៣. បឋមវឌ្ឍិសុត្តំ

៦៣. ‘‘បញ្ចហិ, ភិក្ខវេ, វឌ្ឍីហិ វឌ្ឍមានោ អរិយសាវកោ អរិយាយ វឌ្ឍិយា វឌ្ឍតិ, សារាទាយី ច ហោតិ វរាទាយី ច កាយស្ស. កតមាហិ បញ្ចហិ? សទ្ធាយ វឌ្ឍតិ, សីលេន វឌ្ឍតិ, សុតេន វឌ្ឍតិ, ចាគេន វឌ្ឍតិ, បញ្ញាយ វឌ្ឍតិ – ឥមាហិ ខោ, ភិក្ខវេ, បញ្ចហិ វឌ្ឍីហិ វឌ្ឍមានោ អរិយសាវកោ អរិយាយ វឌ្ឍិយា វឌ្ឍតិ, សារាទាយី ច ហោតិ វរាទាយី ច កាយស្សា’’តិ.

‘‘សទ្ធាយ សីលេន ច យោ បវឌ្ឍតិ [យោធ វឌ្ឍតិ (សី.)],

បញ្ញាយ ចាគេន សុតេន ចូភយំ;

សោ តាទិសោ សប្បុរិសោ វិចក្ខណោ,

អាទីយតី សារមិធេវ អត្តនោ’’តិ. តតិយំ;