៩. អតម្មយសុត្តំ

១០៤. ‘‘ឆ, ភិក្ខវេ, អានិសំសេ សម្បស្សមានេន អលមេវ ភិក្ខុនា សព្ពធម្មេសុ អនោធិំ ករិត្វា អនត្តសញ្ញំ ឧបដ្ឋាបេតុំ. កតមេ ឆ? សព្ពលោកេ ច អតម្មយោ ភវិស្សាមិ, អហង្ការា ច មេ ឧបរុជ្ឈិស្សន្តិ, មមង្ការា ច មេ ឧបរុជ្ឈិស្សន្តិ, អសាធារណេន ច ញាណេន សមន្នាគតោ ភវិស្សាមិ, ហេតុ ច មេ សុទិដ្ឋោ ភវិស្សតិ, ហេតុសមុប្បន្នា ច ធម្មា. ឥមេ ខោ, ភិក្ខវេ, ឆ អានិសំសេ សម្បស្សមានេន អលមេវ ភិក្ខុនា សព្ពធម្មេសុ អនោធិំ ករិត្វា អនត្តសញ្ញំ ឧបដ្ឋាបេតុ’’ន្តិ. នវមំ.