៤. អទន្តវគ្គោ

៣១. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ អទន្តំ មហតោ អនត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, អទន្តំ មហតោ អនត្ថាយ សំវត្តតី’’តិ. បឋមំ.

៣២. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ ទន្តំ មហតោ អត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, ទន្តំ មហតោ អត្ថាយ សំវត្តតី’’តិ. ទុតិយំ.

៣៣. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ អគុត្តំ មហតោ អនត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, អគុត្តំ មហតោ អនត្ថាយ សំវត្តតី’’តិ. តតិយំ.

៣៤. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ គុត្តំ មហតោ អត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, គុត្តំ មហតោ អត្ថាយ សំវត្តតី’’តិ. ចតុត្ថំ.

៣៥. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ អរក្ខិតំ មហតោ អនត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, អរក្ខិតំ មហតោ អនត្ថាយ សំវត្តតី’’តិ. បញ្ចមំ.

៣៦. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ រក្ខិតំ មហតោ អត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, រក្ខិតំ មហតោ អត្ថាយ សំវត្តតី’’តិ. ឆដ្ឋំ.

៣៧. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ អសំវុតំ មហតោ អនត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, អសំវុតំ មហតោ អនត្ថាយ សំវត្តតី’’តិ. សត្តមំ.

៣៨. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ សំវុតំ មហតោ អត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, សំវុតំ មហតោ អត្ថាយ សំវត្តតី’’តិ. អដ្ឋមំ.

៣៩. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ អទន្តំ អគុត្តំ អរក្ខិតំ អសំវុតំ មហតោ អនត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, អទន្តំ អគុត្តំ អរក្ខិតំ អសំវុតំ មហតោ អនត្ថាយ សំវត្តតី’’តិ. នវមំ.

៤០. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ ទន្តំ គុត្តំ រក្ខិតំ សំវុតំ មហតោ អត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, ទន្តំ គុត្តំ រក្ខិតំ សំវុតំ មហតោ អត្ថាយ សំវត្តតី’’តិ. ទសមំ.

អទន្តវគ្គោ ចតុត្ថោ.