៧. កាកសុត្តំ

៧៧. ‘‘ទសហិ, ភិក្ខវេ, អសទ្ធម្មេហិ សមន្នាគតោ កាកោ. កតមេហិ ទសហិ? ធំសី ច, បគព្ភោ ច, តិន្តិណោ [និល្លជ្ជោ (ក.) តិន្តិណោតិ តិន្តិណំ វុច្ចតិ តណ្ហា… (សី. ស្យា. អដ្ឋ.) អភិធម្មេ ខុទ្ទកវត្ថុវិភង្គេ តិន្តិណបទនិទ្ទេសេ បស្សិតព្ពំ] ច, មហគ្ឃសោ ច, លុទ្ទោ ច, អការុណិកោ ច, ទុព្ពលោ ច, ឱរវិតា ច, មុដ្ឋស្សតិ ច, នេចយិកោ [នេរសិកោ (សី.) តទដ្ឋកថាយំ បន ‘‘នេចយិកោ’’ ត្វេវ ទិស្សតិ] ច – ឥមេហិ ខោ, ភិក្ខវេ, ទសហិ អសទ្ធម្មេហិ សមន្នាគតោ កាកោ. ឯវមេវំ ខោ, ភិក្ខវេ, ទសហិ អសទ្ធម្មេហិ សមន្នាគតោ បាបភិក្ខុ. កតមេហិ ទសហិ? ធំសី ច, បគព្ភោ ច, តិន្តិណោ ច, មហគ្ឃសោ ច, លុទ្ទោ ច, អការុណិកោ ច, ទុព្ពលោ ច, ឱរវិតា ច, មុដ្ឋស្សតិ ច, នេចយិកោ ច – ឥមេហិ ខោ, ភិក្ខវេ, ទសហិ អសទ្ធម្មេហិ សមន្នាគតោ បាបភិក្ខូ’’តិ. សត្តមំ.