੧੦. ਦਸਕਵਾਰੋ

੩੩੦. ਦਸ ਆਘਾਤਵਤ੍ਥੂਨਿ. ਦਸ ਆਘਾਤਪਟਿਵਿਨਯਾ. ਦਸ ਵਿਨੀਤਵਤ੍ਥੂਨਿ. ਦਸਵਤ੍ਥੁਕਾ ਮਿਚ੍ਛਾਦਿਟ੍ਠਿ. ਦਸਵਤ੍ਥੁਕਾ ਸਮ੍ਮਾਦਿਟ੍ਠਿ. ਦਸ ਅਨ੍ਤਗ੍ਗਾਹਿਕਾ ਦਿਟ੍ਠਿ. ਦਸ ਮਿਚ੍ਛਤ੍ਤਾ. ਦਸ ਸਮ੍ਮਤ੍ਤਾ. ਦਸ ਅਕੁਸਲਕਮ੍ਮਪਥਾ. ਦਸ ਕੁਸਲਕਮ੍ਮਪਥਾ. ਦਸ ਅਧਮ੍ਮਿਕਾ ਸਲਾਕਗ੍ਗਾਹਾ. ਦਸ ਧਮ੍ਮਿਕਾ ਸਲਾਕਗ੍ਗਾਹਾ. ਸਾਮਣੇਰਾਨਂ ਦਸ ਸਿਕ੍ਖਾਪਦਾਨਿ. ਦਸਹਙ੍ਗੇਹਿ ਸਮਨ੍ਨਾਗਤੋ ਸਾਮਣੇਰੋ ਨਾਸੇਤਬ੍ਬੋ.

ਦਸਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਬਾਲੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਅਤ੍ਤਨੋ ਭਾਸਪਰਿਯਨ੍ਤਂ ਨ ਉਗ੍ਗਣ੍ਹਾਤਿ, ਪਰਸ੍ਸ ਭਾਸਪਰਿਯਨ੍ਤਂ ਨ ਉਗ੍ਗਣ੍ਹਾਤਿ, ਅਤ੍ਤਨੋ ਭਾਸਪਰਿਯਨ੍ਤਂ ਅਨੁਗ੍ਗਹੇਤ੍ਵਾ ਪਰਸ੍ਸ ਭਾਸਪਰਿਯਨ੍ਤਂ ਅਨੁਗ੍ਗਹੇਤ੍ਵਾ ਅਧਮ੍ਮੇਨ ਕਾਰੇਤਿ, ਅਪ੍ਪਟਿਞ੍ਞਾਯ ਆਪਤ੍ਤਿਂ ਨ ਜਾਨਾਤਿ, ਆਪਤ੍ਤਿਯਾ ਮੂਲਂ ਨ ਜਾਨਾਤਿ, ਆਪਤ੍ਤਿਸਮੁਦਯਂ ਨ ਜਾਨਾਤਿ, ਆਪਤ੍ਤਿਨਿਰੋਧਂ ਨ ਜਾਨਾਤਿ, ਆਪਤ੍ਤਿਨਿਰੋਧਗਾਮਿਨਿਂ ਪਟਿਪਦਂ ਨ ਜਾਨਾਤਿ.

ਦਸਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਪਣ੍ਡਿਤੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਅਤ੍ਤਨੋ ਭਾਸਪਰਿਯਨ੍ਤਂ ਉਗ੍ਗਣ੍ਹਾਤਿ, ਪਰਸ੍ਸ ਭਾਸਪਰਿਯਨ੍ਤਂ ਉਗ੍ਗਣ੍ਹਾਤਿ, ਅਤ੍ਤਨੋ ਭਾਸਪਰਿਯਨ੍ਤਂ ਉਗ੍ਗਹੇਤ੍ਵਾ ਪਰਸ੍ਸ ਭਾਸਪਰਿਯਨ੍ਤਂ ਉਗ੍ਗਹੇਤ੍ਵਾ ਧਮ੍ਮੇਨ ਕਾਰੇਤਿ, ਪਟਿਞ੍ਞਾਯ ਆਪਤ੍ਤਿਂ ਜਾਨਾਤਿ, ਆਪਤ੍ਤਿਯਾ ਮੂਲਂ ਜਾਨਾਤਿ, ਆਪਤ੍ਤਿਸਮੁਦਯਂ ਜਾਨਾਤਿ, ਆਪਤ੍ਤਿਨਿਰੋਧਂ ਜਾਨਾਤਿ, ਆਪਤ੍ਤਿਨਿਰੋਧਗਾਮਿਨਿਂ ਪਟਿਪਦਂ ਜਾਨਾਤਿ.

ਅਪਰੇਹਿਪਿ ਦਸਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਬਾਲੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਅਧਿਕਰਣਂ ਨ ਜਾਨਾਤਿ, ਅਧਿਕਰਣਸ੍ਸ ਮੂਲਂ ਨ ਜਾਨਾਤਿ, ਅਧਿਕਰਣਸਮੁਦਯਂ ਨ ਜਾਨਾਤਿ, ਅਧਿਕਰਣਨਿਰੋਧਂ ਨ ਜਾਨਾਤਿ, ਅਧਿਕਰਣਨਿਰੋਧਗਾਮਿਨਿਂ ਪਟਿਪਦਂ ਨ ਜਾਨਾਤਿ, ਵਤ੍ਥੁਂ ਨ ਜਾਨਾਤਿ, ਨਿਦਾਨਂ [ਉਦ੍ਦਾਨਂ (ਕ.)] ਨ ਜਾਨਾਤਿ, ਪਞ੍ਞਤ੍ਤਿਂ ਨ ਜਾਨਾਤਿ, ਅਨੁਪਞ੍ਞਤ੍ਤਿਂ ਨ ਜਾਨਾਤਿ, ਅਨੁਸਨ੍ਧਿਵਚਨਪਥਂ ਨ ਜਾਨਾਤਿ.

ਦਸਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਪਣ੍ਡਿਤੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਅਧਿਕਰਣਂ ਜਾਨਾਤਿ, ਅਧਿਕਰਣਸ੍ਸ ਮੂਲਂ ਜਾਨਾਤਿ, ਅਧਿਕਰਣਸਮੁਦਯਂ ਜਾਨਾਤਿ, ਅਧਿਕਰਣਨਿਰੋਧਂ ਜਾਨਾਤਿ, ਅਧਿਕਰਣਨਿਰੋਧਗਾਮਿਨਿਂ ਪਟਿਪਦਂ ਜਾਨਾਤਿ, ਵਤ੍ਥੁਂ ਜਾਨਾਤਿ, ਨਿਦਾਨਂ ਜਾਨਾਤਿ, ਪਞ੍ਞਤ੍ਤਿਂ ਜਾਨਾਤਿ, ਅਨੁਪਞ੍ਞਤ੍ਤਿਂ ਜਾਨਾਤਿ, ਅਨੁਸਨ੍ਧਿਵਚਨਪਥਂ ਜਾਨਾਤਿ.

ਅਪਰੇਹਿਪਿ ਦਸਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਬਾਲੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਞਤ੍ਤਿਂ ਨ ਜਾਨਾਤਿ, ਞਤ੍ਤਿਯਾ ਕਰਣਂ ਨ ਜਾਨਾਤਿ, ਨ ਪੁਬ੍ਬਕੁਸਲੋ ਹੋਤਿ, ਨ ਅਪਰਕੁਸਲੋ ਹੋਤਿ, ਅਕਾਲਞ੍ਞੂ ਚ ਹੋਤਿ, ਆਪਤ੍ਤਾਨਾਪਤ੍ਤਿਂ ਨ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਨ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਨ ਜਾਨਾਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਨ ਜਾਨਾਤਿ, ਆਚਰਿਯਪਰਮ੍ਪਰਾ ਖੋ ਪਨਸ੍ਸ ਨ ਸੁਗ੍ਗਹਿਤਾ ਹੋਤਿ ਨ ਸੁਮਨਸਿਕਤਾ ਨ ਸੂਪਧਾਰਿਤਾ.

ਦਸਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਪਣ੍ਡਿਤੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਞਤ੍ਤਿਂ ਜਾਨਾਤਿ, ਞਤ੍ਤਿਯਾ ਕਰਣਂ ਜਾਨਾਤਿ, ਪੁਬ੍ਬਕੁਸਲੋ ਹੋਤਿ, ਅਪਰਕੁਸਲੋ ਹੋਤਿ, ਕਾਲਞ੍ਞੂ ਚ ਹੋਤਿ, ਆਪਤ੍ਤਾਨਾਪਤ੍ਤਿਂ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਜਾਨਾਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਜਾਨਾਤਿ, ਆਚਰਿਯਪਰਮ੍ਪਰਾ ਖੋ ਪਨਸ੍ਸ ਸੁਗ੍ਗਹਿਤਾ ਹੋਤਿ ਸੁਮਨਸਿਕਤਾ ਸੂਪਧਾਰਿਤਾ.

ਅਪਰੇਹਿਪਿ ਦਸਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਬਾਲੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਆਪਤ੍ਤਾਨਾਪਤ੍ਤਿਂ ਨ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਨ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਨ ਜਾਨਾਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਨ ਜਾਨਾਤਿ, ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ ਵਿਤ੍ਥਾਰੇਨ ਨ ਸ੍ਵਾਗਤਾਨਿ ਹੋਨ੍ਤਿ ਨ ਸੁਵਿਭਤ੍ਤਾਨਿ ਨ ਸੁਪ੍ਪਵਤ੍ਤੀਨਿ ਨ ਸੁਵਿਨਿਚ੍ਛਿਤਾਨਿ ਸੁਤ੍ਤਸੋ ਅਨੁਬ੍ਯਞ੍ਜਨਸੋ, ਆਪਤ੍ਤਾਨਾਪਤ੍ਤਿਂ ਨ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਨ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਨ ਜਾਨਾਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਨ ਜਾਨਾਤਿ, ਅਧਿਕਰਣੇ ਚ ਨ ਵਿਨਿਚ੍ਛਯਕੁਸਲੋ ਹੋਤਿ.

ਦਸਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਪਣ੍ਡਿਤੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਆਪਤ੍ਤਾਨਾਪਤ੍ਤਿਂ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਜਾਨਾਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਜਾਨਾਤਿ, ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ ਵਿਤ੍ਥਾਰੇਨ ਸ੍ਵਾਗਤਾਨਿ ਹੋਨ੍ਤਿ ਸੁਵਿਭਤ੍ਤਾਨਿ ਸੁਪ੍ਪਵਤ੍ਤੀਨਿ ਸੁਵਿਨਿਚ੍ਛਿਤਾਨਿ ਸੁਤ੍ਤਸੋ ਅਨੁਬ੍ਯਞ੍ਜਨਸੋ, ਆਪਤ੍ਤਾਨਾਪਤ੍ਤਿਂ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਜਾਨਾਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਜਾਨਾਤਿ, ਅਧਿਕਰਣੇ ਚ ਵਿਨਿਚ੍ਛਯਕੁਸਲੋ ਹੋਤਿ.

[ਅ. ਨਿ. ੧੦.੩੩] ਦਸਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ ਉਬ੍ਬਾਹਿਕਾਯ ਸਮ੍ਮਨ੍ਨਿਤਬ੍ਬੋ. ਦਸ ਅਤ੍ਥਵਸੇ ਪਟਿਚ੍ਚ ਤਥਾਗਤੇਨ ਸਾਵਕਾਨਂ ਸਿਕ੍ਖਾਪਦਂ ਪਞ੍ਞਤ੍ਤਂ. ਦਸ ਆਦੀਨਵਾ ਰਾਜਨ੍ਤੇਪੁਰਪ੍ਪਵੇਸਨੇ. ਦਸ ਦਾਨਵਤ੍ਥੂਨਿ. ਦਸ ਰਤਨਾਨਿ. ਦਸਵਗ੍ਗੋ ਭਿਕ੍ਖੁਸਙ੍ਘੋ. ਦਸਵਗ੍ਗੇਨ ਗਣੇਨ ਉਪਸਮ੍ਪਾਦੇਤਬ੍ਬਂ. ਦਸ ਪਂਸੁਕੂਲਾਨਿ. ਦਸ ਚੀਵਰਧਾਰਣਾ [ਚੀਵਰਧਾਰਣਾਨਿ (ਸ੍ਯਾ.)]. ਦਸਾਹਪਰਮਂ ਅਤਿਰੇਕਚੀਵਰਂ ਧਾਰੇਤਬ੍ਬਂ. ਦਸ ਸੁਕ੍ਕਾਨਿ. ਦਸ ਇਤ੍ਥਿਯੋ. ਦਸ ਭਰਿਯਾਯੋ. ਵੇਸਾਲਿਯਾ ਦਸ ਵਤ੍ਥੂਨਿ ਦੀਪੇਨ੍ਤਿ. ਦਸ ਪੁਗ੍ਗਲਾ ਅਵਨ੍ਦਿਯਾ. ਦਸ ਅਕ੍ਕੋਸਵਤ੍ਥੂਨਿ. ਦਸਹਾਕਾਰੇਹਿ ਪੇਸੁਞ੍ਞਂ ਉਪਸਂਹਰਤਿ. ਦਸ ਸੇਨਾਸਨਾਨਿ. ਦਸ ਵਰਾਨਿ ਯਾਚਿਂਸੁ. ਦਸ ਅਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ. ਦਸ ਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ. ਦਸਾਨਿਸਂਸਾ ਯਾਗੁਯਾ. ਦਸ ਮਂਸਾ ਅਕਪ੍ਪਿਯਾ. ਦਸ ਪਰਮਾਨਿ. ਦਸਵਸ੍ਸੇਨ ਭਿਕ੍ਖੁਨਾ ਬ੍ਯਤ੍ਤੇਨ ਪਟਿਬਲੇਨ ਪਬ੍ਬਾਜੇਤਬ੍ਬਂ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੋ ਉਪਟ੍ਠਾਪੇਤਬ੍ਬੋ. ਦਸਵਸ੍ਸਾਯ ਭਿਕ੍ਖੁਨਿਯਾ ਬ੍ਯਤ੍ਤਾਯ ਪਟਿਬਲਾਯ ਪਬ੍ਬਾਜੇਤਬ੍ਬਂ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੀ ਉਪਟ੍ਠਾਪੇਤਬ੍ਬਾ. ਦਸਵਸ੍ਸਾਯ ਭਿਕ੍ਖੁਨਿਯਾ ਬ੍ਯਤ੍ਤਾਯ ਪਟਿਬਲਾਯ ਵੁਟ੍ਠਾਪਨਸਮ੍ਮੁਤਿ ਸਾਦਿਤਬ੍ਬਾ. ਦਸਵਸ੍ਸਾਯ ਗਿਹਿਗਤਾਯ ਸਿਕ੍ਖਾ ਦਾਤਬ੍ਬਾਤਿ.

ਦਸਕਂ ਨਿਟ੍ਠਿਤਂ.

ਤਸ੍ਸੁਦ੍ਦਾਨਂ –

ਆਘਾਤਂ ਵਿਨਯਂ ਵਤ੍ਥੁ, ਮਿਚ੍ਛਾ ਸਮ੍ਮਾ ਚ ਅਨ੍ਤਗਾ;

ਮਿਚ੍ਛਤ੍ਤਾ ਚੇਵ ਸਮ੍ਮਤ੍ਤਾ, ਅਕੁਸਲਾ ਕੁਸਲਾਪਿ ਚ.

ਸਲਾਕਾ ਅਧਮ੍ਮਾ ਧਮ੍ਮਾ, ਸਾਮਣੇਰਾ ਚ ਨਾਸਨਾ;

ਭਾਸਾਧਿਕਰਣਞ੍ਚੇਵ, ਞਤ੍ਤਿਲਹੁਕਮੇਵ ਚ.

ਲਹੁਕਾ ਗਰੁਕਾ ਏਤੇ, ਕਣ੍ਹਸੁਕ੍ਕਾ ਵਿਜਾਨਥ;

ਉਬ੍ਬਾਹਿਕਾ ਚ ਸਿਕ੍ਖਾ ਚ, ਅਨ੍ਤੇਪੁਰੇ ਚ ਵਤ੍ਥੂਨਿ.

ਰਤਨਂ ਦਸਵਗ੍ਗੋ ਚ, ਤਥੇਵ ਉਪਸਮ੍ਪਦਾ;

ਪਂਸੁਕੂਲਧਾਰਣਾ ਚ, ਦਸਾਹਸੁਕ੍ਕਇਤ੍ਥਿਯੋ.

ਭਰਿਯਾ ਦਸ ਵਤ੍ਥੂਨਿ, ਅਵਨ੍ਦਿਯਕ੍ਕੋਸੇਨ ਚ;

ਪੇਸੁਞ੍ਞਞ੍ਚੇਵ ਸੇਨਾਨਿ, ਵਰਾਨਿ ਚ ਅਧਮ੍ਮਿਕਾ.

ਧਮ੍ਮਿਕਾ ਯਾਗੁਮਂਸਾ ਚ, ਪਰਮਾ ਭਿਕ੍ਖੁ ਭਿਕ੍ਖੁਨੀ;

ਵੁਟ੍ਠਾਪਨਾ ਗਿਹਿਗਤਾ, ਦਸਕਾ ਸੁਪ੍ਪਕਾਸਿਤਾਤਿ.