៨. ទុតិយអបាសាទិកសុត្តំ

២១៨. ‘‘បញ្ចិមេ, ភិក្ខវេ, អាទីនវា អបាសាទិកេ. កតមេ បញ្ច? អប្បសន្នា នប្បសីទន្តិ, បសន្នានញ្ច ឯកច្ចានំ អញ្ញថត្តំ ហោតិ, សត្ថុសាសនំ អកតំ [ន កតំ (ស្យា. កំ. ក.)] ហោតិ, បច្ឆិមា ជនតា ទិដ្ឋានុគតិំ អាបជ្ជតិ, ចិត្តមស្ស នប្បសីទតិ. ឥមេ ខោ, ភិក្ខវេ, បញ្ច អាទីនវា អបាសាទិកេ.

‘‘បញ្ចិមេ, ភិក្ខវេ, អានិសំសា បាសាទិកេ. កតមេ បញ្ច? អប្បសន្នា បសីទន្តិ, បសន្នានញ្ច ភិយ្យោភាវោ ហោតិ, សត្ថុសាសនំ កតំ ហោតិ, បច្ឆិមា ជនតា ទិដ្ឋានុគតិំ អាបជ្ជតិ, ចិត្តមស្ស បសីទតិ. ឥមេ ខោ, ភិក្ខវេ, បញ្ច អានិសំសា បាសាទិកេ’’តិ. អដ្ឋមំ.