១៩. កាយគតាសតិវគ្គោ

៥៦៣. ‘‘យស្ស កស្សចិ, ភិក្ខវេ, មហាសមុទ្ទោ ចេតសា ផុដោ អន្តោគធា តស្ស កុន្នទិយោ យា កាចិ សមុទ្ទង្គមា; ឯវមេវំ, ភិក្ខវេ, យស្ស កស្សចិ កាយគតា សតិ ភាវិតា ពហុលីកតា អន្តោគធា តស្ស កុសលា ធម្មា យេ កេចិ វិជ្ជាភាគិយា’’តិ.

៥៦៤-៥៧០. ‘‘ឯកធម្មោ, ភិក្ខវេ, ភាវិតោ ពហុលីកតោ មហតោ សំវេគាយ សំវត្តតិ… មហតោ អត្ថាយ សំវត្តតិ… មហតោ យោគក្ខេមាយ សំវត្តតិ… សតិសម្បជញ្ញាយ សំវត្តតិ… ញាណទស្សនប្បដិលាភាយ សំវត្តតិ… ទិដ្ឋធម្មសុខវិហារាយ សំវត្តតិ… វិជ្ជាវិមុត្តិផលសច្ឆិកិរិយាយ សំវត្តតិ. កតមោ ឯកធម្មោ? កាយគតា សតិ. អយំ ខោ, ភិក្ខវេ, ឯកធម្មោ ភាវិតោ ពហុលីកតោ មហតោ សំវេគាយ សំវត្តតិ… មហតោ អត្ថាយ សំវត្តតិ… មហតោ យោគក្ខេមាយ សំវត្តតិ… សតិសម្បជញ្ញាយ សំវត្តតិ… ញាណទស្សនប្បដិលាភាយ សំវត្តតិ… ទិដ្ឋធម្មសុខវិហារាយ សំវត្តតិ… វិជ្ជាវិមុត្តិផលសច្ឆិកិរិយាយ សំវត្តតី’’តិ.

៥៧១. ‘‘ឯកធម្មេ, ភិក្ខវេ, ភាវិតេ ពហុលីកតេ កាយោបិ បស្សម្ភតិ, ចិត្តម្បិ បស្សម្ភតិ, វិតក្កវិចារាបិ វូបសម្មន្តិ, កេវលាបិ វិជ្ជាភាគិយា ធម្មា ភាវនាបារិបូរិំ គច្ឆន្តិ. កតមស្មិំ ឯកធម្មេ? កាយគតាយ សតិយា. ឥមស្មិំ ខោ, ភិក្ខវេ, ឯកធម្មេ ភាវិតេ ពហុលីកតេ កាយោបិ បស្សម្ភតិ, ចិត្តម្បិ បស្សម្ភតិ, វិតក្កវិចារាបិ វូបសម្មន្តិ, កេវលាបិ វិជ្ជាភាគិយា ធម្មា ភាវនាបារិបូរិំ គច្ឆន្តី’’តិ.

៥៧២. ‘‘ឯកធម្មេ, ភិក្ខវេ, ភាវិតេ ពហុលីកតេ អនុប្បន្នា ចេវ អកុសលា ធម្មា នុប្បជ្ជន្តិ, ឧប្បន្នា ច អកុសលា ធម្មា បហីយន្តិ. កតមស្មិំ ឯកធម្មេ? កាយគតាយ សតិយា. ឥមស្មិំ ខោ, ភិក្ខវេ, ឯកធម្មេ ភាវិតេ ពហុលីកតេ អនុប្បន្នា ចេវ អកុសលា ធម្មា នុប្បជ្ជន្តិ, ឧប្បន្នា ច អកុសលា ធម្មា បហីយន្តី’’តិ.

៥៧៣. ‘‘ឯកធម្មេ, ភិក្ខវេ, ភាវិតេ ពហុលីកតេ អនុប្បន្នា ចេវ កុសលា ធម្មា ឧប្បជ្ជន្តិ, ឧប្បន្នា ច កុសលា ធម្មា ភិយ្យោភាវាយ វេបុល្លាយ សំវត្តន្តិ. កតមស្មិំ ឯកធម្មេ? កាយគតាយ សតិយា. ឥមស្មិំ ខោ, ភិក្ខវេ, ឯកធម្មេ ភាវិតេ ពហុលីកតេ អនុប្បន្នា ចេវ កុសលា ធម្មា ឧប្បជ្ជន្តិ, ឧប្បន្នា ច កុសលា ធម្មា ភិយ្យោភាវាយ វេបុល្លាយ សំវត្តន្តី’’តិ.

៥៧៤. ‘‘ឯកធម្មេ, ភិក្ខវេ, ភាវិតេ ពហុលីកតេ អវិជ្ជា បហីយតិ, វិជ្ជា ឧប្បជ្ជតិ, អស្មិមានោ បហីយតិ, អនុសយា សមុគ្ឃាតំ គច្ឆន្តិ, សំយោជនា បហីយន្តិ. កតមស្មិំ ឯកធម្មេ? កាយគតាយ សតិយា. ឥមស្មិំ ខោ, ភិក្ខវេ, ឯកធម្មេ ភាវិតេ ពហុលីកតេ អវិជ្ជា បហីយតិ, វិជ្ជា ឧប្បជ្ជតិ, អស្មិមានោ បហីយតិ, អនុសយា សមុគ្ឃាតំ គច្ឆន្តិ, សំយោជនា បហីយន្តី’’តិ.

៥៧៥-៥៧៦. ‘‘ឯកធម្មោ, ភិក្ខវេ, ភាវិតោ ពហុលីកតោ បញ្ញាបភេទាយ សំវត្តតិ… អនុបាទាបរិនិព្ពានាយ សំវត្តតិ. កតមោ ឯកធម្មោ? កាយគតា សតិ. អយំ ខោ, ភិក្ខវេ, ឯកធម្មោ ភាវិតោ ពហុលីកតោ បញ្ញាបភេទាយ សំវត្តតិ… អនុបាទាបរិនិព្ពានាយ សំវត្តតី’’តិ.

៥៧៧-៥៧៩. ‘‘ឯកធម្មេ, ភិក្ខវេ, ភាវិតេ ពហុលីកតេ អនេកធាតុបដិវេធោ ហោតិ… នានាធាតុបដិវេធោ ហោតិ… អនេកធាតុបដិសម្ភិទា ហោតិ. កតមស្មិំ ឯកធម្មេ? កាយគតាយ សតិយា. ឥមស្មិំ ខោ, ភិក្ខវេ, ឯកធម្មេ ភាវិតេ ពហុលីកតេ អនេកធាតុបដិវេធោ ហោតិ… នានាធាតុបដិវេធោ ហោតិ… អនេកធាតុបដិសម្ភិទា ហោតី’’តិ.

៥៨០-៥៨៣. ‘‘ឯកធម្មោ, ភិក្ខវេ, ភាវិតោ ពហុលីកតោ សោតាបត្តិផលសច្ឆិកិរិយាយ សំវត្តតិ… សកទាគាមិផលសច្ឆិកិរិយាយ សំវត្តតិ… អនាគាមិផលសច្ឆិកិរិយាយ សំវត្តតិ… អរហត្តផលសច្ឆិកិរិយាយ សំវត្តតិ. កតមោ ឯកធម្មោ? កាយគតា សតិ. អយំ ខោ, ភិក្ខវេ, ឯកធម្មោ ភាវិតោ ពហុលីកតោ សោតាបត្តិផលសច្ឆិកិរិយាយ សំវត្តតិ… សកទាគាមិផលសច្ឆិកិរិយាយ សំវត្តតិ… អនាគាមិផលសច្ឆិកិរិយាយ សំវត្តតិ… អរហត្តផលសច្ឆិកិរិយាយ សំវត្តតី’’តិ.

៥៨៤-៥៩៩. ‘‘ឯកធម្មោ, ភិក្ខវេ, ភាវិតោ ពហុលីកតោ បញ្ញាបដិលាភាយ សំវត្តតិ… បញ្ញាវុទ្ធិយា សំវត្តតិ… បញ្ញាវេបុល្លាយ សំវត្តតិ… មហាបញ្ញតាយ សំវត្តតិ… បុថុបញ្ញតាយ សំវត្តតិ… វិបុលបញ្ញតាយ សំវត្តតិ… គម្ភីរបញ្ញតាយ សំវត្តតិ… អសាមន្តបញ្ញតាយ [អសមត្ថបញ្ញតាយ (ស្យា. កំ.), អសមត្តបញ្ញតាយ (ក.), អសមន្តបញ្ញតាយ (ដីកា) បដិ. ម. អដ្ឋ. ២.៣.១ បស្សិតព្ពំ] សំវត្តតិ… ភូរិបញ្ញតាយ សំវត្តតិ… បញ្ញាពាហុល្លាយ សំវត្តតិ… សីឃបញ្ញតាយ សំវត្តតិ… លហុបញ្ញតាយ សំវត្តតិ… ហាសបញ្ញតាយ [ហាសុបញ្ញតាយ (សី. បី.)] សំវត្តតិ… ជវនបញ្ញតាយ សំវត្តតិ… តិក្ខបញ្ញតាយ សំវត្តតិ… និព្ពេធិកបញ្ញតាយ សំវត្តតិ. កតមោ ឯកធម្មោ? កាយគតា សតិ. អយំ ខោ, ភិក្ខវេ, ឯកធម្មោ ភាវិតោ ពហុលីកតោ បញ្ញាបដិលាភាយ សំវត្តតិ… បញ្ញាវុទ្ធិយា សំវត្តតិ… បញ្ញាវេបុល្លាយ សំវត្តតិ… មហាបញ្ញតាយ សំវត្តតិ… បុថុបញ្ញតាយ សំវត្តតិ… វិបុលបញ្ញតាយ សំវត្តតិ… គម្ភីរបញ្ញតាយ សំវត្តតិ… អសាមន្តបញ្ញតាយ សំវត្តតិ… ភូរិបញ្ញតាយ សំវត្តតិ… បញ្ញាពាហុល្លាយ សំវត្តតិ… សីឃបញ្ញតាយ សំវត្តតិ… លហុបញ្ញតាយ សំវត្តតិ… ហាសបញ្ញតាយ សំវត្តតិ… ជវនបញ្ញតាយ សំវត្តតិ… តិក្ខបញ្ញតាយ សំវត្តតិ… និព្ពេធិកបញ្ញតាយ សំវត្តតី’’តិ.

កាយគតាសតិវគ្គោ ឯកូនវីសតិមោ.