នមោ តស្ស ភគវតោ អរហតោ សម្មាសម្ពុទ្ធស្ស

អង្គុត្តរនិកាយោ

ឯកកនិបាតបាឡិ

១. រូបាទិវគ្គោ

១. ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តត្រ ខោ ភគវា ភិក្ខូ អាមន្តេសិ – ‘‘ភិក្ខវោ’’តិ. ‘‘ភទន្តេ’’តិ តេ ភិក្ខូ ភគវតោ បច្ចស្សោសុំ. ភគវា ឯតទវោច –

‘‘នាហំ, ភិក្ខវេ, អញ្ញំ ឯករូបម្បិ សមនុបស្សាមិ យំ ឯវំ បុរិសស្ស ចិត្តំ បរិយាទាយ តិដ្ឋតិ យថយិទំ, ភិក្ខវេ, ឥត្ថិរូបំ. ឥត្ថិរូបំ, ភិក្ខវេ, បុរិសស្ស ចិត្តំ បរិយាទាយ តិដ្ឋតី’’តិ. បឋមំ.

២. ‘‘នាហំ, ភិក្ខវេ, អញ្ញំ ឯកសទ្ទម្បិ សមនុបស្សាមិ យំ ឯវំ បុរិសស្ស ចិត្តំ បរិយាទាយ តិដ្ឋតិ យថយិទំ, ភិក្ខវេ, ឥត្ថិសទ្ទោ. ឥត្ថិសទ្ទោ, ភិក្ខវេ, បុរិសស្ស ចិត្តំ បរិយាទាយ តិដ្ឋតី’’តិ. ទុតិយំ.

៣. ‘‘នាហំ, ភិក្ខវេ, អញ្ញំ ឯកគន្ធម្បិ សមនុបស្សាមិ យំ ឯវំ បុរិសស្ស ចិត្តំ បរិយាទាយ តិដ្ឋតិ យថយិទំ, ភិក្ខវេ, ឥត្ថិគន្ធោ. ឥត្ថិគន្ធោ, ភិក្ខវេ, បុរិសស្ស ចិត្តំ បរិយាទាយ តិដ្ឋតី’’តិ. តតិយំ.

៤. ‘‘នាហំ, ភិក្ខវេ, អញ្ញំ ឯករសម្បិ សមនុបស្សាមិ យំ ឯវំ បុរិសស្ស ចិត្តំ បរិយាទាយ តិដ្ឋតិ យថយិទំ, ភិក្ខវេ, ឥត្ថិរសោ. ឥត្ថិរសោ, ភិក្ខវេ, បុរិសស្ស ចិត្តំ បរិយាទាយ តិដ្ឋតី’’តិ. ចតុត្ថំ.

៥. ‘‘នាហំ, ភិក្ខវេ, អញ្ញំ ឯកផោដ្ឋព្ពម្បិ សមនុបស្សាមិ យំ ឯវំ បុរិសស្ស ចិត្តំ បរិយាទាយ តិដ្ឋតិ យថយិទំ, ភិក្ខវេ, ឥត្ថិផោដ្ឋព្ពោ. ឥត្ថិផោដ្ឋព្ពោ, ភិក្ខវេ, បុរិសស្ស ចិត្តំ បរិយាទាយ តិដ្ឋតី’’តិ. បញ្ចមំ.

៦. ‘‘នាហំ, ភិក្ខវេ, អញ្ញំ ឯករូបម្បិ សមនុបស្សាមិ យំ ឯវំ ឥត្ថិយា ចិត្តំ បរិយាទាយ តិដ្ឋតិ យថយិទំ, ភិក្ខវេ, បុរិសរូបំ. បុរិសរូបំ, ភិក្ខវេ, ឥត្ថិយា ចិត្តំ បរិយាទាយ តិដ្ឋតី’’តិ. ឆដ្ឋំ.

៧. ‘‘នាហំ, ភិក្ខវេ, អញ្ញំ ឯកសទ្ទម្បិ សមនុបស្សាមិ យំ ឯវំ ឥត្ថិយា ចិត្តំ បរិយាទាយ តិដ្ឋតិ យថយិទំ, ភិក្ខវេ, បុរិសសទ្ទោ. បុរិសសទ្ទោ, ភិក្ខវេ, ឥត្ថិយា ចិត្តំ បរិយាទាយ តិដ្ឋតី’’តិ. សត្តមំ.

៨. ‘‘នាហំ, ភិក្ខវេ, អញ្ញំ ឯកគន្ធម្បិ សមនុបស្សាមិ យំ ឯវំ ឥត្ថិយា ចិត្តំ បរិយាទាយ តិដ្ឋតិ យថយិទំ, ភិក្ខវេ, បុរិសគន្ធោ. បុរិសគន្ធោ, ភិក្ខវេ, ឥត្ថិយា ចិត្តំ បរិយាទាយ តិដ្ឋតី’’តិ. អដ្ឋមំ.

៩. ‘‘នាហំ, ភិក្ខវេ, អញ្ញំ ឯករសម្បិ សមនុបស្សាមិ យំ ឯវំ ឥត្ថិយា ចិត្តំ បរិយាទាយ តិដ្ឋតិ យថយិទំ, ភិក្ខវេ, បុរិសរសោ. បុរិសរសោ, ភិក្ខវេ, ឥត្ថិយា ចិត្តំ បរិយាទាយ តិដ្ឋតី’’តិ. នវមំ.

១០. ‘‘នាហំ, ភិក្ខវេ, អញ្ញំ ឯកផោដ្ឋព្ពម្បិ សមនុបស្សាមិ យំ ឯវំ ឥត្ថិយា ចិត្តំ បរិយាទាយ តិដ្ឋតិ យថយិទំ, ភិក្ខវេ, បុរិសផោដ្ឋព្ពោ. បុរិសផោដ្ឋព្ពោ, ភិក្ខវេ, ឥត្ថិយា ចិត្តំ បរិយាទាយ តិដ្ឋតី’’តិ. ទសមំ.

រូបាទិវគ្គោ បឋមោ.

២. នីវរណប្បហានវគ្គោ

១១. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នោ វា កាមច្ឆន្ទោ ឧប្បជ្ជតិ ឧប្បន្នោ វា កាមច្ឆន្ទោ ភិយ្យោភាវាយ វេបុល្លាយ សំវត្តតិ យថយិទំ, ភិក្ខវេ, សុភនិមិត្តំ. សុភនិមិត្តំ, ភិក្ខវេ, អយោនិសោ មនសិ ករោតោ អនុប្បន្នោ ចេវ កាមច្ឆន្ទោ ឧប្បជ្ជតិ ឧប្បន្នោ ច កាមច្ឆន្ទោ ភិយ្យោភាវាយ វេបុល្លាយ សំវត្តតី’’តិ. បឋមំ.

១២. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នោ វា ព្យាបាទោ ឧប្បជ្ជតិ ឧប្បន្នោ វា ព្យាបាទោ ភិយ្យោភាវាយ វេបុល្លាយ សំវត្តតិ យថយិទំ, ភិក្ខវេ, បដិឃនិមិត្តំ. បដិឃនិមិត្តំ, ភិក្ខវេ, អយោនិសោ មនសិ ករោតោ អនុប្បន្នោ ចេវ ព្យាបាទោ ឧប្បជ្ជតិ ឧប្បន្នោ ច ព្យាបាទោ ភិយ្យោភាវាយ វេបុល្លាយ សំវត្តតី’’តិ. ទុតិយំ.

១៣. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នំ វា ថិនមិទ្ធំ [ថីនមិទ្ធំ (សី. ស្យា. កំ. បី.)] ឧប្បជ្ជតិ ឧប្បន្នំ វា ថិនមិទ្ធំ ភិយ្យោភាវាយ វេបុល្លាយ សំវត្តតិ យថយិទំ, ភិក្ខវេ, អរតិ តន្ទី [តន្ទិ (ក.)] វិជម្ភិតា [វិជម្ភិកា (សី. ស្យា. កំ. បី.)] ភត្តសម្មទោ ចេតសោ ច លីនត្តំ. លីនចិត្តស្ស, ភិក្ខវេ, អនុប្បន្នញ្ចេវ ថិនមិទ្ធំ ឧប្បជ្ជតិ ឧប្បន្នញ្ច ថិនមិទ្ធំ ភិយ្យោភាវាយ វេបុល្លាយ សំវត្តតី’’តិ. តតិយំ.

១៤. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នំ វា ឧទ្ធច្ចកុក្កុច្ចំ ឧប្បជ្ជតិ ឧប្បន្នំ វា ឧទ្ធច្ចកុក្កុច្ចំ ភិយ្យោភាវាយ វេបុល្លាយ សំវត្តតិ យថយិទំ, ភិក្ខវេ, ចេតសោ អវូបសមោ. អវូបសន្តចិត្តស្ស, ភិក្ខវេ, អនុប្បន្នញ្ចេវ ឧទ្ធច្ចកុក្កុច្ចំ ឧប្បជ្ជតិ ឧប្បន្នញ្ច ឧទ្ធច្ចកុក្កុច្ចំ ភិយ្យោភាវាយ វេបុល្លាយ សំវត្តតី’’តិ. ចតុត្ថំ.

១៥. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា វិចិកិច្ឆា ឧប្បជ្ជតិ ឧប្បន្នា វា វិចិកិច្ឆា ភិយ្យោភាវាយ វេបុល្លាយ សំវត្តតិ យថយិទំ, ភិក្ខវេ, អយោនិសោមនសិការោ. អយោនិសោ, ភិក្ខវេ, មនសិ ករោតោ អនុប្បន្នា ចេវ វិចិកិច្ឆា ឧប្បជ្ជតិ ឧប្បន្នា ច វិចិកិច្ឆា ភិយ្យោភាវាយ វេបុល្លាយ សំវត្តតី’’តិ. បញ្ចមំ.

១៦. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នោ វា កាមច្ឆន្ទោ នុប្បជ្ជតិ ឧប្បន្នោ វា កាមច្ឆន្ទោ បហីយតិ យថយិទំ, ភិក្ខវេ, អសុភនិមិត្តំ. អសុភនិមិត្តំ, ភិក្ខវេ, យោនិសោ មនសិ ករោតោ អនុប្បន្នោ ចេវ កាមច្ឆន្ទោ នុប្បជ្ជតិ ឧប្បន្នោ ច កាមច្ឆន្ទោ បហីយតី’’តិ. ឆដ្ឋំ.

១៧. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នោ វា ព្យាបាទោ នុប្បជ្ជតិ ឧប្បន្នោ វា ព្យាបាទោ បហីយតិ យថយិទំ, ភិក្ខវេ, មេត្តា ចេតោវិមុត្តិ. មេត្តំ, ភិក្ខវេ, ចេតោវិមុត្តិំ យោនិសោ មនសិ ករោតោ អនុប្បន្នោ ចេវ ព្យាបាទោ នុប្បជ្ជតិ ឧប្បន្នោ ច ព្យាបាទោ បហីយតី’’តិ. សត្តមំ.

១៨. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នំ វា ថិនមិទ្ធំ នុប្បជ្ជតិ ឧប្បន្នំ វា ថិនមិទ្ធំ បហីយតិ យថយិទំ, ភិក្ខវេ, អារម្ភធាតុ និក្កមធាតុ បរក្កមធាតុ. អារទ្ធវីរិយស្ស, ភិក្ខវេ, អនុប្បន្នញ្ចេវ ថិនមិទ្ធំ នុប្បជ្ជតិ ឧប្បន្នញ្ច ថិនមិទ្ធំ បហីយតី’’តិ. អដ្ឋមំ.

១៩. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នំ វា ឧទ្ធច្ចកុក្កុច្ចំ នុប្បជ្ជតិ ឧប្បន្នំ វា ឧទ្ធច្ចកុក្កុច្ចំ បហីយតិ យថយិទំ, ភិក្ខវេ, ចេតសោ វូបសមោ. វូបសន្តចិត្តស្ស, ភិក្ខវេ, អនុប្បន្នញ្ចេវ ឧទ្ធច្ចកុក្កុច្ចំ នុប្បជ្ជតិ ឧប្បន្នញ្ច ឧទ្ធច្ចកុក្កុច្ចំ បហីយតី’’តិ. នវមំ.

២០. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា វិចិកិច្ឆា នុប្បជ្ជតិ ឧប្បន្នា វា វិចិកិច្ឆា បហីយតិ យថយិទំ, ភិក្ខវេ, យោនិសោមនសិការោ. យោនិសោ, ភិក្ខវេ, មនសិ ករោតោ អនុប្បន្នា ចេវ វិចិកិច្ឆា នុប្បជ្ជតិ ឧប្បន្នា ច វិចិកិច្ឆា បហីយតី’’តិ. ទសមំ.

នីវរណប្បហានវគ្គោ ទុតិយោ.

៣. អកម្មនិយវគ្គោ

២១. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ អភាវិតំ អកម្មនិយំ ហោតិ យថយិទំ, ភិក្ខវេ, ចិត្តំ [យថយិទំ ចិត្តំ (សី. បី.) ឯវមុបរិបិ]. ចិត្តំ, ភិក្ខវេ, អភាវិតំ អកម្មនិយំ ហោតី’’តិ. បឋមំ.

២២. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ ភាវិតំ កម្មនិយំ ហោតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, ភាវិតំ កម្មនិយំ ហោតី’’តិ. ទុតិយំ.

២៣. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ អភាវិតំ មហតោ អនត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, អភាវិតំ មហតោ អនត្ថាយ សំវត្តតី’’តិ. តតិយំ.

២៤. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ ភាវិតំ មហតោ អត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, ភាវិតំ មហតោ អត្ថាយ សំវត្តតី’’តិ. ចតុត្ថំ.

២៥. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ អភាវិតំ អបាតុភូតំ មហតោ អនត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, អភាវិតំ អបាតុភូតំ មហតោ អនត្ថាយ សំវត្តតី’’តិ. បញ្ចមំ.

២៦. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ ភាវិតំ បាតុភូតំ មហតោ អត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, ភាវិតំ បាតុភូតំ មហតោ អត្ថាយ សំវត្តតី’’តិ. ឆដ្ឋំ.

២៧. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ អភាវិតំ អពហុលីកតំ មហតោ អនត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, អភាវិតំ អពហុលីកតំ មហតោ អនត្ថាយ សំវត្តតី’’តិ. សត្តមំ.

២៨. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ ភាវិតំ ពហុលីកតំ មហតោ អត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, ភាវិតំ ពហុលីកតំ មហតោ អត្ថាយ សំវត្តតី’’តិ. អដ្ឋមំ.

២៩. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ អភាវិតំ អពហុលីកតំ ទុក្ខាធិវហំ ហោតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, អភាវិតំ អពហុលីកតំ ទុក្ខាធិវហំ ហោតី’’តិ. នវមំ.

៣០. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ ភាវិតំ ពហុលីកតំ សុខាធិវហំ ហោតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, ភាវិតំ ពហុលីកតំ សុខាធិវហំ ហោតី’’តិ. ទសមំ.

អកម្មនិយវគ្គោ តតិយោ.

៤. អទន្តវគ្គោ

៣១. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ អទន្តំ មហតោ អនត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, អទន្តំ មហតោ អនត្ថាយ សំវត្តតី’’តិ. បឋមំ.

៣២. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ ទន្តំ មហតោ អត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, ទន្តំ មហតោ អត្ថាយ សំវត្តតី’’តិ. ទុតិយំ.

៣៣. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ អគុត្តំ មហតោ អនត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, អគុត្តំ មហតោ អនត្ថាយ សំវត្តតី’’តិ. តតិយំ.

៣៤. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ គុត្តំ មហតោ អត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, គុត្តំ មហតោ អត្ថាយ សំវត្តតី’’តិ. ចតុត្ថំ.

៣៥. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ អរក្ខិតំ មហតោ អនត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, អរក្ខិតំ មហតោ អនត្ថាយ សំវត្តតី’’តិ. បញ្ចមំ.

៣៦. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ រក្ខិតំ មហតោ អត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, រក្ខិតំ មហតោ អត្ថាយ សំវត្តតី’’តិ. ឆដ្ឋំ.

៣៧. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ អសំវុតំ មហតោ អនត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, អសំវុតំ មហតោ អនត្ថាយ សំវត្តតី’’តិ. សត្តមំ.

៣៨. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ សំវុតំ មហតោ អត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, សំវុតំ មហតោ អត្ថាយ សំវត្តតី’’តិ. អដ្ឋមំ.

៣៩. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ អទន្តំ អគុត្តំ អរក្ខិតំ អសំវុតំ មហតោ អនត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, អទន្តំ អគុត្តំ អរក្ខិតំ អសំវុតំ មហតោ អនត្ថាយ សំវត្តតី’’តិ. នវមំ.

៤០. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ ទន្តំ គុត្តំ រក្ខិតំ សំវុតំ មហតោ អត្ថាយ សំវត្តតិ យថយិទំ, ភិក្ខវេ, ចិត្តំ. ចិត្តំ, ភិក្ខវេ, ទន្តំ គុត្តំ រក្ខិតំ សំវុតំ មហតោ អត្ថាយ សំវត្តតី’’តិ. ទសមំ.

អទន្តវគ្គោ ចតុត្ថោ.

៥. បណិហិតអច្ឆវគ្គោ

៤១. ‘‘សេយ្យថាបិ, ភិក្ខវេ, សាលិសូកំ វា យវសូកំ វា មិច្ឆាបណិហិតំ ហត្ថេន វា បាទេន វា អក្កន្តំ ហត្ថំ វា បាទំ វា ភេច្ឆតិ [ភិជ្ជិស្សតិ (ស្យា. កំ. ក.), ភេជ្ជតិ (សី.) មោគ្គល្លានព្យាករណំ បស្សិតព្ពំ] លោហិតំ វា ឧប្បាទេស្សតីតិ នេតំ ឋានំ វិជ្ជតិ. តំ កិស្ស ហេតុ? មិច្ឆាបណិហិតត្តា, ភិក្ខវេ, សូកស្ស. ឯវមេវំ ខោ, ភិក្ខវេ, សោ វត ភិក្ខុ មិច្ឆាបណិហិតេន ចិត្តេន អវិជ្ជំ ភេច្ឆតិ, វិជ្ជំ ឧប្បាទេស្សតិ, និព្ពានំ សច្ឆិករិស្សតីតិ នេតំ ឋានំ វិជ្ជតិ. តំ កិស្ស ហេតុ? មិច្ឆាបណិហិតត្តា, ភិក្ខវេ, ចិត្តស្សា’’តិ. បឋមំ.

៤២. ‘‘សេយ្យថាបិ, ភិក្ខវេ, សាលិសូកំ វា យវសូកំ វា សម្មាបណិហិតំ ហត្ថេន វា បាទេន វា អក្កន្តំ ហត្ថំ វា បាទំ វា ភេច្ឆតិ លោហិតំ វា ឧប្បាទេស្សតីតិ ឋានមេតំ វិជ្ជតិ. តំ កិស្ស ហេតុ? សម្មាបណិហិតត្តា, ភិក្ខវេ, សូកស្ស. ឯវមេវំ ខោ, ភិក្ខវេ, សោ វត ភិក្ខុ សម្មាបណិហិតេន ចិត្តេន អវិជ្ជំ ភេច្ឆតិ, វិជ្ជំ ឧប្បាទេស្សតិ, និព្ពានំ សច្ឆិករិស្សតីតិ ឋានមេតំ វិជ្ជតិ. តំ កិស្ស ហេតុ? សម្មាបណិហិតត្តា, ភិក្ខវេ, ចិត្តស្សា’’តិ. ទុតិយំ.

៤៣. ‘‘ឥធាហំ [ឥទាហំ (សី.)], ភិក្ខវេ, ឯកច្ចំ បុគ្គលំ បទុដ្ឋចិត្តំ ឯវំ ចេតសា ចេតោ បរិច្ច បជានាមិ – ‘ឥមម្ហិ ចេ អយំ សមយេ បុគ្គលោ កាលំ ករេយ្យ, យថាភតំ និក្ខិត្តោ ឯវំ និរយេ’. តំ កិស្ស ហេតុ? ចិត្តំ ហិស្ស, ភិក្ខវេ, បទុដ្ឋំ. ‘‘ចេតោបទោសហេតុ បន, ភិក្ខវេ, ឯវមិធេកច្ចេ សត្តា កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបជ្ជន្តី’’តិ. តតិយំ.

៤៤. ‘‘ឥធាហំ, ភិក្ខវេ, ឯកច្ចំ បុគ្គលំ បសន្នចិត្តំ ឯវំ ចេតសា ចេតោ បរិច្ច បជានាមិ – ‘ឥមម្ហិ ចេ អយំ សមយេ បុគ្គលោ កាលំ ករេយ្យ, យថាភតំ និក្ខិត្តោ ឯវំ សគ្គេ’. តំ កិស្ស ហេតុ? ចិត្តំ ហិស្ស, ភិក្ខវេ, បសន្នំ. ‘‘ចេតោបសាទហេតុ បន, ភិក្ខវេ, ឯវមិធេកច្ចេ សត្តា កាយស្ស ភេទា បរំ មរណា សុគតិំ សគ្គំ លោកំ ឧបបជ្ជន្តី’’តិ. ចតុត្ថំ.

៤៥. ‘‘សេយ្យថាបិ, ភិក្ខវេ, ឧទករហទោ អាវិលោ លុឡិតោ កលលីភូតោ តត្ថ ចក្ខុមា បុរិសោ តីរេ ឋិតោ ន បស្សេយ្យ សិប្បិសម្ពុកម្បិ [សិប្បិកសម្ពុកម្បិ (ក.)] សក្ខរកឋលម្បិ មច្ឆគុម្ពម្បិ ចរន្តម្បិ តិដ្ឋន្តម្បិ. តំ កិស្ស ហេតុ? អាវិលត្តា, ភិក្ខវេ, ឧទកស្ស. ឯវមេវំ ខោ, ភិក្ខវេ, សោ វត ភិក្ខុ អាវិលេន ចិត្តេន អត្តត្ថំ វា ញស្សតិ បរត្ថំ វា ញស្សតិ ឧភយត្ថំ វា ញស្សតិ ឧត្តរិំ វា មនុស្សធម្មា អលមរិយញាណទស្សនវិសេសំ សច្ឆិករិស្សតីតិ នេតំ ឋានំ វិជ្ជតិ. តំ កិស្ស ហេតុ? អាវិលត្តា, ភិក្ខវេ, ចិត្តស្សា’’តិ. បញ្ចមំ.

៤៦. ‘‘សេយ្យថាបិ, ភិក្ខវេ, ឧទករហទោ អច្ឆោ វិប្បសន្នោ អនាវិលោ តត្ថ ចក្ខុមា បុរិសោ តីរេ ឋិតោ បស្សេយ្យ សិប្បិសម្ពុកម្បិ សក្ខរកឋលម្បិ មច្ឆគុម្ពម្បិ ចរន្តម្បិ តិដ្ឋន្តម្បិ. តំ កិស្ស ហេតុ? អនាវិលត្តា, ភិក្ខវេ, ឧទកស្ស. ឯវមេវំ ខោ, ភិក្ខវេ, សោ វត ភិក្ខុ អនាវិលេន ចិត្តេន អត្តត្ថំ វា ញស្សតិ បរត្ថំ វា ញស្សតិ ឧភយត្ថំ វា ញស្សតិ ឧត្តរិំ វា មនុស្សធម្មា អលមរិយញាណទស្សនវិសេសំ សច្ឆិករិស្សតីតិ ឋានមេតំ វិជ្ជតិ. តំ កិស្ស ហេតុ? អនាវិលត្តា, ភិក្ខវេ, ចិត្តស្សា’’តិ. ឆដ្ឋំ.

៤៧. ‘‘សេយ្យថាបិ, ភិក្ខវេ, យានិ កានិចិ រុក្ខជាតានំ ផន្ទនោ តេសំ អគ្គមក្ខាយតិ យទិទំ មុទុតាយ ចេវ កម្មញ្ញតាយ ច. ឯវមេវំ ខោ អហំ, ភិក្ខវេ, នាញ្ញំ ឯកធម្មម្បិ សមនុបស្សាមិ យំ ឯវំ ភាវិតំ ពហុលីកតំ មុទុ ច ហោតិ កម្មញ្ញញ្ច យថយិទំ ចិត្តំ. ចិត្តំ, ភិក្ខវេ, ភាវិតំ ពហុលីកតំ មុទុ ច ហោតិ កម្មញ្ញញ្ច ហោតី’’តិ. សត្តមំ.

៤៨. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យំ ឯវំ លហុបរិវត្តំ យថយិទំ ចិត្តំ. យាវញ្ចិទំ, ភិក្ខវេ, ឧបមាបិ ន សុករា យាវ លហុបរិវត្តំ ចិត្ត’’ន្តិ. អដ្ឋមំ.

៤៩. ‘‘បភស្សរមិទំ, ភិក្ខវេ, ចិត្តំ. តញ្ច ខោ អាគន្តុកេហិ ឧបក្កិលេសេហិ ឧបក្កិលិដ្ឋ’’ន្តិ. នវមំ.

៥០. ‘‘បភស្សរមិទំ, ភិក្ខវេ, ចិត្តំ. តញ្ច ខោ អាគន្តុកេហិ ឧបក្កិលេសេហិ វិប្បមុត្ត’’ន្តិ. ទសមំ.

បណិហិតអច្ឆវគ្គោ បញ្ចមោ.

៦. អច្ឆរាសង្ឃាតវគ្គោ

៥១. ‘‘បភស្សរមិទំ, ភិក្ខវេ, ចិត្តំ. តញ្ច ខោ អាគន្តុកេហិ ឧបក្កិលេសេហិ ឧបក្កិលិដ្ឋំ. តំ អស្សុតវា បុថុជ្ជនោ យថាភូតំ នប្បជានាតិ. តស្មា ‘អស្សុតវតោ បុថុជ្ជនស្ស ចិត្តភាវនា នត្ថី’តិ វទាមី’’តិ. បឋមំ.

៥២. ‘‘បភស្សរមិទំ, ភិក្ខវេ, ចិត្តំ. តញ្ច ខោ អាគន្តុកេហិ ឧបក្កិលេសេហិ វិប្បមុត្តំ. តំ សុតវា អរិយសាវកោ យថាភូតំ បជានាតិ. តស្មា ‘សុតវតោ អរិយសាវកស្ស ចិត្តភាវនា អត្ថី’តិ វទាមី’’តិ. ទុតិយំ.

៥៣. ‘‘អច្ឆរាសង្ឃាតមត្តម្បិ ចេ, ភិក្ខវេ, ភិក្ខុ មេត្តាចិត្តំ [មេត្តំ ចិត្តំ (សី.), មេត្តចិត្តំ (ស្យា. កំ. បី. ក.)] អាសេវតិ; អយំ វុច្ចតិ, ភិក្ខវេ – ‘ភិក្ខុ អរិត្តជ្ឈានោ វិហរតិ សត្ថុសាសនករោ ឱវាទបតិករោ, អមោឃំ រដ្ឋបិណ្ឌំ ភុញ្ជតិ’. កោ បន វាទោ យេ នំ ពហុលីករោន្តី’’តិ! តតិយំ.

៥៤. ‘‘អច្ឆរាសង្ឃាតមត្តម្បិ ចេ, ភិក្ខវេ, ភិក្ខុ មេត្តាចិត្តំ ភាវេតិ; អយំ វុច្ចតិ, ភិក្ខវេ – ‘ភិក្ខុ អរិត្តជ្ឈានោ វិហរតិ សត្ថុសាសនករោ ឱវាទបតិករោ, អមោឃំ រដ្ឋបិណ្ឌំ ភុញ្ជតិ’. កោ បន វាទោ យេ នំ ពហុលីករោន្តី’’តិ! ចតុត្ថំ.

៥៥. ‘‘អច្ឆរាសង្ឃាតមត្តម្បិ ចេ, ភិក្ខវេ, ភិក្ខុ មេត្តាចិត្តំ មនសិ ករោតិ; អយំ វុច្ចតិ, ភិក្ខវេ – ‘ភិក្ខុ អរិត្តជ្ឈានោ វិហរតិ សត្ថុសាសនករោ ឱវាទបតិករោ អមោឃំ រដ្ឋបិណ្ឌំ ភុញ្ជតិ’. កោ បន វាទោ យេ នំ ពហុលីករោន្តី’’តិ! បញ្ចមំ.

៥៦. ‘‘យេ កេចិ, ភិក្ខវេ, ធម្មា អកុសលា អកុសលភាគិយា អកុសលបក្ខិកា, សព្ពេ តេ មនោបុព្ពង្គមា. មនោ តេសំ ធម្មានំ បឋមំ ឧប្បជ្ជតិ, អន្វទេវ អកុសលា ធម្មា’’តិ. ឆដ្ឋំ.

៥៧. ‘‘យេ កេចិ, ភិក្ខវេ, ធម្មា កុសលា កុសលភាគិយា កុសលបក្ខិកា, សព្ពេ តេ មនោបុព្ពង្គមា. មនោ តេសំ ធម្មានំ បឋមំ ឧប្បជ្ជតិ, អន្វទេវ កុសលា ធម្មា’’តិ. សត្តមំ.

៥៨. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ, ភិក្ខវេ, បមាទោ. បមត្តស្ស, ភិក្ខវេ, អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តី’’តិ. អដ្ឋមំ.

៥៩. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ, ភិក្ខវេ, អប្បមាទោ. អប្បមត្តស្ស, ភិក្ខវេ, អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តី’’តិ. នវមំ.

៦០. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ, ភិក្ខវេ, កោសជ្ជំ. កុសីតស្ស, ភិក្ខវេ, អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តី’’តិ. ទសមំ.

អច្ឆរាសង្ឃាតវគ្គោ ឆដ្ឋោ.

៧. វីរិយារម្ភាទិវគ្គោ

៦១. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ, ភិក្ខវេ, វីរិយារម្ភោ [វិរិយារម្ភោ (សី. ស្យា. កំ. បី.)]. អារទ្ធវីរិយស្ស, ភិក្ខវេ, អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តី’’តិ. បឋមំ.

៦២. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ, ភិក្ខវេ, មហិច្ឆតា. មហិច្ឆស្ស, ភិក្ខវេ, អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តី’’តិ. ទុតិយំ.

៦៣. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ, ភិក្ខវេ, អប្បិច្ឆតា. អប្បិច្ឆស្ស, ភិក្ខវេ, អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តី’’តិ. តតិយំ.

៦៤. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ, ភិក្ខវេ, អសន្តុដ្ឋិតា. អសន្តុដ្ឋស្ស, ភិក្ខវេ, អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តី’’តិ. ចតុត្ថំ.

៦៥. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ, ភិក្ខវេ, សន្តុដ្ឋិតា. សន្តុដ្ឋស្ស, ភិក្ខវេ, អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តី’’តិ. បញ្ចមំ.

៦៦. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ, ភិក្ខវេ, អយោនិសោមនសិការោ. អយោនិសោ, ភិក្ខវេ, មនសិ ករោតោ អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តី’’តិ. ឆដ្ឋំ.

៦៧. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ, ភិក្ខវេ, យោនិសោមនសិការោ. យោនិសោ, ភិក្ខវេ, មនសិ ករោតោ អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តី’’តិ. សត្តមំ.

៦៨. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ, ភិក្ខវេ, អសម្បជញ្ញំ. អសម្បជានស្ស, ភិក្ខវេ, អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តី’’តិ. អដ្ឋមំ.

៦៩. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ, ភិក្ខវេ, សម្បជញ្ញំ. សម្បជានស្ស, ភិក្ខវេ, អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តី’’តិ. នវមំ.

៧០. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ, ភិក្ខវេ, បាបមិត្តតា. បាបមិត្តស្ស, ភិក្ខវេ, អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តី’’តិ. ទសមំ.

វីរិយារម្ភាទិវគ្គោ សត្តមោ.

៨. កល្យាណមិត្តាទិវគ្គោ

៧១. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ, ភិក្ខវេ, កល្យាណមិត្តតា. កល្យាណមិត្តស្ស, ភិក្ខវេ, អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តី’’តិ. បឋមំ.

៧២. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា អកុសលា ធម្មា ឧប្បជ្ជន្តិ ឧប្បន្នា វា កុសលា ធម្មា បរិហាយន្តិ យថយិទំ, ភិក្ខវេ, អនុយោគោ អកុសលានំ ធម្មានំ, អននុយោគោ កុសលានំ ធម្មានំ. អនុយោគា, ភិក្ខវេ, អកុសលានំ ធម្មានំ, អននុយោគា កុសលានំ ធម្មានំ អនុប្បន្នា ចេវ អកុសលា ធម្មា ឧប្បជ្ជន្តិ ឧប្បន្នា ច កុសលា ធម្មា បរិហាយន្តី’’តិ. ទុតិយំ.

៧៣. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា កុសលា ធម្មា ឧប្បជ្ជន្តិ ឧប្បន្នា វា អកុសលា ធម្មា បរិហាយន្តិ យថយិទំ, ភិក្ខវេ, អនុយោគោ កុសលានំ ធម្មានំ, អននុយោគោ អកុសលានំ ធម្មានំ. អនុយោគា, ភិក្ខវេ, កុសលានំ ធម្មានំ, អននុយោគា អកុសលានំ ធម្មានំ អនុប្បន្នា ចេវ កុសលា ធម្មា ឧប្បជ្ជន្តិ ឧប្បន្នា ច អកុសលា ធម្មា បរិហាយន្តី’’តិ. តតិយំ.

៧៤. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា ពោជ្ឈង្គា នុប្បជ្ជន្តិ ឧប្បន្នា វា ពោជ្ឈង្គា ន ភាវនាបារិបូរិំ គច្ឆន្តិ យថយិទំ, ភិក្ខវេ, អយោនិសោមនសិការោ. អយោនិសោ, ភិក្ខវេ, មនសិ ករោតោ អនុប្បន្នា ចេវ ពោជ្ឈង្គា នុប្បជ្ជន្តិ ឧប្បន្នា ច ពោជ្ឈង្គា ន ភាវនាបារិបូរិំ គច្ឆន្តី’’តិ. ចតុត្ថំ.

៧៥. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យេន អនុប្បន្នា វា ពោជ្ឈង្គា ឧប្បជ្ជន្តិ ឧប្បន្នា វា ពោជ្ឈង្គា ភាវនាបារិបូរិំ គច្ឆន្តិ យថយិទំ, ភិក្ខវេ, យោនិសោមនសិការោ. យោនិសោ, ភិក្ខវេ, មនសិ ករោតោ អនុប្បន្នា ចេវ ពោជ្ឈង្គា ឧប្បជ្ជន្តិ ឧប្បន្នា ច ពោជ្ឈង្គា ភាវនាបារិបូរិំ គច្ឆន្តី’’តិ. បញ្ចមំ.

៧៦. ‘‘អប្បមត្តិកា ឯសា, ភិក្ខវេ, បរិហានិ យទិទំ ញាតិបរិហានិ. ឯតំ បតិកិដ្ឋំ, ភិក្ខវេ, បរិហានីនំ យទិទំ បញ្ញាបរិហានី’’តិ. ឆដ្ឋំ.

៧៧. ‘‘អប្បមត្តិកា ឯសា, ភិក្ខវេ, វុទ្ធិ យទិទំ ញាតិវុទ្ធិ. ឯតទគ្គំ, ភិក្ខវេ, វុទ្ធីនំ យទិទំ បញ្ញាវុទ្ធិ. តស្មាតិហ, ភិក្ខវេ, ឯវំ សិក្ខិតព្ពំ – ‘បញ្ញាវុទ្ធិយា វទ្ធិស្សាមា’តិ. ឯវញ្ហិ វោ, ភិក្ខវេ, សិក្ខិតព្ព’’ន្តិ. សត្តមំ.

៧៨. ‘‘អប្បមត្តិកា ឯសា, ភិក្ខវេ, បរិហានិ យទិទំ ភោគបរិហានិ. ឯតំ បតិកិដ្ឋំ, ភិក្ខវេ, បរិហានីនំ យទិទំ បញ្ញាបរិហានី’’តិ. អដ្ឋមំ.

៧៩. ‘‘អប្បមត្តិកា ឯសា, ភិក្ខវេ, វុទ្ធិ យទិទំ ភោគវុទ្ធិ. ឯតទគ្គំ, ភិក្ខវេ, វុទ្ធីនំ យទិទំ បញ្ញាវុទ្ធិ. តស្មាតិហ, ភិក្ខវេ, ឯវំ សិក្ខិតព្ពំ – ‘បញ្ញាវុទ្ធិយា វទ្ធិស្សាមា’តិ. ឯវញ្ហិ វោ, ភិក្ខវេ, សិក្ខិតព្ព’’ន្តិ. នវមំ.

៨០. ‘‘អប្បមត្តិកា ឯសា, ភិក្ខវេ, បរិហានិ យទិទំ យសោបរិហានិ. ឯតំ បតិកិដ្ឋំ, ភិក្ខវេ, បរិហានីនំ យទិទំ បញ្ញាបរិហានី’’តិ. ទសមំ.

កល្យាណមិត្តាទិវគ្គោ អដ្ឋមោ.

៩. បមាទាទិវគ្គោ

៨១. ‘‘អប្បមត្តិកា ឯសា, ភិក្ខវេ, វុទ្ធិ យទិទំ យសោវុទ្ធិ. ឯតទគ្គំ, ភិក្ខវេ, វុទ្ធីនំ យទិទំ បញ្ញាវុទ្ធិ. តស្មាតិហ, ភិក្ខវេ, ឯវំ សិក្ខិតព្ពំ – ‘បញ្ញាវុទ្ធិយា វទ្ធិស្សាមា’តិ. ឯវញ្ហិ វោ, ភិក្ខវេ, សិក្ខិតព្ព’’ន្តិ. បឋមំ.

៨២. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ, ភិក្ខវេ, បមាទោ. បមាទោ, ភិក្ខវេ, មហតោ អនត្ថាយ សំវត្តតី’’តិ. ទុតិយំ.

៨៣. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ, ភិក្ខវេ, អប្បមាទោ. អប្បមាទោ, ភិក្ខវេ, មហតោ អត្ថាយ សំវត្តតី’’តិ. តតិយំ.

៨៤. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ, ភិក្ខវេ, កោសជ្ជំ. កោសជ្ជំ, ភិក្ខវេ, មហតោ អនត្ថាយ សំវត្តតី’’តិ. ចតុត្ថំ.

៨៥. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ, ភិក្ខវេ, វីរិយារម្ភោ. វីរិយារម្ភោ, ភិក្ខវេ, មហតោ អត្ថាយ សំវត្តតី’’តិ. បញ្ចមំ.

៨៦. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ, ភិក្ខវេ, មហិច្ឆតា. មហិច្ឆតា, ភិក្ខវេ, មហតោ អនត្ថាយ សំវត្តតី’’តិ. ឆដ្ឋំ.

៨៧. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ, ភិក្ខវេ, អប្បិច្ឆតា. អប្បិច្ឆតា, ភិក្ខវេ, មហតោ អត្ថាយ សំវត្តតី’’តិ. សត្តមំ.

៨៨. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ, ភិក្ខវេ, អសន្តុដ្ឋិតា. អសន្តុដ្ឋិតា, ភិក្ខវេ, មហតោ អនត្ថាយ សំវត្តតី’’តិ. អដ្ឋមំ.

៨៩. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ, ភិក្ខវេ, សន្តុដ្ឋិតា. សន្តុដ្ឋិតា, ភិក្ខវេ, មហតោ អត្ថាយ សំវត្តតី’’តិ. នវមំ.

៩០. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ, ភិក្ខវេ, អយោនិសោ មនសិការោ. អយោនិសោមនសិការោ, ភិក្ខវេ, មហតោ អនត្ថាយ សំវត្តតី’’តិ. ទសមំ.

៩១. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ, ភិក្ខវេ, យោនិសោ មនសិការោ. យោនិសោមនសិការោ, ភិក្ខវេ, មហតោ អត្ថាយ សំវត្តតី’’តិ. ឯកាទសមំ.

៩២. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ, ភិក្ខវេ, អសម្បជញ្ញំ. អសម្បជញ្ញំ, ភិក្ខវេ, មហតោ អនត្ថាយ សំវត្តតី’’តិ. ទ្វាទសមំ.

៩៣. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ, ភិក្ខវេ, សម្បជញ្ញំ. សម្បជញ្ញំ, ភិក្ខវេ, មហតោ អត្ថាយ សំវត្តតី’’តិ. តេរសមំ.

៩៤. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ, ភិក្ខវេ, បាបមិត្តតា. បាបមិត្តតា, ភិក្ខវេ, មហតោ អនត្ថាយ សំវត្តតី’’តិ. ចុទ្ទសមំ.

៩៥. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ, ភិក្ខវេ, កល្យាណមិត្តតា. កល្យាណមិត្តតា, ភិក្ខវេ, មហតោ អត្ថាយ សំវត្តតី’’តិ. បន្នរសមំ.

៩៦. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អនត្ថាយ សំវត្តតិ យថយិទំ, ភិក្ខវេ, អនុយោគោ អកុសលានំ ធម្មានំ, អននុយោគោ កុសលានំ ធម្មានំ. អនុយោគោ, ភិក្ខវេ, អកុសលានំ ធម្មានំ, អននុយោគោ កុសលានំ ធម្មានំ មហតោ អនត្ថាយ សំវត្តតី’’តិ. សោឡសមំ.

៩៧. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ មហតោ អត្ថាយ សំវត្តតិ យថយិទំ, ភិក្ខវេ, អនុយោគោ កុសលានំ ធម្មានំ, អននុយោគោ អកុសលានំ ធម្មានំ. អនុយោគោ, ភិក្ខវេ, កុសលានំ ធម្មានំ, អននុយោគោ អកុសលានំ ធម្មានំ មហតោ អត្ថាយ សំវត្តតី’’តិ. សត្តរសមំ.

បមាទាទិវគ្គោ នវមោ.

១០. ទុតិយបមាទាទិវគ្គោ

៩៨. ‘‘អជ្ឈត្តិកំ, ភិក្ខវេ, អង្គន្តិ ករិត្វា នាញ្ញំ ឯកង្គម្បិ សមនុបស្សាមិ យំ ឯវំ មហតោ អនត្ថាយ សំវត្តតិ យថយិទំ, ភិក្ខវេ, បមាទោ. បមាទោ, ភិក្ខវេ, មហតោ អនត្ថាយ សំវត្តតី’’តិ. បឋមំ.

៩៩. ‘‘អជ្ឈត្តិកំ, ភិក្ខវេ, អង្គន្តិ ករិត្វា នាញ្ញំ ឯកង្គម្បិ សមនុបស្សាមិ យំ ឯវំ មហតោ អត្ថាយ សំវត្តតិ យថយិទំ, ភិក្ខវេ, អប្បមាទោ. អប្បមាទោ, ភិក្ខវេ, មហតោ អត្ថាយ សំវត្តតី’’តិ. ទុតិយំ.

១០០. ‘‘អជ្ឈត្តិកំ, ភិក្ខវេ, អង្គន្តិ ករិត្វា នាញ្ញំ ឯកង្គម្បិ សមនុបស្សាមិ យំ ឯវំ មហតោ អនត្ថាយ សំវត្តតិ យថយិទំ, ភិក្ខវេ, កោសជ្ជំ. កោសជ្ជំ, ភិក្ខវេ, មហតោ អនត្ថាយ សំវត្តតី’’តិ. តតិយំ.

១០១. ‘‘អជ្ឈត្តិកំ, ភិក្ខវេ, អង្គន្តិ ករិត្វា នាញ្ញំ ឯកង្គម្បិ សមនុបស្សាមិ យំ ឯវំ មហតោ អត្ថាយ សំវត្តតិ យថយិទំ, ភិក្ខវេ, វីរិយារម្ភោ. វីរិយារម្ភោ, ភិក្ខវេ, មហតោ អត្ថាយ សំវត្តតី’’តិ. ចតុត្ថំ.

១០២-១០៩. ‘‘អជ្ឈត្តិកំ, ភិក្ខវេ, អង្គន្តិ ករិត្វា នាញ្ញំ ឯកង្គម្បិ សមនុបស្សាមិ យំ ឯវំ មហតោ អនត្ថាយ សំវត្តតិ យថយិទំ, ភិក្ខវេ, មហិច្ឆតា…បេ… អប្បិច្ឆតា… អសន្តុដ្ឋិតា… សន្តុដ្ឋិតា… អយោនិសោមនសិការោ… យោនិសោមនសិការោ… អសម្បជញ្ញំ… សម្បជញ្ញំ… ទ្វាទសមំ.

១១០. ‘‘ពាហិរំ, ភិក្ខវេ, អង្គន្តិ ករិត្វា នាញ្ញំ ឯកង្គម្បិ សមនុបស្សាមិ យំ ឯវំ មហតោ អនត្ថាយ សំវត្តតិ យថយិទំ, ភិក្ខវេ, បាបមិត្តតា. បាបមិត្តតា, ភិក្ខវេ, មហតោ អនត្ថាយ សំវត្តតី’’តិ. តេរសមំ.

១១១. ‘‘ពាហិរំ, ភិក្ខវេ, អង្គន្តិ ករិត្វា នាញ្ញំ ឯកង្គម្បិ សមនុបស្សាមិ យំ ឯវំ មហតោ អត្ថាយ សំវត្តតិ យថយិទំ, ភិក្ខវេ, កល្យាណមិត្តតា. កល្យាណមិត្តតា, ភិក្ខវេ, មហតោ អត្ថាយ សំវត្តតី’’តិ. ចុទ្ទសមំ.

១១២. ‘‘អជ្ឈត្តិកំ, ភិក្ខវេ, អង្គន្តិ ករិត្វា នាញ្ញំ ឯកង្គម្បិ សមនុបស្សាមិ យំ ឯវំ មហតោ អនត្ថាយ សំវត្តតិ យថយិទំ, ភិក្ខវេ, អនុយោគោ អកុសលានំ ធម្មានំ, អននុយោគោ កុសលានំ ធម្មានំ. អនុយោគោ, ភិក្ខវេ, អកុសលានំ ធម្មានំ, អននុយោគោ កុសលានំ ធម្មានំ មហតោ អនត្ថាយ សំវត្តតី’’តិ. បន្នរសមំ.

១១៣. ‘‘អជ្ឈត្តិកំ, ភិក្ខវេ, អង្គន្តិ ករិត្វា នាញ្ញំ ឯកង្គម្បិ សមនុបស្សាមិ យំ ឯវំ មហតោ អត្ថាយ សំវត្តតិ យថយិទំ, ភិក្ខវេ, អនុយោគោ កុសលានំ ធម្មានំ, អននុយោគោ អកុសលានំ ធម្មានំ. អនុយោគោ, ភិក្ខវេ, កុសលានំ ធម្មានំ, អននុយោគោ អកុសលានំ ធម្មានំ មហតោ អត្ថាយ សំវត្តតី’’តិ. សោឡសមំ.

១១៤. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ សទ្ធម្មស្ស សម្មោសាយ អន្តរធានាយ សំវត្តតិ យថយិទំ, ភិក្ខវេ, បមាទោ. បមាទោ, ភិក្ខវេ, សទ្ធម្មស្ស សម្មោសាយ អន្តរធានាយ សំវត្តតី’’តិ. សត្តរសមំ.

១១៥. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ សទ្ធម្មស្ស ឋិតិយា អសម្មោសាយ អនន្តរធានាយ សំវត្តតិ យថយិទំ, ភិក្ខវេ, អប្បមាទោ. អប្បមាទោ, ភិក្ខវេ, សទ្ធម្មស្ស ឋិតិយា អសម្មោសាយ អនន្តរធានាយ សំវត្តតី’’តិ. អដ្ឋារសមំ.

១១៦. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ សទ្ធម្មស្ស សម្មោសាយ អន្តរធានាយ សំវត្តតិ យថយិទំ, ភិក្ខវេ, កោសជ្ជំ. កោសជ្ជំ, ភិក្ខវេ, សទ្ធម្មស្ស សម្មោសាយ អន្តរធានាយ សំវត្តតី’’តិ. ឯកូនវីសតិមំ.

១១៧. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ សទ្ធម្មស្ស ឋិតិយា អសម្មោសាយ អនន្តរធានាយ សំវត្តតិ យថយិទំ, ភិក្ខវេ, វីរិយារម្ភោ. វីរិយារម្ភោ, ភិក្ខវេ, សទ្ធម្មស្ស ឋិតិយា អសម្មោសាយ អនន្តរធានាយ សំវត្តតី’’តិ. វីសតិមំ.

១១៨-១២៨. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ សទ្ធម្មស្ស សម្មោសាយ អន្តរធានាយ សំវត្តតិ យថយិទំ, ភិក្ខវេ, មហិច្ឆតា…បេ… អប្បិច្ឆតា… អសន្តុដ្ឋិតា… សន្តុដ្ឋិតា… អយោនិសោមនសិការោ… យោនិសោមនសិការោ… អសម្បជញ្ញំ… សម្បជញ្ញំ … បាបមិត្តតា… កល្យាណមិត្តតា… អនុយោគោ អកុសលានំ ធម្មានំ, អននុយោគោ កុសលានំ ធម្មានំ. អនុយោគោ, ភិក្ខវេ, អកុសលានំ ធម្មានំ, អននុយោគោ កុសលានំ ធម្មានំ សទ្ធម្មស្ស សម្មោសាយ អន្តរធានាយ សំវត្តតី’’តិ. ឯកត្តិំសតិមំ.

១២៩. ‘‘នាហំ, ភិក្ខវេ, អញ្ញំ ឯកធម្មម្បិ សមនុបស្សាមិ យោ ឯវំ សទ្ធម្មស្ស ឋិតិយា អសម្មោសាយ អនន្តរធានាយ សំវត្តតិ យថយិទំ, ភិក្ខវេ, អនុយោគោ កុសលានំ ធម្មានំ, អននុយោគោ អកុសលានំ ធម្មានំ. អនុយោគោ, ភិក្ខវេ, កុសលានំ ធម្មានំ, អននុយោគោ អកុសលានំ ធម្មានំ សទ្ធម្មស្ស ឋិតិយា អសម្មោសាយ អនន្តរធានាយ សំវត្តតី’’តិ. ចតុក្កោដិកំ និដ្ឋិតំ. ពាត្តិំសតិមំ.

១៣០. ‘‘យេ តេ, ភិក្ខវេ, ភិក្ខូ អធម្មំ ធម្មោតិ ទីបេន្តិ តេ, ភិក្ខវេ, ភិក្ខូ ពហុជនអហិតាយ បដិបន្នា ពហុជនអសុខាយ, ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សានំ. ពហុញ្ច តេ, ភិក្ខវេ, ភិក្ខូ អបុញ្ញំ បសវន្តិ, តេ ចិមំ [តេបិមំ (សី.)] សទ្ធម្មំ អន្តរធាបេន្តី’’តិ. តេត្តិំសតិមំ.

១៣១. ‘‘យេ តេ, ភិក្ខវេ, ភិក្ខូ ធម្មំ អធម្មោតិ ទីបេន្តិ តេ, ភិក្ខវេ, ភិក្ខូ ពហុជនអហិតាយ បដិបន្នា ពហុជនអសុខាយ, ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សានំ. ពហុញ្ច តេ, ភិក្ខវេ, ភិក្ខូ អបុញ្ញំ បសវន្តិ, តេ ចិមំ សទ្ធម្មំ អន្តរធាបេន្តី’’តិ. ចតុត្តិំសតិមំ.

១៣២-១៣៩. ‘‘យេ តេ, ភិក្ខវេ, ភិក្ខូ អវិនយំ វិនយោតិ ទីបេន្តិ…បេ… វិនយំ អវិនយោតិ ទីបេន្តិ…បេ… អភាសិតំ អលបិតំ តថាគតេន ភាសិតំ លបិតំ តថាគតេនាតិ ទីបេន្តិ…បេ… ភាសិតំ លបិតំ តថាគតេន អភាសិតំ អលបិតំ តថាគតេនាតិ ទីបេន្តិ…បេ… អនាចិណ្ណំ តថាគតេន អាចិណ្ណំ តថាគតេនាតិ ទីបេន្តិ…បេ… អាចិណ្ណំ តថាគតេន អនាចិណ្ណំ តថាគតេនាតិ ទីបេន្តិ…បេ… អបញ្ញត្តំ តថាគតេន បញ្ញត្តំ តថាគតេនាតិ ទីបេន្តិ…បេ… បញ្ញត្តំ តថាគតេន អបញ្ញត្តំ តថាគតេនាតិ ទីបេន្តិ តេ, ភិក្ខវេ, ភិក្ខូ ពហុជនអហិតាយ បដិបន្នា ពហុជនអសុខាយ, ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សានំ. ពហុញ្ច តេ, ភិក្ខវេ, ភិក្ខូ អបុញ្ញំ បសវន្តិ, តេ ចិមំ សទ្ធម្មំ អន្តរធាបេន្តី’’តិ. ទ្វាចត្តាលីសតិមំ.

ទុតិយបមាទាទិវគ្គោ ទសមោ.

១១. អធម្មវគ្គោ

១៤០. ‘‘យេ តេ, ភិក្ខវេ, ភិក្ខូ អធម្មំ អធម្មោតិ ទីបេន្តិ តេ, ភិក្ខវេ, ភិក្ខូ ពហុជនហិតាយ បដិបន្នា ពហុជនសុខាយ, ពហុនោ ជនស្ស អត្ថាយ ហិតាយ សុខាយ ទេវមនុស្សានំ. ពហុញ្ច តេ, ភិក្ខវេ, ភិក្ខូ បុញ្ញំ បសវន្តិ, តេ ចិមំ សទ្ធម្មំ ឋបេន្តី’’តិ [ថបេន្តីតិ (ក.)]. បឋមំ.

១៤១. ‘‘យេ តេ, ភិក្ខវេ, ភិក្ខូ ធម្មំ ធម្មោតិ ទីបេន្តិ តេ, ភិក្ខវេ, ភិក្ខូ ពហុជនហិតាយ បដិបន្នា ពហុជនសុខាយ, ពហុនោ ជនស្ស អត្ថាយ ហិតាយ សុខាយ ទេវមនុស្សានំ. ពហុញ្ច តេ, ភិក្ខវេ, ភិក្ខូ បុញ្ញំ បសវន្តិ, តេ ចិមំ សទ្ធម្មំ ឋបេន្តី’’តិ. ទុតិយំ.

១៤២-១៤៩. ‘‘យេ តេ, ភិក្ខវេ, ភិក្ខូ អវិនយំ អវិនយោតិ ទីបេន្តិ…បេ… វិនយំ វិនយោតិ ទីបេន្តិ…បេ… អភាសិតំ អលបិតំ តថាគតេន អភាសិតំ អលបិតំ តថាគតេនាតិ ទីបេន្តិ…បេ… ភាសិតំ លបិតំ តថាគតេន ភាសិតំ លបិតំ តថាគតេនាតិ ទីបេន្តិ…បេ… អនាចិណ្ណំ តថាគតេន អនាចិណ្ណំ តថាគតេនាតិ ទីបេន្តិ…បេ… អាចិណ្ណំ តថាគតេន អាចិណ្ណំ តថាគតេនាតិ ទីបេន្តិ…បេ… អបញ្ញត្តំ តថាគតេន អបញ្ញត្តំ តថាគតេនាតិ ទីបេន្តិ…បេ… បញ្ញត្តំ តថាគតេន បញ្ញត្តំ តថាគតេនាតិ ទីបេន្តិ តេ, ភិក្ខវេ, ភិក្ខូ ពហុជនហិតាយ បដិបន្នា ពហុជនសុខាយ, ពហុនោ ជនស្ស អត្ថាយ ហិតាយ សុខាយ ទេវមនុស្សានំ. ពហុញ្ច តេ, ភិក្ខវេ, ភិក្ខូ បុញ្ញំ បសវន្តិ, តេ ចិមំ សទ្ធម្មំ ឋបេន្តី’’តិ. ទសមំ.

អធម្មវគ្គោ ឯកាទសមោ.

១២. អនាបត្តិវគ្គោ

១៥០. ‘‘យេ តេ, ភិក្ខវេ, ភិក្ខូ អនាបត្តិំ អាបត្តីតិ ទីបេន្តិ តេ, ភិក្ខវេ, ភិក្ខូ ពហុជនអហិតាយ បដិបន្នា ពហុជនអសុខាយ, ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សានំ. ពហុញ្ច តេ, ភិក្ខវេ, ភិក្ខូ អបុញ្ញំ បសវន្តិ, តេ ចិមំ សទ្ធម្មំ អន្តរធាបេន្តី’’តិ. បឋមំ.

១៥១. ‘‘យេ តេ, ភិក្ខវេ, ភិក្ខូ អាបត្តិំ អនាបត្តីតិ ទីបេន្តិ តេ, ភិក្ខវេ, ភិក្ខូ ពហុជនអហិតាយ បដិបន្នា ពហុជនអសុខាយ, ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សានំ. ពហុញ្ច តេ, ភិក្ខវេ, ភិក្ខូ អបុញ្ញំ បសវន្តិ, តេ ចិមំ សទ្ធម្មំ អន្តរធាបេន្តី’’តិ. ទុតិយំ.

១៥២-១៥៩. ‘‘យេ តេ, ភិក្ខវេ, ភិក្ខូ លហុកំ អាបត្តិំ គរុកា អាបត្តីតិ ទីបេន្តិ…បេ… គរុកំ អាបត្តិំ លហុកា អាបត្តីតិ ទីបេន្តិ…បេ… ទុដ្ឋុល្លំ អាបត្តិំ អទុដ្ឋុល្លា អាបត្តីតិ ទីបេន្តិ…បេ… អទុដ្ឋុល្លំ អាបត្តិំ ទុដ្ឋុល្លា អាបត្តីតិ ទីបេន្តិ…បេ… សាវសេសំ អាបត្តិំ អនវសេសា អាបត្តីតិ ទីបេន្តិ…បេ… អនវសេសំ អាបត្តិំ សាវសេសា អាបត្តីតិ ទីបេន្តិ…បេ… សប្បដិកម្មំ អាបត្តិំ អប្បដិកម្មា អាបត្តីតិ ទីបេន្តិ…បេ… អប្បដិកម្មំ អាបត្តិំ សប្បដិកម្មា អាបត្តីតិ ទីបេន្តិ តេ, ភិក្ខវេ, ភិក្ខូ ពហុជនអហិតាយ បដិបន្នា ពហុជនអសុខាយ, ពហុនោ ជនស្ស អនត្ថាយ អហិតាយ ទុក្ខាយ ទេវមនុស្សានំ. ពហុញ្ច តេ, ភិក្ខវេ, ភិក្ខូ អបុញ្ញំ បសវន្តិ, តេ ចិមំ សទ្ធម្មំ អន្តរធាបេន្តី’’តិ. ទសមំ.

១៦០. ‘‘យេ តេ, ភិក្ខវេ, ភិក្ខូ អនាបត្តិំ អនាបត្តីតិ ទីបេន្តិ តេ, ភិក្ខវេ, ភិក្ខូ ពហុជនហិតាយ បដិបន្នា ពហុជនសុខាយ, ពហុនោ ជនស្ស អត្ថាយ ហិតាយ សុខាយ ទេវមនុស្សានំ. ពហុញ្ច តេ, ភិក្ខវេ, ភិក្ខូ បុញ្ញំ បសវន្តិ, តេ ចិមំ សទ្ធម្មំ ឋបេន្តី’’តិ. ឯកាទសមំ.

១៦១. ‘‘យេ តេ, ភិក្ខវេ, ភិក្ខូ អាបត្តិំ អាបត្តីតិ ទីបេន្តិ តេ, ភិក្ខវេ, ភិក្ខូ ពហុជនហិតាយ បដិបន្នា ពហុជនសុខាយ, ពហុនោ ជនស្ស អត្ថាយ ហិតាយ សុខាយ ទេវមនុស្សានំ. ពហុញ្ច តេ, ភិក្ខវេ, ភិក្ខូ បុញ្ញំ បសវន្តិ, តេ ចិមំ សទ្ធម្មំ ឋបេន្តី’’តិ. ទ្វាទសមំ.