បញ្ចមកណ្ឌ

៤២. , ៣២. គោសរេ បុថស្សាគមោ ក្វចិ.

បុថឥច្ចេតស្ស អន្តេ សរេ បរេ ក្វចិ គការាគមោ ហោតិ.

បុថគេ វ.

៤៣. , ៣៣. បាស្ស ចន្តោ រស្សោ.

បាឥច្ចេតស្ស អន្តេ សរេ បរេ ក្វចិ គការាគមោ ហោតិ, អន្តោ ច សរោ រស្សោ ហោតិ.

បគេវ វុត្យស្ស.

ក្វចីតិ កស្មា? បា ឯវ វុត្យស្ស.

៤៤. , ២៤. អព្ភោ អភិ.

អភិឥច្ចេតស្ស សរេ បរេ អព្ភាទេសោ ហោតិ. អព្ភុទីរិតំ, អព្ភុគ្គច្ឆតិ.

៤៥. , ២៥. អជ្ឈោ អធិ.

អធិឥច្ចេតស្ស សរេ បរេ អជ្ឈាទេសោ ហោតិ.

អជ្ឈោកាសេ, អជ្ឈាគមា.

៤៦. , ២៦. តេ ន វា ឥវណ្ណេ.

តេ ច ខោ អភិអធិឥច្ចេតេ ឥវណ្ណេ បរេ អព្ភោ អជ្ឈោឥតិវុត្តរូបា នំ ហោន្តិ វា.

អភិច្ឆិតំ, អធីរិតំ.

វាតិ កស្មា? អព្ភីរិតំ, អជ្ឈិណមុត្តោ.

៤៧. , ២៣. អតិស្ស ចន្តស្ស.

អតិឥច្ចេតស្ស អន្តភូតស្ស តិសទ្ទស្ស ឥវណ្ណេ បរេ ‘‘សព្ពោ ចំ តី’’តិ វុត្តរូបំ ន ហោតិ.

អតីសិគណោ, អតីរិតំ.

ឥវណ្ណេតិ កស្មា? អច្ចន្តំ.

៤៨. , ៤៣. ក្វចិ បដិ បតិស្ស.

បតិឥច្ចេតស្ស សរេ វា ព្យញ្ជនេ វា បរេ ក្វចិ បដិអាទេសោ ហោតិ.

បដគ្គិ ទាតព្ពោ, បដិហញ្ញតិ.

ក្វចីតិ កស្មា? បច្ចន្តិមេសុ ជនបទេសុ, បតិលីយតិ, បតិរូបទេសវាសោ ច.

៤៩. , ៤៤. បុថស្សុ ព្យញ្ជនេ.

បុថឥច្ចេតស្ស អន្តោ សរោ ព្យញ្ជនេ បរេ ឧការោ ហោតិ.

បុថុជ្ជនោ, បុថុភូតំ.

អន្តគ្គហណេន អបុថស្សាបិ សរេ បរេ អន្តស្ស ឧការោ ហោតិ, មនុញ្ញំ.

៥០. , ៤៥. ឱ អវស្ស.

អវឥច្ចេតស្ស ព្យញ្ជនេ បរេ ក្វចិ ឱការោ ហោតិ.

អន្ធការេន ឱនទ្ធា.

ក្វចីតិ កស្មា? អវសុស្សតុ មេ សរីរេ មំសលោហិតំ.

៥១. , ៥៩. អនុបទិដ្ឋានំ វុត្តយោគតោ.

អនុបទិដ្ឋានំ ឧបសគ្គនិបាតានំ សរសន្ធីហិ ព្យញ្ជនសន្ធីហិ វុត្តសន្ធីហិ ច យថាយោគំ យោជេតព្ពំ.

បាបនំ, បរាយណំ, ឧបាយនំ, ឧបាហនំ, ន្យាយោគោ, និគុបធិ, អនុពោធោ, ទុវូបសន្តំ, សុវូបសន្តំ, ទ្វាលយោ, ស្វាលយោ, ទុរាខ្យាតំ, ស្វាខ្យាតោ, ឧទីរិតំ, សមុទ្ទិដ្ឋំ, វិយគ្គំ, វិជ្ឈគ្គំ, ព្យគ្គំ, អវយាគមនំ, អន្វេតិ, អនុបឃាតោ, អនច្ឆរិយំ, បរិយេសនា, បរាមាសោ, ឯវំ សរេ ច ហោន្តិ.

បរិគ្គហោ, បគ្គហោ, បក្កមោ, បរក្កមោ, និក្កមោ, និក្កសាវោ, និល្លយនំ, ទុល្លយនំ, ទុម្ភិក្ខំ, ទុព្ពុត្តំ, សន្ទិដ្ឋំ, ទុគ្គហោ, វិគ្គហោ, និគ្គតោ, អភិក្កមោ, បដិក្កមោ, ឯវំ ព្យញ្ជនេ ច. សេសា សព្ពេ យោជេតព្ពា.

ឥតិ សន្ធិកប្បេ បញ្ចមោ កណ្ឌោ.

សន្ធិកប្បោ និដ្ឋិតោ.