២០៥. ន្ត

ននុ ន្តន្តូនន្តិ តទន្តា គយ្ហន្តិ បច្ចយគ្គហណបរិភាសាយ, តថា សតិ ការិយិត្តេន តទន្តាវ គយ្ហន្តិ កថំ ន្តន្តូយេវា ត្យាសង្កិយាហ- តេយេវេ’ច្ចាទិ, បច្ចក្ខតាយាតិ [សុតថាយ-បញ្ចិកា] សុតត្តា, ពលវត្តា តេយេវ ការិយិត្តេន គយ្ហន្តីតិ សម្ពន្ធោ, ន តទន្តា, ទុព្ពលាតិ ព្យតិរេកំ វត្វា ទុព្ពលត្តេ ការណមាហ- ‘អនុមិតត្តា’តិ, អនុមិតត្តំ សាធេតុមាហ- ‘អនុមិតាហិ’ច្ចាទិ, ភវិភត្តីនន្តិ បាឋោ យុត្ត តរោ, តស្ស អន្តាទេសេ អការេតិ សម្ពន្ធោ.