១១. អនុបុព្ពនិរោធសុត្តំ

៣១. ‘‘នវយិមេ, ភិក្ខវេ, អនុបុព្ពនិរោធា. កតមេ នវ? បឋមំ ឈានំ សមាបន្នស្ស កាមសញ្ញា [អាមិស្សសញ្ញា (ស្យា.)] និរុទ្ធា ហោតិ; ទុតិយំ ឈានំ សមាបន្នស្ស វិតក្កវិចារា និរុទ្ធា ហោន្តិ; តតិយំ ឈានំ សមាបន្នស្ស បីតិ និរុទ្ធា ហោតិ; ចតុត្ថំ ឈានំ សមាបន្នស្ស អស្សាសបស្សាសា និរុទ្ធា ហោន្តិ; អាកាសានញ្ចាយតនំ សមាបន្នស្ស រូបសញ្ញា និរុទ្ធា ហោតិ; វិញ្ញាណញ្ចាយតនំ សមាបន្នស្ស អាកាសានញ្ចាយតនសញ្ញា និរុទ្ធា ហោតិ; អាកិញ្ចញ្ញាយតនំ សមាបន្នស្ស វិញ្ញាណញ្ចាយតនសញ្ញា និរុទ្ធា ហោតិ; នេវសញ្ញានាសញ្ញាយតនំ សមាបន្នស្ស អាកិញ្ចញ្ញាយតនសញ្ញា និរុទ្ធា ហោតិ; សញ្ញាវេទយិតនិរោធំ សមាបន្នស្ស សញ្ញា ច វេទនា ច និរុទ្ធា ហោន្តិ. ឥមេ ខោ, ភិក្ខវេ, នវ អនុបុព្ពនិរោធា’’តិ [ទី. និ. ៣.៣៤៤, ៣៤៩]. ឯកាទសមំ.

សត្តាវាសវគ្គោ តតិយោ.