១៥. អដ្ឋានបាឡិ

១. បឋមវគ្គោ

២៦៨. ‘‘អដ្ឋានមេតំ, ភិក្ខវេ, អនវកាសោ យំ ទិដ្ឋិសម្បន្នោ បុគ្គលោ កញ្ចិ [កិញ្ចិ (ក.)] សង្ខារំ និច្ចតោ ឧបគច្ឆេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ បុថុជ្ជនោ កញ្ចិ សង្ខារំ និច្ចតោ ឧបគច្ឆេយ្យ. ឋានមេតំ វិជ្ជតី’’តិ.

២៦៩. ‘‘អដ្ឋានមេតំ, ភិក្ខវេ, អនវកាសោ យំ ទិដ្ឋិសម្បន្នោ បុគ្គលោ កញ្ចិ សង្ខារំ សុខតោ ឧបគច្ឆេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ បុថុជ្ជនោ កញ្ចិ សង្ខារំ សុខតោ ឧបគច្ឆេយ្យ. ឋានមេតំ វិជ្ជតី’’តិ.

២៧០. ‘‘អដ្ឋានមេតំ, ភិក្ខវេ, អនវកាសោ យំ ទិដ្ឋិសម្បន្នោ បុគ្គលោ កញ្ចិ ធម្មំ អត្តតោ ឧបគច្ឆេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ បុថុជ្ជនោ កញ្ចិ ធម្មំ អត្តតោ ឧបគច្ឆេយ្យ. ឋានមេតំ វិជ្ជតី’’តិ.

២៧១. ‘‘អដ្ឋានមេតំ, ភិក្ខវេ, អនវកាសោ យំ ទិដ្ឋិសម្បន្នោ បុគ្គលោ មាតរំ ជីវិតា វោរោបេយ្យ. នេតំ ឋានំ វិជ្ជតិ. ឋានញ្ច ខោ, ភិក្ខវេ, វិជ្ជតិ យំ បុថុជ្ជនោ មាតរំ ជីវិតា វោរោបេយ្យ. ឋានមេតំ វិជ្ជតី’’តិ.

២៧២. ‘‘អដ្ឋានមេតំ, ភិក្ខវេ, អនវកាសោ យំ ទិដ្ឋិសម្បន្នោ បុគ្គលោ បិតរំ ជីវិតា វោរោបេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ បុថុជ្ជនោ បិតរំ ជីវិតា វោរោបេយ្យ. ឋានមេតំ វិជ្ជតី’’តិ.

២៧៣. ‘‘អដ្ឋានមេតំ, ភិក្ខវេ, អនវកាសោ យំ ទិដ្ឋិសម្បន្នោ បុគ្គលោ អរហន្តំ ជីវិតា វោរោបេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ បុថុជ្ជនោ អរហន្តំ ជីវិតា វោរោបេយ្យ. ឋានមេតំ វិជ្ជតី’’តិ.

២៧៤. ‘‘អដ្ឋានមេតំ, ភិក្ខវេ, អនវកាសោ យំ ទិដ្ឋិសម្បន្នោ បុគ្គលោ តថាគតស្ស បទុដ្ឋចិត្តោ លោហិតំ ឧប្បាទេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ បុថុជ្ជនោ តថាគតស្ស បទុដ្ឋចិត្តោ លោហិតំ ឧប្បាទេយ្យ. ឋានមេតំ វិជ្ជតី’’តិ.

២៧៥. ‘‘អដ្ឋានមេតំ, ភិក្ខវេ, អនវកាសោ យំ ទិដ្ឋិសម្បន្នោ បុគ្គលោ សង្ឃំ ភិន្ទេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ បុថុជ្ជនោ សង្ឃំ ភិន្ទេយ្យ. ឋានមេតំ វិជ្ជតី’’តិ.

២៧៦. ‘‘អដ្ឋានមេតំ, ភិក្ខវេ, អនវកាសោ យំ ទិដ្ឋិសម្បន្នោ បុគ្គលោ អញ្ញំ សត្ថារំ ឧទ្ទិសេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ បុថុជ្ជនោ អញ្ញំ សត្ថារំ ឧទ្ទិសេយ្យ. ឋានមេតំ វិជ្ជតី’’តិ.

២៧៧. ‘‘អដ្ឋានមេតំ, ភិក្ខវេ, អនវកាសោ យំ ឯកិស្សា លោកធាតុយា ទ្វេ អរហន្តោ សម្មាសម្ពុទ្ធា អបុព្ពំ អចរិមំ ឧប្បជ្ជេយ្យុំ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ ឯកិស្សា លោកធាតុយា ឯកោវ អរហំ សម្មាសម្ពុទ្ធោ ឧប្បជ្ជេយ្យ. ឋានមេតំ វិជ្ជតី’’តិ.

វគ្គោ បឋមោ.

២. ទុតិយវគ្គោ

២៧៨. ‘‘អដ្ឋានមេតំ, ភិក្ខវេ, អនវកាសោ យំ ឯកិស្សា លោកធាតុយា ទ្វេ រាជានោ ចក្កវត្តី អបុព្ពំ អចរិមំ ឧប្បជ្ជេយ្យុំ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ ឯកិស្សា លោកធាតុយា ឯកោ រាជា ចក្កវត្តី ឧប្បជ្ជេយ្យ. ឋានមេតំ វិជ្ជតី’’តិ.

២៧៩. ‘‘អដ្ឋានមេតំ, ភិក្ខវេ, អនវកាសោ យំ ឥត្ថី អរហំ អស្ស សម្មាសម្ពុទ្ធោ. នេតំ ឋានំ វិជ្ជតិ. ឋានញ្ច ខោ, ឯតំ, ភិក្ខវេ, វិជ្ជតិ យំ បុរិសោ អរហំ អស្ស សម្មាសម្ពុទ្ធោ. ឋានមេតំ វិជ្ជតី’’តិ.

២៨០. ‘‘អដ្ឋានមេតំ, ភិក្ខវេ, អនវកាសោ យំ ឥត្ថី រាជា អស្ស ចក្កវត្តី. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ បុរិសោ រាជា អស្ស ចក្កវត្តី. ឋានមេតំ វិជ្ជតី’’តិ.

២៨១-២៨៣. ‘‘អដ្ឋានមេតំ, ភិក្ខវេ, អនវកាសោ យំ ឥត្ថី សក្កត្តំ ការេយ្យ…បេ… មារត្តំ ការេយ្យ…បេ… ព្រហ្មត្តំ ការេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ បុរិសោ សក្កត្តំ ការេយ្យ…បេ… មារត្តំ ការេយ្យ…បេ… ព្រហ្មត្តំ ការេយ្យ. ឋានមេតំ វិជ្ជតី’’តិ.

២៨៤. ‘‘អដ្ឋានមេតំ, ភិក្ខវេ, អនវកាសោ យំ កាយទុច្ចរិតស្ស ឥដ្ឋោ កន្តោ មនាបោ វិបាកោ និព្ពត្តេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ កាយទុច្ចរិតស្ស អនិដ្ឋោ អកន្តោ អមនាបោ វិបាកោ និព្ពត្តេយ្យ. ឋានមេតំ វិជ្ជតី’’តិ.

២៨៥-២៨៦. ‘‘អដ្ឋានមេតំ, ភិក្ខវេ, អនវកាសោ យំ វចីទុច្ចរិតស្ស…បេ… យំ មនោទុច្ចរិតស្ស ឥដ្ឋោ កន្តោ មនាបោ វិបាកោ និព្ពត្តេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ មនោទុច្ចរិតស្ស អនិដ្ឋោ អកន្តោ អមនាបោ វិបាកោ និព្ពត្តេយ្យ. ឋានមេតំ វិជ្ជតី’’តិ.

វគ្គោ ទុតិយោ.

៣. តតិយវគ្គោ

២៨៧. ‘‘អដ្ឋានមេតំ, ភិក្ខវេ, អនវកាសោ យំ កាយសុចរិតស្ស អនិដ្ឋោ អកន្តោ អមនាបោ វិបាកោ និព្ពត្តេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ កាយសុចរិតស្ស ឥដ្ឋោ កន្តោ មនាបោ វិបាកោ និព្ពត្តេយ្យ. ឋានមេតំ វិជ្ជតី’’តិ.

២៨៨-២៨៩. ‘‘អដ្ឋានមេតំ, ភិក្ខវេ, អនវកាសោ យំ វចីសុចរិតស្ស…បេ… មនោសុចរិតស្ស អនិដ្ឋោ អកន្តោ អមនាបោ វិបាកោ និព្ពត្តេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ មនោសុចរិតស្ស ឥដ្ឋោ កន្តោ មនាបោ វិបាកោ និព្ពត្តេយ្យ. ឋានមេតំ វិជ្ជតី’’តិ.

២៩០. ‘‘អដ្ឋានមេតំ, ភិក្ខវេ, អនវកាសោ យំ កាយទុច្ចរិតសមង្គី តន្និទានា តប្បច្ចយា កាយស្ស ភេទា បរំ មរណា សុគតិំ សគ្គំ លោកំ ឧបបជ្ជេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ កាយទុច្ចរិតសមង្គី តន្និទានា តប្បច្ចយា កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបជ្ជេយ្យ. ឋានមេតំ វិជ្ជតី’’តិ.

២៩១-២៩២. ‘‘អដ្ឋានមេតំ, ភិក្ខវេ, អនវកាសោ យំ វចីទុច្ចរិតសមង្គី…បេ… យំ មនោទុច្ចរិតសមង្គី តន្និទានា តប្បច្ចយា កាយស្ស ភេទា បរំ មរណា សុគតិំ សគ្គំ លោកំ ឧបបជ្ជេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ មនោទុច្ចរិតសមង្គី តន្និទានា តប្បច្ចយា កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបជ្ជេយ្យ. ឋានមេតំ វិជ្ជតី’’តិ.

២៩៣. ‘‘អដ្ឋានមេតំ, ភិក្ខវេ, អនវកាសោ យំ កាយសុចរិតសមង្គី តន្និទានា តប្បច្ចយា កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបជ្ជេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ កាយសុចរិតសមង្គី តន្និទានា តប្បច្ចយា កាយស្ស ភេទា បរំ មរណា សុគតិំ សគ្គំ លោកំ ឧបបជ្ជេយ្យ. ឋានមេតំ វិជ្ជតី’’តិ.

២៩៤-២៩៥. ‘‘អដ្ឋានមេតំ, ភិក្ខវេ, អនវកាសោ យំ វចីសុចរិតសមង្គី…បេ… យំ មនោសុចរិតសមង្គី តន្និទានា តប្បច្ចយា កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបជ្ជេយ្យ. នេតំ ឋានំ វិជ្ជតិ. ឋានញ្ច ខោ ឯតំ, ភិក្ខវេ, វិជ្ជតិ យំ មនោសុចរិតសមង្គី តន្និទានា តប្បច្ចយា កាយស្ស ភេទា បរំ មរណា សុគតិំ សគ្គំ លោកំ ឧបបជ្ជេយ្យ. ឋានមេតំ វិជ្ជតី’’តិ.

វគ្គោ តតិយោ.

អដ្ឋានបាឡិ បន្នរសមោ.