៥. ទានានិសំសសុត្តំ

៣៥. ‘‘បញ្ចិមេ, ភិក្ខវេ, ទានេ អានិសំសា. កតមេ បញ្ច? ពហុនោ ជនស្ស បិយោ ហោតិ មនាបោ; សន្តោ សប្បុរិសា ភជន្តិ; កល្យាណោ កិត្តិសទ្ទោ អព្ភុគ្គច្ឆតិ; គិហិធម្មា អនបគតោ [គិហិធម្មា អនបេតោ (សី. បី.), គិហិធម្មមនុបគតោ (ក.)] ហោតិ; កាយស្ស ភេទា បរំ មរណា សុគតិំ សគ្គំ លោកំ ឧបបជ្ជតិ. ឥមេ ខោ, ភិក្ខវេ, បញ្ច ទានេ អានិសំសា’’តិ.

‘‘ទទមានោ បិយោ ហោតិ, សតំ ធម្មំ អនុក្កមំ;

សន្តោ នំ សទា ភជន្តិ [សន្តោ ភជន្តិ សប្បុរិសា (សី.)], សញ្ញតា ព្រហ្មចារយោ.

‘‘តេ តស្ស ធម្មំ ទេសេន្តិ, សព្ពទុក្ខាបនូទនំ;

យំ សោ ធម្មំ ឥធញ្ញាយ, បរិនិព្ពាតិ អនាសវោ’’តិ. បញ្ចមំ;