២. នាមកប្ប

បឋមកណ្ឌ

៥២. , ៦០. ជិនវចនយុត្តំ ហិ.

‘‘ជិនវចនយុត្តំ ហិ’’ ឥច្ចេតំ អធិការត្ថំ វេទិតព្ពំ.

៥៣. , ៦១. លិង្គញ្ច និប្បជ្ជតេ.

យថា យថា ជិនវចនយុត្តំ ហិ លិង្គំ, តថា តថា ឥធ លិង្គញ្ច និប្បជ្ជតេ.

តំ យថា? ឯសោ នោ សត្ថា, ព្រហ្មា អត្តា, សខា, រាជា.

៥៤. , ៦២. តតោ ច វិភត្តិយោ.

តតោ ជិនវចនយុត្តេហិ លិង្គេហិ វិភត្តិយោ បរា ហោន្តិ.

៥៥. , ៦៣. សិ យោ, អំ យោ, នា ហិ, ស នំ, ស្មា ហិ, ស នំ, ស្មិំ សុ.

កា ច បន តាយោ វិភត្តិយោ? សិ, យោ ឥតិ បឋមា, អំ, យោឥតិ ទុតិយា, នា ហិ ឥតិ តតិយា, ស, នំឥតិ ចតុត្ថី, ស្មា, ហិ ឥតិ បញ្ចមី, ស, នំ ឥតិ ឆដ្ឋី, ស្មិំ, សុ ឥតិ សត្តមី.

វិភត្តិឥច្ចនេន ក្វត្ថោ? អម្ហស្ស មមំ សវិភត្តិស្ស សេ.

៥៦. , ៦៤. តទនុបរោធេន.

យថា យថា តេសំ ជិនវចនានំ អនុបរោធោ. តថា តថា ឥធ លិង្គញ្ច និប្បជ្ជតេ.

៥៧. , ៧១. អាលបនេ សិ គ សញ្ញោ.

អាលបនត្ថេ សិ គសញ្ញោ ហោតិ.

ភោតិ អយ្យេ, ភោតិ កញ្ញេ, ភោតិ ខរាទិយេ.

អាលបនេតិ កិមត្ថំ? សា អយ្យា.

សីតិ កិមត្ថំ? ភោតិយោ អយ្យាយោ.

គឥច្ចនេន ក្វត្ថោ? ឃតេ ច.

៥៨. , ២៩. ឥវណ្ណុវណ្ណា ឈលា.

ឥវណ្ណុវណ្ណាឥច្ចេតេ ឈលសញ្ញា ហោន្តិ យថាសង្ខ្យំ.

ឥសិនោ, អគ្គិនោ, គហបតិនោ, ទណ្ឌិនោ. សេតុនោ, កេតុនោ, ភិក្ខុនោ. សយម្ភុនោ, អភិភុនោ.

ឈលឥច្ចនេន ក្វត្ថោ? ឈលតោ សស្ស នោ វា.

៥៩. , ១៨២. តេ ឥត្ថិខ្យា បោ.

តេ ឥវណ្ណុវណ្ណា យទា ឥត្ថិខ្យា, តទា បសញ្ញា ហោន្តិ.

រត្តិយា, ឥត្ថិយា, ធេនុយា, វធុយា.

ឥត្ថិខ្យាតិ កិមត្ថំ? ឥសិនា, ភិក្ខុនា.

សឥច្ចនេន ក្វត្ថោ? បតោ យា.

៦០. , ១៧៧. អា ឃោ.

អាការោ យទា ឥត្ថិខ្យោ, តទា ឃសញ្ញោ ហោតិ.

សទ្ធាយ, កញ្ញាយ, វីណាយ, គង្គាយ, ទិសាយ សាលាយ, មាលាយ, តុលាយ, ទោលាយ, បភាយ, សោភាយ, បញ្ញាយ, ករុណាយ នាវាយ, កបាលិកាយ.

អាតិ កិមត្ថំ? រត្តិយា, ឥត្ថិយា.

ឥត្ថិខ្យោតិ កិមត្ថំ? សត្ថារា ទេសិតោ អយំ ធម្មោ.

ឃឥច្ចនេន ក្វត្ថោ? ឃតោ នាទីនំ.

៦១. , ៨៦. សាគមោ សេ.

សការាគមោ ហោតិ សេ វិភត្តិម្ហិ.

បុរិសស្ស, អគ្គិស្ស, ឥសិស្ស, ទណ្ឌិស្ស, ភិក្ខុស្ស, សយម្ភុស្ស, អភិភុស្ស.

សេតិ កិមត្តំ? បុរិសស្មិំ.

៦២. , ២០៦. សំសាស្វេកវចនេសុ ច.

សំសាសុ ឯកវចនេសុ វិភត្តាទេសេសុ សការាគមោ ហោតិ.

ឯតិស្សំ, ឯតិស្សា ឥមិស្សំ, ឥមិស្សា, តិស្សំ, តិស្សា,

តស្សំ តស្សា, យស្សំ, យស្សា, អមុស្សំ, អមុស្សា.

សំសាស្វីតិ កិមត្ថំ? អគ្គិនា, បាណិនា.

ឯកវចនេស្វីតិ កិមត្ថំ? តាសំ, សព្ពាសំ.

វិភត្តាទេសេស្វីតិ កិមត្ថំ? មនសា, វចសា, ថាមសា.

៦៣. , ២១៧. ឯតិមាសមិ.

ឯតាឥមាឥច្ចេតេសមន្តោ សរោ ឥការោ ហោតិ សំសាសុ ឯកវចនេសុ វិភត្តាទេសេសុ.

ឯតិស្សំ, ឯតិស្សា, ឥមិស្សំ, ឥមិស្សា.

សំសាស្វីតិ កិមត្ថំ? ឯតាយ, ឥមាយ.

ឯកវចនេស្វីតិ កិមត្ថំ? ឯតាសំ, ឥមាសំ.

៦៤. , ២១៦. តស្សា វា.

តស្សា ឥត្ថិយំ វត្តមានស្ស អន្តស្ស អាការស្ស ឥការោ ហោតិ វា សំសាសុ ឯកវចនេសុ វិភត្តាទេសេសុ.

តិស្សំ, តិស្សា, តស្សំ, តស្សា.

៦៥. , ២១៥. តតោ សស្ស ស្សាយ.

តតោ តា ឯតា ឥមាតោ សស្ស វិភត្តិស្ស ស្សាយាទេសោ ហោតិ វា.

តិស្សាយ, ឯតិស្សាយ, ឥមិស្សាយ.

វាតិ កិមត្ថំ? តិស្សា, ឯតិស្សា, ឥមិស្សា.

៦៦. , ២០៥. ឃោ រស្សំ.

ឃោ រស្សមាបជ្ជតេ សំសាសុ ឯកវចនេសុ វិភត្តាទេសេសុ.

តស្សំ, តស្សា, យស្សំ, យស្សា, សព្ពស្សំ, សព្ពស្សា.

សំសាស្វីតិ កិមត្ថំ? តាយ, សព្ពាយ.

ឯកវចនេស្វីតិ កិមត្ថំ? តាសំ, សព្ពាសំ.

៦៧. , ២២៩. នោ ច ទ្វាទិតោ នំម្ហិ.

ទ្វិឥច្ចេវមាទិតោ សង្ខ្យាតោ នការាគមោ ហោតិ នំម្ហិ វិភត្តិម្ហិ.

ទ្វិន្នំ, តិន្នំ, ចតុន្នំ, បញ្ចន្នំ, ឆន្នំ, សត្តន្នំ, អដ្ឋន្នំ, នវន្នំ, ទសន្នំ.

ទ្វាទិតោតិ កិមត្ថំ? សហស្សានំ.

នំម្ហីតិ កិមត្ថំ? ទ្វីសុ, តីសុ.

ចគ្គហណេនស្សញ្ចាគមោ ហោតិ. ចតស្សន្នំ ឥត្ថីនំ តិស្សន្នំ វេទនានំ.

៦៨. , ១៨៤. អមា បតោ ស្មិំស្មានំ វា.

បឥច្ចេតស្មា ស្មិំស្មាឥច្ចេតេសំ អំអាអាទេសា ហោន្តិ វា យថាសង្ខ្យំ.

មត្យំ, មតិយំ, មត្យា, មតិយា, និកត្យំ. និកតិយំ, និកត្យា, និកតិយា, វិកត្យំ, វិកតិយំ, វិកត្យា, វិកតិយា, វិរត្យំ, វិរតិយំ, វិរត្យា, វិរតិយា, រត្យំ, រតិយំ, រត្យា, រតិយា, បុថព្យំ, បុថវិយំ, បុថព្យា, បុថវិយា, បវត្យំ, បវត្យា, បវត្តិយំ, បវត្តិយា.

៦៩. , ១៨៦. អាទិតោ ឱ ច.

អាទិឥច្ចេតស្មា ស្មិំវចនស្ស អំឱអាទេសា ហោន្តិ វា.

អាទីំ, អាទោ.

វាតិ កិមត្ថំ? អាទិស្មិំ, អាទិម្ហិ នាថំ នមស្សិត្វាន,

ចគ្គហណេន អញ្ញស្មាបិ ស្មិំ វចនស្ស អា ឱ អំអាទេសា ហោន្តិ. ទិវា ច រត្តោ ច ហរន្តិ យេ ពលិ. ពារាណសិំ អហុ រាជា.

៧០. , ៣០. ឈលានមិយុវា សរេ វា.

ឈលឥច្ចេតេសំ ឥយ ឧវឥច្ចេតេ អាទេសា ហោន្តិ វា សរេ បរេ យថាសង្ខ្យំ.

តិយន្តំ បច្ឆិយាគារេ, អគ្គិយាគារេ, ភិក្ខុវាសនេ និសីទតិ, វុថុវាសនេ និសីទតិ.

សរេតិ កិមត្ថំ? តិមលំ, តិផលំ, តិចតុក្កំ, តិទណ្ឌំ, តិលោកំ, តិនយនំ, តិបាសំ, តិហំសំ, តិភវំ, តិខន្ធំ, តិបិដកំ, តិវេទនំ, ចតុទ្ទិសំ, បុថុភូតំ.

វាតិ កិមត្ថំ? បញ្ចហង្គេហិ តីហាការេហិ. ចក្ខាយតនំ.

វាតិ វិកប្បនត្ថំ, ឥការស្ស អយាទេសោ ហោតិ, វត្ថុត្តយំ.

៧១. , ៥០៥. យវការា ច.

ឈលានំ យការ វការាទេសា ហោន្តិ សរេ បរេ យថាសង្ខ្យំ.

អគ្យាគារំ, បក្ខាយតនំ, ស្វាគតំ, តេ មហាវីរ.

ចគ្គហណំ សម្បិណ្ឌនត្ថំ.

៧២. , ១៨៥. បសញ្ញស្ស ច.

បសញ្ញស្ស ច ឥវណ្ណស្ស វិភត្តាទេសេ សរេ បរេ យការាទេសោ ហោតិ.

បុថព្យា, រត្យា, មត្យា.

សរេតិ កិមត្ថំ? បុថវិយំ.

៧៣. , ១៧៤. គាវ សេ.

គោឥច្ចេតស្ស ឱការស្ស អាវាទេសោ ហោតិ សេ វិភត្តិម្ហិ.

គាវស្ស.

៧៤. , ១៦៩. យោសុ ច.

គោឥច្ចេតស្ស ឱការស្ស អាវាទេសោ ហោតិ យោឥច្ចេតេសុ បរេសុ.

គាវោ គច្ឆន្តិ, គាវោ បស្សន្តិ, គាវី គច្ឆន្តិ, គាវី បស្សន្តិ.

ចគ្គហណំ កិមត្ថំ? នាស្មាស្មិំសុ វចនេសុ អាវា ទេសោ ហោតិ.

គាវេន, គាវា, គាវេ, គាវេសុ.

៧៥. , ១៧០. អវម្ហិ ច.

គោឥច្ចេតស្ស ឱការស្ស អាវអវឥច្ចេតេ អាទេសា ហោន្តិ អំម្ហិ វិភត្តិម្ហិ.

គាវំ, គវំ.

ចគ្គហណេន សាទិសេសេសុ បុព្ពុត្តវចនេសុ គោឥច្ចេតស្ស ឱការស្ស អវាទេសោ ហោតិ.

គវស្ស, គវោ, គវេន, គវា, គវេ, គវេសុ.

៧៦. , ១៧១. អាវស្សុ វា.

អាវឥច្ចេតស្ស គាវាទេសស្ស អន្ត សរស្ស ឧការាទេសោ ហោតិ វា អំម្ហិ វិភត្តិម្ហិ.

គាវុំ, គាវំ.

អាវស្សេតិ កិមត្ថំ? គាវោ តិដ្ឋន្តិ.

៧៧. , ១៧៥. តតោ នមំ បតិម្ហា លុត្តេ ច សមាសេ.

តតោ គោសទ្ទតោ នំវចនស្ស អំអាទេសោ ហោតិ, គោឥច្ចេតស្ស ឱការស្ស អវាទេសោ ហោតិ បតិម្ហិ បរេ អលុត្តេ ច សមាសេ.

គវបតិ.

អលុត្តេតិ កិមត្ថំ? គោបតិ.

ចគ្គហណេន អសមាសេបិ នំវចនស្ស អំអាទេសោ ហោតិ, គោឥច្ចេតស្ស ឱការស្ស អវាទេសោ ហោតិ.

គវំ.

៧៨. , ៣. ឱសរេ ច.

គោឥច្ចេតស្ស ឱការស្ស អវាទេសោ ហោតិ សមាសេ ច សរេ បរេ.

គវស្សកំ, គវេឡកំ, គវាជិនំ.

ចគ្គហណេន ឧវណ្ណឥច្ចេវមន្តានំ លិង្គានំ ឧវអវឧរាទេសា ហោន្តិ ស្មិំយោឥច្ចេតេសុ ក្វចិ.

ភុវិ, បសវោ, គុរវោ, ចតុរោ.

សរេតិ កិមត្ថំ? គោធនោ, គោវិន្ទោ.

៧៩. , ៤៦. តព្ពិបរីតូបបទេ ព្យញ្ជនេ ច.

តស្ស អវសទ្ទស្ស យទា ឧបបទេ តិដ្ឋមានស្ស តស្ស ឱការស្ស វិបរីតោ ហោតិ ព្យញ្ជនេ បរេ.

ឧគ្គតេ សូរិយេ, ឧគ្គច្ឆតិ, ឧគ្គហេត្វា.

ចគ្គហណមវធារណត្ថំ. អវសានេ, អវកិរណេ, អវកិរតិ.

៨០. , ១៧៣. គោណ នំម្ហិ វា.

សព្ពស្សេវ គោសទ្ទស្ស គោណាទេសោ ហោតិ វា នំម្ហិ វិភត្តិម្ហិ.

គោណានំ សត្តន្នំ.

វាតិ កិមត្ថំ?

គោនញ្ចេ តរមានានំ, ឧជុំ គច្ឆតិ បុង្គវោ.

សព្ពា គាវី ឧជុំ យន្តិ, នេត្តេ ឧជុំ គតេ សតិ.

យោគវិភាគេន អញ្ញត្រាបិ គោណាទេសោ ហោតិ. គោណភូតានំ.

៨១. , ១៧២. សុហិនាសុ ច.

សុហិនាឥច្ចេតេសុ សព្ពស្ស គោសទ្ទស្ស គោណាទេសោ ហោតិ វា.

គោណេសុ, គោណេហិ, គោណេភិ, គោណេន.

វាតិ កិមត្ថំ? គោសុ, គោហិ, គោភិ, គវេន.

ចគ្គហណេន ស្យាទិសេសេសុ បុព្ពុត្តរវចនេសុបិ គោណ គុ គវយាទេសា ហោន្តិ. គោណោ, គោណា, គោណំ, គោណេ, គោណស្ស, គោណម្ហា. គោណម្ហិ, គុន្នំ, គវយេហិ, គវយេភិ.

៨២. , ១៤៩. អំមោ និគ្គហិតំ ឈលបេហិ.

អំវចនស្ស មការស្ស ច ឈលបឥច្ចេតេហិ និគ្គហិតំ ហោតិ

អគ្គិំ, ឥសិំ, គហបតិំ, ទណ្ឌិំ, មហេសិំ, ភិក្ខុំ, បដុំ, សយម្ភុំ, អភិភុំ, រត្តិំ, ឥត្ថិំ, វធុំ, បុល្លិង្គំ, បុម្ភាវោ, បុង្កោកិលោ.

អំមោតិ កិមត្ថំ? អគ្គិនា, បាណិនា, ភិក្ខុនា, រត្តិយា, ឥត្ថិយា, វធុយា.

ឈលបេហីតិ កិមត្ថំ? សុខំ, ទុក្ខំ.

បុនារម្ភ ហណំ វិភាសានិវត្តនត្ថំ. អគ្គិំ, បដុំ, ពុទ្ធិំ, វធុំ.

៨៣. , ៦៧. សរលោបោ’ មាទេស បច្ចយាទិម្ហិ សរលោបេ តុ បកតិ.

សរលោបោ ហោតិ អមាទេសបច្ចយាទិម្ហិ សរ លោបេ តុ បកតិ ហោតិ.

បុរិសំ, បុរិសេ, បាបំ, បាបេ, បាបិយោ, បាបិដ្ឋោ.

អមាទេសបច្ចយាទិម្ហីតិ កិ ត្ថំ? អប្បមាទោ អមតំ បទំ.

សរលោបេតិ កិមត្ថំ? បុរិសស្ស, ទណ្ឌិនំ.

តុគ្គហណមវធារណត្ថំ. ភិក្ខុនី, គហបតានី.

បកតិគ្គហណសាមត្ថេន បុន សន្ធិភាវោ ច ហោតិ. សេយ្យោ, សេដ្ឋោ, ជេយ្យោ, ជេដ្ឋោ.

៨៤. , ១៤៤. អឃោរស្សមេកវចនយោស្វបិ ច.