ចតុត្ថកណ្ឌ

៣០. , ៥៨. អំ ព្យញ្ជនេ និគ្គហិតំ.

និគ្គហិតំ ខោ ព្យញ្ជនេ បរេ អំ ឥតិ ហោតិ.

ឯវំ វុត្តេ, តំ សាធូតិ បដិស្សុណិត្វា.

៣១. , ៤៩. វគ្គន្តំ វា វគ្គេ.

វគ្គភូតេ ព្យញ្ជនេ បរេ និគ្គហិតំ ខោ វគ្គន្តំ វា បប្បោតិ.

តន្និច្ចុតំ, ធម្មញ្ចរេ សុចរិតំ, ចិរប្បវាសិំ បុរិសំ. សន្តន្តស្ស មនំ ហោតិ, តង្ការុណិកំ, ឯវង្ខោ ភិក្ខវេ សិក្ខិតព្ពំ.

វាគ្គហណេននិគ្គហិតំ ខោ លការាទេសោ ហោតិ. បុគ្គលំ.

វាតិ កស្មា? ន តំ កម្មំ កតំ សាធុ.

៣២. , ៥០. ឯហេ ឧំ.

ឯការហការេ បរេ និគ្គហិតំ ខោ ញការំ បប្បោតិ វា.

បច្ចត្តញ្ញេវ បរិនិព្ពាយិស្សាមិ, តញ្ញេវេត្ថ បដិបុច្ឆិស្សាមិ, ឯវញ្ហិ វោ ភិក្ខវេ សិក្ខិតព្ពំ. តញ្ហិ តស្ស មុសា ហោតិ.

វាតិ កស្មា? ឯវមេតំ អភិញ្ញាយ, ឯវំ ហោតិ សុភាសិតំ.

៣៣. , ៥០. សយេ ច.

និគ្គហិតំ ខោ យការេ បរេ សហ យការេន ញការំ បប្បោតិ វា.

សញ្ញោគោ, សញ្ញុត្តំ.

វាតិ កស្មា? សំយោគោ, សំយុត្តំ.

៣៤. , ៥២. មទា សរេ.

និគ្គហិតស្ស ខោ សរេ បរេ មការទការាទេសា ហោន្តិ វា.

តមហំ ព្រូមិ ព្រាហ្មណំ, ឯតទវោច សត្ថា.

វាតិ កស្មា? អក្កោច្ឆិ មំ អវធិ មំ, អជិនិ មំ អហាសិ មេ.

៣៥. , ៣៤. យ វ ម ទ ន ត រ លា ចាគមា.

សរេ បរេ យការោ វការោ មការោ ទការោ នការោ តការោ រការោ លការោ ឥមេ អាគមា ហោន្តិ វា.

នយិមស្ស វិជ្ជា, យថយិទំ ចិត្តំ. មិគី ភន្តា វុទិក្ខតិ, សិត្តា តេ លហុ មេស្សតិ, អសិត្តា តេ គរុ មេស្សតិ. អស្សោ ភទ្រោ កសាមិវ, សម្មទញ្ញា វិមុត្តានំ. មនសាទញ្ញា វិមុត្តានំ, អត្តទត្ថមភិញ្ញាយ. ចិរំនាយតិ, ឥតោ នាយតិ. យស្មាតិហ ភិក្ខវេ, តស្មាតិហ ភិក្ខវេ, អជ្ជតគ្គេ បាណុបេតំ. សព្ភិរេវ សមាសេថ, អារគ្គេរិវ សាសបោ, សាសបោរិវ អារគ្គា. ឆឡភិញ្ញា, សឡាយតនំ.

វាតិ កស្មា? ឯវំ មហិទ្ធិយា ឯសា, អក្កោច្ឆិ មំ អវធិ មំ, អជិនិ មំ អហាសិ មេ, អជេយ្យោ អនុគាមិកោ.

ចគ្គហណេន ឥធេវ មការស្ស បការោ ហោតិ. ចិរប្បវាសិំ បុរិសំ.

កការស្ស ច ទការោ ហោតិ. សទត្ថបសុតោ សិយា.

ទការស្ស ច តការោ ហោតិ, សុគតោ.

៣៦. , ៤៧. ក្វចិ ឱ ព្យញ្ជនេ.

ព្យញ្ជនេ បរេ ក្វចិ ឱការាគមោ ហោតិ.

អតិប្បគោ ខោ តាវ សាវត្ថិយំ បិណ្ឌាយ ចរិតុំ. បរោសហស្សំ.

ក្វចីកិ កស្មា? ឯថ បស្សថិមំ លោកំ, អន្ធីភូតោ អយំ លោកោ.

៣៧. , ៥៧. និគ្គហិតញ្ច.

និគ្គហិតញ្ចាគមោ ហោតិ សរេ វា ព្យញ្ជនេ វា បរេ ក្វចិ.

ចក្ខុំឧទបាទិ, អវំសិរោ, យាវញ្ចិធ ភិក្ខវេ បុរិមំ ជាតិំ សរាមិ, អណុំថូលានិ សព្ពសោ, មនោបុព្ពង្គមា ធម្មា.

ក្វចីតិ កស្មា? ឥធេវ នំ បសំសន្តិ, បេច្ច សគ្គេ បមោទតិ, ន ហិ ឯតេហិ យានេហិ, គច្ឆេយ្យ អគតំ ទិសំ.

ចគ្គហណេន វិសទ្ទស្ស ច បការោ ហោតិ. បចេស្សតិ, វិចេស្សតិ វា.

៣៨. , ៥៣. ក្វចិ លោបំ.

និគ្គហិតំ ខោ សរេ បរេ ក្វចិ លោបំ បប្បោតិ.

តាសាហំ សន្តិកេ, វិទូនគ្គមិតិ.

ក្វចីតិ កស្មា? អហមេវ នូន ពាលោ ឯតមត្ថំ វិទិត្វាន.

៣៩. , ៥៤. ព្យញ្ជនេ ច.

និគ្គហិតំ ខោ ព្យញ្ជនេ បរេ ក្វចិ លោបំ បប្បោតិ.

អរិយសច្ចានទស្សនំ, ឯតំ ពុទ្ធានសាសនំ.

ក្វចីតិ កស្មា? ឯតំ មង្គលមុត្តមំ, តំ វោ វទាមិ ភទ្ទន្តេ.

៤០. , ៥៥. បរោ វាសរោ.

និគ្គហិតម្ហា បរោ សរោ លោបំ បប្បោតិ វា.

ភាសិតំ អភិនន្ទុន្តិ, ឧត្តត្តំវ, យថាពីជំវ, យថាធញ្ញំវ.

វាតិ កស្មា? អហមេវ នូន ពាលោ, ឯតទហោសិ.

៤១. , ៥៦. ព្យញ្ជនោ ច វិសញ្ញោគោ.

និគ្គហិតម្ហា បរស្មិំ សរេ លុត្តេ យទិ ព្យញ្ជនោ សសញ្ញោគោ វិសញ្ញោគោ ហោតិ.

ឯវំស តេ អាសវោ, បុប្ផំសា ឧប្បជ្ជិ.

លុត្តេតិ កស្មា? ឯវមស្ស វិទូនគ្គមិតិ.

ចគ្គហណេន តិណ្ណំ ព្យញ្ជនានមន្តរេ យេ សរូបា, តេសម្បិ លោបោ ហោតិ. អគ្យាគារំ, បដិសន្ថារវុត្យស្ស.

ឥតិ សន្ធិកប្បេ ចតុត្ថោ កណ្ឌោ.