៦. ឆដ្ឋវគ្គោ

២៤៨. ‘‘ឯតទគ្គំ, ភិក្ខវេ, មម សាវកានំ ឧបាសកានំ បឋមំ សរណំ គច្ឆន្តានំ យទិទំ តបុស្សភល្លិកា [តបស្សុភល្លិកា (សី. បី.)] វាណិជា’’.

២៤៩. … ទាយកានំ យទិទំ សុទត្តោ គហបតិ អនាថបិណ្ឌិកោ.

២៥០. … ធម្មកថិកានំ យទិទំ ចិត្តោ គហបតិ មច្ឆិកាសណ្ឌិកោ.

២៥១. … ចតូហិ សង្គហវត្ថូហិ បរិសំ សង្គណ្ហន្តានំ យទិទំ ហត្ថកោ អាឡវកោ.

២៥២. … បណីតទាយកានំ យទិទំ មហានាមោ សក្កោ.

២៥៣. … មនាបទាយកានំ យទិទំ ឧគ្គោ គហបតិ វេសាលិកោ.

២៥៤. … សង្ឃុបដ្ឋាកានំ យទិទំ ហត្ថិគាមកោ ឧគ្គតោ គហបតិ.

២៥៥. … អវេច្ចប្បសន្នានំ យទិទំ សូរម្ពដ្ឋោ [សូរោ អម្ពដ្ឋោ (សី. ស្យា. កំ. បី.) សុរេពន្ធោ (ក.)].

២៥៦. … បុគ្គលប្បសន្នានំ យទិទំ ជីវកោ កោមារភច្ចោ.

២៥៧. … វិស្សាសកានំ យទិទំ នកុលបិតា គហបតីតិ.

វគ្គោ ឆដ្ឋោ.