៥. រូបសុត្តំ

៦៥. ‘‘ចត្តារោមេ, ភិក្ខវេ, បុគ្គលា សន្តោ សំវិជ្ជមានា លោកស្មិំ. កតមេ ចត្តារោ? រូបប្បមាណោ រូបប្បសន្នោ, ឃោសប្បមាណោ ឃោសប្បសន្នោ, លូខប្បមាណោ លូខប្បសន្នោ, ធម្មប្បមាណោ ធម្មប្បសន្នោ – ឥមេ ខោ, ភិក្ខវេ, ចត្តារោ បុគ្គលា សន្តោ សំវិជ្ជមានា លោកស្មិ’’ន្តិ.

‘‘យេ ច រូបេ បមាណិំសុ [យេ ច រូបេន បាមិំសុ (សី. ស្យា. កំ. បី.)], យេ ច ឃោសេន អន្វគូ;

ឆន្ទរាគវសូបេតា, នាភិជានន្តិ តេ ជនា [ន តេ ជានន្តិ តំ ជនា (សី. ស្យា. កំ. បី.)].

‘‘អជ្ឈត្តញ្ច ន ជានាតិ, ពហិទ្ធា ច ន បស្សតិ;

សមន្តាវរណោ ពាលោ, ស វេ ឃោសេន វុយ្ហតិ.

‘‘អជ្ឈត្តញ្ច ន ជានាតិ, ពហិទ្ធា ច វិបស្សតិ;

ពហិទ្ធា ផលទស្សាវី, សោបិ ឃោសេន វុយ្ហតិ.

‘‘អជ្ឈត្តញ្ច បជានាតិ, ពហិទ្ធា ច វិបស្សតិ;

វិនីវរណទស្សាវី, ន សោ ឃោសេន វុយ្ហតី’’តិ. បញ្ចមំ;