៨. និគណ្ឋសុត្តំ

៧៨. ‘‘ទសហិ, ភិក្ខវេ, អសទ្ធម្មេហិ សមន្នាគតា និគណ្ឋា. កតមេហិ ទសហិ? អស្សទ្ធា, ភិក្ខវេ, និគណ្ឋា; ទុស្សីលា, ភិក្ខវេ, និគណ្ឋា; អហិរិកា, ភិក្ខវេ, និគណ្ឋា; អនោត្តប្បិនោ, ភិក្ខវេ, និគណ្ឋា; អសប្បុរិសសម្ភត្តិនោ, ភិក្ខវេ, និគណ្ឋា; អត្តុក្កំសកបរវម្ភកា, ភិក្ខវេ, និគណ្ឋា; សន្ទិដ្ឋិបរាមាសា អាធានគ្គាហី ទុប្បដិនិស្សគ្គិនោ, ភិក្ខវេ, និគណ្ឋា; កុហកា, ភិក្ខវេ, និគណ្ឋា; បាបិច្ឆា, ភិក្ខវេ, និគណ្ឋា; បាបមិត្តា, ភិក្ខវេ, និគណ្ឋា – ឥមេហិ ខោ, ភិក្ខវេ, ទសហិ អសទ្ធម្មេហិ សមន្នាគតា និគណ្ឋា’’តិ. អដ្ឋមំ.