២០. អមតវគ្គោ

៦០០. ‘‘អមតំ តេ, ភិក្ខវេ, ន បរិភុញ្ជន្តិ យេ កាយគតាសតិំ ន បរិភុញ្ជន្តិ. អមតំ តេ, ភិក្ខវេ, បរិភុញ្ជន្តិ យេ កាយគតាសតិំ បរិភុញ្ជន្តី’’តិ.

៦០១. ‘‘អមតំ តេសំ, ភិក្ខវេ, អបរិភុត្តំ យេសំ កាយគតាសតិ អបរិភុត្តា. អមតំ តេសំ, ភិក្ខវេ, បរិភុត្តំ យេសំ កាយគតាសតិ បរិភុត្តា’’តិ.

៦០២. ‘‘អមតំ តេសំ, ភិក្ខវេ, បរិហីនំ យេសំ កាយគតាសតិ បរិហីនា. អមតំ តេសំ, ភិក្ខវេ, អបរិហីនំ យេសំ កាយគតាសតិ អបរិហីនា’’តិ.

៦០៣. ‘‘អមតំ តេសំ, ភិក្ខវេ, វិរទ្ធំ យេសំ កាយគតាសតិ វិរទ្ធា. អមតំ តេសំ, ភិក្ខវេ, អារទ្ធំ [អវិរទ្ធំ (ក.)] យេសំ កាយគតាសតិ អារទ្ធា’’តិ.

៦០៤. ‘‘អមតំ តេ, ភិក្ខវេ, បមាទិំសុ យេ កាយគតាសតិំ បមាទិំសុ. អមតំ តេ, ភិក្ខវេ, ន បមាទិំសុ យេ កាយគតាសតិំ ន បមាទិំសុ’’.

៦០៥. ‘‘អមតំ តេសំ, ភិក្ខវេ, បមុដ្ឋំ យេសំ កាយគតាសតិ បមុដ្ឋា. អមតំ តេសំ, ភិក្ខវេ, អប្បមុដ្ឋំ យេសំ កាយគតាសតិ អប្បមុដ្ឋា’’តិ.

៦០៦. ‘‘អមតំ តេសំ, ភិក្ខវេ, អនាសេវិតំ យេសំ កាយគតាសតិ អនាសេវិតា. អមតំ តេសំ, ភិក្ខវេ, អាសេវិតំ យេសំ កាយគតាសតិ អាសេវិតា’’តិ.

៦០៧. ‘‘អមតំ តេសំ, ភិក្ខវេ, អភាវិតំ យេសំ កាយគតាសតិ អភាវិតា. អមតំ តេសំ, ភិក្ខវេ, ភាវិតំ យេសំ កាយគតាសតិ ភាវិតា’’តិ.

៦០៨. ‘‘អមតំ តេសំ, ភិក្ខវេ, អពហុលីកតំ យេសំ កាយគតាសតិ អពហុលីកតា. អមតំ តេសំ, ភិក្ខវេ, ពហុលីកតំ យេសំ កាយគតាសតិ ពហុលីកតា’’តិ.

៦០៩. ‘‘អមតំ តេសំ, ភិក្ខវេ, អនភិញ្ញាតំ យេសំ កាយគតាសតិ អនភិញ្ញាតា. អមតំ តេសំ, ភិក្ខវេ, អភិញ្ញាតំ យេសំ កាយគតាសតិ អភិញ្ញាតា’’តិ.

៦១០. ‘‘អមតំ តេសំ, ភិក្ខវេ, អបរិញ្ញាតំ យេសំ កាយគតាសតិ អបរិញ្ញាតា. អមតំ តេសំ, ភិក្ខវេ, បរិញ្ញាតំ យេសំ កាយគតាសតិ បរិញ្ញាតា’’តិ.

៦១១. ‘‘អមតំ តេសំ, ភិក្ខវេ, អសច្ឆិកតំ យេសំ កាយគតាសតិ អសច្ឆិកតា. អមតំ តេសំ, ភិក្ខវេ, សច្ឆិកតំ យេសំ កាយគតាសតិ សច្ឆិកតា’’តិ. (….) [(ឯកកនិបាតស្ស សុត្តសហស្សំ សមត្តំ.) (សី. ស្យា. កំ. បី.)]

(ឥទមវោច ភគវា. អត្តមនា តេ ភិក្ខូ ភគវតោ ភាសិតំ អភិនន្ទុន្តិ.) [( ) ឯត្ថន្តរេ បាឋោ សី. ស្យា. កំ. បី. បោត្ថកេសុ នត្ថិ]

អមតវគ្គោ វីសតិមោ.