា សោ វិបុលត្តា មហន្តត្តា វិត្ថិណ្ណត្តា តុមូល សោមោតិ វុច្ចតិ. តំ តុមូលសោមំ. អត្ថតោ មហាសោម វិហារន្តិ វុត្តំ ហោតិ. ឯតេន ថេរោ អត្តនោ អាចរិយវំសស្ស វសន វិហារំ កិត្តេតិ. អត្តនោ វសនដ្ឋានំ បន នាមរូបបរិច្ឆេទេ កិត្តិតំ. ធញ្ញាធិវាសន្តិ តស្មិំ វិហារេ អាទិកម្មិកភូត មហិន្ទត្ថេរាទីនំ បុញ្ញវន្តត្ថេរានំ អជ្ឈាវុដ្ឋភូតំ. ទីបបសាទក មហាមហិន្ទត្ថេរស្ស ហិ វំសេ ជាតត្តា តស្មិំ វិហារេ អាទិកម្មិកភូតោ មហាថេរោបិ មហិន្ទត្ថេរោនាមាតិ ធាតុវំសេ វុត្តោ. ឧទិតោទិតន្តិ អតិវិយ ឧទិតំ. នភមជ្ឈេ បុណ្ណចន្ទមណ្ឌលំ វិយ សកលសីហឡទីបេ អតិវិយ ឧគ្គតន្តិ អត្ថោ. អរិយមគ្គបញ្ញាវសេន បរិយត្តិវេសារជ្ជាទិ បញ្ញាវសេនវា អវទាតេហិ បរិយោទាតេហិ គុណេហិ សោតិតាតិ បញ្ញាវទាតគុណសោតិតា. តេ ឯវ លជ្ជីបាបគរហិនោ. មញ្ញន្តូតិ អនុស្សរន្តុ. បុញ្ញវិភាវោទយ មង្គលាយាតិ វិបុលានំ បុញ្ញានំ វឌ្ឍិសង្ខាត មង្គលត្ថាយ. តត្រាយំ យោជនា, បុញ្ញេន តេន វិបុលេន ធញ្ញាធិវាសំ ឧទិតោទិតំ តុមូលសោម វិហារញ្ច តត្ថ និបាសិនោ មហិន្ទត្ថេរាទិកេ បញ្ញាវទាត គុណសោភិតេ លជ្ជិភូតេ ភិក្ខូច បុញ្ញវិភវោទយមង្គលាយ អាយុកន្តំ មញ្ញន្តុ បច្ឆិមា ជនាតិ. អថវា, តំវិហារំ អញ្ញេ បញ្ញាវទាត គុណសោភិត លជ្ជី ភិក្ខូ មញ្ញន្តូតិ យោជនា. ឯតេន ថេរោ បច្ឆិមជនានំ ឆសុ អនុត្តរិយធម្មេសុ អនុស្សតានុត្តរិយសង្ខាតំ បុញ្ញវិសេសញ្ច មយំបិ តាទិសគុណភាគិនោ ភវិស្សាមាតិ ឧស្សាហនុបាយញ្ច បដិបាទេសីតិ.

បរមត្ថទីបនី និគមកថា

ឯត្តាវតាច –

នគរេ ទីបរង្គម្ហិ, គាមេ តិ នាមកេ;

អដ្ឋសុញ្ញទ្វយេកម្ហិ, សាកេ ជាតេន យា មយា.

មុំរ្វាគាមេ អរញ្ញម្ហិ, លង្ឃតីតិ វិស្សុតាលយេ;

វសតា មហតោ ភិក្ខុ, គណស្ស ហិតការិនា.

បរមត្ថទីបនីនាម, សង្ខតា សារទស្សិនា;

សារេសីនំ ហិតត្ថាយ, សារាសារវិវេកិនំ.

សុនិដ្ឋិតា អយំ ដីកា, និព្ភយា និរុបទ្ទវា;

នវបញ្ចទ្វយេកម្ហិ, សាកេ កោមុទសារទេ.

តថា កល្យាណសង្កប្បា, សាធូនំ អមតប្ផលា;

និដ្ឋំ គច្ឆន្តុ សព្ពេបិ, និព្ភយា និរុបទ្ទវា.

យថា លោកម្ហិ ជោតន្តិ, ឧភោ ចន្ទិមសូរិយា;

តថេវ បរមត្ថេសុ, អយំ បរមត្ថទីបនី.

បាឡិយត្តេសុ សា សុភា, សទ្ទនិរុត្តិទីបនី;

ឧភោ លោកម្ហិ ជោតន្តុ, សទ្ធម្មោ យាវ តិដ្ឋតីតិ.

តត្ថ នគរេ ទីបរង្គម្ហីតិ ទីបវាសិមហាជនំ រញ្ជេតីតិ ទីបរង្គន្តិ លទ្ធនាមេ នគរេ. គាមេ នាមកេតិ រោហិតមិគានំ និវាសភូមិតលេ បតិដ្ឋិតត្តា ឯវំនាមកេ មហាគាមេ. សាកេតិ កលិយុគេ. យា មយាតិ បរមត្ថទីបនីនាម យាដីកា មយា សង្ខតាតិ សម្ពន្ធោ. លង្ឃតីតិ វិស្សុតាលយេតិ ឯវំវិស្សុតេ អរញ្ញវិហារេ. សារេសីនន្តិ សារគវេសីនំ. សារាសារវិវេកិនន្តិ អយំ សារោ អយំ អសារោតិ ឯវំ សារញ្ច អសារញ្ចវិវេ ចេត្វា ជានិតុំ សមត្ថានំ. សាកេតិ កលិយុគេ. កោមុទសារ ទេតិ កុមុទបុប្ផយុត្តេ សរទឧតុ បរិយាបន្នេបច្ឆិ មកត្តិកមាសេ. អមតប្ផលាតិ និព្ពានបយោជនា. សុភាតិ អត្ថព្យញ្ជនសម្បត្តិយា សោភណា. សទ្ធម្មោតិ តិវិធំ សត្ថុសាសនំ វុច្ចតីតិ.

ឥតិ អភិធម្មត្ថសង្គហបករណស្ស ចតុត្ថសំវណ្ណនា

ភូតា បរមត្ថទីបនីនាមា យំដីកា

សព្ពាការេន និដ្ឋិតា.