១០. អាឃាតបដិវិនយសុត្តំ

៣០. [ទី. និ. ៣.៣៤០, ៣៥៩] ‘‘នវយិមេ, ភិក្ខវេ, អាឃាតបដិវិនយា. កតមេ នវ? ‘អនត្ថំ មេ អចរិ [អចរីតិ (ស្យា.), ឯវំ ‘‘ចរតិ, ចរិស្សតិ’’ បទេសុបិ], តំ កុតេត្ថ លព្ភា’តិ អាឃាតំ បដិវិនេតិ; ‘អនត្ថំ មេ ចរតិ, តំ កុតេត្ថ លព្ភា’តិ អាឃាតំ បដិវិនេតិ; ‘អនត្ថំ មេ ចរិស្សតិ, តំ កុតេត្ថ លព្ភា’តិ អាឃាតំ បដិវិនេតិ; បិយស្ស មេ មនាបស្ស អនត្ថំ អចរិ…បេ… អនត្ថំ ចរតិ…បេ… ‘អនត្ថំ ចរិស្សតិ, តំ កុតេត្ថ លព្ភា’តិ អាឃាតំ បដិវិនេតិ; អប្បិយស្ស មេ អមនាបស្ស អត្ថំ អចរិ…បេ… អត្ថំ ចរតិ…បេ… ‘អត្ថំ ចរិស្សតិ, តំ កុតេត្ថ លព្ភា’តិ អាឃាតំ បដិវិនេតិ. ឥមេ ខោ, ភិក្ខវេ, នវ អាឃាតបដិវិនយា’’តិ. ទសមំ.