៦. ទុតិយអក្ខន្តិសុត្តំ

២១៦. ‘‘បញ្ចិមេ, ភិក្ខវេ, អាទីនវា អក្ខន្តិយា. កតមេ បញ្ច? ពហុនោ ជនស្ស អប្បិយោ ហោតិ អមនាបោ, លុទ្ទោ ច ហោតិ, វិប្បដិសារី ច, សម្មូឡ្ហោ កាលំ ករោតិ, កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបជ្ជតិ. ឥមេ ខោ, ភិក្ខវេ, បញ្ច អាទីនវា អក្ខន្តិយា.

‘‘បញ្ចិមេ, ភិក្ខវេ, អានិសំសា ខន្តិយា. កតមេ បញ្ច? ពហុនោ ជនស្ស បិយោ ហោតិ មនាបោ, អលុទ្ទោ ច ហោតិ, អវិប្បដិសារី ច, អសម្មូឡ្ហោ កាលំ ករោតិ, កាយស្ស ភេទា បរំ មរណា សុគតិំ សគ្គំ លោកំ ឧបបជ្ជតិ. ឥមេ ខោ, ភិក្ខវេ, បញ្ច អានិសំសា ខន្តិយា’’តិ. ឆដ្ឋំ.