១៤. ឯតទគ្គវគ្គោ

១. បឋមវគ្គោ

១៨៨. ‘‘ឯតទគ្គំ, ភិក្ខវេ, មម សាវកានំ ភិក្ខូនំ រត្តញ្ញូនំ យទិទំ អញ្ញាសិកោណ្ឌញ្ញោ’’ [អញ្ញាតកោណ្ឌញ្ញោតិ (ក.), អញ្ញាកោណ្ឌញ្ញោ (សី. ស្យា. កំ. បី.)].

១៨៩. … មហាបញ្ញានំ យទិទំ សារិបុត្តោ.

១៩០. … ឥទ្ធិមន្តានំ យទិទំ មហាមោគ្គល្លានោ.

១៩១. … ធុតវាទានំ [ធុតង្គធរានំ (កត្ថចិ)] យទិទំ មហាកស្សបោ.

១៩២. … ទិព្ពចក្ខុកានំ យទិទំ អនុរុទ្ធោ.

១៩៣. … ឧច្ចាកុលិកានំ យទិទំ ភទ្ទិយោ កាឡិគោធាយបុត្តោ.

១៩៤. … មញ្ជុស្សរានំ យទិទំ លកុណ្ឌក [លកុណ្ដក (ស្យា. កំ.)] ភទ្ទិយោ.

១៩៥. … សីហនាទិកានំ យទិទំ បិណ្ឌោលភារទ្វាជោ.

១៩៦. … ធម្មកថិកានំ យទិទំ បុណ្ណោ មន្តាណិបុត្តោ.

១៩៧. … សំខិត្តេន ភាសិតស្ស វិត្ថារេន អត្ថំ វិភជន្តានំ យទិទំ មហាកច្ចានោតិ.

វគ្គោ បឋមោ.

២. ទុតិយវគ្គោ

១៩៨. ‘‘ឯតទគ្គំ, ភិក្ខវេ, មម សាវកានំ ភិក្ខូនំ មនោមយំ កាយំ អភិនិម្មិនន្តានំ យទិទំ ចូឡបន្ថកោ’’ [ចុល្លបន្ថកោ (សី. ស្យា. កំ. បី.)].

១៩៩. … ចេតោវិវដ្ដកុសលានំ យទិទំ ចូឡបន្ថកោ.

២០០. … សញ្ញាវិវដ្ដកុសលានំ យទិទំ មហាបន្ថកោ.

២០១. … អរណវិហារីនំ យទិទំ សុភូតិ.

២០២. … ទក្ខិណេយ្យានំ យទិទំ សុភូតិ.

២០៣. … អារញ្ញកានំ យទិទំ រេវតោ ខទិរវនិយោ.

២០៤. … ឈាយីនំ យទិទំ កង្ខារេវតោ.

២០៥. … អារទ្ធវីរិយានំ យទិទំ សោណោ កោឡិវិសោ.

២០៦. … កល្យាណវាក្ករណានំ យទិទំ សោណោ កុដិកណ្ណោ.

២០៧. … លាភីនំ យទិទំ សីវលិ.

២០៨. … សទ្ធាធិមុត្តានំ យទិទំ វក្កលីតិ.

វគ្គោ ទុតិយោ.

៣. តតិយវគ្គោ

២០៩. ‘‘ឯតទគ្គំ, ភិក្ខវេ, មម សាវកានំ ភិក្ខូនំ សិក្ខាកាមានំ យទិទំ រាហុលោ’’.

២១០. … សទ្ធាបព្ពជិតានំ យទិទំ រដ្ឋបាលោ.

២១១. … បឋមំ សលាកំ គណ្ហន្តានំ យទិទំ កុណ្ឌធានោ.

២១២. … បដិភានវន្តានំ យទិទំ វង្គីសោ.

២១៣. … សមន្តបាសាទិកានំ យទិទំ ឧបសេនោ វង្គន្តបុត្តោ.

២១៤. … សេនាសនបញ្ញាបកានំ យទិទំ ទព្ពោ មល្លបុត្តោ.

២១៥. … ទេវតានំ បិយមនាបានំ យទិទំ បិលិន្ទវច្ឆោ.

២១៦. … ខិប្បាភិញ្ញានំ យទិទំ ពាហិយោ ទារុចីរិយោ.

២១៧. … ចិត្តកថិកានំ យទិទំ កុមារកស្សបោ.

២១៨. … បដិសម្ភិទាបត្តានំ យទិទំ មហាកោដ្ឋិតោតិ [មហាកោដ្ឋិកោតិ (អញ្ញេសុ សុត្តេសុ មរម្មបោត្ថកេ)].

វគ្គោ តតិយោ.

៤. ចតុត្ថវគ្គោ

២១៩. ‘‘ឯតទគ្គំ, ភិក្ខវេ, មម សាវកានំ ភិក្ខូនំ ពហុស្សុតានំ យទិទំ អានន្ទោ’’.

២២០. … សតិមន្តានំ យទិទំ អានន្ទោ.

២២១. … គតិមន្តានំ យទិទំ អានន្ទោ.

២២២. … ធិតិមន្តានំ យទិទំ អានន្ទោ.

២២៣. … ឧបដ្ឋាកានំ យទិទំ អានន្ទោ.

២២៤. … មហាបរិសានំ យទិទំ ឧរុវេលកស្សបោ.

២២៥. … កុលប្បសាទកានំ យទិទំ កាឡុទាយី.

២២៦. … អប្បាពាធានំ យទិទំ ពាកុលោ [ពក្កុលោ (សី. ស្យា. កំ. បី.)].

២២៧. … បុព្ពេនិវាសំ អនុស្សរន្តានំ យទិទំ សោភិតោ.

២២៨. … វិនយធរានំ យទិទំ ឧបាលិ.

២២៩. … ភិក្ខុនោវាទកានំ យទិទំ នន្ទកោ.

២៣០. … ឥន្ទ្រិយេសុ គុត្តទ្វារានំ យទិទំ នន្ទោ.

២៣១. … ភិក្ខុឱវាទកានំ យទិទំ មហាកប្បិនោ.

២៣២. … តេជោធាតុកុសលានំ យទិទំ សាគតោ.

២៣៣. … បដិភានេយ្យកានំ យទិទំ រាធោ.

២៣៤. … លូខចីវរធរានំ យទិទំ មោឃរាជាតិ.

វគ្គោ ចតុត្ថោ.

៥. បញ្ចមវគ្គោ

២៣៥. ‘‘ឯតទគ្គំ, ភិក្ខវេ, មម សាវិកានំ ភិក្ខុនីនំ រត្តញ្ញូនំ យទិទំ មហាបជាបតិគោតមី’’.

២៣៦. … មហាបញ្ញានំ យទិទំ ខេមា.

២៣៧. … ឥទ្ធិមន្តីនំ យទិទំ ឧប្បលវណ្ណា.

២៣៨. … វិនយធរានំ យទិទំ បដាចារា.

២៣៩. … ធម្មកថិកានំ យទិទំ ធម្មទិន្នា.

២៤០. … ឈាយីនំ យទិទំ នន្ទា.

២៤១. … អារទ្ធវីរិយានំ យទិទំ សោណា.

២៤២. … ទិព្ពចក្ខុកានំ យទិទំ ពកុលា [សកុលា (សី. ស្យា. កំ. បី.)].

២៤៣. … ខិប្បាភិញ្ញានំ យទិទំ ភទ្ទា កុណ្ឌលកេសា.

២៤៤. … បុព្ពេនិវាសំ អនុស្សរន្តីនំ យទិទំ ភទ្ទា កាបិលានី.

២៤៥. … មហាភិញ្ញប្បត្តានំ យទិទំ ភទ្ទកច្ចានា.

២៤៦. … លូខចីវរធរានំ យទិទំ កិសាគោតមី.

២៤៧. … សទ្ធាធិមុត្តានំ យទិទំ សិង្គាលកមាតាតិ [សិគាលមាតាតិ (សី. ស្យា. កំ. បី.)].

វគ្គោ បញ្ចមោ.

៦. ឆដ្ឋវគ្គោ

២៤៨. ‘‘ឯតទគ្គំ, ភិក្ខវេ, មម សាវកានំ ឧបាសកានំ បឋមំ សរណំ គច្ឆន្តានំ យទិទំ តបុស្សភល្លិកា [តបស្សុភល្លិកា (សី. បី.)] វាណិជា’’.

២៤៩. … ទាយកានំ យទិទំ សុទត្តោ គហបតិ អនាថបិណ្ឌិកោ.

២៥០. … ធម្មកថិកានំ យទិទំ ចិត្តោ គហបតិ មច្ឆិកាសណ្ឌិកោ.

២៥១. … ចតូហិ សង្គហវត្ថូហិ បរិសំ សង្គណ្ហន្តានំ យទិទំ ហត្ថកោ អាឡវកោ.

២៥២. … បណីតទាយកានំ យទិទំ មហានាមោ សក្កោ.

២៥៣. … មនាបទាយកានំ យទិទំ ឧគ្គោ គហបតិ វេសាលិកោ.

២៥៤. … សង្ឃុបដ្ឋាកានំ យទិទំ ហត្ថិគាមកោ ឧគ្គតោ គហបតិ.

២៥៥. … អវេច្ចប្បសន្នានំ យទិទំ សូរម្ពដ្ឋោ [សូរោ អម្ពដ្ឋោ (សី. ស្យា. កំ. បី.) សុរេពន្ធោ (ក.)].

២៥៦. … បុគ្គលប្បសន្នានំ យទិទំ ជីវកោ កោមារភច្ចោ.

២៥៧. … វិស្សាសកានំ យទិទំ នកុលបិតា គហបតីតិ.

វគ្គោ ឆដ្ឋោ.

៧. សត្តមវគ្គោ

២៥៨. ‘‘ឯតទគ្គំ, ភិក្ខវេ, មម សាវិកានំ ឧបាសិកានំ បឋមំ សរណំ គច្ឆន្តីនំ យទិទំ សុជាតា សេនិយធីតា’’ [សេនានី ធីតា (សី. ស្យា. កំ. បី.)].

២៥៩. … ទាយិកានំ យទិទំ វិសាខា មិគារមាតា.

២៦០. … ពហុស្សុតានំ យទិទំ ខុជ្ជុត្តរា.

២៦១. … មេត្តាវិហារីនំ យទិទំ សាមាវតី.

២៦២. … ឈាយីនំ យទិទំ ឧត្តរានន្ទមាតា.

២៦៣. … បណីតទាយិកានំ យទិទំ សុប្បវាសា កោលិយធីតា.

២៦៤. … គិលានុបដ្ឋាកីនំ យទិទំ សុប្បិយា ឧបាសិកា.

២៦៥. … អវេច្ចប្បសន្នានំ យទិទំ កាតិយានី.

២៦៦. … វិស្សាសិកានំ យទិទំ នកុលមាតា គហបតានី.

២៦៧. … អនុស្សវប្បសន្នានំ យទិទំ កាឡី ឧបាសិកា កុលឃរិកា [កុលឃរិកា (ក.)] តិ.

វគ្គោ សត្តមោ.

ឯតទគ្គវគ្គោ ចុទ្ទសមោ.