២. នាមកណ្ឌ

បុល្លិង្គ

៤៧. ‘‘ជិនវចនយុត្តំ ហី’’តិ សព្ពត្ថាធិការោ.

លិង្គញ្ច និបច្ចតេ.

ធាតុប្បច្ចយវិភត្តិវជ្ជិតមត្ថយុត្តំ សទ្ទរូបំ លិង្គំ នាម, ជិនវចនយោគ្គំ លិង្គំ ឥធ ឋបីយតិ និប្ផាទីយតិ ច.

៤៨. ពុទ្ធឥតិ ឋិតេ –

តតោ ច វិភត្តិយោ.

តស្មា លិង្គា បរា វិភត្តិយោ ហោន្តិ. ចការេន តាសំ ឯកវចនាទិបឋមាទិសញ្ញា ច.

‘‘សិ យោ អំ យោ នា ហិ ស នំ ស្មា ហិ ស នំ ស្មិំ សូ’’ តិ វិភត្តិយោ. សិ យោ ឥតិ បឋមា, អំ យោ ឥតិ ទុតិយា, នា ហិ ឥតិ តតិយា, ស នំ ឥតិ ចតុត្ថី, ស្មា ហិ ឥតិ បញ្ចមី, ស នំ ឥតិ ឆដ្ឋី, ស្មិំ សុ ឥតិ សត្តមី.

លិង្គត្ថេ បឋមា.

យោ កម្មកត្តាទិវត្តន្តរមប្បត្តោ សស្សរូបដ្ឋោ សុទ្ធោ, សោ លិង្គត្ថោ នាម, តស្សាភិធានមត្តេ បឋមាវិភត្តិ ហោតិ. តស្សាបនិយមេ ឯកម្ហិ វត្តព្ពេ ឯកវចនំ សិ, វុច្ចតេ នេនេតិវចនំ, ឯកស្សត្ថស្ស វចនំ ឯកវចនំ. ឯវំ ពហុវចនំ.

អតោត្វេវ.

សោ.

អការន្តា បរស្ស សិស្ស ឱ ហោតិ.

សរលោបោ មាទេសប្បច្ចយាទិម្ហិ សរលោបេ តុ បកតិ.

អំអាទីសុ បរេសុ សរស្ស លោបោ ហោតិ, តស្មិំ កតេ តុ ក្វចាទិនា អសវណ្ណេ បត្តេ បកតិ ហោតិ.

នយេ បរំ យុត្តេ. ឯវមុបរិ សរលោបាទិ. ពុទ្ធោ.

ពហុម្ហិ វត្តព្ពេ ពហុវចនំ យោ.

អតោ វាត្វេវ.

សព្ពយោនីនមាឯ.

អការន្តា បរេសំ បឋមទុតិយាយោនីនំ យថាសង្ខ្យំ អាឯ វា ហោន្តិ. ពុទ្ធា.

វាតិ កិំ. អគ្គយោ.

៤៩. លិង្គត្ថេ បឋមាត្វេវ.

អាលបនេ ច.

អភិមុខីករណមាលបនំ, តទធិកេ លិង្គត្ថេ បឋមា ហោតិ.

‘‘អាលបនេ សិ គសញ្ញោ’’តិ សិស្ស គសញ្ញា. គេឥត្វេវ.

អការា បិតាទ្យន្តានមា.

គេ បរេ អការោ បិតុសត្ថុអត្តរាជាទីនមន្តោ ច អាត្តំ យាតិ.

‘‘អាការោ វា’’តិ គេ បរេ អាការស្ស រស្សោ វា.

សេសតោ លោបំ គសីបិ.

សោ សិំ ស្យា ច សខាតោ គស្សេវាត្យាទិនិទ្ទិដ្ឋេហញ្ញេ អវណ្ណិវណ្ណុវណ្ណោការន្តា សេសា, តេហិ បរេ គសី លុប្យន្តេ. ហេ - ពុទ្ធ, ពុទ្ធា. យោ - ពុទ្ធា.

៥០. កម្មត្ថេ ទុតិយា.

យំ ករោតិ, តំ កម្មំ នាម. តត្ថ ទុតិយា ហោតិ. អំពុទ្ធំ. យោស្ស ឯ-ពុទ្ធេ.

៥១. តតិយាត្វេវ.

កត្តរិ ច.

យោ ករោតិ, ស កត្តា នាម. តត្ថ តតិយា ហោតិ. នា.

អតោ នេន.

អការា បរោ នា ឯនំ យាតិ. ពុទ្ធេន.

ហិ.

សុហិស្វការោ ឯ.

សុហិសុ បរេស្វការស្ស ឯ ហោតិ.

ស្មាហិស្មិន្នំ ម្ហាភិម្ហិ វា.

សព្ពសទ្ទេហិ បរេសំ ស្មាហិស្មិន្នំ យថាសង្ខ្យំ ម្ហាភិម្ហិឥច្ចេតេ វា ហោន្តិ. ពុទ្ធេភិ, ពុទ្ធេហិ.

៥២. ករណេ តតិយា.

យេន វា កយិរតេ, តំ ករណំ នាម. តត្ថ តតិយា ហោតិ. សព្ពំ កត្តុសមំ.

៥៣. សម្បទានេ ចតុត្ថី.

យស្ស ទាតុកាមោ រោចតេ, ធារយតេ វា, តំ សម្បទានំ នាម. តត្ថ ចតុត្ថី ហោតិ. ស.

អតោ វាត្វេវ.

អាយ ចតុត្ថេកវចនស្ស តុ.

អការា បរស្ស ចតុត្ថេកវចនស្ស អាយោ វា ហោតិ. ពុទ្ធាយ.

‘‘សាគមោ សេ’’តិ សេ សការាគមោ. ពុទ្ធស្ស. នំ.

ទីឃន្ត្វេវ.

សុនំហិសុ ច.

សុនំហិសុ បរេសុ សរាទីនំ ទីឃោ ហោតិ. ចសទ្ទេន ក្វចិ ន. ពុទ្ធានំ.

៥៤. អបាទានេ បញ្ចមី.

យស្មាទបេតិ, ភយមាទត្តេ វា, តទបាទានំ នាម, តត្ថ បញ្ចមី ហោតិ. ស្មា.

អតោ អាឯត្វេវ.

៥៥. ស្មាស្មិន្នំ វា.

អការា បរេសំ ស្មាស្មិន្នំ អាឯ វា ហោន្តិ. ពុទ្ធា, ពុទ្ធម្ហា, ពុទ្ធស្មា. ពុទ្ធេភិ, ពុទ្ធេហិ.

៥៦. សាមិស្មិំ ឆដ្ឋី.

យស្ស វា បរិគ្គហោ, តំ សាមី នាម. តត្ថ ឆដ្ឋី ហោតិ. ពុទ្ធស្ស. ពុទ្ធានំ.

៥៧. ឱកាសេ សត្តមី.

យោធារោ, តមោកាសំ នាម. តត្ថ សត្តមី ហោតិ. ស្មិំ-ពុទ្ធេ, ពុទ្ធម្ហិ, ពុទ្ធស្មិំ. សុ-ពុទ្ធេសុ.

៥៨. ពុទ្ធោ ពុទ្ធ សុខំ ទទាតិ សរតោ ពុទ្ធំ តតោ ទុក្ករំ,

កិំ ពុទ្ធេន មហិទ្ធយោបិ មុនយោ ពុទ្ធេន ជាតាសុខី;

ពុទ្ធស្សេវ មនំ ទទេ បទមហំ ពុទ្ធា លភេយ្យាច្ចុតំ,

ពុទ្ធស្សិទ្ធិ ន កិំ ករេ ភវភវេ ភត្ត្យត្ថុ ពុទ្ធេ មម.

៥៩. ឥតោ បរំ តតិយាបញ្ចមីនញ្ច ចតុត្ថីឆដ្ឋីនញ្ច សរូបត្តា បញ្ចមីឆដ្ឋិយោ ភីយោ ឧបេក្ខន្តេ.

៦០. អត្ត, សិ.

ព្រហ្មត្តសខរាជាទិតោ ត្វេវ.

ស្យា ច.

ព្រហ្មាទិតោ សិស្ស អា ហោតិ. អត្តា.

‘‘យោនមានោ’’តិ ព្រហ្មាទិតោ យោនំ អានោត្តំ. អត្តានោ.

៦១. ហេ - អត្ត, អត្តា. យោ, អត្តានោ.

៦២. ‘‘ព្រហ្មត្តសខរាជាទិតោ អមាន’’ន្តិ ព្រហ្មាទិតោ អំវចនស្ស អានំ វា ហោតិ. អត្តានំ, អត្តំ. អត្តានោ.

៦៣. អត្តេន, អត្តនា. បក្ខេ-ជិនវចនានុរោធេន ឯនាភាវោ.

‘‘អត្តាន្តោ ហិស្មិមនត្តំ’’តិ ហិម្ហិ អត្តន្តស្ស អនោ. អត្តនេហិ. ឯវំ ករណេ.

៦៤. ‘‘សស្ស នោ’’តិ នោការោ. អត្តនោ. អត្តានំ.

៦៥. អម្ហតុម្ហន្តុ រាជព្រហ្មត្តសខ សត្ថុបិតាទីហិ ស្មា នាវ.

អម្ហាទិតោ ស្មា នា ឥវ ហោតិ. អត្តនា.

៦៦. ‘‘តតោ ស្មិន្នី’’តិ ស្មិនោ និ. អត្តនិ. ‘‘អនត្ត’’ន្តិ ភាវនិទ្ទេសេន សុម្ហិ ច អនោ. អត្តនេសុ.

៦៧. រាជា អត្តាវ. នា.

សវិភត្តិស្ស រាជស្សេត្វេវ.

នាម្ហិ រញ្ញា វា.

នាម្ហិ សវិភត្តិស្ស រាជសទ្ទស្ស រញ្ញា វា ហោតិ. រញ្ញា, រាជេន.

រាជស្ស រាជុ សុនំហិសុ ច.

សុនំ ហិសុ បរេសុ រាជស្ស រាជុ ហោតិ, ចការេន ក្វចិ ន.

‘‘សុនំហិសុ ចេតិ’’ ទីឃេ - រាជូភិ, រាជូហិ, រាជេភិ, រាជេហិ.

៦៨. សវិភត្តិស្សេត្យធិការោ.

‘‘រាជស្ស រញ្ញោ រាជិនោ សេ’’តិ សេ រញ្ញោ រាជិនោ ហោន្តិ. រញ្ញោ, រាជិនោ.

‘‘រញ្ញំ នម្ហិ វា’’តិ នម្ហិ រញ្ញំ វា. រញ្ញំ, រាជូនំ, រាជានំ.

៦៩. ស្មាស្សនាតុល្យត្តា-នាម្ហិ រញ្ញា វា. រញ្ញា, រាជម្ហា, រាជស្មា.

៧០. ‘‘ស្មិម្ហិ រញ្ញេ រាជិនី’’តិ ស្មិម្ហិ រញ្ញេ រាជិនិ ហោន្តិ. រញ្ញេ, រាជិនិ. រាជូសុ, រាជេសុ.

៧១. គុណវន្តុ, សិ.

សវិភត្តិស្ស ន្តុស្សេត្វេវ.

‘‘អា សិម្ហី’’តិ សិម្ហិ សវិភត្តិស្ស ន្តុស្ស អា. គុណវា.

យោម្ហិ បឋមេត្វេវ.

ន្តុស្ស ន្តោ.

បឋមេ យោម្ហិ សវិភត្តិស្ស ន្តុស្ស ន្តោការោ ហោតិ. គុណវន្តោ.

សុនំហិសុ អត្តំត្វេវ.

ន្តុស្សន្តោ យោសុ ច.

សុនំហិសុ, យោសុ, ចការេន អញ្ញេសុបិ បរេសុ ន្តុស្សន្តោ អត្តំ យាតិ. គុណវន្តា.

៧២. សវិភត្តិស្សេត្យធិការោ. អំឥត្វេវ.

អវណ្ណោ ច គេ.

គេ បរេ សវិភត្តិស្ស ន្តុស្ស អំអអា ហោន្តិ. ហេគុណវំ,គុណវ, គុណវា. យោ - គុណវន្តោ, គុណវន្តា.

៧៣. អត្តំ – គុណវន្តំ. គុណវន្តេ.

៧៤. ‘‘តោតិតា សស្មិំ នាស្វី’’តិ សវិភត្តិស្ស ន្តុស្ស នាម្ហិ តា, សេ តោការោ, ស្មិម្ហិ តិ ច វា. គុណវតា, គុណវន្តេន. គុណវន្តេភិ, គុណវន្តេហិ.

៧៥. គុណវតោ, គុណវន្តស្ស.

‘‘នម្ហិ តំ វា’’តិ នម្ហិ ន្តុស្ស តំ វា. គុណវតំ, គុណវន្តានំ. ស្មា នាវ.

៧៦. គុណវតិ, គុណវន្តេ, គុណវន្តម្ហិ, គុណវន្តស្មិំ, គុណវន្តេសុ.

៧៧. គច្ឆន្ត, សិ.

‘‘សិម្ហិ គច្ឆន្តាទីនំ ន្តសទ្ទោ អ’’ន្តិ ន្តសទ្ទស្ស អំវា, សិលោបោ. គច្ឆំ, សិស្ស ឱ – គច្ឆន្តោ.

គច្ឆន្តាទីនំ ន្តសទ្ទោត្វេវ.

សេសេសុន្តុវ.

វុត្តំ ហិត្វា សេសេសុ គច្ឆន្តាទីនំ ន្តសទ្ទោ ន្តុ ឥវ ទដ្ឋព្ពោ. គច្ឆន្តោ, គច្ឆន្តាឥច្ចាទិ.

សេសំ គុណវន្តុសមំ.

៧៨. គច្ឆន្តាទយោ នាម អន្តប្បច្ចយន្តា.

៧៩. អគ្គិ, សិលោបោ.

‘‘ឥវណ្ណុវណ្ណា ឈលា’’តិ ឥវណ្ណុវណ្ណានំ យថាសង្ខ្យំ ឈលសញ្ញា.

ឈលតោ វាត្វេវ.

ឃបតោ ច យោនំ លោបោ.

ឃបឈលតោ យោនំ លោបោ វា ហោតិ.

យោសុ កតនិការលោបេសុ ទីឃំ.

កតោ និការោ លោបោ ច យេសំ តេសុ យោសុ សរានំ ទីឃោ ហោតិ. អគ្គី. បក្ខេ-អត្តន្ត្វេវ.

យោ ស្វកតរស្សោ ឈោ.

យោសុ អកតរស្សោ ឈោ អត្តំ យាតិ. អគ្គយោ. តថាលបនេ.

៨០. អំ មោ និគ្គហីតំ ឈលបេហិ.

ឈលបតោ អំ មោ ច ពិន្ទុំ យន្តិ. អគ្គិំ. អគ្គី, អគ្គយោ.

៨១. អគ្គិនា. ទីឃេ-អគ្គីភិ, អគ្គីហិ.

៨២. ‘‘ឈលតោ សស្ស នោ វា’’តិ សស្ស នោត្តំ វា. អគ្គិនោ, អគ្គិស្ស. អគ្គីនំ.

៨៣. ‘‘ឈលតោ ចេ’’តិ ស្មាស្ស នា. អគ្គិនា.

៨៤. អគ្គិម្ហិ, អគ្គិស្មិំ. អគ្គីសុ.

៨៥. អាទិ អគ្គីវ. ស្មិំនោ បន ‘‘អាទិតោ ឱ ចេ’’តិ អំ, ឱ ច វា. អាទិ, អាទោ, អាទិម្ហិ, អាទិស្មិំ. អាទីសុ.

៨៦. ទណ្ឌី, សិ.

‘‘អឃោ រស្ស’’មាទិនា រស្សេ សម្បត្តេ ‘‘ន សិស្មិមនបុំសកានី’’តិ សិម្ហិ អនបុំសកានំ ន រស្សោ. សិលោបោ, ទណ្ឌី, យោលោបេ – ទណ្ឌី. បក្ខេ –

អឃោ រស្សមេកវចនយោស្វបិ ច.

ឯកវចនយោសុ ឈលបា រស្សំ យន្តិ.

ឈតោ កតរស្សាត្វេវ.

យោនំ នោ.

កតស្សា ឈតោ យោនំ នោត្តំ ហោតិ. ទណ្ឌិនោ.

៨៧. ‘‘ឈលបា រស្ស’’ន្តិ គេ បរេ ឈលបានំ រស្សោ. ហេទណ្ឌិ. ទណ្ឌី, ទណ្ឌិនោ.

៨៨. វា អំឥត្វេវ.

‘‘នំ ឈតោ កតរស្សា’’តិ អំឥច្ចស្ស នំ វា. ទណ្ឌិនំ, ទណ្ឌិំ. ទណ្ឌី, ទណ្ឌិនោ.

៨៩. ទណ្ឌិនា. ទណ្ឌីភិ, ទណ្ឌីហិ.

៩០. ទណ្ឌិនោ, ទណ្ឌិស្ស. ទណ្ឌីនំ.

៩១. ឈតោ កតរស្សាត្វេវ.

‘‘ស្មិន្នី’’តិ ស្មិនោ និ. ទណ្ឌិនិ. ទណ្ឌីសុ.

៩២. ភិក្ខុ, សិលោបោ.

វា យោនំត្វេវ.

‘‘លតោ វោ ការោ ចេ’’តិ លតោ យោនំ វោត្តំ វា.