៩. អាឃាតវត្ថុសុត្តំ

៧៩. [អ. និ. ៩.២៩] ‘‘ទសយិមានិ, ភិក្ខវេ, អាឃាតវត្ថូនិ. កតមានិ ទស? ‘អនត្ថំ មេ អចរី’តិ អាឃាតំ ពន្ធតិ; ‘អនត្ថំ មេ ចរតី’តិ អាឃាតំ ពន្ធតិ; ‘អនត្ថំ មេ ចរិស្សតី’តិ អាឃាតំ ពន្ធតិ; ‘បិយស្ស មេ មនាបស្ស អនត្ថំ អចរី’តិ…បេ… ‘អនត្ថំ ចរតី’តិ…បេ… ‘អនត្ថំ ចរិស្សតី’តិ អាឃាតំ ពន្ធតិ, ‘អប្បិយស្ស មេ អមនាបស្ស អត្ថំ អចរី’តិ…បេ… ‘អត្ថំ ចរតី’តិ…បេ… ‘អត្ថំ ចរិស្សតី’តិ អាឃាតំ ពន្ធតិ; អដ្ឋានេ ច កុប្បតិ – ឥមានិ ខោ, ភិក្ខវេ, ទស អាឃាតវត្ថូនី’’តិ. នវមំ.