៤. អព្យយវគ្គ

១១៣៦. អព្យយំ វុច្ចតេ ទានិ, ចិរស្សំ តុ ចិរំ តថា;

ចិរេន ចិររត្តាយ, សហ សទ្ធិំ សមំ អមា.

១១៣៧. បុនប្បុនំ អភិណ្ហញ្ចា, សកិំ ចា’ភិក្ខណំ មុហុំ;

វជ្ជនេ តុ វិនា នានា, អន្តរេន រិតេ បុថុ.

១១៣៨. ពលវំ សុដ្ឋុ ចា’តីវា, តិសយេ កិមុត ស្វ’តិ;

អហោ តុ កិំ កិមូ’ ទាហុ, វិកប្បេ កិមុតោ’ទ ច.

១១៣៩. អវ្ហានេ ភោ អរេ អម្ភោ,

ហម្ភោ រេ ជេ’ង្គ អាវុសោ;

ហេ ហរេ ថ កថំ កិំសុ, ននុ កច្ចិ នុ កិំ សមា.

១១៤០. អធុនេ’តរហី’ទានិ, សម្បតិ អញ្ញទត្ថុ តុ;

តគ្ឃេ’ កំសេ សសក្កញ្ចា, ទ្ធា កាមំ ជាតុ វេ ហវេ.

១១៤១. យាវតា តាវតា យាវ, តាវ កិត្តាវតា តថា;

ឯត្តាវតា ច កីវេ’តិ, បរិច្ឆេទត្ថវាចកា.

១១៤២. យថា តថា យថេវេ’វំ, យថានាម យថាហិ ច;

សេយ្យថាប្យេ’វមេវំ, វា, តថេវ ច យថាបិ ច.

១១៤៣. ឯវម្បិ ច សេយ្យថាបិ, នាម យថរិវា’បិ ច;

បដិភាគត្ថេ យថាច, វិយ តថរិវា’បិ ច.

១១៤៤. សំ សាមញ្ច សយំ ចាថ, អាម សាហុ លហូ’បិ ច;

ឱបាយិកំ បតិរូបំ, សាធ្វេ’វំ សម្បដិច្ឆនេ.

១១៤៥. យំ តំ យតោ តតោ យេន,

តេនេ’តិ ការណេ សិយុំ;

អសាកល្យេ តុ ចន ចិ, និប្ផលេ តុ មុធា ភវេ.

១១៤៦. កទាចិ ជាតុ តុល្យា’ថ, សព្ពតោ ច សមន្តតោ;

បរិតោ ច សមន្តាបិ, អថ មិច្ឆា មុសា ភវេ.

១១៤៧. និសេធេ ន អនោមា’លំ, នហិ ចេតុ សចេ យទិ;

អនុកុល្យេ តុ សទ្ធញ្ច,

នត្តំ [រត្តំ (ដី.)] ទោសោ ទិវា ត្វ’ហេ.

១១៤៨. ឦសំ កិញ្ចិ មនំ អប្បេ, សហសា តុ អតក្កិតេ;

បុរេ គ្គតោ តុ បុរតោ, បេច្ចា’មុត្រភវន្តរេ.

១១៤៩. អហោ ហី វិម្ហយេ តុណ្ហី,

តុ មោនេ ថា’វិ បាតុ ច;

តង្ខណេ សជ្ជុ សបទិ, ពលក្ការេ បសយ្ហ ច.

១១៥០. សុទំ ខោ [វោ (ក.)] អស្សុ យគ្ឃេ វេ,ហា’ទយោ បទបូរណេ;

អន្តរេន’ន្តរា អន្តោ, វស្សំ នូន ច និច្ឆយេ.

១១៥១. អានន្ទេ សញ្ច ទិដ្ឋា ថ, វិរោធកថនេ ននុ;

កាមប្បវេទនេ កច្ចិ, ឧសូយោបគមេ’ត្ថុ ច.

១១៥២. ឯវា’វធារណេ ញេយ្យំ, យថាត្តំ តុ យថាតថំ;

នីចំ អប្បេ, មហត្យុ’ច្ចំ, អថ បាតោ បគេ សមា.

១១៥៣. និច្ចេ សទា សនំ [សនា (ក.)] បាយោ,

ពាហុល្យេ ពាហិរំ ពហិ;

ពហិទ្ធា ពាហិរា ពាហ្យេ, សីឃេតុ សណិកំ ភវេ.

១១៥៤. អត្ថំ អទស្សនេ ទុដ្ឋុ, និន្ទាយំ, វន្ទនេ នមោ;

សម្មា សុដ្ឋុ បសំសាយំ, អថោ សត្តាយ មត្ថិ ច.

១១៥៥. សាយំ សាយេ’ជ្ជ អត្រា’ហេ,

សុវេ តុ ស្វេ អនាគតេ;

តតោ បរេ បរសុវេ, ហិយ្យោតុ ទិវសេ គតេ.

១១៥៦. យត្ថ យត្រ យហិំចាថ, តត្ថ តត្រ តហិំតហំ;

អថោ ឧទ្ធញ្ច ឧបរិ, ហេដ្ឋា តុ ច អធោ សមា.

១១៥៧. ចោទនេ ឥង្ឃ ហន្ទា’ថ, អារាទូរា ច អារកា;

បរម្មុខា តុ ច រហោ, សម្មុខា ត្វា’វិ បាតុ ច.

១១៥៨. សំសយត្ថម្ហិ អប្បេវ, អប្បេវនាម នូ’តិ ច;

និទស្សនេ ឥតិ’ត្ថញ្ច, ឯវំ, កិច្ឆេ កថញ្ចិ ច.

១១៥៩. ហា ខេទេ សច្ឆិ បច្ចក្ខេ,

ធុវំ ថិរេ’វធារណេ;

តិរោ តុ តិរិយំ ចាថ, កុច្ឆាយំ ទុដ្ឋុ កុ’ច្ចតេ.

១១៦០. សុវត្ថិ អាសិដ្ឋត្ថម្ហិ, និន្ទាយំ តុ ធី [ធិ (ក.)] កថ្យតេ;

កុហិញ្ចនំ កុហិំ កុត្រ, កុត្ថ កត្ថ កហំ ក្វ ថ.

១១៦១. ឥហេ’ធា’ត្រ តុ ឯត្ថា’ត្ថ,

អថ សព្ពត្រ សព្ពធិ;

កទា កុទាចនំ ចាថ, តទានិ ច តទា សមា.

១១៦២. អាទិកម្មេ ភុសត្ថេ ច, សម្ភវោ’តិណ្ណ តិត្តិសុ;

និយោគិ’ស្សរិយ’ប្បីតិ, ទាន បូជា’គ្គ, សន្តិសុ.

១១៦៣. ទស្សនេ តប្បរេ សង្គេ, បសំសា, គតិ, សុទ្ធិសុ;

ហិំសា, បការន្តោ’ភាវ, វិយោគា’វយវេសុ ច;

បោ’បសគ្គោ ទិសាយោគេ, បត្ថនា, ធិតិអាទិសុ.

១១៦៤. បរាសទ្ទោ បរិហានិ, បរាជយ គតីសុ ច;

ភុសត្ថេ បដិលោមត្ថេ, វិក្កមា’មសនាទិសុ.

១១៦៥. និស្សេសា’ភាវ សន្យាស, ភុសត្ថ មោក្ខ រាសិសុ;

គេហា’ទេសោ’បមាហីន, បសាទនិគ្គតា’ច្ចយេ.

១១៦៦. ទស្សនោ’សាននិក្ខន្តា, ធោភាគេស្វ’វធារណេ;

សាមីប្យេ ពន្ធនេ ឆេក, ន្តោភាគោ’បរតីសុ ច.

១១៦៧. បាតុភាវេ វិយោគេ ច, និសេធាទោ និ ទិស្សតិ;

អថោ នីហរណេ ចេវា, វរណាទោ ច នី សិយា.

១១៦៨. ឧទ្ធកម្ម វិយោគ ត្ត, លាភ តិត្តិ សមិទ្ធិសុ;

បាតុភាវ’ច្ចយាភាវ, បពលត្តេ បកាសនេ;

ទក្ខ’គ្គតាសុ កថនេ, សត្តិមោក្ខាទិកេ ឧ ច.

១១៦៩. ទុ កុច្ឆិតេ’សទត្ថេសុ, វិរូបត្តេ ប្យ’សោភនេ;

សិយា’ភាវា’សមិទ្ធីសុ, កិច្ឆេ ចា’នន្ទនាទិកេ.

១១៧០. សំ សមោធាន សង្ខេប, សមន្តត្ត សមិទ្ធិសុ;

សម្មា ភុស សហ ប្បត្ថា, ភិមុខត្ថេសុ សង្គតេ;

វិធានេ បភវេ បូជា, បុនប្បុនក្រិយាទិសុ.

១១៧១. វិវិធា’តិសយា’ភាវ, ភុសត្តិ’ស្សរិយា’ច្ចយេ;

វិយោគេ កលហេ បាតុ, ភាវេ ភាសេ ច កុច្ឆនេ.

១១៧២. ទូរា’នភិមុខត្តេសុ, មោហា’នវដ្ឋិតីសុ ច;

បធាន ទក្ខតា ខេទ, សហត្ថាទោ វិ ទិស្សតិ.

១១៧៣. វិយោគេ ជាននេ ចា’ធោ,ភាគ និច្ឆយ [ភាគ’និច្ឆយ (ភាគ+អនិច្ឆយ-ដី)] សុទ្ធិសុ;

ឦសទត្ថេ បរិភវេ, ទេស ព្យាបន ហានិសុ;

វចោក្រិយាយ ថេយ្យេ ច, ញាណប្បត្តាទិកេ អវ.

១១៧៤. បច្ឆា ភុសត្ត សាទិស្យា, នុបច្ឆិន្នា’នុវត្តិសុ;

ហីនេ ច តតិយត្ថា’ធោ, ភាគេស្វ’នុគតេ ហិតេ;

ទេសេ លក្ខណ វិច្ឆេ’ត្ថ, ម្ភូត ភាគាទិកេ អនុ.

១១៧៥. សមន្តត្ថេ បរិច្ឆេទេ, បូជា’លិង្គន វជ្ជនេ;

ទោសក្ខានេ និវាសនា, វញ្ញា’ធារេសុ ភោជនេ;

សោក ព្យាបន តត្វេសុ, លក្ខណាទោ សិយា បរិ.

១១៧៦. អាភិមុខ្យ វិសិដ្ឋុ’ទ្ធ, កម្មសារុប្បវុទ្ធិសុ;

បូជា’ធិក កុលា’សច្ច, លក្ខណាទិម្ហិ ចាប្យ’ភិ.

១១៧៧. អធិកិ’ស្សរ, បាឋា’ធិ, ដ្ឋាន, បាបុណនេស្វ’ធិ;

និច្ឆយេ ចោបរិត្តា’ធិ, ភវនេ ច វិសេសនេ.

១១៧៨. បដិទាននិសេធេសុ, វាមា’ទាននិវត្តិសុ;

សាទិសេ បដិនិធិម្ហិ, អាភិមុខ្យគតីសុ ច.

១១៧៩. បតិពោធេ បតិគតេ, តថា បុនក្រិយាយ ច;

សម្ភាវនេ បដិច្ចត្ថេ, បតីតិ លក្ខណាទិកេ;

សុ សោភនេ សុខេ សម្មា, ភុស សុដ្ឋុ សមិទ្ធិសុ.

១១៨០. អាភិមុខ្យ, សមីបា’ទិ, កម្មា’លិង្គន បត្តិសុ;

មរិយាទុ’ទ្ធកម្មិ’ច្ឆា, ពន្ធនា’ភិវិធីសុ អា.

១១៨១. និវាសា’វ្ហាន គហណ, កិច្ឆេ’សត្ថ និវត្តិសុ;

អប្បសាទា’សិ សរណ, បតិដ្ឋា’វិម្ហយាទិសុ.

១១៨២. អន្តោភាវ ភុសត្តា’តិ, សយ បូជាស្វ’តិក្កមេ;

ភូតភាវេ បសំសាយំ, ទឡ្ហត្ថាទោ សិយា អតិ.

១១៨៣. សម្ភាវនេ ច គរហា, បេក្ខាសុ ច សមុច្ចយេ;

បញ្ហេ សំវរណេ ចេវ, អាសីសត្ថេ អបី’រិតំ.

១១៨៤. និទ្ទេសេ វជ្ជនេ បូជា, បគតេ វារណេបិ ច;

បទុស្សនេ ច គរហា, ចោរិកា’ទោ សិយា អប.

១១៨៥. សមីបបូជា សាទិស្ស, ទោសក្ខានោ’បបត្តិសុ;

ភុសត្តោ’បគមា’ធិក្យ, បុព្ពកម្មនិវត្តិសុ;

គយ្ហាការោ’បរិត្តេសុ, ឧបេ’ត្យ [ឧបេត្យ=ឧប+ឥតិ]’នសនា’ទិកេ.

១១៨៦. ឯវំ និទស្សនា’ការោ, បមាសុ សម្បហំសនេ;

ឧបទេសេ ច វចន, បដិគ្គាហេ’វធារណេ;

គរហាយេ’ទមត្ថេ ច, បរិមានេ ច បុច្ឆនេ.

១១៨៧. សមុច្ចយេ សមាហារេ, ន្វាចយេ ចេ’តរីតរេ;

បទបូរណមត្តេ ច, ចសទ្ទោ អវធារណេ.

១១៨៨. ឥតិ ហេតុបការេសុ, អាទិម្ហិ ចា’វធារណេ;

និទស្សនេ បទត្ថស្ស, វិបល្លាសេ សមាបនេ.

១១៨៩. សមុច្ចយេ ចោ’បមាយំ, សំសយេ បទបូរណេ;

វវត្ថិតវិភាសាយំ, វា’វស្សគ្គេ វិកប្បនេ.

១១៩០. ភូសនេ វារណេ ចា’លំ, វុច្ចតេ បរិយត្តិយំ;

អថោ’ថា’នន្តរា’រម្ភ, បញ្ហេសុ បទបូរណេ.

១១៩១. បសំសាគរហាសញ្ញា, សីការាទោ [ស្វីការ (ដី.)] បិ នាម ថ;

និច្ឆយេ ចា’នុមានស្មិំ, សិយា នូន វិតក្កនេ.

១១៩២. បុច្ឆា’វធារណា’នុញ្ញា, សាន្ត្វនា’លបនេ [សន្តនាលបនេ (ក.)] ននុ;

វតេ’កំស, ទយា, ហាស, ខេទា’លបន, វិម្ហយេ.

១១៩៣. វាក្យារម្ភ, វិសាទេសុ, ហន្ទ ហាសេ’នុកម្បនេ;

យាវ តុ តាវ សាកល្យ, មានា’វធ្យ’វធារណេ.

១១៩៤. បាចី, បុរ, ង្គតោត្ថេសុ, បុរត្ថា បឋមេ ប្យថ;

បពន្ធេ ច ចិរាតីតេ, និកដាគាមិកេ បុរា.

១១៩៥. និសេធវាក្យាលង្ការា, វធារណបសិទ្ធិសុ;

ខល្វា’សន្នេ តុ អភិតោ-

ភិមុខោ’ភយតោទិកេ.

១១៩៦. កាមំ យទ្យបិសទ្ទត្ថេ, ឯកំសត្ថេ ច ទិស្សតិ;

អថោ បន វិសេសស្មិំ, តថេវ បទបូរណេ.

១១៩៧. ហិ ការណេ វិសេសា’វ, ធារណេ បទបូរណេ;

តុ ហេតុវជ្ជេ តត្ថា’ថ, កុ បាបេ’សត្ថ’កុច្ឆនេ.

១១៩៨. នុ សំសយេ ច បញ្ហេ ថ, នានា’ នេកត្ថ វជ្ជនេ;

កិំ តុ បុច្ឆាជិគុច្ឆាសុ, កំ តុ វារិម្ហិ មុទ្ធនិ.

១១៩៩. អមា សហសមីបេ ថ, ភេទេ អប្បឋមេ បុន;

កិរា’នុស្សវា’រុចិសុ, ឧទា’ប្យត្ថេ វិកប្បនេ.

១២០០. បតីចី ចរិមេ បច្ឆា, សាមិ ត្វទ្ធេ ជិគុច្ឆនេ;

បកាសេ សម្ភវេ បាតុ,

អញ្ញោញ្ញេ តុ រហោ មិថោ.