៤. ពហុភាណិសុត្តំ

២១៤. ‘‘បញ្ចិមេ, ភិក្ខវេ, អាទីនវា ពហុភាណិស្មិំ បុគ្គលេ. កតមេ បញ្ច? មុសា ភណតិ, បិសុណំ ភណតិ, ផរុសំ ភណតិ, សម្ផប្បលាបំ ភណតិ, កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបជ្ជតិ. ឥមេ ខោ, ភិក្ខវេ, បញ្ច អាទីនវា ពហុភាណិស្មិំ បុគ្គលេ.

‘‘បញ្ចិមេ, ភិក្ខវេ, អានិសំសា មន្តភាណិស្មិំ បុគ្គលេ. កតមេ បញ្ច? ន មុសា ភណតិ, ន បិសុណំ ភណតិ, ន ផរុសំ ភណតិ, ន សម្ផប្បលាបំ ភណតិ, កាយស្ស ភេទា បរំ មរណា សុគតិំ សគ្គំ លោកំ ឧបបជ្ជតិ. ឥមេ ខោ, ភិក្ខវេ, បញ្ច អានិសំសា មន្តភាណិស្មិំ បុគ្គលេ’’តិ. ចតុត្ថំ.