ਏਕੁਤ੍ਤਰਿਕਨਯੋ
੧. ਏਕਕਵਾਰੋ
੩੨੧. ਆਪਤ੍ਤਿਕਰਾ ਧਮ੍ਮਾ ਜਾਨਿਤਬ੍ਬਾ. ਅਨਾਪਤ੍ਤਿਕਰਾ ਧਮ੍ਮਾ ਜਾਨਿਤਬ੍ਬਾ. ਆਪਤ੍ਤਿ ਜਾਨਿਤਬ੍ਬਾ. ਅਨਾਪਤ੍ਤਿ ਜਾਨਿਤਬ੍ਬਾ. ਲਹੁਕਾ ਆਪਤ੍ਤਿ ਜਾਨਿਤਬ੍ਬਾ. ਗਰੁਕਾ ਆਪਤ੍ਤਿ ਜਾਨਿਤਬ੍ਬਾ. ਸਾਵਸੇਸਾ ਆਪਤ੍ਤਿ ਜਾਨਿਤਬ੍ਬਾ. ਅਨਵਸੇਸਾ ਆਪਤ੍ਤਿ ਜਾਨਿਤਬ੍ਬਾ. ਦੁਟ੍ਠੁਲ੍ਲਾ ਆਪਤ੍ਤਿ ਜਾਨਿਤਬ੍ਬਾ. ਅਦੁਟ੍ਠੁਲ੍ਲਾ ਆਪਤ੍ਤਿ ਜਾਨਿਤਬ੍ਬਾ. ਸਪ੍ਪਟਿਕਮ੍ਮਾ ਆਪਤ੍ਤਿ ਜਾਨਿਤਬ੍ਬਾ. ਅਪ੍ਪਟਿਕਮ੍ਮਾ ਆਪਤ੍ਤਿ ਜਾਨਿਤਬ੍ਬਾ. ਦੇਸਨਾਗਾਮਿਨੀ ਆਪਤ੍ਤਿ ਜਾਨਿਤਬ੍ਬਾ. ਅਦੇਸਨਾਗਾਮਿਨੀ ਆਪਤ੍ਤਿ ਜਾਨਿਤਬ੍ਬਾ. ਅਨ੍ਤਰਾਯਿਕਾ ਆਪਤ੍ਤਿ ਜਾਨਿਤਬ੍ਬਾ. ਅਨਨ੍ਤਰਾਯਿਕਾ ਆਪਤ੍ਤਿ ਜਾਨਿਤਬ੍ਬਾ. ਸਾਵਜ੍ਜਪਞ੍ਞਤ੍ਤਿ ਆਪਤ੍ਤਿ ਜਾਨਿਤਬ੍ਬਾ. ਅਨਵਜ੍ਜਪਞ੍ਞਤ੍ਤਿ ਆਪਤ੍ਤਿ ਜਾਨਿਤਬ੍ਬਾ. ਕਿਰਿਯਤੋ ਸਮੁਟ੍ਠਿਤਾ ਆਪਤ੍ਤਿ ਜਾਨਿਤਬ੍ਬਾ. ਅਕਿਰਿਯਤੋ ਸਮੁਟ੍ਠਿਤਾ ਆਪਤ੍ਤਿ ਜਾਨਿਤਬ੍ਬਾ. ਕਿਰਿਯਾਕਿਰਿਯਤੋ ਸਮੁਟ੍ਠਿਤਾ ਆਪਤ੍ਤਿ ਜਾਨਿਤਬ੍ਬਾ. ਪੁਬ੍ਬਾਪਤ੍ਤਿ ਜਾਨਿਤਬ੍ਬਾ. ਅਪਰਾਪਤ੍ਤਿ ਜਾਨਿਤਬ੍ਬਾ. ਪੁਬ੍ਬਾਪਤ੍ਤੀਨਂ ਅਨ੍ਤਰਾਪਤ੍ਤਿ ਜਾਨਿਤਬ੍ਬਾ. ਅਪਰਾਪਤ੍ਤੀਨਂ ਅਨ੍ਤਰਾਪਤ੍ਤਿ ਜਾਨਿਤਬ੍ਬਾ. ਦੇਸਿਤਾ ਗਣਨੂਪਗਾ ਆਪਤ੍ਤਿ ਜਾਨਿਤਬ੍ਬਾ. ਦੇਸਿਤਾ ਨ ਗਣਨੂਪਗਾ ਆਪਤ੍ਤਿ ਜਾਨਿਤਬ੍ਬਾ. ਪਞ੍ਞਤ੍ਤਿ ਜਾਨਿਤਬ੍ਬਾ. ਅਨੁਪਞ੍ਞਤ੍ਤਿ ਜਾਨਿਤਬ੍ਬਾ. ਅਨੁਪ੍ਪਨ੍ਨਪਞ੍ਞਤ੍ਤਿ ਜਾਨਿਤਬ੍ਬਾ. ਸਬ੍ਬਤ੍ਥਪਞ੍ਞਤ੍ਤਿ ਜਾਨਿਤਬ੍ਬਾ. ਪਦੇਸਪਞ੍ਞਤ੍ਤਿ ਜਾਨਿਤਬ੍ਬਾ. ਸਾਧਾਰਣਪਞ੍ਞਤ੍ਤਿ ਜਾਨਿਤਬ੍ਬਾ. ਅਸਾਧਾਰਣਪਞ੍ਞਤ੍ਤਿ ਜਾਨਿਤਬ੍ਬਾ. ਏਕਤੋਪਞ੍ਞਤ੍ਤਿ ਜਾਨਿਤਬ੍ਬਾ. ਉਭਤੋਪਞ੍ਞਤ੍ਤਿ ਜਾਨਿਤਬ੍ਬਾ. ਥੁਲ੍ਲਵਜ੍ਜਾ ਆਪਤ੍ਤਿ ਜਾਨਿਤਬ੍ਬਾ. ਅਥੁਲ੍ਲਵਜ੍ਜਾ ਆਪਤ੍ਤਿ ਜਾਨਿਤਬ੍ਬਾ. ਗਿਹਿਪਟਿਸਂਯੁਤ੍ਤਾ ਆਪਤ੍ਤਿ ਜਾਨਿਤਬ੍ਬਾ. ਨ ਗਿਹਿਪਟਿਸਂਯੁਤ੍ਤਾ ਆਪਤ੍ਤਿ ਜਾਨਿਤਬ੍ਬਾ. ਨਿਯਤਾ ਆਪਤ੍ਤਿ ਜਾਨਿਤਬ੍ਬਾ. ਅਨਿਯਤਾ ਆਪਤ੍ਤਿ ਜਾਨਿਤਬ੍ਬਾ. ਆਦਿਕਰੋ ਪੁਗ੍ਗਲੋ ਜਾਨਿਤਬ੍ਬੋ. ਅਨਾਦਿਕਰੋ ਪੁਗ੍ਗਲੋ ਜਾਨਿਤਬ੍ਬੋ. ਅਧਿਚ੍ਚਾਪਤ੍ਤਿਕੋ ਪੁਗ੍ਗਲੋ ਜਾਨਿਤਬ੍ਬੋ. ਅਭਿਣ੍ਹਾਪਤ੍ਤਿਕੋ ਪੁਗ੍ਗਲੋ ਜਾਨਿਤਬ੍ਬੋ. ਚੋਦਕੋ ਪੁਗ੍ਗਲੋ ਜਾਨਿਤਬ੍ਬੋ. ਚੁਦਿਤਕੋ ਪੁਗ੍ਗਲੋ ਜਾਨਿਤਬ੍ਬੋ. ਅਧਮ੍ਮਚੋਦਕੋ ਪੁਗ੍ਗਲੋ ਜਾਨਿਤਬ੍ਬੋ. ਅਧਮ੍ਮਚੁਦਿਤਕੋ ਪੁਗ੍ਗਲੋ ਜਾਨਿਤਬ੍ਬੋ. ਧਮ੍ਮਚੋਦਕੋ ਪੁਗ੍ਗਲੋ ਜਾਨਿਤਬ੍ਬੋ. ਧਮ੍ਮਚੁਦਿਤਕੋ ਪੁਗ੍ਗਲੋ ਜਾਨਿਤਬ੍ਬੋ. ਨਿਯਤੋ ਪੁਗ੍ਗਲੋ ਜਾਨਿਤਬ੍ਬੋ. ਅਨਿਯਤੋ ਪੁਗ੍ਗਲੋ ਜਾਨਿਤਬ੍ਬੋ. ਅਭਬ੍ਬਾਪਤ੍ਤਿਕੋ ਪੁਗ੍ਗਲੋ ਜਾਨਿਤਬ੍ਬੋ. ਭਬ੍ਬਾਪਤ੍ਤਿਕੋ ਪੁਗ੍ਗਲੋ ਜਾਨਿਤਬ੍ਬੋ. ਉਕ੍ਖਿਤ੍ਤਕੋ ਪੁਗ੍ਗਲੋ ਜਾਨਿਤਬ੍ਬੋ. ਅਨੁਕ੍ਖਿਤ੍ਤਕੋ ਪੁਗ੍ਗਲੋ ਜਾਨਿਤਬ੍ਬੋ. ਨਾਸਿਤਕੋ ਪੁਗ੍ਗਲੋ ਜਾਨਿਤਬ੍ਬੋ. ਅਨਾਸਿਤਕੋ ਪੁਗ੍ਗਲੋ ਜਾਨਿਤਬ੍ਬੋ. ਸਮਾਨਸਂਵਾਸਕੋ ਪੁਗ੍ਗਲੋ ਜਾਨਿਤਬ੍ਬੋ. ਅਸਮਾਨਸਂਵਾਸਕੋ ਪੁਗ੍ਗਲੋ ਜਾਨਿਤਬ੍ਬੋ. ਠਪਨਂ ਜਾਨਿਤਬ੍ਬਨ੍ਤਿ.
ਏਕਕਂ ਨਿਟ੍ਠਿਤਂ.
ਤਸ੍ਸੁਦ੍ਦਾਨਂ –
ਕਰਾ ਆਪਤ੍ਤਿ ਲਹੁਕਾ, ਸਾਵਸੇਸਾ ਚ ਦੁਟ੍ਠੁਲ੍ਲਾ;
ਪਟਿਕਮ੍ਮਦੇਸਨਾ ਚ, ਅਨ੍ਤਰਾ ਵਜ੍ਜਕਿਰਿਯਂ.
ਕਿਰਿਯਾਕਿਰਿਯਂ ਪੁਬ੍ਬਾ, ਅਨ੍ਤਰਾ ਗਣਨੂਪਗਾ;
ਪਞ੍ਞਤ੍ਤਿ ਅਨਾਨੁਪ੍ਪਨ੍ਨ, ਸਬ੍ਬਸਾਧਾਰਣਾ ਚ ਏਕਤੋ [ਪਞ੍ਞਤ੍ਤਾਨੁਪ੍ਪਨ੍ਨਾ ਸਬ੍ਬਾ, ਸਾਧਾਰਣਾ ਚ ਏਕਤੋ (ਸ੍ਯਾ.)].
ਥੁਲ੍ਲਗਿਹਿਨਿਯਤਾ ਚ, ਆਦਿ ਅਧਿਚ੍ਚਚੋਦਕੋ;
ਅਧਮ੍ਮਧਮ੍ਮਨਿਯਤੋ, ਅਭਬ੍ਬੋਕ੍ਖਿਤ੍ਤਨਾਸਿਤਾ;
ਸਮਾਨਂ ਠਪਨਞ੍ਚੇਵ, ਉਦ੍ਦਾਨਂ ਏਕਕੇ ਇਦਨ੍ਤਿ.
੨. ਦੁਕਵਾਰੋ
੩੨੨. ਅਤ੍ਥਾਪਤ੍ਤਿ ਸਞ੍ਞਾ ਵਿਮੋਕ੍ਖਾ, ਅਤ੍ਥਾਪਤ੍ਤਿ ਨੋ ਸਞ੍ਞਾਵਿਮੋਕ੍ਖਾ. ਅਤ੍ਥਾਪਤ੍ਤਿ ਲਦ੍ਧਸਮਾਪਤ੍ਤਿਕਸ੍ਸ, ਅਤ੍ਥਾਪਤ੍ਤਿ ਨ ਲਦ੍ਧਸਮਾਪਤ੍ਤਿਕਸ੍ਸ. ਅਤ੍ਥਾਪਤ੍ਤਿ ਸਦ੍ਧਮ੍ਮਪਟਿਸਞ੍ਞੁਤ੍ਤਾ, ਅਤ੍ਥਾਪਤ੍ਤਿ ਅਸਦ੍ਧਮ੍ਮਪਟਿਸਞ੍ਞੁਤ੍ਤਾ. ਅਤ੍ਥਾਪਤ੍ਤਿ ਸਪਰਿਕ੍ਖਾਰਪਟਿਸਞ੍ਞੁਤ੍ਤਾ, ਅਤ੍ਥਾਪਤ੍ਤਿ ਪਰਪਰਿਕ੍ਖਾਰਪਟਿਸਞ੍ਞੁਤ੍ਤਾ. ਅਤ੍ਥਾਪਤ੍ਤਿ ਸਪੁਗ੍ਗਲਪਟਿਸਞ੍ਞੁਤ੍ਤਾ, ਅਤ੍ਥਾਪਤ੍ਤਿ ਪਰਪੁਗ੍ਗਲਪਟਿਸਞ੍ਞੁਤ੍ਤਾ. ਅਤ੍ਥਿ ਸਚ੍ਚਂ ਭਣਨ੍ਤੋ ਗਰੁਕਂ ਆਪਤ੍ਤਿਂ ਆਪਜ੍ਜਤਿ, ਮੁਸਾ ਭਣਨ੍ਤੋ ਲਹੁਕਂ. ਅਤ੍ਥਿ ਮੁਸਾ ਭਣਨ੍ਤੋ ਗਰੁਕਂ ਆਪਤ੍ਤਿਂ ਆਪਜ੍ਜਤਿ, ਸਚ੍ਚਂ ਭਣਨ੍ਤੋ ਲਹੁਕਂ. ਅਤ੍ਥਾਪਤ੍ਤਿ ਭੂਮਿਗਤੋ ਆਪਜ੍ਜਤਿ, ਨੋ ਵੇਹਾਸਗਤੋ. ਅਤ੍ਥਾਪਤ੍ਤਿ ਵੇਹਾਸਗਤੋ ਆਪਜ੍ਜਤਿ, ਨੋ ਭੂਮਿਗਤੋ. ਅਤ੍ਥਾਪਤ੍ਤਿ ਨਿਕ੍ਖਮਨ੍ਤੋ ਆਪਜ੍ਜਤਿ, ਨੋ ਪਵਿਸਨ੍ਤੋ. ਅਤ੍ਥਾਪਤ੍ਤਿ ਪਵਿਸਨ੍ਤੋ ਆਪਜ੍ਜਤਿ, ਨੋ ਨਿਕ੍ਖਮਨ੍ਤੋ. ਅਤ੍ਥਾਪਤ੍ਤਿ ਆਦਿਯਨ੍ਤੋ ਆਪਜ੍ਜਤਿ, ਅਤ੍ਥਾਪਤ੍ਤਿ ਅਨਾਦਿਯਨ੍ਤੋ ਆਪਜ੍ਜਤਿ. ਅਤ੍ਥਾਪਤ੍ਤਿ ਸਮਾਦਿਯਨ੍ਤੋ ਆਪਜ੍ਜਤਿ, ਅਤ੍ਥਾਪਤ੍ਤਿ ਨ ਸਮਾਦਿਯਨ੍ਤੋ ਆਪਜ੍ਜਤਿ. ਅਤ੍ਥਾਪਤ੍ਤਿ ਕਰੋਨ੍ਤੋ ਆਪਜ੍ਜਤਿ, ਅਤ੍ਥਾਪਤ੍ਤਿ ਨ ਕਰੋਨ੍ਤੋ ਆਪਜ੍ਜਤਿ. ਅਤ੍ਥਾਪਤ੍ਤਿ ਦੇਨ੍ਤੋ ਆਪਜ੍ਜਤਿ, ਅਤ੍ਥਾਪਤ੍ਤਿ ਨ ਦੇਨ੍ਤੋ ਆਪਜ੍ਜਤਿ. (ਅਤ੍ਥਾਪਤ੍ਤਿ ਦੇਸੇਨ੍ਤੋ ਆਪਜ੍ਜਤਿ, ਅਤ੍ਥਾਪਤ੍ਤਿ ਨ ਦੇਸੇਨ੍ਤੋ ਆਪਜ੍ਜਤਿ.) [( ) (ਨਤ੍ਥਿ ਕਤ੍ਥਚਿ)] ਅਤ੍ਥਾਪਤ੍ਤਿ ਪਟਿਗ੍ਗਣ੍ਹਨ੍ਤੋ ਆਪਜ੍ਜਤਿ, ਅਤ੍ਥਾਪਤ੍ਤਿ ਨ ਪਟਿਗ੍ਗਣ੍ਹਨ੍ਤੋ ਆਪਜ੍ਜਤਿ. ਅਤ੍ਥਾਪਤ੍ਤਿ ਪਰਿਭੋਗੇਨ ਆਪਜ੍ਜਤਿ, ਅਤ੍ਥਾਪਤ੍ਤਿ ਨ ਪਰਿਭੋਗੇਨ ਆਪਜ੍ਜਤਿ. ਅਤ੍ਥਾਪਤ੍ਤਿ ਰਤ੍ਤਿਂ ਆਪਜ੍ਜਤਿ, ਨੋ ਦਿਵਾ. ਅਤ੍ਥਾਪਤ੍ਤਿ ਦਿਵਾ ਆਪਜ੍ਜਤਿ, ਨੋ ਰਤ੍ਤਿਂ. ਅਤ੍ਥਾਪਤ੍ਤਿ ਅਰੁਣੁਗ੍ਗੇ ਆਪਜ੍ਜਤਿ, ਅਤ੍ਥਾਪਤ੍ਤਿ ਨ ਅਰੁਣੁਗ੍ਗੇ ਆਪਜ੍ਜਤਿ. ਅਤ੍ਥਾਪਤ੍ਤਿ ਛਿਨ੍ਦਨ੍ਤੋ ਆਪਜ੍ਜਤਿ, ਅਤ੍ਥਾਪਤ੍ਤਿ ਨ ਛਿਨ੍ਦਨ੍ਤੋ ਆਪਜ੍ਜਤਿ. ਅਤ੍ਥਾਪਤ੍ਤਿ ਛਾਦੇਨ੍ਤੋ ਆਪਜ੍ਜਤਿ, ਅਤ੍ਥਾਪਤ੍ਤਿ ਨ ਛਾਦੇਨ੍ਤੋ ਆਪਜ੍ਜਤਿ. ਅਤ੍ਥਾਪਤ੍ਤਿ ਧਾਰੇਨ੍ਤੋ ਆਪਜ੍ਜਤਿ, ਅਤ੍ਥਾਪਤ੍ਤਿ ਨ ਧਾਰੇਨ੍ਤੋ ਆਪਜ੍ਜਤਿ.
ਦ੍ਵੇ ਉਪੋਸਥਾ – ਚਾਤੁਦ੍ਦਸਿਕੋ ਚ ਪਨ੍ਨਰਸਿਕੋ ਚ. ਦ੍ਵੇ ਪਵਾਰਣਾ – ਚਾਤੁਦ੍ਦਸਿਕਾ ਚ ਪਨ੍ਨਰਸਿਕਾ ਚ. ਦ੍ਵੇ ਕਮ੍ਮਾਨਿ – ਅਪਲੋਕਨਕਮ੍ਮਂ, ਞਤ੍ਤਿਕਮ੍ਮਂ. ਅਪਰਾਨਿਪਿ ਦ੍ਵੇ ਕਮ੍ਮਾਨਿ – ਞਤ੍ਤਿਦੁਤਿਯਕਮ੍ਮਂ, ਞਤ੍ਤਿਚਤੁਤ੍ਥਕਮ੍ਮਂ. ਦ੍ਵੇ ਕਮ੍ਮਵਤ੍ਥੂਨਿ – ਅਪਲੋਕਨਕਮ੍ਮਸ੍ਸ ਵਤ੍ਥੁ, ਞਤ੍ਤਿਕਮ੍ਮਸ੍ਸ ਵਤ੍ਥੁ. ਅਪਰਾਨਿਪਿ ਦ੍ਵੇ ਕਮ੍ਮਵਤ੍ਥੂਨਿ – ਞਤ੍ਤਿਦੁਤਿਯਕਮ੍ਮਸ੍ਸ ਵਤ੍ਥੁ, ਞਤ੍ਤਿਚਤੁਤ੍ਥਕਮ੍ਮਸ੍ਸ ਵਤ੍ਥੁ. ਦ੍ਵੇ ਕਮ੍ਮਦੋਸਾ – ਅਪਲੋਕਨਕਮ੍ਮਸ੍ਸ ਦੋਸੋ, ਞਤ੍ਤਿਕਮ੍ਮਸ੍ਸ ਦੋਸੋ. ਅਪਰੇਪਿ ਦ੍ਵੇ ਕਮ੍ਮਦੋਸਾ – ਞਤ੍ਤਿਦੁਤਿਯਕਮ੍ਮਸ੍ਸ ਦੋਸੋ, ਞਤ੍ਤਿਚਤੁਤ੍ਥਕਮ੍ਮਸ੍ਸ ਦੋਸੋ. ਦ੍ਵੇ ਕਮ੍ਮਸਮ੍ਪਤ੍ਤਿਯੋ – ਅਪਲੋਕਨਕਮ੍ਮਸ੍ਸ ਸਮ੍ਪਤ੍ਤਿ, ਞਤ੍ਤਿਕਮ੍ਮਸ੍ਸ ਸਮ੍ਪਤ੍ਤਿ. ਅਪਰਾਪਿ ਦ੍ਵੇ ਕਮ੍ਮਸਮ੍ਪਤ੍ਤਿਯੋ – ਞਤ੍ਤਿਦੁਤਿਯਕਮ੍ਮਸ੍ਸ ਸਮ੍ਪਤ੍ਤਿ, ਞਤ੍ਤਿਚਤੁਤ੍ਥਕਮ੍ਮਸ੍ਸ ਸਮ੍ਪਤ੍ਤਿ. ਦ੍ਵੇ ਨਾਨਾਸਂਵਾਸਕਭੂਮਿਯੋ – ਅਤ੍ਤਨਾ ਵਾ ਅਤ੍ਤਾਨਂ ਨਾਨਾਸਂਵਾਸਕਂ ਕਰੋਤਿ, ਸਮਗ੍ਗੋ ਵਾ ਨਂ ਸਙ੍ਘੋ ਉਕ੍ਖਿਪਤਿ ਅਦਸ੍ਸਨੇ ਵਾ ਅਪ੍ਪਟਿਕਮ੍ਮੇ ਵਾ ਅਪ੍ਪਟਿਨਿਸ੍ਸਗ੍ਗੇ ਵਾ. ਦ੍ਵੇ ਸਮਾਨਸਂਵਾਸਕਭੂਮਿਯੋ – ਅਤ੍ਤਨਾ ਵਾ ਅਤ੍ਤਾਨਂ ਸਮਾਨਸਂਵਾਸਕਂ ਕਰੋਤਿ, ਸਮਗ੍ਗੋ ਵਾ ਨਂ ਸਙ੍ਘੋ ਉਕ੍ਖਿਤ੍ਤਂ ਓਸਾਰੇਤਿ ਦਸ੍ਸਨੇ ਵਾ ਪਟਿਕਮ੍ਮੇ ਵਾ ਪਟਿਨਿਸ੍ਸਗ੍ਗੇ ਵਾ. ਦ੍ਵੇ ਪਾਰਾਜਿਕਾ – ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ. ਦ੍ਵੇ ਸਙ੍ਘਾਦਿਸੇਸਾ, ਦ੍ਵੇ ਥੁਲ੍ਲਚ੍ਚਯਾ, ਦ੍ਵੇ ਪਾਚਿਤ੍ਤਿਯਾ, ਦ੍ਵੇ ਪਾਟਿਦੇਸਨੀਯਾ, ਦ੍ਵੇ ਦੁਕ੍ਕਟਾ, ਦ੍ਵੇ ਦੁਬ੍ਭਾਸਿਤਾ – ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ. ਸਤ੍ਤ ਆਪਤ੍ਤਿਯੋ, ਸਤ੍ਤ ਆਪਤ੍ਤਿਕ੍ਖਨ੍ਧਾ. ਦ੍ਵੀਹਾਕਾਰੇਹਿ ਸਙ੍ਘੋ ਭਿਜ੍ਜਤਿ – ਕਮ੍ਮੇਨ ਵਾ ਸਲਾਕਗ੍ਗਾਹੇਨ ਵਾ.
ਦ੍ਵੇ ਪੁਗ੍ਗਲਾ ਨ ਉਪਸਮ੍ਪਾਦੇਤਬ੍ਬਾ – ਅਦ੍ਧਾਨਹੀਨੋ, ਅਙ੍ਗਹੀਨੋ. ਅਪਰੇਪਿ ਦ੍ਵੇ ਪੁਗ੍ਗਲਾ ਨ ਉਪਸਮ੍ਪਾਦੇਤਬ੍ਬਾ – ਵਤ੍ਥੁਵਿਪਨ੍ਨੋ, ਕਰਣਦੁਕ੍ਕਟਕੋ. ਅਪਰੇਪਿ ਦ੍ਵੇ ਪੁਗ੍ਗਲਾ ਨ ਉਪਸਮ੍ਪਾਦੇਤਬ੍ਬਾ – ਅਪਰਿਪੂਰੋ ਪਰਿਪੂਰੋ ਨੋ ਚ ਯਾਚਤਿ. ਦ੍ਵਿਨ੍ਨਂ ਪੁਗ੍ਗਲਾਨਂ ਨਿਸ੍ਸਾਯ ਨ ਵਤ੍ਥਬ੍ਬਂ – ਅਲਜ੍ਜਿਸ੍ਸ ਚ ਬਾਲਸ੍ਸ ਚ. ਦ੍ਵਿਨ੍ਨਂ ਪੁਗ੍ਗਲਾਨਂ ਨਿਸ੍ਸਯੋ ਨ ਦਾਤਬ੍ਬੋ – ਅਲਜ੍ਜਿਸ੍ਸ ਚ ਲਜ੍ਜਿਨੋ ਚ ਨ ਯਾਚਤਿ. ਦ੍ਵਿਨ੍ਨਂ ਪੁਗ੍ਗਲਾਨਂ ਨਿਸ੍ਸਯੋ ਦਾਤਬ੍ਬੋ – ਬਾਲਸ੍ਸ ਚ ਲਜ੍ਜਿਸ੍ਸ ਚ ਯਾਚਤਿ. ਦ੍ਵੇ ਪੁਗ੍ਗਲਾ ਅਭਬ੍ਬਾ ਆਪਤ੍ਤਿਂ ਆਪਜ੍ਜਿਤੁਂ – ਬੁਦ੍ਧਾ ਚ ਪਚ੍ਚੇਕਬੁਦ੍ਧਾ ਚ. ਦ੍ਵੇ ਪੁਗ੍ਗਲਾ ਭਬ੍ਬਾ, ਆਪਤ੍ਤਿਂ ਆਪਜ੍ਜਿਤੁਂ – ਭਿਕ੍ਖੂ ਚ ਭਿਕ੍ਖੁਨਿਯੋ ਚ. ਦ੍ਵੇ ਪੁਗ੍ਗਲਾ ਅਭਬ੍ਬਾ ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਿਤੁਂ – ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਅਰਿਯਪੁਗ੍ਗਲਾ. ਦ੍ਵੇ ਪੁਗ੍ਗਲਾ ਭਬ੍ਬਾ ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਿਤੁਂ – ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਪੁਥੁਜ੍ਜਨਾ. ਦ੍ਵੇ ਪੁਗ੍ਗਲਾ ਅਭਬ੍ਬਾ ਸਞ੍ਚਿਚ੍ਚ ਸਾਤਿਸਾਰਂ ਵਤ੍ਥੁਂ ਅਜ੍ਝਾਚਰਿਤੁਂ – ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਅਰਿਯਪੁਗ੍ਗਲਾ. ਦ੍ਵੇ ਪੁਗ੍ਗਲਾ ਭਬ੍ਬਾ ਸਞ੍ਚਿਚ੍ਚ ਸਾਤਿਸਾਰਂ ਵਤ੍ਥੁਂ ਅਜ੍ਝਾਚਰਿਤੁਂ – ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਪੁਥੁਜ੍ਜਨਾ.
ਦ੍ਵੇ ਪਟਿਕ੍ਕੋਸਾ – ਕਾਯੇਨ ਵਾ ਪਟਿਕ੍ਕੋਸਤਿ ਵਾਚਾਯ ਵਾ ਪਟਿਕ੍ਕੋਸਤਿ. ਦ੍ਵੇ ਨਿਸ੍ਸਾਰਣਾ – ਅਤ੍ਥਿ ਪੁਗ੍ਗਲੋ ਅਪ੍ਪਤ੍ਤੋ ਨਿਸ੍ਸਾਰਣਂ ਤਂ ਚੇ ਸਙ੍ਘੋ ਨਿਸ੍ਸਾਰੇਤਿ ਏਕਚ੍ਚੋ ਸੁਨਿਸ੍ਸਾਰਿਤੋ, ਏਕਚ੍ਚੋ ਦੁਨ੍ਨਿਸ੍ਸਾਰਿਤੋ. ਦ੍ਵੇ ਓਸਾਰਣਾ – ਅਤ੍ਥਿ ਪੁਗ੍ਗਲੋ ਅਪ੍ਪਤ੍ਤੋ ਓਸਾਰਣਂ ਤਂ ਚੇ ਸਙ੍ਘੋ ਓਸਾਰੇਤਿ ਏਕਚ੍ਚੋ ਸੋਸਾਰਿਤੋ, ਏਕਚ੍ਚੋ ਦੋਸਾਰਿਤੋ. ਦ੍ਵੇ ਪਟਿਞ੍ਞਾ – ਕਾਯੇਨ ਵਾ ਪਟਿਜਾਨਾਤਿ ਵਾਚਾਯ ਵਾ ਪਟਿਜਾਨਾਤਿ. ਦ੍ਵੇ ਪਟਿਗ੍ਗਹਾ – ਕਾਯੇਨ ਵਾ ਪਟਿਗ੍ਗਣ੍ਹਾਤਿ ਕਾਯਪਟਿਬਦ੍ਧੇਨ ਵਾ ਪਟਿਗ੍ਗਣ੍ਹਾਤਿ. ਦ੍ਵੇ ਪਟਿਕ੍ਖੇਪਾ – ਕਾਯੇਨ ਵਾ ਪਟਿਕ੍ਖਿਪਤਿ ਵਾਚਾਯ ਵਾ ਪਟਿਕ੍ਖਿਪਤਿ. ਦ੍ਵੇ ਉਪਘਾਤਿਕਾ – ਸਿਕ੍ਖੂਪਘਾਤਿਕਾ ਚ ਭੋਗੂਪਘਾਤਿਕਾ ਚ. ਦ੍ਵੇ ਚੋਦਨਾ – ਕਾਯੇਨ ਵਾ ਚੋਦੇਤਿ ਵਾਚਾਯ ਵਾ ਚੋਦੇਤਿ. ਦ੍ਵੇ ਕਥਿਨਸ੍ਸ ਪਲਿਬੋਧਾ – ਆਵਾਸਪਲਿਬੋਧੋ ਚ ਚੀਵਰਪਲਿਬੋਧੋ ਚ. ਦ੍ਵੇ ਕਥਿਨਸ੍ਸ ਅਪਲਿਬੋਧਾ – ਆਵਾਸਅਪਲਿਬੋਧੋ ਚ ਚੀਵਰਅਪਲਿਬੋਧੋ ਚ. ਦ੍ਵੇ ਚੀਵਰਾਨਿ – ਗਹਪਤਿਕਞ੍ਚ ਪਂਸੁਕੂਲਞ੍ਚ. ਦ੍ਵੇ ਪਤ੍ਤਾ – ਅਯੋਪਤ੍ਤੋ ਮਤ੍ਤਿਕਾਪਤ੍ਤੋ. ਦ੍ਵੇ ਮਣ੍ਡਲਾਨਿ – ਤਿਪੁਮਯਂ, ਸੀਸਮਯਂ. ਦ੍ਵੇ ਪਤ੍ਤਸ੍ਸ ਅਧਿਟ੍ਠਾਨਾ – ਕਾਯੇਨ ਵਾ ਅਧਿਟ੍ਠੇਤਿ ਵਾਚਾਯ ਵਾ ਅਧਿਟ੍ਠੇਤਿ. ਦ੍ਵੇ ਚੀਵਰਸ੍ਸ ਅਧਿਟ੍ਠਾਨਾ – ਕਾਯੇਨ ਵਾ ਅਧਿਟ੍ਠੇਤਿ ਵਾਚਾਯ ਵਾ ਅਧਿਟ੍ਠੇਤਿ. ਦ੍ਵੇ ਵਿਕਪ੍ਪਨਾ – ਸਮ੍ਮੁਖਾਵਿਕਪ੍ਪਨਾ ਚ ਪਰਮ੍ਮੁਖਾਵਿਕਪ੍ਪਨਾ ਚ. ਦ੍ਵੇ ਵਿਨਯਾ – ਭਿਕ੍ਖੂਨਞ੍ਚ ਭਿਕ੍ਖੁਨੀਨਞ੍ਚ. ਦ੍ਵੇ ਵੇਨਯਿਕਾ – ਪਞ੍ਞਤ੍ਤਞ੍ਚ ਪਞ੍ਞਤ੍ਤਾਨੁਲੋਮਞ੍ਚ. ਦ੍ਵੇ ਵਿਨਯਸ੍ਸ ਸਲ੍ਲੇਖਾ – ਅਕਪ੍ਪਿਯੇ ਸੇਤੁਘਾਤੋ, ਕਪ੍ਪਿਯੇ ਮਤ੍ਤਕਾਰਿਤਾ. ਦ੍ਵੀਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤਿ – ਕਾਯੇਨ ਵਾ ਆਪਜ੍ਜਤਿ ਵਾਚਾਯ ਵਾ ਆਪਜ੍ਜਤਿ. ਦ੍ਵੀਹਾਕਾਰੇਹਿ ਆਪਤ੍ਤਿਯਾ ਵੁਟ੍ਠਾਤਿ – ਕਾਯੇਨ ਵਾ ਵੁਟ੍ਠਾਤਿ ਵਾਚਾਯ ਵਾ ਵੁਟ੍ਠਾਤਿ. ਦ੍ਵੇ ਪਰਿਵਾਸਾ – ਪਟਿਚ੍ਛਨ੍ਨਪਰਿਵਾਸੋ, ਅਪ੍ਪਟਿਚ੍ਛਨ੍ਨਪਰਿਵਾਸੋ. ਅਪਰੇਪਿ ਦ੍ਵੇ ਪਰਿਵਾਸਾ – ਸੁਦ੍ਧਨ੍ਤਪਰਿਵਾਸੋ ਸਮੋਧਾਨਪਰਿਵਾਸੋ. ਦ੍ਵੇ ਮਾਨਤ੍ਤਾ – ਪਟਿਚ੍ਛਨ੍ਨਮਾਨਤ੍ਤਂ, ਅਪ੍ਪਟਿਚ੍ਛਨ੍ਨਮਾਨਤ੍ਤਂ. ਅਪਰੇਪਿ ਦ੍ਵੇ ਮਾਨਤ੍ਤਾ – ਪਕ੍ਖਮਾਨਤ੍ਤਂ, ਸਮੋਧਾਨਮਾਨਤ੍ਤਂ. ਦ੍ਵਿਨ੍ਨਂ ਪੁਗ੍ਗਲਾਨਂ ਰਤ੍ਤਿਚ੍ਛੇਦੋ – ਪਾਰਿਵਾਸਿਕਸ੍ਸ ਚ ਮਾਨਤ੍ਤਚਾਰਿਕਸ੍ਸ ਚ. ਦ੍ਵੇ ਅਨਾਦਰਿਯਾਨਿ – ਪੁਗ੍ਗਲਾਨਾਦਰਿਯਞ੍ਚ ਧਮ੍ਮਾਨਾਦਰਿਯਞ੍ਚ. ਦ੍ਵੇ ਲੋਣਾਨਿ – ਜਾਤਿਮਞ੍ਚ ਕਾਰਿਮਞ੍ਚ [ਜਾਤਿਮਯਞ੍ਚ ਖਾਰਿਮਯਞ੍ਚ (ਸ੍ਯਾ.)]. ਅਪਰਾਨਿਪਿ ਦ੍ਵੇ ਲੋਣਾਨਿ – ਸਾਮੁਦ੍ਦਂ ਕਾਲ਼ਲੋਣਂ. ਅਪਰਾਨਿਪਿ ਦ੍ਵੇ ਲੋਣਾਨਿ – ਸਿਨ੍ਧਵਂ, ਉਬ੍ਭਿਦਂ [ਉਬ੍ਭਿਰਂ (ਇਤਿਪਿ)]. ਅਪਰਾਨਿਪਿ ਦ੍ਵੇ ਲੋਣਾਨਿ – ਰੋਮਕਂ, ਪਕ੍ਕਾਲਕਂ. ਦ੍ਵੇ ਪਰਿਭੋਗਾ – ਅਬ੍ਭਨ੍ਤਰਪਰਿਭੋਗੋ ਚ ਬਾਹਿਰਪਰਿਭੋਗੋ ਚ. ਦ੍ਵੇ ਅਕ੍ਕੋਸਾ – ਹੀਨੋ ਚ ਅਕ੍ਕੋਸੋ ਉਕ੍ਕਟ੍ਠੋ ਚ ਅਕ੍ਕੋਸੋ. ਦ੍ਵੀਹਾਕਾਰੇਹਿ ਪੇਸੁਞ੍ਞਂ ਹੋਤਿ – ਪਿਯਕਮ੍ਯਸ੍ਸ ਵਾ ਭੇਦਾਧਿਪ੍ਪਾਯਸ੍ਸ ਵਾ. ਦ੍ਵੀਹਾਕਾਰੇਹਿ ਗਣਭੋਜਨਂ ਪਸਵਤਿ – ਨਿਮਨ੍ਤਨਤੋ ਵਾ ਵਿਞ੍ਞਤ੍ਤਿਤੋ ਵਾ. ਦ੍ਵੇ ਵਸ੍ਸੂਪਨਾਯਿਕਾ – ਪੁਰਿਮਿਕਾ, ਪਚ੍ਛਿਮਿਕਾ. ਦ੍ਵੇ ਅਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ. ਦ੍ਵੇ ਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ.
[ਅ. ਨਿ. ੨.੯੯ ਆਦਯੋ] ਦ੍ਵੇ ਪੁਗ੍ਗਲਾ ਬਾਲਾ – ਯੋ ਚ ਅਨਾਗਤਂ ਭਾਰਂ ਵਹਤਿ, ਯੋ ਚ ਆਗਤਂ ਭਾਰਂ ਨ ਵਹਤਿ. ਦ੍ਵੇ ਪੁਗ੍ਗਲਾ ਪਣ੍ਡਿਤਾ – ਯੋ ਚ ਅਨਾਗਤਂ ਭਾਰਂ ਨ ਵਹਤਿ, ਯੋ ਚ ਆਗਤਂ ਭਾਰਂ ਵਹਤਿ. ਅਪਰੇਪਿ ਦ੍ਵੇ ਪੁਗ੍ਗਲਾ ਬਾਲਾ – ਯੋ ਚ ਅਕਪ੍ਪਿਯੇ ਕਪ੍ਪਿਯਸਞ੍ਞੀ, ਯੋ ਚ ਕਪ੍ਪਿਯੇ ਅਕਪ੍ਪਿਯਸਞ੍ਞੀ. ਦ੍ਵੇ ਪੁਗ੍ਗਲਾ ਪਣ੍ਡਿਤਾ – ਯੋ ਚ ਅਕਪ੍ਪਿਯੇ ਅਕਪ੍ਪਿਯਸਞ੍ਞੀ, ਯੋ ਚ ਕਪ੍ਪਿਯੇ ਕਪ੍ਪਿਯਸਞ੍ਞੀ. ਅਪਰੇਪਿ ਦ੍ਵੇ ਪੁਗ੍ਗਲਾ ਬਾਲਾ – ਯੋ ਚ ਅਨਾਪਤ੍ਤਿਯਾ ਆਪਤ੍ਤਿਸਞ੍ਞੀ, ਯੋ ਚ ਆਪਤ੍ਤਿਯਾ ਅਨਾਪਤ੍ਤਿਸਞ੍ਞੀ. ਦ੍ਵੇ ਪੁਗ੍ਗਲਾ ਪਣ੍ਡਿਤਾ – ਯੋ ਚ ਆਪਤ੍ਤਿਯਾ ਆਪਤ੍ਤਿਸਞ੍ਞੀ, ਯੋ ਚ ਅਨਾਪਤ੍ਤਿਯਾ ਅਨਾਪਤ੍ਤਿਸਞ੍ਞੀ. ਅਪਰੇਪਿ ਦ੍ਵੇ ਪੁਗ੍ਗਲਾ ਬਾਲਾ – ਯੋ ਚ ਅਧਮ੍ਮੇ ਧਮ੍ਮਸਞ੍ਞੀ, ਯੋ ਚ ਧਮ੍ਮੇ ਅਧਮ੍ਮਸਞ੍ਞੀ. ਦ੍ਵੇ ਪੁਗ੍ਗਲਾ ਪਣ੍ਡਿਤਾ – ਯੋ ਚ ਅਧਮ੍ਮੇ ਅਧਮ੍ਮਸਞ੍ਞੀ, ਯੋ ਚ ਧਮ੍ਮੇ ਧਮ੍ਮਸਞ੍ਞੀ. ਅਪਰੇਪਿ ਦ੍ਵੇ ਪੁਗ੍ਗਲਾ ਬਾਲਾ – ਯੋ ਚ ਅਵਿਨਯੇ ਵਿਨਯਸਞ੍ਞੀ, ਯੋ ਚ ਵਿਨਯੇ ਅਵਿਨਯਸਞ੍ਞੀ. ਦ੍ਵੇ ਪੁਗ੍ਗਲਾ ਪਣ੍ਡਿਤਾ – ਯੋ ਚ ਅਵਿਨਯੇ ਅਵਿਨਯਸਞ੍ਞੀ, ਯੋ ਚ ਵਿਨਯੇ ਵਿਨਯਸਞ੍ਞੀ.
[ਅ. ਨਿ. ੨.੧੦੯] ਦ੍ਵਿਨ੍ਨਂ ਪੁਗ੍ਗਲਾਨਂ ਆਸਵਾ ਵਡ੍ਢਨ੍ਤਿ – ਯੋ ਚ ਨ ਕੁਕ੍ਕੁਚ੍ਚਾਯਿਤਬ੍ਬਂ ਕੁਕ੍ਕੁਚ੍ਚਾਯਤਿ, ਯੋ ਚ ਕੁਕ੍ਕੁਚ੍ਚਾਯਿਤਬ੍ਬਂ ਕੁਕ੍ਕੁਚ੍ਚਾਯਤਿ. ਦ੍ਵਿਨ੍ਨਂ ਪੁਗ੍ਗਲਾਨਂ ਆਸਵਾ ਨ ਵਡ੍ਢਨ੍ਤਿ – ਯੋ ਚ ਕੁਕ੍ਕੁਚ੍ਚਾਯਿਤਬ੍ਬਂ ਨ ਕੁਕ੍ਕੁਚ੍ਚਾਯਤਿ, ਯੋ ਚ ਕੁਕ੍ਕੁਚ੍ਚਾਯਿਤਬ੍ਬਂ ਕੁਕ੍ਕੁਚ੍ਚਾਯਤਿ. ਅਪਰੇਸਮ੍ਪਿ ਦ੍ਵਿਨ੍ਨਂ ਪੁਗ੍ਗਲਾਨਂ ਆਸਵਾ ਵਡ੍ਢਨ੍ਤਿ – ਯੋ ਚ ਅਕਪ੍ਪਿਯੇ ਕਪ੍ਪਿਯਸਞ੍ਞੀ, ਯੋ ਚ ਕਪ੍ਪਿਯੇ ਅਕਪ੍ਪਿਯਸਞ੍ਞੀ. ਦ੍ਵਿਨ੍ਨਂ ਪੁਗ੍ਗਲਾਨਂ ਆਸਵਾ ਨ ਵਡ੍ਢਨ੍ਤਿ – ਯੋ ਚ ਅਕਪ੍ਪਿਯੇ ਅਕਪ੍ਪਿਯਸਞ੍ਞੀ, ਯੋ ਚ ਕਪ੍ਪਿਯੇ ਕਪ੍ਪਿਯਸਞ੍ਞੀ. ਅਪਰੇਸਮ੍ਪਿ ਦ੍ਵਿਨ੍ਨਂ ਪੁਗ੍ਗਲਾਨਂ ਆਸਵਾ ਵਡ੍ਢਨ੍ਤਿ – ਯੋ ਚ ਅਨਾਪਤ੍ਤਿਯਾ ਆਪਤ੍ਤਿਸਞ੍ਞੀ, ਯੋ ਚ ਆਪਤ੍ਤਿਯਾ ਅਨਾਪਤ੍ਤਿਸਞ੍ਞੀ. ਦ੍ਵਿਨ੍ਨਂ ਪੁਗ੍ਗਲਾਨਂ ਆਸਵਾ ਨ ਵਡ੍ਢਨ੍ਤਿ – ਯੋ ਚ ਅਨਾਪਤ੍ਤਿਯਾ ਅਨਾਪਤ੍ਤਿਸਞ੍ਞੀ, ਯੋ ਚ ਆਪਤ੍ਤਿਯਾ ਆਪਤ੍ਤਿਸਞ੍ਞੀ. ਅਪਰੇਸਮ੍ਪਿ ਦ੍ਵਿਨ੍ਨਂ ਪੁਗ੍ਗਲਾਨਂ ਆਸਵਾ ਵਡ੍ਢਨ੍ਤਿ – ਯੋ ਚ ਅਧਮ੍ਮੇ ਧਮ੍ਮਸਞ੍ਞੀ, ਯੋ ਚ ਧਮ੍ਮੇ ਅਧਮ੍ਮਸਞ੍ਞੀ. ਦ੍ਵਿਨ੍ਨਂ ਪੁਗ੍ਗਲਾਨਂ ਆਸਵਾ ਨ ਵਡ੍ਢਨ੍ਤਿ – ਯੋ ਚ ਅਧਮ੍ਮੇ ਅਧਮ੍ਮਸਞ੍ਞੀ, ਯੋ ਚ ਧਮ੍ਮੇ ਧਮ੍ਮਸਞ੍ਞੀ. ਅਪਰੇਸਮ੍ਪਿ ਦ੍ਵਿਨ੍ਨਂ ਪੁਗ੍ਗਲਾਨਂ ਆਸਵਾ ਵਡ੍ਢਨ੍ਤਿ – ਯੋ ਚ ਅਵਿਨਯੇ ਵਿਨਯਸਞ੍ਞੀ, ਯੋ ਚ ਵਿਨਯੇ ਅਵਿਨਯਸਞ੍ਞੀ. ਦ੍ਵਿਨ੍ਨਂ ਪੁਗ੍ਗਲਾਨਂ ਆਸਵਾ ਨ ਵਡ੍ਢਨ੍ਤਿ – ਯੋ ਚ ਅਵਿਨਯੇ ਅਵਿਨਯਸਞ੍ਞੀ, ਯੋ ਚ ਵਿਨਯੇ ਵਿਨਯਸਞ੍ਞੀ.
ਦੁਕਾ ਨਿਟ੍ਠਿਤਾ.
ਤਸ੍ਸੁਦ੍ਦਾਨਂ –
ਸਞ੍ਞਾ ਲਦ੍ਧਾ ਚ ਸਦ੍ਧਮ੍ਮਾ, ਪਰਿਕ੍ਖਾਰਾ ਚ ਪੁਗ੍ਗਲਾ;
ਸਚ੍ਚਂ ਭੂਮਿ ਨਿਕ੍ਖਮਨ੍ਤੋ, ਆਦਿਯਨ੍ਤੋ ਸਮਾਦਿਯਂ.
ਕਰੋਨ੍ਤੋ ਦੇਨ੍ਤੋ ਗਣ੍ਹਨ੍ਤੋ, ਪਰਿਭੋਗੇਨ ਰਤ੍ਤਿ ਚ;
ਅਰੁਣਾਛਿਨ੍ਦਂ ਛਾਦੇਨ੍ਤੋ, ਧਾਰੇਨ੍ਤੋ ਚ ਉਪੋਸਥਾ.
ਪਵਾਰਣਾ ਕਮ੍ਮਾਪਰਾ, ਵਤ੍ਥੁ ਅਪਰਾ ਦੋਸਾ ਚ;
ਅਪਰਾ ਦ੍ਵੇ ਚ ਸਮ੍ਪਤ੍ਤਿ, ਨਾਨਾ ਸਮਾਨਮੇਵ ਚ.
ਪਾਰਾਜਿਸਙ੍ਘਥੁਲ੍ਲਚ੍ਚਯ, ਪਾਚਿਤ੍ਤਿ ਪਾਟਿਦੇਸਨਾ;
ਦੁਕ੍ਕਟਾ ਦੁਬ੍ਭਾਸਿਤਾ ਚੇਵ, ਸਤ੍ਤ ਆਪਤ੍ਤਿਕ੍ਖਨ੍ਧਾ ਚ.
ਭਿਜ੍ਜਤਿ ਉਪਸਮ੍ਪਦਾ, ਤਥੇਵ ਅਪਰੇ ਦੁਵੇ;
ਨ ਵਤ੍ਥਬ੍ਬਂ ਨ ਦਾਤਬ੍ਬਂ, ਅਭਬ੍ਬਾਭਬ੍ਬਮੇਵ ਚ.
ਸਞ੍ਚਿਚ੍ਚ ਸਾਤਿਸਾਰਾ ਚ, ਪਟਿਕ੍ਕੋਸਾ ਨਿਸ੍ਸਾਰਣਾ;
ਓਸਾਰਣਾ ਪਟਿਞ੍ਞਾ ਚ, ਪਟਿਗ੍ਗਹਾ ਪਟਿਕ੍ਖਿਪਾ.
ਉਪਘਾਤਿ ਚੋਦਨਾ ਚ, ਕਥਿਨਾ ਚ ਦੁਵੇ ਤਥਾ;
ਚੀਵਰਾ ਪਤ੍ਤਮਣ੍ਡਲਾ, ਅਧਿਟ੍ਠਾਨਾ ਤਥੇਵ ਦ੍ਵੇ.
ਵਿਕਪ੍ਪਨਾ ਚ ਵਿਨਯਾ, ਵੇਨਯਿਕਾ ਚ ਸਲ੍ਲੇਖਾ;
ਆਪਜ੍ਜਤਿ ਚ ਵੁਟ੍ਠਾਤਿ, ਪਰਿਵਾਸਾਪਰੇ ਦੁਵੇ.
ਦ੍ਵੇ ਮਾਨਤ੍ਤਾ ਅਪਰੇ ਚ, ਰਤ੍ਤਿਚ੍ਛੇਦੋ ਅਨਾਦਰਿ;
ਦ੍ਵੇ ਲੋਣਾ ਤਯੋ ਅਪਰੇ, ਪਰਿਭੋਗਕ੍ਕੋਸੇਨ ਚ.
ਪੇਸੁਞ੍ਞੋ ਚ ਗਣਾਵਸ੍ਸ, ਠਪਨਾ ਭਾਰਕਪ੍ਪਿਯਂ;
ਅਨਾਪਤ੍ਤਿ ਅਧਮ੍ਮਧਮ੍ਮਾ, ਵਿਨਯੇ ਆਸਵੇ ਤਥਾਤਿ.
੩. ਤਿਕਵਾਰੋ
੩੨੩. ਅਤ੍ਥਾਪਤ੍ਤਿ ਤਿਟ੍ਠਨ੍ਤੇ ਭਗਵਤਿ ਆਪਜ੍ਜਤਿ, ਨੋ ਪਰਿਨਿਬ੍ਬੁਤੇ; ਅਤ੍ਥਾਪਤ੍ਤਿ ਪਰਿਨਿਬ੍ਬੁਤੇ ਭਗਵਤਿ ਆਪਜ੍ਜਤਿ, ਨੋ ਤਿਟ੍ਠਨ੍ਤੇ; ਅਤ੍ਥਾਪਤ੍ਤਿ ਤਿਟ੍ਠਨ੍ਤੇਪਿ ਭਗਵਤਿ ਆਪਜ੍ਜਤਿ ਪਰਿਨਿਬ੍ਬੁਤੇਪਿ. ਅਤ੍ਥਾਪਤ੍ਤਿ ਕਾਲੇ ਆਪਜ੍ਜਤਿ, ਨੋ ਵਿਕਾਲੇ; ਅਤ੍ਥਾਪਤ੍ਤਿ ਵਿਕਾਲੇ ਆਪਜ੍ਜਤਿ, ਨੋ ਕਾਲੇ; ਅਤ੍ਥਾਪਤ੍ਤਿ ਕਾਲੇ ਚੇਵ ਆਪਜ੍ਜਤਿ ਵਿਕਾਲੇ ਚ. ਅਤ੍ਥਾਪਤ੍ਤਿ ਰਤ੍ਤਿਂ ਆਪਜ੍ਜਤਿ, ਨੋ ਦਿਵਾ; ਅਤ੍ਥਾਪਤ੍ਤਿ ਦਿਵਾ ਆਪਜ੍ਜਤਿ, ਨੋ ਰਤ੍ਤਿਂ; ਅਤ੍ਥਾਪਤ੍ਤਿ ਰਤ੍ਤਿਞ੍ਚੇਵ ਆਪਜ੍ਜਤਿ ਦਿਵਾ ਚ. ਅਤ੍ਥਾਪਤ੍ਤਿ ਦਸਵਸ੍ਸੋ ਆਪਜ੍ਜਤਿ, ਨੋ ਊਨਦਸਵਸ੍ਸੋ; ਅਤ੍ਥਾਪਤ੍ਤਿ ਊਨਦਸਵਸ੍ਸੋ ਆਪਜ੍ਜਤਿ, ਨੋ ਦਸਵਸ੍ਸੋ; ਅਤ੍ਥਾਪਤ੍ਤਿ ਦਸਵਸ੍ਸੋ ਚੇਵ ਆਪਜ੍ਜਤਿ ਊਨਦਸਵਸ੍ਸੋ ਚ. ਅਤ੍ਥਾਪਤ੍ਤਿ ਪਞ੍ਚਵਸ੍ਸੋ ਆਪਜ੍ਜਤਿ, ਨੋ ਊਨਪਞ੍ਚਵਸ੍ਸੋ; ਅਤ੍ਥਾਪਤ੍ਤਿ ਊਨਪਞ੍ਚਵਸ੍ਸੋ ਆਪਜ੍ਜਤਿ, ਨੋ ਪਞ੍ਚਵਸ੍ਸੋ; ਅਤ੍ਥਾਪਤ੍ਤਿ ਪਞ੍ਚਵਸ੍ਸੋ ਚੇਵ ਆਪਜ੍ਜਤਿ ਊਨਪਞ੍ਚਵਸ੍ਸੋ ਚ. ਅਤ੍ਥਾਪਤ੍ਤਿ ਕੁਸਲਚਿਤ੍ਤੋ ਆਪਜ੍ਜਤਿ; ਅਤ੍ਥਾਪਤ੍ਤਿ ਅਕੁਸਲਚਿਤ੍ਤੋ ਆਪਜ੍ਜਤਿ; ਅਤ੍ਥਾਪਤ੍ਤਿ ਅਬ੍ਯਾਕਤਚਿਤ੍ਤੋ ਆਪਜ੍ਜਤਿ. ਅਤ੍ਥਾਪਤ੍ਤਿ ਸੁਖਵੇਦਨਾਸਮਙ੍ਗੀ ਆਪਜ੍ਜਤਿ; ਅਤ੍ਥਾਪਤ੍ਤਿ ਦੁਕ੍ਖਵੇਦਨਾਸਮਙ੍ਗੀ ਆਪਜ੍ਜਤਿ; ਅਤ੍ਥਾਪਤ੍ਤਿ ਅਦੁਕ੍ਖਮਸੁਖਵੇਦਨਾਸਮਙ੍ਗੀ ਆਪਜ੍ਜਤਿ. ਤੀਣਿ ਚੋਦਨਾਵਤ੍ਥੂਨਿ – ਦਿਟ੍ਠੇਨ, ਸੁਤੇਨ, ਪਰਿਸਙ੍ਕਾਯ. ਤਯੋ ਸਲਾਕਗ੍ਗਾਹਾ – ਗੁਲ਼੍ਹਕੋ, ਵਿਵਟਕੋ [ਵਿਵਟ੍ਟਕੋ (ਕ.)], ਸਕਣ੍ਣਜਪ੍ਪਕੋ. ਤਯੋ ਪਟਿਕ੍ਖੇਪਾ – ਮਹਿਚ੍ਛਤਾ, ਅਸਨ੍ਤੁਟ੍ਠਿਤਾ [ਅਸਨ੍ਤੁਟ੍ਠਤਾ (ਸ੍ਯਾ.)], ਅਸਲ੍ਲੇਖਤਾ. ਤਯੋ ਅਨੁਞ੍ਞਾਤਾ – ਅਪ੍ਪਿਚ੍ਛਤਾ, ਸਨ੍ਤੁਟ੍ਠਿਤਾ, ਸਲ੍ਲੇਖਤਾ. ਅਪਰੇਪਿ ਤਯੋ ਪਟਿਕ੍ਖੇਪਾ – ਮਹਿਚ੍ਛਤਾ, ਅਸਨ੍ਤੁਟ੍ਠਿਤਾ, ਅਮਤ੍ਤਞ੍ਞੁਤਾ. ਤਯੋ ਅਨੁਞ੍ਞਾਤਾ – ਅਪ੍ਪਿਚ੍ਛਤਾ, ਸਨ੍ਤੁਟ੍ਠਿਤਾ, ਮਤ੍ਤਞ੍ਞੁਤਾ. ਤਿਸ੍ਸੋ ਪਞ੍ਞਤ੍ਤਿਯੋ – ਪਞ੍ਞਤ੍ਤਿ, ਅਨੁਪਞ੍ਞਤ੍ਤਿ, ਅਨੁਪ੍ਪਨ੍ਨਪਞ੍ਞਤ੍ਤਿ. ਅਪਰਾਪਿ ਤਿਸ੍ਸੋ ਪਞ੍ਞਤ੍ਤਿਯੋ – ਸਬ੍ਬਤ੍ਥਪਞ੍ਞਤ੍ਤਿ, ਪਦੇਸਪਞ੍ਞਤ੍ਤਿ, ਸਾਧਾਰਣਪਞ੍ਞਤ੍ਤਿ. ਅਪਰਾਪਿ ਤਿਸ੍ਸੋ ਪਞ੍ਞਤ੍ਤਿਯੋ – ਅਸਾਧਾਰਣਪਞ੍ਞਤ੍ਤਿ, ਏਕਤੋਪਞ੍ਞਤ੍ਤਿ, ਉਭਤੋਪਞ੍ਞਤ੍ਤਿ.
ਅਤ੍ਥਾਪਤ੍ਤਿ ਬਾਲੋ ਆਪਜ੍ਜਤਿ, ਨੋ ਪਣ੍ਡਿਤੋ; ਅਤ੍ਥਾਪਤ੍ਤਿ ਪਣ੍ਡਿਤੋ ਆਪਜ੍ਜਤਿ, ਨੋ ਬਾਲੋ; ਅਤ੍ਥਾਪਤ੍ਤਿ ਬਾਲੋ ਚੇਵ ਆਪਜ੍ਜਤਿ ਪਣ੍ਡਿਤੋ ਚ. ਅਤ੍ਥਾਪਤ੍ਤਿ ਕਾਲ਼ੇ ਆਪਜ੍ਜਤਿ, ਨੋ ਜੁਣ੍ਹੇ; ਅਤ੍ਥਾਪਤ੍ਤਿ ਜੁਣ੍ਹੇ ਆਪਜ੍ਜਤਿ, ਨੋ ਕਾਲ਼ੇ; ਅਤ੍ਥਾਪਤ੍ਤਿ ਕਾਲ਼ੇ ਚੇਵ ਆਪਜ੍ਜਤਿ ਜੁਣ੍ਹੇ ਚ. ਅਤ੍ਥਿ ਕਾਲ਼ੇ ਕਪ੍ਪਤਿ, ਨੋ ਜੁਣ੍ਹੇ; ਅਤ੍ਥਿ ਜੁਣ੍ਹੇ ਕਪ੍ਪਤਿ, ਨੋ ਕਾਲ਼ੇ; ਅਤ੍ਥਿ ਕਾਲ਼ੇ ਚੇਵ ਕਪ੍ਪਤਿ ਜੁਣ੍ਹੇ ਚ. ਅਤ੍ਥਾਪਤ੍ਤਿ ਹੇਮਨ੍ਤੇ ਆਪਜ੍ਜਤਿ, ਨੋ ਗਿਮ੍ਹੇ ਨੋ ਵਸ੍ਸੇ; ਅਤ੍ਥਾਪਤ੍ਤਿ ਗਿਮ੍ਹੇ ਆਪਜ੍ਜਤਿ, ਨੋ ਹੇਮਨ੍ਤੇ ਨੋ ਵਸ੍ਸੇ; ਅਤ੍ਥਾਪਤ੍ਤਿ ਵਸ੍ਸੇ ਆਪਜ੍ਜਤਿ, ਨੋ ਹੇਮਨ੍ਤੇ ਨੋ ਗਿਮ੍ਹੇ. ਅਤ੍ਥਾਪਤ੍ਤਿ ਸਙ੍ਘੋ ਆਪਜ੍ਜਤਿ, ਨ ਗਣੋ ਨ ਪੁਗ੍ਗਲੋ; ਅਤ੍ਥਾਪਤ੍ਤਿ ਗਣੋ ਆਪਜ੍ਜਤਿ, ਨ ਸਙ੍ਘੋ ਨ ਪੁਗ੍ਗਲੋ; ਅਤ੍ਥਾਪਤ੍ਤਿ ਪੁਗ੍ਗਲੋ ਆਪਜ੍ਜਤਿ, ਨ ਸਙ੍ਘੋ ਨ ਗਣੋ. ਅਤ੍ਥਿ ਸਙ੍ਘਸ੍ਸ ਕਪ੍ਪਤਿ, ਨ ਗਣਸ੍ਸ ਨ ਪੁਗ੍ਗਲਸ੍ਸ; ਅਤ੍ਥਿ ਗਣਸ੍ਸ ਕਪ੍ਪਤਿ, ਨ ਸਙ੍ਘਸ੍ਸ ਨ ਪੁਗ੍ਗਲਸ੍ਸ; ਅਤ੍ਥਿ ਪੁਗ੍ਗਲਸ੍ਸ ਕਪ੍ਪਤਿ, ਨ ਸਙ੍ਘਸ੍ਸ ਨ ਗਣਸ੍ਸ. ਤਿਸ੍ਸੋ ਛਾਦਨਾ ਵਤ੍ਥੁਂ ਛਾਦੇਤਿ, ਨੋ ਆਪਤ੍ਤਿਂ; ਆਪਤ੍ਤਿਂ ਛਾਦੇਤਿ, ਨੋ ਵਤ੍ਥੁਂ; ਵਤ੍ਥੁਞ੍ਚੇਵ ਛਾਦੇਤਿ ਆਪਤ੍ਤਿਞ੍ਚ. ਤਿਸ੍ਸੋ ਪਟਿਚ੍ਛਾਦਿਯੋ – ਜਨ੍ਤਾਘਰਪਟਿਚ੍ਛਾਦਿ, ਉਦਕਪਟਿਚ੍ਛਾਦਿ, ਵਤ੍ਥਪਟਿਚ੍ਛਾਦਿ. [ਅ. ਨਿ. ੩.੧੩੨] ਤੀਣਿ ਪਟਿਚ੍ਛਨ੍ਨਾਨਿ ਵਹਨ੍ਤਿ, ਨੋ ਵਿਵਟਾਨਿ – ਮਾਤੁਗਾਮੋ ਪਟਿਚ੍ਛਨ੍ਨੋ ਵਹਤਿ, ਨੋ ਵਿਵਟੋ; ਬ੍ਰਾਹ੍ਮਣਾਨਂ ਮਨ੍ਤਾ ਪਟਿਚ੍ਛਨ੍ਨਾ ਵਹਨ੍ਤਿ, ਨੋ ਵਿਵਟਾ; ਮਿਚ੍ਛਾਦਿਟ੍ਠਿ ਪਟਿਚ੍ਛਨ੍ਨਾ ਵਹਤਿ, ਨੋ ਵਿਵਟਾ. ਤੀਣਿ ਵਿਵਟਾਨਿ ਵਿਰੋਚਨ੍ਤਿ, ਨੋ ਪਟਿਚ੍ਛਨ੍ਨਾਨਿ – ਚਨ੍ਦਮਣ੍ਡਲਂ ਵਿਵਟਂ ਵਿਰੋਚਤਿ, ਨੋ ਪਟਿਚ੍ਛਨ੍ਨਂ; ਸੂਰਿਯਮਣ੍ਡਲਂ ਵਿਵਟਂ ਵਿਰੋਚਤਿ, ਨੋ ਪਟਿਚ੍ਛਨ੍ਨਂ; ਤਥਾਗਤਪ੍ਪਵੇਦਿਤੋ ਧਮ੍ਮਵਿਨਯੋ ਵਿਵਟੋ ਵਿਰੋਚਤਿ, ਨੋ ਪਟਿਚ੍ਛਨ੍ਨੋ. ਤਯੋ ਸੇਨਾਸਨਗ੍ਗਾਹਾ – ਪੁਰਿਮਕੋ, ਪਚ੍ਛਿਮਕੋ, ਅਨ੍ਤਰਾਮੁਤ੍ਤਕੋ. ਅਤ੍ਥਾਪਤ੍ਤਿ ਗਿਲਾਨੋ ਆਪਜ੍ਜਤਿ, ਨੋ ਅਗਿਲਾਨੋ; ਅਤ੍ਥਾਪਤ੍ਤਿ ਅਗਿਲਾਨੋ ਆਪਜ੍ਜਤਿ, ਨੋ ਗਿਲਾਨੋ; ਅਤ੍ਥਾਪਤ੍ਤਿ ਗਿਲਾਨੋ ਚੇਵ ਆਪਜ੍ਜਤਿ ਅਗਿਲਾਨੋ ਚ.
ਤੀਣਿ ਅਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ. ਤੀਣਿ ਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ. ਤਯੋ ਪਰਿਵਾਸਾ – ਪਟਿਚ੍ਛਨ੍ਨਪਰਿਵਾਸੋ, ਅਪ੍ਪਟਿਚ੍ਛਨ੍ਨਪਰਿਵਾਸੋ, ਸੁਦ੍ਧਨ੍ਤਪਰਿਵਾਸੋ. ਤਯੋ ਮਾਨਤ੍ਤਾ – ਪਟਿਚ੍ਛਨ੍ਨਮਾਨਤ੍ਤਂ, ਅਪ੍ਪਟਿਚ੍ਛਨ੍ਨਮਾਨਤ੍ਤਂ, ਪਕ੍ਖਮਾਨਤ੍ਤਂ. ਤਯੋ ਪਾਰਿਵਾਸਿਕਸ੍ਸ ਭਿਕ੍ਖੁਨੋ ਰਤ੍ਤਿਚ੍ਛੇਦਾ – ਸਹਵਾਸੋ, ਵਿਪ੍ਪਵਾਸੋ, ਅਨਾਰੋਚਨਾ. ਅਤ੍ਥਾਪਤ੍ਤਿ ਅਨ੍ਤੋ ਆਪਜ੍ਜਤਿ, ਨੋ ਬਹਿ; ਅਤ੍ਥਾਪਤ੍ਤਿ ਬਹਿ ਆਪਜ੍ਜਤਿ, ਨੋ ਅਨ੍ਤੋ; ਅਤ੍ਥਾਪਤ੍ਤਿ ਅਨ੍ਤੋ ਚੇਵ ਆਪਜ੍ਜਤਿ ਬਹਿ ਚ. ਅਤ੍ਥਾਪਤ੍ਤਿ ਅਨ੍ਤੋਸੀਮਾਯ ਆਪਜ੍ਜਤਿ, ਨੋ ਬਹਿਸੀਮਾਯ; ਅਤ੍ਥਾਪਤ੍ਤਿ ਬਹਿਸੀਮਾਯ ਆਪਜ੍ਜਤਿ, ਨੋ ਅਨ੍ਤੋਸੀਮਾਯ; ਅਤ੍ਥਾਪਤ੍ਤਿ ਅਨ੍ਤੋਸੀਮਾਯ ਚੇਵ ਆਪਜ੍ਜਤਿ ਬਹਿਸੀਮਾਯ ਚ. ਤੀਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤਿ – ਕਾਯੇਨ ਆਪਜ੍ਜਤਿ, ਵਾਚਾਯ ਆਪਜ੍ਜਤਿ, ਕਾਯੇਨ ਵਾਚਾਯ ਆਪਜ੍ਜਤਿ. ਅਪਰੇਹਿਪਿ ਤੀਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤਿ – ਸਙ੍ਘਮਜ੍ਝੇ, ਗਣਮਜ੍ਝੇ, ਪੁਗ੍ਗਲਸ੍ਸ ਸਨ੍ਤਿਕੇ. ਤੀਹਾਕਾਰੇਹਿ ਆਪਤ੍ਤਿਯਾ ਵੁਟ੍ਠਾਤਿ – ਕਾਯੇਨ ਵੁਟ੍ਠਾਤਿ, ਵਾਚਾਯ ਵੁਟ੍ਠਾਤਿ, ਕਾਯੇਨ ਵਾਚਾਯ ਵੁਟ੍ਠਾਤਿ. ਅਪਰੇਹਿਪਿ ਤੀਹਾਕਾਰੇਹਿ ਆਪਤ੍ਤਿਯਾ ਵੁਟ੍ਠਾਤਿ – ਸਙ੍ਘਮਜ੍ਝੇ, ਗਣਮਜ੍ਝੇ, ਪੁਗ੍ਗਲਸ੍ਸ ਸਨ੍ਤਿਕੇ. ਤੀਣਿ ਅਧਮ੍ਮਿਕਾਨਿ ਅਮੂਲ਼੍ਹਵਿਨਯਸ੍ਸ ਦਾਨਾਨਿ. ਤੀਣਿ ਧਮ੍ਮਿਕਾਨਿ ਅਮੂਲ਼੍ਹਵਿਨਯਸ੍ਸ ਦਾਨਾਨਿ.
[ਚੂਲ਼ਵ. ੬] ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਤਜ੍ਜਨੀਯਕਮ੍ਮਂ ਕਰੇਯ੍ਯ – ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ, ਆਪਤ੍ਤਿਬਹੁਲੋ ਅਨਪਦਾਨੋ ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ. [ਚੂਲ਼ਵ. ੧੫] ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਨਿਯਸ੍ਸਕਮ੍ਮਂ ਕਰੇਯ੍ਯ – ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ, ਆਪਤ੍ਤਿਬਹੁਲੋ ਅਨਪਦਾਨੋ ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ. [ਚੂਲ਼ਵ. ੨੭] ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਪਬ੍ਬਾਜਨੀਯਕਮ੍ਮਂ ਕਰੇਯ੍ਯ – ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ, ਆਪਤ੍ਤਿਬਹੁਲੋ ਅਨਪਦਾਨੋ ਕੁਲਦੂਕਕੋ ਹੋਤਿ ਪਾਪਸਮਾਚਾਰੋ ਪਾਪਸਮਾਚਾਰਾ ਦਿਸ੍ਸਨ੍ਤਿ ਚੇਵ ਸੁਯ੍ਯਨ੍ਤਿ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਪਟਿਸਾਰਣੀਯਕਮ੍ਮਂ ਕਰੇਯ੍ਯ – ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ, ਆਪਤ੍ਤਿ ਬਹੁਲੋ ਅਨਪਦਾਨੋ ਗਿਹੀ ਅਕ੍ਕੋਸਤਿ ਪਰਿਭਾਸਤਿ. [ਚੂਲ਼ਵ. ੫੦] ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਆਪਤ੍ਤਿਯਾ ਅਦਸ੍ਸਨੇ ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ – ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ, ਆਪਤ੍ਤਿਬਹੁਲੋ ਅਨਪਦਾਨੋ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਸ੍ਸਿਤੁਂ. [ਚੂਲ਼ਵ. ੫੯] ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਆਪਤ੍ਤਿਯਾ ਅਪ੍ਪਟਿਕਮ੍ਮੇ ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ – ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ, ਆਪਤ੍ਤਿਬਹੁਲੋ ਅਨਪਦਾਨੋ ਆਪਤ੍ਤਿਂ ਆਪਜ੍ਜਿਤ੍ਵਾ ਨ ਇਚ੍ਛਤਿ ਆਪਤ੍ਤਿਂ ਪਟਿਕਾਤੁਂ. [ਚੂਲ਼ਵ. ੬੯] ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਪਾਪਿਕਾਯ ਦਿਟ੍ਠਿਯਾ ਅਪ੍ਪਟਿਨਿਸ੍ਸਗ੍ਗੇ ਉਕ੍ਖੇਪਨੀਯਕਮ੍ਮਂ ਕਰੇਯ੍ਯ – ਭਣ੍ਡਨਕਾਰਕੋ ਹੋਤਿ…ਪੇ… ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ, ਆਪਤ੍ਤਿਬਹੁਲੋ ਅਨਪਦਾਨੋ ਨ ਇਚ੍ਛਤਿ ਪਾਪਿਕਂ ਦਿਟ੍ਠਿਂ ਪਟਿਨਿਸ੍ਸਜ੍ਜਿਤੁਂ.
ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਆਕਙ੍ਖਮਾਨੋ ਸਙ੍ਘੋ ਆਗਾਲ਼੍ਹਾਯ ਚੇਤੇਯ੍ਯ – ਭਣ੍ਡਨਕਾਰਕੋ ਹੋਤਿ ਕਲਹਕਾਰਕੋ ਵਿਵਾਦਕਾਰਕੋ ਭਸ੍ਸਕਾਰਕੋ ਸਙ੍ਘੇ ਅਧਿਕਰਣਕਾਰਕੋ, ਬਾਲੋ ਹੋਤਿ ਅਬ੍ਯਤ੍ਤੋ ਆਪਤ੍ਤਿਬਹੁਲੋ ਅਨਪਦਾਨੋ, ਗਿਹਿਸਂਸਟ੍ਠੋ ਵਿਹਰਤਿ ਅਨਨੁਲੋਮਿਕੇਹਿ ਗਿਹਿਸਂਸਗ੍ਗੇਹਿ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਕਾਯਿਕੇਨ ਦਵੇਨ ਸਮਨ੍ਨਾਗਤੋ ਹੋਤਿ, ਵਾਚਸਿਕੇਨ ਦਵੇਨ ਸਮਨ੍ਨਾਗਤੋ ਹੋਤਿ, ਕਾਯਿਕਵਾਚਸਿਕੇਨ ਦਵੇਨ ਸਮਨ੍ਨਾਗਤੋ ਹੋਤਿ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਕਾਯਿਕੇਨ ਅਨਾਚਾਰੇਨ ਸਮਨ੍ਨਾਗਤੋ ਹੋਤਿ, ਵਾਚਸਿਕੇਨ ਅਨਾਚਾਰੇਨ ਸਮਨ੍ਨਾਗਤੋ ਹੋਤਿ, ਕਾਯਿਕਵਾਚਸਿਕੇਨ ਅਨਾਚਾਰੇਨ ਸਮਨ੍ਨਾਗਤੋ ਹੋਤਿ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਕਾਯਿਕੇਨ ਉਪਘਾਤਿਕੇਨ ਸਮਨ੍ਨਾਗਤੋ ਹੋਤਿ, ਵਾਚਸਿਕੇਨ ਉਪਘਾਤਿਕੇਨ ਸਮਨ੍ਨਾਗਤੋ ਹੋਤਿ, ਕਾਯਿਕਵਾਚਸਿਕੇਨ ਉਪਘਾਤਿਕੇਨ ਸਮਨ੍ਨਾਗਤੋ ਹੋਤਿ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਕਾਯਿਕੇਨ ਮਿਚ੍ਛਾਜੀਵੇਨ ਸਮਨ੍ਨਾਗਤੋ ਹੋਤਿ, ਵਾਚਸਿਕੇਨ ਮਿਚ੍ਛਾਜੀਵੇਨ ਸਮਨ੍ਨਾਗਤੋ ਹੋਤਿ, ਕਾਯਿਕਵਾਚਸਿਕੇਨ ਮਿਚ੍ਛਾਜੀਵੇਨ ਸਮਨ੍ਨਾਗਤੋ ਹੋਤਿ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਆਪਤ੍ਤਿਂ ਆਪਨ੍ਨੋ ਕਮ੍ਮਕਤੋ ਉਪਸਮ੍ਪਾਦੇਤਿ, ਨਿਸ੍ਸਯਂ ਦੇਤਿ, ਸਾਮਣੇਰਂ ਉਪਟ੍ਠਾਪੇਤਿ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਯਾਯ ਆਪਤ੍ਤਿਯਾ ਸਙ੍ਘੇਨ ਕਮ੍ਮਂ ਕਤਂ ਹੋਤਿ ਤਂ ਆਪਤ੍ਤਿਂ ਆਪਜ੍ਜਤਿ, ਅਞ੍ਞਂ ਵਾ ਤਾਦਿਸਿਕਂ, ਤਤੋ ਵਾ ਪਾਪਿਟ੍ਠਤਰਂ. ਅਪਰੇਹਿਪਿ ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਕਮ੍ਮਂ ਕਾਤਬ੍ਬਂ – ਬੁਦ੍ਧਸ੍ਸ ਅਵਣ੍ਣਂ ਭਾਸਤਿ, ਧਮ੍ਮਸ੍ਸ ਅਵਣ੍ਣਂ ਭਾਸਤਿ, ਸਙ੍ਘਸ੍ਸ ਅਵਣ੍ਣਂ ਭਾਸਤਿ.
ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਸਙ੍ਘਮਜ੍ਝੇ ਉਪੋਸਥਂ ਠਪੇਨ੍ਤਸ੍ਸ – ‘‘ਅਲਂ, ਭਿਕ੍ਖੁ, ਮਾ ਭਣ੍ਡਨਂ ਮਾ ਕਲਹਂ ਮਾ ਵਿਗ੍ਗਹਂ ਮਾ ਵਿਵਾਦ’’ਨ੍ਤਿ ਓਮਦ੍ਦਿਤ੍ਵਾ ਸਙ੍ਘੇਨ ਉਪੋਸਥੋ ਕਾਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਸਙ੍ਘਮਜ੍ਝੇ ਪਵਾਰਣਂ ਠਪੇਨ੍ਤਸ੍ਸ – ‘‘ਅਲਂ, ਭਿਕ੍ਖੁ, ਮਾ ਭਣ੍ਡਨਂ ਮਾ ਕਲਹਂ ਮਾ ਵਿਗ੍ਗਹਂ ਮਾ ਵਿਵਾਦ’’ਨ੍ਤਿ ਓਮਦ੍ਦਿਤ੍ਵਾ ਸਙ੍ਘੇਨ ਪਵਾਰੇਤਬ੍ਬਂ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨ ਕਾਚਿ ਸਙ੍ਘਸਮ੍ਮੁਤਿ ਦਾਤਬ੍ਬਾ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਸਙ੍ਘੇ ਨ ਵੋਹਰਿਤਬ੍ਬਂ [ਸਂਘੋ ਨ ਵੋਹਰਿਤਬ੍ਬੋ (ਸ੍ਯਾ.)] – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ ਨ ਕਿਸ੍ਮਿਂ ਚਿ ਪਚ੍ਚੇਕਟ੍ਠਾਨੇ ਠਪੇਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਸ੍ਸਾਯ ਨ ਵਤ੍ਥਬ੍ਬਂ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਨਿਸ੍ਸਯੋ ਨ ਦਾਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਓਕਾਸਕਮ੍ਮਂ ਕਾਰਾਪੇਨ੍ਤਸ੍ਸ ਨਾਲਂ ਓਕਾਸਕਮ੍ਮਂ ਕਾਤੁਂ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਸਵਚਨੀਯਂ ਨਾਦਾਤਬ੍ਬਂ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਵਿਨਯੋ ਨ ਪੁਚ੍ਛਿਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਵਿਨਯੋ ਨ ਪੁਚ੍ਛਿਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਵਿਨਯੋ ਨ ਵਿਸ੍ਸਜ੍ਜੇਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਵਿਨਯੋ ਨ ਵਿਸ੍ਸਜ੍ਜੇਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਅਨੁਯੋਗੋ ਨ ਦਾਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਸਦ੍ਧਿਂ ਵਿਨਯੋ ਨ ਸਾਕਚ੍ਛਿਤਬ੍ਬੋ [ਸਾਕਚ੍ਛਾਤਬ੍ਬੋ (ਕ.)] – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ. ਤੀਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨ ਉਪਸਮ੍ਪਾਦੇਤਬ੍ਬਂ ਨ ਨਿਸ੍ਸਯੋ ਦਾਤਬ੍ਬੋ ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਅਲਜ੍ਜੀ ਚ ਹੋਤਿ, ਬਾਲੋ ਚ, ਅਪਕਤਤ੍ਤੋ ਚ.
ਤਯੋ ਉਪੋਸਥਾ – ਚਾਤੁਦ੍ਦਸਿਕੋ, ਪਨ੍ਨਰਸਿਕੋ, ਸਾਮਗ੍ਗਿਉਪੋਸਥੋ. ਅਪਰੇਪਿ ਤਯੋ ਉਪੋਸਥਾ – ਸਙ੍ਘੇਉਪੋਸਥੋ, ਗਣੇਉਪੋਸਥੋ, ਪੁਗ੍ਗਲੇਉਪੋਸਥੋ. ਅਪਰੇਪਿ ਤਯੋ ਉਪੋਸਥਾ – ਸੁਤ੍ਤੁਦ੍ਦੇਸੋਉਪੋਸਥੋ, ਪਾਰਿਸੁਦ੍ਧਿਉਪੋਸਥੋ, ਅਧਿਟ੍ਠਾਨੁਪੋਸਥੋ. ਤਿਸ੍ਸੋ ਪਵਾਰਣਾ – ਚਾਤੁਦ੍ਦਸਿਕਾ, ਪਨ੍ਨਰਸਿਕਾ, ਸਾਮਗ੍ਗਿਪਵਾਰਣਾ. ਅਪਰਾਪਿ ਤਿਸ੍ਸੋ ਪਵਾਰਣਾ – ਸਙ੍ਘੇਪਵਾਰਣਾ, ਗਣੇਪਵਾਰਣਾ, ਪੁਗ੍ਗਲੇਪਵਾਰਣਾ. ਅਪਰਾਪਿ ਤਿਸ੍ਸੋ ਪਵਾਰਣਾ – ਤੇਵਾਚਿਕਾਪਵਾਰਣਾ, ਦ੍ਵੇਵਾਚਿਕਾਪਵਾਰਣਾ, ਸਮਾਨਵਸ੍ਸਿਕਾਪਵਾਰਣਾ.
ਤਯੋ ਆਪਾਯਿਕਾ ਨੇਰਯਿਕਾ – ਇਦਮਪ੍ਪਹਾਯ, ਯੋ ਚ ਅਬ੍ਰਹ੍ਮਚਾਰੀ ਬ੍ਰਹ੍ਮਚਾਰਿਪਟਿਞ੍ਞੋ, ਯੋ ਚ ਸੁਦ੍ਧਂ ਬ੍ਰਹ੍ਮਚਾਰਿਂ ਪਰਿਸੁਦ੍ਧਬ੍ਰਹ੍ਮਚਰਿਯਂ ਚਰਨ੍ਤਂ ਅਮੂਲਕੇਨ ਅਬ੍ਰਹ੍ਮਚਰਿਯੇਨ ਅਨੁਦ੍ਧਂਸੇਤਿ, ਯੋ ਚਾਯਂ ਏਵਂਵਾਦੀ ਏਵਂਦਿਟ੍ਠਿ [ਏਵਂਦਿਟ੍ਠੀ (ਸੀ.)] – ‘‘ਨਤ੍ਥਿ ਕਾਮੇਸੁ ਦੋਸੋ’’ਤਿ ਸੋ ਕਾਮੇਸੁ ਪਾਤਬ੍ਯਤਂ ਆਪਜ੍ਜਤਿ. [ਅ. ਨਿ. ੩.੭੦] ਤੀਣਿ ਅਕੁਸਲਮੂਲਾਨਿ – ਲੋਭੋ ਅਕੁਸਲਮੂਲਂ, ਦੋਸੋ ਅਕੁਸਲਮੂਲਂ, ਮੋਹੋ ਅਕੁਸਲਮੂਲਂ. [ਅ. ਨਿ. ੩.੭੦] ਤੀਣਿ ਕੁਸਲਮੂਲਾਨਿ – ਅਲੋਭੋ ਕੁਸਲਮੂਲਂ, ਅਦੋਸੋ ਕੁਸਲਮੂਲਂ, ਅਮੋਹੋ ਕੁਸਲਮੂਲਂ. ਤੀਣਿ ਦੁਚ੍ਚਰਿਤਾਨਿ – ਕਾਯਦੁਚ੍ਚਰਿਤਂ, ਵਚੀਦੁਚ੍ਚਰਿਤਂ, ਮਨੋਦੁਚ੍ਚਰਿਤਂ. ਤੀਣਿ ਸੁਚਰਿਤਾਨਿ – ਕਾਯਸੁਚਰਿਤਂ, ਵਚੀਸੁਚਰਿਤਂ, ਮਨੋਸੁਚਰਿਤਂ. ਤਯੋ ਅਤ੍ਥਵਸੇ ਪਟਿਚ੍ਚ ਭਗਵਤਾ ਕੁਲੇਸੁ ਤਿਕਭੋਜਨਂ ਪਞ੍ਞਤ੍ਤਂ – ਦੁਮ੍ਮਙ੍ਕੂਨਂ ਪੁਗ੍ਗਲਾਨਂ ਨਿਗ੍ਗਹਾਯ, ਪੇਸਲਾਨਂ ਭਿਕ੍ਖੂਨਂ ਫਾਸੁਵਿਹਾਰਾਯ, ‘‘ਮਾ ਪਾਪਿਚ੍ਛਾ ਪਕ੍ਖਂ ਨਿਸ੍ਸਾਯ ਸਙ੍ਘਂ ਭਿਨ੍ਦੇਯ੍ਯੁ’’ਨ੍ਤਿ ਕੁਲਾਨੁਦ੍ਦਯਤਾਯ ਚ. [ਚੂਲ਼ਵ. ੩੫੦] ਤੀਹਿ ਅਸਦ੍ਧਮ੍ਮੇਹਿ ਅਭਿਭੂਤੋ ਪਰਿਯਾਦਿਨ੍ਨਚਿਤ੍ਤੋ ਦੇਵਦਤ੍ਤੋ ਆਪਾਯਿਕੋ ਨੇਰਯਿਕੋ ਕਪ੍ਪਟ੍ਠੋ ਅਤੇਕਿਚ੍ਛੋ ਪਾਪਿਚ੍ਛਤਾ ਪਾਪਮਿਤ੍ਤਤਾ ਓਰਮਤ੍ਤਕੇਨ ਵਿਸੇਸਾਧਿਗਮੇਨ ਅਨ੍ਤਰਾ ਵੋਸਾਨਂ ਆਪਾਦਿ. ਤਿਸ੍ਸੋ ਸਮ੍ਮੁਤਿਯੋ – ਦਣ੍ਡਸਮ੍ਮੁਤਿ, ਸਿਕ੍ਕਾਸਮ੍ਮੁਤਿ, ਦਣ੍ਡਸਿਕ੍ਕਾਸਮ੍ਮੁਤਿ. ਤਿਸ੍ਸੋ ਪਾਦੁਕਾ ਧੁਵਟ੍ਠਾਨਿਕਾ ਅਸਙ੍ਕਮਨੀਯਾ – ਵਚ੍ਚਪਾਦੁਕਾ, ਪਸ੍ਸਾਵਪਾਦੁਕਾ, ਆਚਮਨਪਾਦੁਕਾ. ਤਿਸ੍ਸੋ ਪਾਦਘਂਸਨਿਯੋ – ਸਕ੍ਖਰਂ, ਕਥਲਾ, ਸਮੁਦ੍ਦਫੇਣਕੋਤਿ.
ਤਿਕਂ ਨਿਟ੍ਠਿਤਂ.
ਤਸ੍ਸੁਦ੍ਦਾਨਂ –
ਤਿਟ੍ਠਨ੍ਤੇ ਕਾਲੇ ਰਤ੍ਤਿਞ੍ਚ, ਦਸ ਪਞ੍ਚ ਕੁਸਲੇਨ;
ਵੇਦਨਾ ਚੋਦਨਾ ਵਤ੍ਥੁ, ਸਲਾਕਾ ਦ੍ਵੇ ਪਟਿਕ੍ਖਿਪਾ.
ਪਞ੍ਞਤ੍ਤਿ ਅਪਰੇ ਦ੍ਵੇ ਚ, ਬਾਲੋ ਕਾਲ਼ੇ ਚ ਕਪ੍ਪਤਿ;
ਹੇਮਨ੍ਤੇ ਸਙ੍ਘੋ ਸਙ੍ਘਸ੍ਸ, ਛਾਦਨਾ ਚ ਪਟਿਚ੍ਛਾਦਿ.
ਪਟਿਚ੍ਛਨ੍ਨਾ ਵਿਵਟਾ ਚ, ਸੇਨਾਸਨਗਿਲਾਯਨਾ;
ਪਾਤਿਮੋਕ੍ਖਂ ਪਰਿਵਾਸਂ, ਮਾਨਤ੍ਤਾ ਪਾਰਿਵਾਸਿਕਾ.
ਅਨ੍ਤੋ ਅਨ੍ਤੋ ਚ ਸੀਮਾਯ, ਆਪਜ੍ਜਤਿ ਪੁਨਾਪਰੇ;
ਵੁਟ੍ਠਾਤਿ ਅਪਰੇ ਚੇਵ, ਅਮੂਲ਼੍ਹਵਿਨਯਾ ਦੁਵੇ.
ਤਜ੍ਜਨੀਯਾ ਨਿਯਸ੍ਸਾ ਚ, ਪਬ੍ਬਾਜਪਟਿਸਾਰਣੀ;
ਅਦਸ੍ਸਨਾ ਪਟਿਕਮ੍ਮੇ, ਅਨਿਸ੍ਸਗ੍ਗੇ ਚ ਦਿਟ੍ਠਿਯਾ.
ਆਗਾਲ਼੍ਹਕਮ੍ਮਾਧਿਸੀਲੇ, ਦਵਾਨਾਚਾਰ ਘਾਤਿਕਾ;
ਆਜੀਵਾਪਨ੍ਨਾ ਤਾਦਿਸਿਕਾ, ਅਵਣ੍ਣੁਪੋਸਥੇਨ ਚ.
ਪਵਾਰਣਾ ਸਮ੍ਮੁਤਿ ਚ, ਵੋਹਾਰਪਚ੍ਚੇਕੇਨ ਚ;
ਨ ਵਤ੍ਥਬ੍ਬਂ ਨ ਦਾਤਬ੍ਬਂ, ਓਕਾਸਂ ਨ ਕਰੇ ਤਥਾ.
ਨ ਕਰੇ ਸਵਚਨੀਯਂ, ਨ ਪੁਚ੍ਛਿਤਬ੍ਬਕਾ ਦੁਵੇ;
ਨ ਵਿਸ੍ਸਜ੍ਜੇ ਦੁਵੇ ਚੇਵ, ਅਨੁਯੋਗਮ੍ਪਿ ਨੋ ਦਦੇ.
ਸਾਕਚ੍ਛਾ ਉਪਸਮ੍ਪਦਾ, ਨਿਸ੍ਸਯਸਾਮਣੇਰਾ ਚ;
ਉਪੋਸਥਤਿਕਾ ਤੀਣਿ, ਪਵਾਰਣਤਿਕਾ ਤਯੋ.
ਆਪਾਯਿਕਾ ਅਕੁਸਲਾ, ਕੁਸਲਾ ਚਰਿਤਾ ਦੁਵੇ;
ਤਿਕਭੋਜਨਸਦ੍ਧਮ੍ਮੇ, ਸਮ੍ਮੁਤਿ ਪਾਦੁਕੇਨ ਚ;
ਪਾਦਘਂਸਨਿਕਾ ਚੇਵ, ਉਦ੍ਦਾਨਂ ਤਿਕਕੇ ਇਦਨ੍ਤਿ.
੪. ਚਤੁਕ੍ਕਵਾਰੋ
੩੨੪. ਅਤ੍ਥਾਪਤ੍ਤਿ ਸਕਵਾਚਾਯ ਆਪਜ੍ਜਤਿ, ਪਰਵਾਚਾਯ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਪਰਵਾਚਾਯ ਆਪਜ੍ਜਤਿ, ਸਕਵਾਚਾਯ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਸਕਵਾਚਾਯ ਆਪਜ੍ਜਤਿ, ਸਕਵਾਚਾਯ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਪਰਵਾਚਾਯ ਆਪਜ੍ਜਤਿ, ਪਰਵਾਚਾਯ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਕਾਯੇਨ ਆਪਜ੍ਜਤਿ, ਵਾਚਾਯ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਵਾਚਾਯ ਆਪਜ੍ਜਤਿ, ਕਾਯੇਨ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਕਾਯੇਨ ਆਪਜ੍ਜਤਿ, ਕਾਯੇਨ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਵਾਚਾਯ ਆਪਜ੍ਜਤਿ, ਵਾਚਾਯ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਪਸੁਤ੍ਤੋ ਆਪਜ੍ਜਤਿ, ਪਟਿਬੁਦ੍ਧੋ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਪਟਿਬੁਦ੍ਧੋ ਆਪਜ੍ਜਤਿ, ਪਸੁਤ੍ਤੋ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਪਸੁਤ੍ਤੋ ਆਪਜ੍ਜਤਿ, ਪਸੁਤ੍ਤੋ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਪਟਿਬੁਦ੍ਧੋ ਆਪਜ੍ਜਤਿ, ਪਟਿਬੁਦ੍ਧੋ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਅਚਿਤ੍ਤਕੋ ਆਪਜ੍ਜਤਿ, ਸਚਿਤ੍ਤਕੋ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਸਚਿਤ੍ਤਕੋ ਆਪਜ੍ਜਤਿ, ਅਚਿਤ੍ਤਕੋ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਅਚਿਤ੍ਤਕੋ ਆਪਜ੍ਜਤਿ, ਅਚਿਤ੍ਤਕੋ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਸਚਿਤ੍ਤਕੋ ਆਪਜ੍ਜਤਿ, ਸਚਿਤ੍ਤਕੋ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਆਪਜ੍ਜਨ੍ਤੋ ਦੇਸੇਤਿ; ਦੇਸੇਨ੍ਤੋ ਆਪਜ੍ਜਤਿ; ਅਤ੍ਥਾਪਤ੍ਤਿ ਆਪਜ੍ਜਨ੍ਤੋ ਵੁਟ੍ਠਾਤਿ; ਵੁਟ੍ਠਹਨ੍ਤੋ ਆਪਜ੍ਜਤਿ. ਅਤ੍ਥਾਪਤ੍ਤਿ ਕਮ੍ਮੇਨ ਆਪਜ੍ਜਤਿ, ਅਕਮ੍ਮੇਨ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਅਕਮ੍ਮੇਨ ਆਪਜ੍ਜਤਿ, ਕਮ੍ਮੇਨ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਕਮ੍ਮੇਨ ਆਪਜ੍ਜਤਿ, ਕਮ੍ਮੇਨ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਅਕਮ੍ਮੇਨ ਆਪਜ੍ਜਤਿ, ਅਕਮ੍ਮੇਨ ਵੁਟ੍ਠਾਤਿ.
[ਅ. ਨਿ. ੪.੨੫੦; ਦੀ. ਨਿ. ੩.੩੧੩; ਵਿਭ. ੯੩੯] ਚਤ੍ਤਾਰੋ ਅਨਰਿਯਵੋਹਾਰਾ – ਅਦਿਟ੍ਠੇ ਦਿਟ੍ਠਵਾਦਿਤਾ, ਅਸ੍ਸੁਤੇ ਸੁਤਵਾਦਿਤਾ, ਅਮੁਤੇ ਮੁਤਵਾਦਿਤਾ, ਅਵਿਞ੍ਞਾਤੇ ਵਿਞ੍ਞਾਤਵਾਦਿਤਾ. ਚਤ੍ਤਾਰੋ ਅਰਿਯਵੋਹਾਰਾ – ਅਦਿਟ੍ਠੇ ਅਦਿਟ੍ਠਵਾਦਿਤਾ, ਅਸ੍ਸੁਤੇ ਅਸ੍ਸੁਤਵਾਦਿਤਾ, ਅਮੁਤੇ ਅਮੁਤਵਾਦਿਤਾ, ਅਵਿਞ੍ਞਾਤੇ ਅਵਿਞ੍ਞਾਤਵਾਦਿਤਾ. ਅਪਰੇਪਿ ਚਤ੍ਤਾਰੋ ਅਨਰਿਯਵੋਹਾਰਾ – ਦਿਟ੍ਠੇ ਅਦਿਟ੍ਠਵਾਦਿਤਾ, ਸੁਤੇ ਅਸ੍ਸੁਤਵਾਦਿਤਾ, ਮੁਤੇ ਅਮੁਤਵਾਦਿਤਾ, ਵਿਞ੍ਞਾਤੇ ਅਵਿਞ੍ਞਾਤਵਾਦਿਤਾ. ਚਤ੍ਤਾਰੋ ਅਰਿਯਵੋਹਾਰਾ – ਦਿਟ੍ਠੇ ਦਿਟ੍ਠਵਾਦਿਤਾ, ਸੁਤੇ ਸੁਤਵਾਦਿਤਾ, ਮੁਤੇ ਮੁਤਵਾਦਿਤਾ, ਵਿਞ੍ਞਾਤੇ ਵਿਞ੍ਞਾਤਵਾਦਿਤਾ.
ਚਤ੍ਤਾਰੋ ਪਾਰਾਜਿਕਾ ਭਿਕ੍ਖੂਨਂ ਭਿਕ੍ਖੁਨੀਹਿ ਸਾਧਾਰਣਾ; ਚਤ੍ਤਾਰੋ ਪਾਰਾਜਿਕਾ ਭਿਕ੍ਖੁਨੀਨਂ ਭਿਕ੍ਖੂਹਿ ਅਸਾਧਾਰਣਾ. ਚਤ੍ਤਾਰੋ ਪਰਿਕ੍ਖਾਰਾ – ਅਤ੍ਥਿ ਪਰਿਕ੍ਖਾਰੋ ਰਕ੍ਖਿਤਬ੍ਬੋ ਗੋਪੇਤਬ੍ਬੋ ਮਮਾਯਿਤਬ੍ਬੋ ਪਰਿਭੁਞ੍ਜਿਤਬ੍ਬੋ; ਅਤ੍ਥਿ ਪਰਿਕ੍ਖਾਰੋ ਰਕ੍ਖਿਤਬ੍ਬੋ ਗੋਪੇਤਬ੍ਬੋ ਮਮਾਯਿਤਬ੍ਬੋ, ਨ ਪਰਿਭੁਞ੍ਜਿਤਬ੍ਬੋ; ਅਤ੍ਥਿ ਪਰਿਕ੍ਖਾਰੋ ਰਕ੍ਖਿਤਬ੍ਬੋ ਗੋਪੇਤਬ੍ਬੋ, ਨ ਮਮਾਯਿਤਬ੍ਬੋ ਨ ਪਰਿਭੁਞ੍ਜਿਤਬ੍ਬੋ; ਅਤ੍ਥਿ ਪਰਿਕ੍ਖਾਰੋ ਨ ਰਕ੍ਖਿਤਬ੍ਬੋ ਨ ਗੋਪੇਤਬ੍ਬੋ, ਨ ਮਮਾਯਿਤਬ੍ਬੋ ਨ ਪਰਿਭੁਞ੍ਜਿਤਬ੍ਬੋ. ਅਤ੍ਥਾਪਤ੍ਤਿ ਸਮ੍ਮੁਖਾ ਆਪਜ੍ਜਤਿ, ਪਰਮ੍ਮੁਖਾ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਪਰਮ੍ਮੁਖਾ ਆਪਜ੍ਜਤਿ, ਸਮ੍ਮੁਖਾ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਸਮ੍ਮੁਖਾ ਆਪਜ੍ਜਤਿ, ਸਮ੍ਮੁਖਾ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਪਰਮ੍ਮੁਖਾ ਆਪਜ੍ਜਤਿ, ਪਰਮ੍ਮੁਖਾ ਵੁਟ੍ਠਾਤਿ. ਅਤ੍ਥਾਪਤ੍ਤਿ ਅਜਾਨਨ੍ਤੋ ਆਪਜ੍ਜਤਿ, ਜਾਨਨ੍ਤੋ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਜਾਨਨ੍ਤੋ ਆਪਜ੍ਜਤਿ, ਅਜਾਨਨ੍ਤੋ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਅਜਾਨਨ੍ਤੋ ਆਪਜ੍ਜਤਿ, ਅਜਾਨਨ੍ਤੋ ਵੁਟ੍ਠਾਤਿ; ਅਤ੍ਥਾਪਤ੍ਤਿ ਜਾਨਨ੍ਤੋ ਆਪਜ੍ਜਤਿ, ਜਾਨਨ੍ਤੋ ਵੁਟ੍ਠਾਤਿ.
ਚਤੂਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤਿ – ਕਾਯੇਨ ਆਪਜ੍ਜਤਿ, ਵਾਚਾਯ ਆਪਜ੍ਜਤਿ, ਕਾਯੇਨ ਵਾਚਾਯ ਆਪਜ੍ਜਤਿ, ਕਮ੍ਮਵਾਚਾਯ ਆਪਜ੍ਜਤਿ. ਅਪਰੇਹਿਪਿ ਚਤੂਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤਿ – ਸਙ੍ਘਮਜ੍ਝੇ, ਗਣਮਜ੍ਝੇ, ਪੁਗ੍ਗਲਸ੍ਸ ਸਨ੍ਤਿਕੇ, ਲਿਙ੍ਗਪਾਤੁਭਾਵੇਨ. ਚਤੂਹਾਕਾਰੇਹਿ ਆਪਤ੍ਤਿਯਾ ਵੁਟ੍ਠਾਤਿ – ਕਾਯੇਨ ਵੁਟ੍ਠਾਤਿ, ਵਾਚਾਯ ਵੁਟ੍ਠਾਤਿ, ਕਾਯੇਨ ਵਾਚਾਯ ਵੁਟ੍ਠਾਤਿ, ਕਮ੍ਮਵਾਚਾਯ ਵੁਟ੍ਠਾਤਿ. ਅਪਰੇਹਿਪਿ ਚਤੂਹਾਕਾਰੇਹਿ ਆਪਤ੍ਤਿਯਾ ਵੁਟ੍ਠਾਤਿ – ਸਙ੍ਘਮਜ੍ਝੇ, ਗਣਮਜ੍ਝੇ, ਪੁਗ੍ਗਲਸ੍ਸ ਸਨ੍ਤਿਕੇ, ਲਿਙ੍ਗਪਾਤੁਭਾਵੇਨ. ਸਹ ਪਟਿਲਾਭੇਨ ਪੁਰਿਮਂ ਜਹਤਿ, ਪਚ੍ਛਿਮੇ ਪਤਿਟ੍ਠਾਤਿ, ਵਿਞ੍ਞਤ੍ਤਿਯੋ ਪਟਿਪ੍ਪਸ੍ਸਮ੍ਭਨ੍ਤਿ, ਪਣ੍ਣਤ੍ਤਿਯੋ ਨਿਰੁਜ੍ਝਨ੍ਤਿ. ਸਹ ਪਟਿਲਾਭੇਨ ਪਚ੍ਛਿਮਂ ਜਹਤਿ, ਪੁਰਿਮੇ ਪਤਿਟ੍ਠਾਤਿ, ਵਿਞ੍ਞਤ੍ਤਿਯੋ ਪਟਿਪ੍ਪਸ੍ਸਮ੍ਭਨ੍ਤਿ, ਪਣ੍ਣਤ੍ਤਿਯੋ ਨਿਰੁਜ੍ਝਨ੍ਤਿ. ਚਤਸ੍ਸੋ ਚੋਦਨਾ – ਸੀਲਵਿਪਤ੍ਤਿਯਾ ਚੋਦੇਤਿ, ਆਚਾਰਵਿਪਤ੍ਤਿਯਾ ਚੋਦੇਤਿ, ਦਿਟ੍ਠਿਵਿਪਤ੍ਤਿਯਾ ਚੋਦੇਤਿ, ਆਜੀਵਵਿਪਤ੍ਤਿਯਾ ਚੋਦੇਤਿ. ਚਤ੍ਤਾਰੋ ਪਰਿਵਾਸਾ – ਪਟਿਚ੍ਛਨ੍ਨਪਰਿਵਾਸੋ, ਅਪ੍ਪਟਿਚ੍ਛਨ੍ਨਪਰਿਵਾਸੋ, ਸੁਦ੍ਧਨ੍ਤਪਰਿਵਾਸੋ, ਸਮੋਧਾਨਪਰਿਵਾਸੋ. ਚਤ੍ਤਾਰੋ ਮਾਨਤ੍ਤਾ – ਪਟਿਚ੍ਛਨ੍ਨਮਾਨਤ੍ਤਂ, ਅਪ੍ਪਟਿਚ੍ਛਨ੍ਨਮਾਨਤ੍ਤਂ, ਪਕ੍ਖਮਾਨਤ੍ਤਂ, ਸਮੋਧਾਨਮਾਨਤ੍ਤਂ. ਚਤ੍ਤਾਰੋ ਮਾਨਤ੍ਤਚਾਰਿਕਸ੍ਸ ਭਿਕ੍ਖੁਨੋ ਰਤ੍ਤਿਚ੍ਛੇਦਾ – ਸਹਵਾਸੋ, ਵਿਪ੍ਪਵਾਸੋ, ਅਨਾਰੋਚਨਾ, ਊਨੇ ਗਣੇ ਚਰਤਿ. ਚਤ੍ਤਾਰੋ ਸਾਮੁਕ੍ਕਂਸਾ. ਚਤ੍ਤਾਰੋ ਪਟਿਗ੍ਗਹਿਤਪਰਿਭੋਗਾ – ਯਾਵਕਾਲਿਕਂ, ਯਾਮਕਾਲਿਕਂ, ਸਤ੍ਤਾਹਕਾਲਿਕਂ, ਯਾਵਜੀਵਿਕਂ. ਚਤ੍ਤਾਰਿ ਮਹਾਵਿਕਟਾਨਿ – ਗੂਥੋ, ਮੁਤ੍ਤਂ, ਛਾਰਿਕਾ, ਮਤ੍ਤਿਕਾ. ਚਤ੍ਤਾਰਿ ਕਮ੍ਮਾਨਿ – ਅਪਲੋਕਨਕਮ੍ਮਂ, ਞਤ੍ਤਿਕਮ੍ਮਂ, ਞਤ੍ਤਿਦੁਤਿਯਕਮ੍ਮਂ, ਞਤ੍ਤਿਚਤੁਤ੍ਥਕਮ੍ਮਂ. ਅਪਰਾਨਿਪਿ ਚਤ੍ਤਾਰਿ ਕਮ੍ਮਾਨਿ – ਅਧਮ੍ਮੇਨ ਵਗ੍ਗਕਮ੍ਮਂ, ਅਧਮ੍ਮੇਨ ਸਮਗ੍ਗਕਮ੍ਮਂ, ਧਮ੍ਮੇਨ ਵਗ੍ਗਕਮ੍ਮਂ, ਧਮ੍ਮੇਨ ਸਮਗ੍ਗਕਮ੍ਮਂ. ਚਤਸ੍ਸੋ ਵਿਪਤ੍ਤਿਯੋ – ਸੀਲਵਿਪਤ੍ਤਿ, ਆਚਾਰਵਿਪਤ੍ਤਿ, ਦਿਟ੍ਠਿਵਿਪਤ੍ਤਿ, ਆਜੀਵਵਿਪਤ੍ਤਿ. ਚਤ੍ਤਾਰਿ ਅਧਿਕਰਣਾਨਿ – ਵਿਵਾਦਾਧਿਕਰਣਂ, ਅਨੁਵਾਦਾਧਿਕਰਣਂ, ਆਪਤ੍ਤਾਧਿਕਰਣਂ, ਕਿਚ੍ਚਾਧਿਕਰਣਂ. [ਅ. ਨਿ. ੪.੨੧੧] ਚਤ੍ਤਾਰੋ ਪਰਿਸਦੂਸਨਾ – ਭਿਕ੍ਖੁ ਦੁਸ੍ਸੀਲੋ ਪਾਪਧਮ੍ਮੋ ਪਰਿਸਦੂਸਨੋ, ਭਿਕ੍ਖੁਨੀ ਦੁਸ੍ਸੀਲਾ ਪਾਪਧਮ੍ਮਾ ਪਰਿਸਦੂਸਨਾ, ਉਪਾਸਕੋ ਦੁਸ੍ਸੀਲੋ ਪਾਪਧਮ੍ਮੋ ਪਰਿਸਦੂਸਨੋ, ਉਪਾਸਿਕਾ ਦੁਸ੍ਸੀਲਾ ਪਾਪਧਮ੍ਮਾ ਪਰਿਸਦੂਸਨਾ. ਚਤ੍ਤਾਰੋ ਪਰਿਸਸੋਭਨਾ [ਪਰਿਸਸੋਭਣਾ (ਸ੍ਯਾ. ਕ.)] – ਭਿਕ੍ਖੁ ਸੀਲਵਾ ਕਲ੍ਯਾਣਧਮ੍ਮੋ ਪਰਿਸਸੋਭਨੋ, ਭਿਕ੍ਖੁਨੀ ਸੀਲਵਤੀ ਕਲ੍ਯਾਣਧਮ੍ਮਾ ਪਰਿਸਸੋਭਨਾ, ਉਪਾਸਕੋ ਸੀਲਵਾ ਕਲ੍ਯਾਣਧਮ੍ਮੋ ਪਰਿਸਸੋਭਨੋ, ਉਪਾਸਿਕਾ ਸੀਲਵਤੀ ਕਲ੍ਯਾਣਧਮ੍ਮਾ ਪਰਿਸਸੋਭਨਾ.
ਅਤ੍ਥਾਪਤ੍ਤਿ ਆਗਨ੍ਤੁਕੋ ਆਪਜ੍ਜਤਿ, ਨੋ ਆਵਾਸਿਕੋ; ਅਤ੍ਥਾਪਤ੍ਤਿ ਆਵਾਸਿਕੋ ਆਪਜ੍ਜਤਿ, ਨੋ ਆਗਨ੍ਤੁਕੋ; ਅਤ੍ਥਾਪਤ੍ਤਿ ਆਗਨ੍ਤੁਕੋ ਚੇਵ ਆਪਜ੍ਜਤਿ ਆਵਾਸਿਕੋ ਚ ਅਤ੍ਥਾਪਤ੍ਤਿ ਨੇਵ ਆਗਨ੍ਤੁਕੋ ਆਪਜ੍ਜਤਿ, ਨੋ ਆਵਾਸਿਕੋ. ਅਤ੍ਥਾਪਤ੍ਤਿ ਗਮਿਕੋ ਆਪਜ੍ਜਤਿ, ਨੋ ਆਵਾਸਿਕੋ; ਅਤ੍ਥਾਪਤ੍ਤਿ ਆਵਾਸਿਕੋ ਆਪਜ੍ਜਤਿ, ਨੋ ਗਮਿਕੋ; ਅਤ੍ਥਾਪਤ੍ਤਿ ਗਮਿਕੋ ਚੇਵ ਆਪਜ੍ਜਤਿ ਆਵਾਸਿਕੋ ਚ; ਅਤ੍ਥਾਪਤ੍ਤਿ ਨੇਵ ਗਮਿਕੋ ਆਪਜ੍ਜਤਿ ਨੋ ਆਵਾਸਿਕੋ. ਅਤ੍ਥਿ ਵਤ੍ਥੁਨਾਨਤ੍ਤਤਾ ਨੋ ਆਪਤ੍ਤਿਨਾਨਤ੍ਤਤਾ, ਅਤ੍ਥਿ ਆਪਤ੍ਤਿਨਾਨਤ੍ਤਤਾ ਨੋ ਵਤ੍ਥੁਨਾਨਤ੍ਤਤਾ, ਅਤ੍ਥਿ ਵਤ੍ਥੁਨਾਨਤ੍ਤਤਾ ਚੇਵ ਆਪਤ੍ਤਿਨਾਨਤ੍ਤਤਾ ਚ, ਅਤ੍ਥਿ ਨੇਵ ਵਤ੍ਥੁਨਾਨਤ੍ਤਤਾ ਨੋ ਆਪਤ੍ਤਿਨਾਨਤ੍ਤਤਾ. ਅਤ੍ਥਿ ਵਤ੍ਥੁਸਭਾਗਤਾ ਨੋ ਆਪਤ੍ਤਿਸਭਾਗਤਾ, ਅਤ੍ਥਿ ਆਪਤ੍ਤਿਸਭਾਗਤਾ ਨੋ ਵਤ੍ਥੁਸਭਾਗਤਾ, ਅਤ੍ਥਿ ਵਤ੍ਥੁਸਭਾਗਤਾ ਚੇਵ ਆਪਤ੍ਤਿਸਭਾਗਤਾ ਚ ਅਤ੍ਥਿ ਨੇਵ ਵਤ੍ਥੁਸਭਾਗਤਾ ਨੋ ਆਪਤ੍ਤਿਸਭਾਗਤਾ. ਅਤ੍ਥਾਪਤ੍ਤਿ ਉਪਜ੍ਝਾਯੋ ਆਪਜ੍ਜਤਿ ਨੋ ਸਦ੍ਧਿਵਿਹਾਰਿਕੋ, ਅਤ੍ਥਾਪਤ੍ਤਿ ਸਦ੍ਧਿਵਿਹਾਰਿਕੋ ਆਪਜ੍ਜਤਿ ਨੋ ਉਪਜ੍ਝਾਯੋ, ਅਤ੍ਥਾਪਤ੍ਤਿ ਉਪਜ੍ਝਾਯੋ ਚੇਵ ਆਪਜ੍ਜਤਿ ਸਦ੍ਧਿਵਿਹਾਰਿਕੋ ਚ, ਅਤ੍ਥਾਪਤ੍ਤਿ ਨੇਵ ਉਪਜ੍ਝਾਯੋ ਆਪਜ੍ਜਤਿ ਨੋ ਸਦ੍ਧਿਵਿਹਾਰਿਕੋ. ਅਤ੍ਥਾਪਤ੍ਤਿ ਆਚਰਿਯੋ ਆਪਜ੍ਜਤਿ ਨੋ ਅਨ੍ਤੇਵਾਸਿਕੋ, ਅਤ੍ਥਾਪਤ੍ਤਿ ਅਨ੍ਤੇਵਾਸਿਕੋ ਆਪਜ੍ਜਤਿ ਨੋ ਆਚਰਿਯੋ, ਅਤ੍ਥਾਪਤ੍ਤਿ ਆਚਰਿਯੋ ਚੇਵ ਆਪਜ੍ਜਤਿ ਅਨ੍ਤੇਵਾਸਿਕੋ ਚ, ਅਤ੍ਥਾਪਤ੍ਤਿ ਨੇਵ ਆਚਰਿਯੋ ਆਪਜ੍ਜਤਿ ਨੋ ਅਨ੍ਤੇਵਾਸਿਕੋ. ਚਤ੍ਤਾਰੋ ਪਚ੍ਚਯਾ ਅਨਾਪਤ੍ਤਿ ਵਸ੍ਸਚ੍ਛੇਦਸ੍ਸ – ਸਙ੍ਘੋ ਵਾ ਭਿਨ੍ਨੋ ਹੋਤਿ, ਸਙ੍ਘਂ ਵਾ ਭਿਨ੍ਦਿਤੁਕਾਮਾ ਹੋਨ੍ਤਿ, ਜੀਵਿਤਨ੍ਤਰਾਯੋ ਵਾ ਹੋਤਿ, ਬ੍ਰਹ੍ਮਚਰਿਯਨ੍ਤਰਾਯੋ ਵਾ ਹੋਤਿ. ਚਤ੍ਤਾਰਿ ਵਚੀਦੁਚ੍ਚਰਿਤਾਨਿ – ਮੁਸਾਵਾਦੋ, ਪਿਸੁਣਾ ਵਾਚਾ, ਫਰੁਸਾ ਵਾਚਾ, ਸਮ੍ਫਪ੍ਪਲਾਪੋ. ਚਤ੍ਤਾਰਿ ਵਚੀਸੁਚਰਿਤਾਨਿ – ਸਚ੍ਚਵਾਚਾ, ਅਪਿਸੁਣਾ ਵਾਚਾ, ਸਣ੍ਹਾ ਵਾਚਾ, ਮਨ੍ਤਾ ਭਾਸਾ. ਅਤ੍ਥਿ ਆਦਿਯਨ੍ਤੋ ਗਰੁਕਂ ਆਪਤ੍ਤਿਂ ਆਪਜ੍ਜਤਿ, ਪਯੋਜੇਨ੍ਤੋ ਲਹੁਕਂ; ਅਤ੍ਥਿ ਆਦਿਯਨ੍ਤੋ ਲਹੁਕਂ ਆਪਤ੍ਤਿਂ ਆਪਜ੍ਜਤਿ, ਪਯੋਜੇਨ੍ਤੋ ਗਰੁਕਂ, ਅਤ੍ਥਿ ਆਦਿਯਨ੍ਤੋਪਿ ਪਯੋਜੇਨ੍ਤੋਪਿ ਗਰੁਕਂ ਆਪਤ੍ਤਿਂ ਆਪਜ੍ਜਤਿ; ਅਤ੍ਥਿ ਆਦਿਯਨ੍ਤੋਪਿ ਪਯੋਜੇਨ੍ਤੋਪਿ ਲਹੁਕਂ ਆਪਤ੍ਤਿਂ ਆਪਜ੍ਜਤਿ.
ਅਤ੍ਥਿ ਪੁਗ੍ਗਲੋ ਅਭਿਵਾਦਨਾਰਹੋ, ਨੋ ਪਚ੍ਚੁਟ੍ਠਾਨਾਰਹੋ; ਅਤ੍ਥਿ ਪੁਗ੍ਗਲੋ ਪਚ੍ਚੁਟ੍ਠਾਨਾਰਹੋ, ਨੋ ਅਭਿਵਾਦਨਾਰਹੋ; ਅਤ੍ਥਿ ਪੁਗ੍ਗਲੋ ਅਭਿਵਾਦਨਾਰਹੋ ਚੇਵ ਪਚ੍ਚੁਟ੍ਠਾਨਾਰਹੋ ਚ; ਅਤ੍ਥਿ ਪੁਗ੍ਗਲੋ ਨੇਵ ਅਭਿਵਾਦਨਾਰਹੋ ਨੋ ਪਚ੍ਚੁਟ੍ਠਾਨਾਰਹੋ. ਅਤ੍ਥਿ ਪੁਗ੍ਗਲੋ ਆਸਨਾਰਹੋ, ਨੋ ਅਭਿਵਾਦਨਾਰਹੋ; ਅਤ੍ਥਿ ਪੁਗ੍ਗਲੋ ਅਭਿਵਾਦਨਾਰਹੋ, ਨੋ ਆਸਨਾਰਹੋ; ਅਤ੍ਥਿ ਪੁਗ੍ਗਲੋ ਆਸਨਾਰਹੋ ਚੇਵ ਅਭਿਵਾਦਨਾਰਹੋ ਚ; ਅਤ੍ਥਿ ਪੁਗ੍ਗਲੋ ਨੇਵ ਆਸਨਾਰਹੋ ਨੋ ਅਭਿਵਾਦਨਾਰਹੋ. ਅਤ੍ਥਾਪਤ੍ਤਿ ਕਾਲੇ ਆਪਜ੍ਜਤਿ, ਨੋ ਵਿਕਾਲੇ; ਅਤ੍ਥਾਪਤ੍ਤਿ ਵਿਕਾਲੇ ਆਪਜ੍ਜਤਿ, ਨੋ ਕਾਲੇ; ਅਤ੍ਥਾਪਤ੍ਤਿ ਕਾਲੇ ਚੇਵ ਆਪਜ੍ਜਤਿ ਵਿਕਾਲੇ ਚ; ਅਤ੍ਥਾਪਤ੍ਤਿ ਨੇਵ ਕਾਲੇ ਆਪਜ੍ਜਤਿ ਨੋ ਵਿਕਾਲੇ. ਅਤ੍ਥਿ ਪਟਿਗ੍ਗਹਿਤਂ ਕਾਲੇ ਕਪ੍ਪਤਿ, ਨੋ ਵਿਕਾਲੇ; ਅਤ੍ਥਿ ਪਟਿਗ੍ਗਹਿਤਂ ਵਿਕਾਲੇ ਕਪ੍ਪਤਿ, ਨੋ ਕਾਲੇ; ਅਤ੍ਥਿ ਪਟਿਗ੍ਗਹਿਤਂ ਕਾਲੇ ਚੇਵ ਕਪ੍ਪਤਿ ਵਿਕਾਲੇ ਚ; ਅਤ੍ਥਿ ਪਟਿਗ੍ਗਹਿਤਂ ਨੇਵ ਕਾਲੇ ਕਪ੍ਪਤਿ ਨੋ ਵਿਕਾਲੇ. ਅਤ੍ਥਾਪਤ੍ਤਿ ਪਚ੍ਚਨ੍ਤਿਮੇਸੁ ਜਨਪਦੇਸੁ ਆਪਜ੍ਜਤਿ, ਨੋ ਮਜ੍ਝਿਮੇਸੁ; ਅਤ੍ਥਾਪਤ੍ਤਿ ਮਜ੍ਝਿਮੇਸੁ ਜਨਪਦੇਸੁ ਆਪਜ੍ਜਤਿ, ਨੋ ਪਚ੍ਚਨ੍ਤਿਮੇਸੁ; ਅਤ੍ਥਾਪਤ੍ਤਿ ਪਚ੍ਚਨ੍ਤਿਮੇਸੁ ਚੇਵ ਜਨਪਦੇਸੁ ਆਪਜ੍ਜਤਿ ਮਜ੍ਝਿਮੇਸੁ ਚ; ਅਤ੍ਥਾਪਤ੍ਤਿ ਨੇਵ ਪਚ੍ਚਨ੍ਤਿਮੇਸੁ ਜਨਪਦੇਸੁ ਆਪਜ੍ਜਤਿ ਨੋ ਮਜ੍ਝਿਮੇਸੁ. ਅਤ੍ਥਿ ਪਚ੍ਚਨ੍ਤਿਮੇਸੁ ਜਨਪਦੇਸੁ ਕਪ੍ਪਤਿ, ਨੋ ਮਜ੍ਝਿਮੇਸੁ; ਅਤ੍ਥਿ ਮਜ੍ਝਿਮੇਸੁ ਜਨਪਦੇਸੁ ਕਪ੍ਪਤਿ, ਨੋ ਪਚ੍ਚਨ੍ਤਿਮੇਸੁ; ਅਤ੍ਥਿ ਪਚ੍ਚਨ੍ਤਿਮੇਸੁ ਚੇਵ ਜਨਪਦੇਸੁ ਕਪ੍ਪਤਿ ਮਜ੍ਝਿਮੇਸੁ ਚ; ਅਤ੍ਥਿ ਨੇਵ ਪਚ੍ਚਨ੍ਤਿਮੇਸੁ ਜਨਪਦੇਸੁ ਕਪ੍ਪਤਿ ਨੋ ਮਜ੍ਝਿਮੇਸੁ. ਅਤ੍ਥਾਪਤ੍ਤਿ ਅਨ੍ਤੋ ਆਪਜ੍ਜਤਿ, ਨੋ ਬਹਿ; ਅਤ੍ਥਾਪਤ੍ਤਿ ਬਹਿ ਆਪਜ੍ਜਤਿ, ਨੋ ਅਨ੍ਤੋ; ਅਤ੍ਥਾਪਤ੍ਤਿ ਅਨ੍ਤੋ ਚੇਵ ਆਪਜ੍ਜਤਿ ਬਹਿ ਚ; ਅਤ੍ਥਾਪਤ੍ਤਿ ਨੇਵ ਅਨ੍ਤੋ ਆਪਜ੍ਜਤਿ ਨੋ ਬਹਿ. ਅਤ੍ਥਾਪਤ੍ਤਿ ਅਨ੍ਤੋਸੀਮਾਯ ਆਪਜ੍ਜਤਿ, ਨੋ ਬਹਿਸੀਮਾਯ; ਅਤ੍ਥਾਪਤ੍ਤਿ ਬਹਿਸੀਮਾਯ ਆਪਜ੍ਜਤਿ, ਨੋ ਅਨ੍ਤੋਸੀਮਾਯ; ਅਤ੍ਥਾਪਤ੍ਤਿ ਅਨ੍ਤੋਸੀਮਾਯ ਚੇਵ ਆਪਜ੍ਜਤਿ ਬਹਿਸੀਮਾਯ ਚ; ਅਤ੍ਥਾਪਤ੍ਤਿ ਨੇਵ ਅਨ੍ਤੋਸੀਮਾਯ ਆਪਜ੍ਜਤਿ ਨੋ ਬਹਿਸੀਮਾਯ. ਅਤ੍ਥਾਪਤ੍ਤਿ ਗਾਮੇ ਆਪਜ੍ਜਤਿ, ਨੋ ਅਰਞ੍ਞੇ; ਅਤ੍ਥਾਪਤ੍ਤਿ ਅਰਞ੍ਞੇ ਆਪਜ੍ਜਤਿ, ਨੋ ਗਾਮੇ; ਅਤ੍ਥਾਪਤ੍ਤਿ ਗਾਮੇ ਚੇਵ ਆਪਜ੍ਜਤਿ ਅਰਞ੍ਞੇ ਚ; ਅਤ੍ਥਾਪਤ੍ਤਿ ਨੇਵ ਗਾਮੇ ਆਪਜ੍ਜਤਿ ਨੋ ਅਰਞ੍ਞੇ.
ਚਤਸ੍ਸੋ ਚੋਦਨਾ – ਵਤ੍ਥੁਸਨ੍ਦਸ੍ਸਨਾ, ਆਪਤ੍ਤਿਸਨ੍ਦਸ੍ਸਨਾ, ਸਂਵਾਸਪਟਿਕ੍ਖੇਪੋ, ਸਾਮੀਚਿਪਟਿਕ੍ਖੇਪੋ. ਚਤ੍ਤਾਰੋ ਪੁਬ੍ਬਕਿਚ੍ਚਾ. ਚਤ੍ਤਾਰੋ ਪਤ੍ਤਕਲ੍ਲਾ. ਚਤ੍ਤਾਰਿ ਅਨਞ੍ਞਪਾਚਿਤ੍ਤਿਯਾਨਿ. ਚਤਸ੍ਸੋ ਭਿਕ੍ਖੁਸਮ੍ਮੁਤਿਯੋ. [ਅ. ਨਿ. ੪.੧੭; ਵਿਭ. ੯੩੯; ਦੀ. ਨਿ. ੩.੩੧੧] ਚਤ੍ਤਾਰਿ ਅਗਤਿਗਮਨਾਨਿ – ਛਨ੍ਦਾਗਤਿਂ ਗਚ੍ਛਤਿ, ਦੋਸਾਗਤਿਂ ਗਚ੍ਛਤਿ, ਮੋਹਾਗਤਿਂ ਗਚ੍ਛਤਿ, ਭਯਾਗਤਿਂ ਗਚ੍ਛਤਿ. ਚਤ੍ਤਾਰਿ ਨਾਗਤਿਗਮਨਾਨਿ – ਨ ਛਨ੍ਦਾਗਤਿਂ ਗਚ੍ਛਤਿ, ਨ ਦੋਸਾਗਤਿਂ ਗਚ੍ਛਤਿ, ਨ ਮੋਹਾਗਤਿਂ ਗਚ੍ਛਤਿ, ਨ ਭਯਾਗਤਿਂ ਗਚ੍ਛਤਿ. ਚਤੂਹਙ੍ਗੇਹਿ ਸਮਨ੍ਨਾਗਤੋ ਅਲਜ੍ਜੀ ਭਿਕ੍ਖੁ ਸਙ੍ਘਂ ਭਿਨ੍ਦਤਿ – ਛਨ੍ਦਾਗਤਿਂ ਗਚ੍ਛਨ੍ਤੋ, ਦੋਸਾਗਤਿਂ ਗਚ੍ਛਨ੍ਤੋ, ਮੋਹਾਗਤਿਂ ਗਚ੍ਛਨ੍ਤੋ, ਭਯਾਗਤਿਂ ਗਚ੍ਛਨ੍ਤੋ. ਚਤੂਹਙ੍ਗੇਹਿ ਸਮਨ੍ਨਾਗਤੋ ਪੇਸਲੋ ਭਿਕ੍ਖੁ ਭਿਨ੍ਨਂ ਸਙ੍ਘਂ ਸਮਗ੍ਗਂ ਕਰੋਤਿ – ਨ ਛਨ੍ਦਾਗਤਿਂ ਗਚ੍ਛਨ੍ਤੋ, ਨ ਦੋਸਾਗਤਿਂ ਗਚ੍ਛਨ੍ਤੋ, ਨ ਮੋਹਾਗਤਿਂ ਗਚ੍ਛਨ੍ਤੋ, ਨ ਭਯਾਗਤਿਂ ਗਚ੍ਛਨ੍ਤੋ. ਚਤੂਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਵਿਨਯੋ ਨ ਪੁਚ੍ਛਿਤਬ੍ਬੋ – ਛਨ੍ਦਾਗਤਿਂ ਗਚ੍ਛਤਿ, ਦੋਸਾਗਤਿਂ ਗਚ੍ਛਤਿ, ਮੋਹਾਗਤਿਂ ਗਚ੍ਛਤਿ, ਭਯਾਗਤਿਂ ਗਚ੍ਛਤਿ. ਚਤੂਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਵਿਨਯੋ ਨ ਪੁਚ੍ਛਿਤਬ੍ਬੋ – ਛਨ੍ਦਾਗਤਿਂ ਗਚ੍ਛਤਿ, ਦੋਸਾਗਤਿਂ ਗਚ੍ਛਤਿ, ਮੋਹਾਗਤਿਂ ਗਚ੍ਛਤਿ, ਭਯਾਗਤਿਂ ਗਚ੍ਛਤਿ. ਚਤੂਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਵਿਨਯੋ ਨ ਵਿਸ੍ਸਜ੍ਜੇਤਬ੍ਬੋ – ਛਨ੍ਦਾਗਤਿਂ ਗਚ੍ਛਤਿ, ਦੋਸਾਗਤਿਂ ਗਚ੍ਛਤਿ, ਮੋਹਾਗਤਿਂ ਗਚ੍ਛਤਿ, ਭਯਾਗਤਿਂ ਗਚ੍ਛਤਿ. ਚਤੂਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਵਿਨਯੋ ਨ ਵਿਸ੍ਸਜ੍ਜੇਤਬ੍ਬੋ – ਛਨ੍ਦਾਗਤਿਂ ਗਚ੍ਛਤਿ, ਦੋਸਾਗਤਿਂ ਗਚ੍ਛਤਿ, ਮੋਹਾਗਤਿਂ ਗਚ੍ਛਤਿ, ਭਯਾਗਤਿਂ ਗਚ੍ਛਤਿ. ਚਤੂਹਙ੍ਗੇਹਿ ਸਮਨ੍ਨਾਗਤਸ੍ਸ ਭਿਕ੍ਖੁਨੋ ਅਨੁਯੋਗੋ ਨ ਦਾਤਬ੍ਬੋ – ਛਨ੍ਦਾਗਤਿਂ ਗਚ੍ਛਤਿ, ਦੋਸਾਗਤਿਂ ਗਚ੍ਛਤਿ, ਮੋਹਾਗਤਿਂ ਗਚ੍ਛਤਿ, ਭਯਾਗਤਿਂ ਗਚ੍ਛਤਿ. ਚਤੂਹਙ੍ਗੇਹਿ ਸਮਨ੍ਨਾਗਤੇ ਭਿਕ੍ਖੁਨਾ ਸਦ੍ਧਿਂ ਵਿਨਯੋ ਨ ਸਾਕਚ੍ਛਿਤਬ੍ਬੋ – ਛਨ੍ਦਾਗਤਿਂ ਗਚ੍ਛਤਿ, ਦੋਸਾਗਤਿਂ ਗਚ੍ਛਤਿ, ਮੋਹਾਗਤਿਂ ਗਚ੍ਛਤਿ, ਭਯਾਗਤਿਂ ਗਚ੍ਛਤਿ. ਅਤ੍ਥਾਪਤ੍ਤਿ ਗਿਲਾਨੋ ਆਪਜ੍ਜਤਿ, ਨੋ ਅਗਿਲਾਨੋ; ਅਤ੍ਥਾਪਤ੍ਤਿ ਅਗਿਲਾਨੋ ਆਪਜ੍ਜਤਿ, ਨੋ ਗਿਲਾਨੋ; ਅਤ੍ਥਾਪਤ੍ਤਿ ਗਿਲਾਨੋ ਚੇਵ ਆਪਜ੍ਜਤਿ ਅਗਿਲਾਨੋ ਚ; ਅਤ੍ਥਾਪਤ੍ਤਿ ਨੇਵ ਗਿਲਾਨੋ ਆਪਜ੍ਜਤਿ ਨੋ ਅਗਿਲਾਨੋ. ਚਤ੍ਤਾਰਿ ਅਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ. ਚਤ੍ਤਾਰਿ ਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ.
ਚਤੁਕ੍ਕਂ ਨਿਟ੍ਠਿਤਂ.
ਤਸ੍ਸੁਦ੍ਦਾਨਂ –
ਸਕਵਾਚਾਯ ਕਾਯੇਨ, ਪਸੁਤ੍ਤੋ ਚ ਅਚਿਤ੍ਤਕੋ;
ਆਪਜ੍ਜਨ੍ਤੋ ਚ ਕਮ੍ਮੇਨ, ਵੋਹਾਰਾ ਚਤੁਰੋ ਤਥਾ.
ਭਿਕ੍ਖੂਨਂ ਭਿਕ੍ਖੁਨੀਨਞ੍ਚ, ਪਰਿਕ੍ਖਾਰੋ ਚ ਸਮ੍ਮੁਖਾ;
ਅਜਾਨਕਾਯੇ ਮਜ੍ਝੇ ਚ, ਵੁਟ੍ਠਾਤਿ ਦੁਵਿਧਾ ਤਥਾ.
ਪਟਿਲਾਭੇਨ ਚੋਦਨਾ, ਪਰਿਵਾਸਾ ਚ ਵੁਚ੍ਚਤਿ;
ਮਾਨਤ੍ਤਚਾਰਿਕਾ ਚਾਪਿ, ਸਾਮੁਕ੍ਕਂਸਾ ਪਟਿਗ੍ਗਹਿ.
ਮਹਾਵਿਕਟਕਮ੍ਮਾਨਿ, ਪੁਨ ਕਮ੍ਮੇ ਵਿਪਤ੍ਤਿਯੋ;
ਅਧਿਕਰਣਾ ਦੁਸ੍ਸੀਲਾ ਚ, ਸੋਭਨਾਗਨ੍ਤੁਕੇਨ ਚ.
ਗਮਿਕੋ ਵਤ੍ਥੁਨਾਨਤ੍ਤਾ, ਸਭਾਗੁਪਜ੍ਝਾਯੇਨ ਚ;
ਆਚਰਿਯੋ ਪਚ੍ਚਯਾ ਵਾ, ਦੁਚ੍ਚਰਿਤਂ ਸੁਚਰਿਤਂ.
ਆਦਿਯਨ੍ਤੋ ਪੁਗ੍ਗਲੋ ਚ, ਅਰਹੋ ਆਸਨੇਨ ਚ;
ਕਾਲੇ ਚ ਕਪ੍ਪਤਿ ਚੇਵ, ਪਚ੍ਚਨ੍ਤਿਮੇਸੁ ਕਪ੍ਪਤਿ.
ਅਨ੍ਤੋ ਅਨ੍ਤੋ ਚ ਸੀਮਾਯ, ਗਾਮੇ ਚ ਚੋਦਨਾਯ ਚ;
ਪੁਬ੍ਬਕਿਚ੍ਚਂ ਪਤ੍ਤਕਲ੍ਲਂ, ਅਨਞ੍ਞਾ ਸਮ੍ਮੁਤਿਯੋ ਚ.
ਅਗਤਿ ਨਾਗਤਿ ਚੇਵ, ਅਲਜ੍ਜੀ ਪੇਸਲੇਨ ਚ;
ਪੁਚ੍ਛਿਤਬ੍ਬਾ ਦੁਵੇ ਚੇਵ, ਵਿਸ੍ਸਜ੍ਜੇਯ੍ਯਾ ਤਥਾ ਦੁਵੇ;
ਅਨੁਯੋਗੋ ਚ ਸਾਕਚ੍ਛਾ, ਗਿਲਾਨੋ ਠਪਨੇਨ ਚਾਤਿ.
੫. ਪਞ੍ਚਕਵਾਰੋ
੩੨੫. ਪਞ੍ਚ ਆਪਤ੍ਤਿਯੋ. ਪਞ੍ਚ ਆਪਤ੍ਤਿਕ੍ਖਨ੍ਧਾ. ਪਞ੍ਚ ਵਿਨੀਤਵਤ੍ਥੂਨਿ. ਪਞ੍ਚ ਕਮ੍ਮਾਨਿ ਆਨਨ੍ਤਰਿਕਾਨਿ. ਪਞ੍ਚ ਪੁਗ੍ਗਲਾ ਨਿਯਤਾ. ਪਞ੍ਚ ਛੇਦਨਕਾ ਆਪਤ੍ਤਿਯੋ. ਪਞ੍ਚਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤਿ. ਪਞ੍ਚ ਆਪਤ੍ਤਿਯੋ. ਮੁਸਾਵਾਦਪਚ੍ਚਯਾ ਪਞ੍ਚਹਾਕਾਰੇਹਿ ਕਮ੍ਮਂ ਨ ਉਪੇਤਿ – ਸਯਂ ਵਾ ਕਮ੍ਮਂ ਨ ਕਰੋਤਿ, ਪਰਂ ਵਾ ਨ ਅਜ੍ਝੇਸਤਿ, ਛਨ੍ਦਂ ਵਾ ਪਾਰਿਸੁਦ੍ਧਿਂ ਵਾ ਨ ਦੇਤਿ, ਕਯਿਰਮਾਨੇ ਕਮ੍ਮੇ ਪਟਿਕ੍ਕੋਸਤਿ, ਕਤੇ ਵਾ ਪਨ ਕਮ੍ਮੇ ਅਧਮ੍ਮਦਿਟ੍ਠਿ ਹੋਤਿ. ਪਞ੍ਚਹਾਕਾਰੇਹਿ ਕਮ੍ਮਂ ਉਪੇਤਿ – ਸਯਂ ਵਾ ਕਮ੍ਮਂ ਕਰੋਤਿ, ਪਰਂ ਵਾ ਅਜ੍ਝੇਸਤਿ, ਛਨ੍ਦਂ ਵਾ ਪਾਰਿਸੁਦ੍ਧਿਂ ਵਾ ਦੇਤਿ, ਕਯਿਰਮਾਨੇ ਕਮ੍ਮੇ ਨਪ੍ਪਟਿਕ੍ਕੋਸਤਿ, ਕਤੇ ਵਾ ਪਨ ਕਮ੍ਮੇ ਧਮ੍ਮਦਿਟ੍ਠਿ ਹੋਤਿ. ਪਞ੍ਚ ਪਿਣ੍ਡਪਾਤਿਕਸ੍ਸ ਭਿਕ੍ਖੁਨੋ ਕਪ੍ਪਨ੍ਤਿ – ਅਨਾਮਨ੍ਤਚਾਰੋ, ਗਣਭੋਜਨਂ, ਪਰਮ੍ਪਰਭੋਜਨਂ, ਅਨਧਿਟ੍ਠਾਨਂ, ਅਵਿਕਪ੍ਪਨਾ. [ਅ. ਨਿ. ੫.੧੦੨] ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ ਉਸ੍ਸਙ੍ਕਿਤਪਰਿਸਙ੍ਕਿਤੋ ਹੋਤਿ – ਪਾਪਭਿਕ੍ਖੁਪਿ ਅਕੁਪ੍ਪਧਮ੍ਮੋਪਿ ਵੇਸਿਯਾਗੋਚਰੋ ਵਾ ਹੋਤਿ, ਵਿਧਵਾਗੋਚਰੋ ਵਾ ਹੋਤਿ, ਥੁਲ੍ਲਕੁਮਾਰਿਗੋਚਰੋ ਵਾ ਹੋਤਿ, ਪਣ੍ਡਕਗੋਚਰੋ ਵਾ ਹੋਤਿ, ਭਿਕ੍ਖੁਨਿਗੋਚਰੋ ਵਾ ਹੋਤਿ. ਪਞ੍ਚ ਤੇਲਾਨਿ – ਤਿਲਤੇਲਂ, ਸਾਸਪਤੇਲਂ, ਮਧੁਕਤੇਲਂ, ਏਰਣ੍ਡਕਤੇਲਂ, ਵਸਾਤੇਲਂ. ਪਞ੍ਚ ਵਸਾਨਿ – ਅਚ੍ਛਵਸਂ, ਮਚ੍ਛਵਸਂ, ਸੁਸੁਕਾਵਸਂ, ਸੂਕਰਵਸਂ, ਗਦ੍ਰਭਵਸਂ. [ਅ. ਨਿ. ੫.੧੩੦; ਦੀ. ਨਿ. ੩.੩੧੬] ਪਞ੍ਚ ਬ੍ਯਸਨਾਨਿ – ਞਾਤਿਬ੍ਯਸਨਂ, ਭੋਗਬ੍ਯਸਨਂ, ਰੋਗਬ੍ਯਸਨਂ, ਸੀਲਬ੍ਯਸਨਂ, ਦਿਟ੍ਠਿਬ੍ਯਸਨਂ. [ਅ. ਨਿ. ੫.੧੩੦; ਦੀ. ਨਿ. ੩.੩੧੬] ਪਞ੍ਚ ਸਮ੍ਪਦਾ – ਞਾਤਿਸਮ੍ਪਦਾ, ਭੋਗਸਮ੍ਪਦਾ, ਅਰੋਗਸਮ੍ਪਦਾ, ਸੀਲਸਮ੍ਪਦਾ, ਦਿਟ੍ਠਿਸਮ੍ਪਦਾ. ਪਞ੍ਚ ਨਿਸ੍ਸਯਪਟਿਪ੍ਪਸ੍ਸਦ੍ਧਿਯੋ ਉਪਜ੍ਝਾਯਮ੍ਹਾ – ਉਪਜ੍ਝਾਯੋ ਪਕ੍ਕਨ੍ਤੋ ਵਾ ਹੋਤਿ, ਵਿਬ੍ਭਨ੍ਤੋ ਵਾ, ਕਾਲਙ੍ਕਤੋ ਵਾ, ਪਕ੍ਖਸਙ੍ਕਨ੍ਤੋ ਵਾ, ਆਣਤ੍ਤਿਯੇਵ ਪਞ੍ਚਮੀ. ਪਞ੍ਚ ਪੁਗ੍ਗਲਾ ਨ ਉਪਸਮ੍ਪਾਦੇਤਬ੍ਬਾ – ਅਦ੍ਧਾਨਹੀਨੋ, ਅਙ੍ਗਹੀਨੋ, ਵਤ੍ਥੁਵਿਪਨ੍ਨੋ, ਕਰਣਦੁਕ੍ਕਟਕੋ, ਅਪਰਿਪੂਰੋ. ਪਞ੍ਚ ਪਂਸੁਕੂਲਾਨਿ – ਸੋਸਾਨਿਕਂ, ਪਾਪਣਿਕਂ, ਉਨ੍ਦੂਰਕ੍ਖਾਯਿਕਂ, ਉਪਚਿਕਕ੍ਖਾਯਿਕਂ, ਅਗ੍ਗਿਦਡ੍ਢਂ. ਅਪਰਾਨਿਪਿ ਪਞ੍ਚ ਪਂਸੁਕੂਲਾਨਿ – ਗੋਖਾਯਿਕਂ, ਅਜਕ੍ਖਾਯਿਕਂ, ਥੂਪਚੀਵਰਂ, ਆਭਿਸੇਕਿਕਂ, ਗਤਪਟਿਯਾਗਤਂ [ਭਤਪਟਿਯਾਭਤਂ (ਕ.)]. ਪਞ੍ਚ ਅਵਹਾਰਾ – ਥੇਯ੍ਯਾਵਹਾਰੋ, ਪਸਯ੍ਹਾਵਹਾਰੋ, ਪਰਿਕਪ੍ਪਾਵਹਾਰੋ, ਪਟਿਚ੍ਛਨ੍ਨਾਵਹਾਰੋ, ਕੁਸਾਵਹਾਰੋ. ਪਞ੍ਚ ਮਹਾਚੋਰਾ ਸਨ੍ਤੋ ਸਂਵਿਜ੍ਜਮਾਨਾ ਲੋਕਸ੍ਮਿਂ. ਪਞ੍ਚ ਅਵਿਸ੍ਸਜ੍ਜਨਿਯਾਨਿ. ਪਞ੍ਚ ਅਵੇਭਙ੍ਗਿਯਾਨਿ. ਪਞ੍ਚਾਪਤ੍ਤਿਯੋ ਕਾਯਤੋ ਸਮੁਟ੍ਠਨ੍ਤਿ, ਨ ਵਾਚਤੋ ਨ ਚਿਤ੍ਤਤੋ. ਪਞ੍ਚਾਪਤ੍ਤਿਯੋ ਕਾਯਤੋ ਚ ਵਾਚਤੋ ਚ ਸਮੁਟ੍ਠਨ੍ਤਿ, ਚਿਤ੍ਤਤੋ. ਪਞ੍ਚਾਪਤ੍ਤਿਯੋ ਦੇਸਨਾਗਾਮਿਨਿਯੋ. ਪਞ੍ਚ ਸਙ੍ਘਾ. ਪਞ੍ਚ ਪਾਤਿਮੋਕ੍ਖੁਦ੍ਦੇਸਾ. ਸਬ੍ਬਪਚ੍ਚਨ੍ਤਿਮੇਸੁ ਜਨਪਦੇਸੁ ਵਿਨਯਧਰਪਞ੍ਚਮੇਨ ਗਣੇਨ ਉਪਸਮ੍ਪਾਦੇਤਬ੍ਬਂ. ਪਞ੍ਚਾਨਿਸਂਸਾ ਕਥਿਨਤ੍ਥਾਰੇ. ਪਞ੍ਚ ਕਮ੍ਮਾਨਿ. ਯਾਵਤਤਿਯਕੇ ਪਞ੍ਚ ਆਪਤ੍ਤਿਯੋ. ਪਞ੍ਚਹਾਕਾਰੇਹਿ ਅਦਿਨ੍ਨਂ ਆਦਿਯਨ੍ਤਸ੍ਸ ਆਪਤ੍ਤਿ ਪਾਰਾਜਿਕਸ੍ਸ. ਪਞ੍ਚਹਾਕਾਰੇਹਿ ਅਦਿਨ੍ਨਂ ਆਦਿਯਨ੍ਤਸ੍ਸ ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਪਞ੍ਚਹਾਕਾਰੇਹਿ ਅਦਿਨ੍ਨਂ ਆਦਿਯਨ੍ਤਸ੍ਸ ਆਪਤ੍ਤਿ ਦੁਕ੍ਕਟਸ੍ਸ. ਪਞ੍ਚ ਅਕਪ੍ਪਿਯਾਨਿ ਨ ਪਰਿਭੁਞ੍ਜਿਤਬ੍ਬਾਨਿ – ਅਦਿਨ੍ਨਞ੍ਚ ਹੋਤਿ, ਅਵਿਦਿਤਞ੍ਚ ਹੋਤਿ, ਅਕਪ੍ਪਿਯਞ੍ਚ ਹੋਤਿ, ਅਪ੍ਪਟਿਗ੍ਗਹਿਤਞ੍ਚ ਹੋਤਿ, ਅਕਤਾਤਿਰਿਤ੍ਤਞ੍ਚ ਹੋਤਿ. ਪਞ੍ਚ ਕਪ੍ਪਿਯਾਨਿ ਪਰਿਭੁਞ੍ਜਿਤਬ੍ਬਾਨਿ – ਦਿਨ੍ਨਞ੍ਚ ਹੋਤਿ, ਵਿਦਿਤਞ੍ਚ ਹੋਤਿ, ਕਪ੍ਪਿਯਞ੍ਚ ਹੋਤਿ, ਪਟਿਗ੍ਗਹਿਤਞ੍ਚ ਹੋਤਿ, ਕਤਾਤਿਰਿਤ੍ਤਞ੍ਚ ਹੋਤਿ. ਪਞ੍ਚ ਦਾਨਾਨਿ ਅਪੁਞ੍ਞਾਨਿ ਪੁਞ੍ਞਸਮ੍ਮਤਾਨਿ ਲੋਕਸ੍ਮਿਂ [ਲੋਕਸ੍ਸ (ਸ੍ਯਾ.)] – ਮਜ੍ਜਦਾਨਂ, ਸਮਜ੍ਜਦਾਨਂ, ਇਤ੍ਥਿਦਾਨਂ, ਉਸਭਦਾਨਂ, ਚਿਤ੍ਤਕਮ੍ਮਦਾਨਂ. ਪਞ੍ਚ ਉਪ੍ਪਨ੍ਨਾ ਦੁਪ੍ਪਟਿਵਿਨੋਦਯਾ [ਵਿਨੋਦਿਯਾ (ਸ੍ਯਾ.)] – ਉਪ੍ਪਨ੍ਨੋ ਰਾਗੋ ਦੁਪ੍ਪਟਿਵਿਨੋਦਯੋ, ਉਪ੍ਪਨ੍ਨੋ ਦੋਸੋ ਦੁਪ੍ਪਟਿਵਿਨੋਦਯੋ, ਉਪ੍ਪਨ੍ਨੋ ਮੋਹੋ ਦੁਪ੍ਪਟਿਵਿਨੋਦਯੋ, ਉਪ੍ਪਨ੍ਨਂ ਪਟਿਭਾਨਂ ਦੁਪ੍ਪਟਿਵਿਨੋਦਯਂ, ਉਪ੍ਪਨ੍ਨਂ ਗਮਿਯਚਿਤ੍ਤਂ ਦੁਪ੍ਪਟਿਵਿਨੋਦਯਂ. ਪਞ੍ਚਾਨਿਸਂਸਾ ਸਮ੍ਮਜ੍ਜਨਿਯਾ – ਸਕਚਿਤ੍ਤਂ ਪਸੀਦਤਿ, ਪਰਚਿਤ੍ਤਂ ਪਸੀਦਤਿ, ਦੇਵਤਾ ਅਤ੍ਤਮਨਾ ਹੋਨ੍ਤਿ, ਪਾਸਾਦਿਕਸਂਵਤ੍ਤਨਿਕਕਮ੍ਮਂ ਉਪਚਿਨਤਿ, ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ. ਅਪਰੇਪਿ ਪਞ੍ਚਾਨਿਸਂਸਾ ਸਮ੍ਮਜ੍ਜਨਿਯਾ – ਸਕਚਿਤ੍ਤਂ ਪਸੀਦਤਿ, ਪਰਚਿਤ੍ਤਂ ਪਸੀਦਤਿ, ਦੇਵਤਾ ਅਤ੍ਤਮਨਾ ਹੋਨ੍ਤਿ, ਸਤ੍ਥੁਸਾਸਨਂ ਕਤਂ ਹੋਤਿ, ਪਚ੍ਛਿਮਾ ਜਨਤਾ ਦਿਟ੍ਠਾਨੁਗਤਿਂ ਆਪਜ੍ਜਤਿ.
ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ‘‘ਬਾਲੋ’’ ਤ੍ਵੇਵ ਸਙ੍ਖਂ ਗਚ੍ਛਤਿ – ਅਤ੍ਤਨੋ ਭਾਸਪਰਿਯਨ੍ਤਂ ਨ ਉਗ੍ਗਣ੍ਹਾਤਿ, ਪਰਸ੍ਸ ਭਾਸਪਰਿਯਨ੍ਤਂ ਨ ਉਗ੍ਗਣ੍ਹਾਤਿ, ਅਤ੍ਤਨੋ ਭਾਸਪਰਿਯਨ੍ਤਂ ਨ ਉਗ੍ਗਹੇਤ੍ਵਾ ਪਰਸ੍ਸ ਭਾਸਪਰਿਯਨ੍ਤਂ ਨ ਉਗ੍ਗਹੇਤ੍ਵਾ ਅਧਮ੍ਮੇਨ ਕਾਰੇਤਿ ਅਪ੍ਪਟਿਞ੍ਞਾਯ. ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ‘‘ਪਣ੍ਡਿਤੋ’’ ਤ੍ਵੇਵ ਸਙ੍ਖਂ ਗਚ੍ਛਤਿ – ਅਤ੍ਤਨੋ ਭਾਸਪਰਿਯਨ੍ਤਂ ਉਗ੍ਗਣ੍ਹਾਤਿ, ਪਰਸ੍ਸ ਭਾਸਪਰਿਯਨ੍ਤਂ ਉਗ੍ਗਣ੍ਹਾਤਿ, ਅਤ੍ਤਨੋ ਭਾਸਪਰਿਯਨ੍ਤਂ ਉਗ੍ਗਹੇਤ੍ਵਾ ਪਰਸ੍ਸ ਭਾਸਪਰਿਯਨ੍ਤਂ ਉਗ੍ਗਹੇਤ੍ਵਾ ਧਮ੍ਮੇਨ ਕਾਰੇਤਿ ਪਟਿਞ੍ਞਾਯ. ਅਪਰੇਹਿਪਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਬਾਲੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਆਪਤ੍ਤਿਂ ਨ ਜਾਨਾਤਿ, ਆਪਤ੍ਤਿਯਾ ਮੂਲਂ ਨ ਜਾਨਾਤਿ, ਆਪਤ੍ਤਿਸਮੁਦਯਂ ਨ ਜਾਨਾਤਿ, ਆਪਤ੍ਤਿਨਿਰੋਧਂ ਨ ਜਾਨਾਤਿ, ਆਪਤ੍ਤਿਨਿਰੋਧਗਾਮਿਨਿਂ ਪਟਿਪਦਂ ਨ ਜਾਨਾਤਿ. ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਪਣ੍ਡਿਤੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਆਪਤ੍ਤਿਂ ਜਾਨਾਤਿ, ਆਪਤ੍ਤਿਯਾ ਮੂਲਂ ਜਾਨਾਤਿ, ਆਪਤ੍ਤਿਸਮੁਦਯਂ ਜਾਨਾਤਿ, ਆਪਤ੍ਤਿਨਿਰੋਧਂ ਜਾਨਾਤਿ, ਆਪਤ੍ਤਿਨਿਰੋਧਗਾਮਿਨਿਂ ਪਟਿਪਦਂ ਜਾਨਾਤਿ. ਅਪਰੇਹਿਪਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਬਾਲੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਅਧਿਕਰਣਂ ਨ ਜਾਨਾਤਿ, ਅਧਿਕਰਣਸ੍ਸ ਮੂਲਂ ਨ ਜਾਨਾਤਿ, ਅਧਿਕਰਣਸਮੁਦਯਂ ਨ ਜਾਨਾਤਿ, ਅਧਿਕਰਣਨਿਰੋਧਂ ਨ ਜਾਨਾਤਿ, ਅਧਿਕਰਣਨਿਰੋਧਗਾਮਿਨਿਂ ਪਟਿਪਦਂ ਨ ਜਾਨਾਤਿ. ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਪਣ੍ਡਿਤੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਅਧਿਕਰਣਂ ਜਾਨਾਤਿ, ਅਧਿਕਰਣਸ੍ਸ ਮੂਲਂ ਜਾਨਾਤਿ, ਅਧਿਕਰਣਸਮੁਦਯਂ ਜਾਨਾਤਿ, ਅਧਿਕਰਣਨਿਰੋਧਂ ਜਾਨਾਤਿ, ਅਧਿਕਰਣਨਿਰੋਧਗਾਮਿਨਿਂ ਪਟਿਪਦਂ ਜਾਨਾਤਿ. ਅਪਰੇਹਿਪਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਬਾਲੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਵਤ੍ਥੁਂ ਨ ਜਾਨਾਤਿ, ਨਿਦਾਨਂ ਨ ਜਾਨਾਤਿ, ਪਞ੍ਞਤ੍ਤਿਂ ਨ ਜਾਨਾਤਿ, ਅਨੁਪਞ੍ਞਤ੍ਤਿਂ ਨ ਜਾਨਾਤਿ, ਅਨੁਸਨ੍ਧਿਵਚਨਪਥਂ ਨ ਜਾਨਾਤਿ. ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਪਣ੍ਡਿਤੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਵਤ੍ਥੁਂ ਜਾਨਾਤਿ, ਨਿਦਾਨਂ ਜਾਨਾਤਿ, ਪਞ੍ਞਤ੍ਤਿਂ ਜਾਨਾਤਿ, ਅਨੁਪਞ੍ਞਤ੍ਤਿਂ ਜਾਨਾਤਿ, ਅਨੁਸਨ੍ਧਿਵਚਨਪਥਂ ਜਾਨਾਤਿ. ਅਪਰੇਹਿਪਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਬਾਲੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਞਤ੍ਤਿਂ ਨ ਜਾਨਾਤਿ, ਞਤ੍ਤਿਯਾ ਕਰਣਂ ਨ ਜਾਨਾਤਿ, ਨ ਪੁਬ੍ਬਕੁਸਲੋ ਹੋਤਿ, ਨ ਅਪਰਕੁਸਲੋ ਹੋਤਿ, ਅਕਾਲਞ੍ਞੂ ਚ ਹੋਤਿ. ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਪਣ੍ਡਿਤੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਞਤ੍ਤਿਂ ਜਾਨਾਤਿ, ਞਤ੍ਤਿਯਾ ਕਰਣਂ ਜਾਨਾਤਿ, ਪੁਬ੍ਬਕੁਸਲੋ ਹੋਤਿ, ਅਪਰਕੁਸਲੋ ਹੋਤਿ, ਕਾਲਞ੍ਞੂ ਚ ਹੋਤਿ. ਅਪਰੇਹਿਪਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਬਾਲੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਆਪਤ੍ਤਾਨਾਪਤ੍ਤਿਂ ਨ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਨ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਨ ਜਾਨਾਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਨ ਜਾਨਾਤਿ, ਆਚਰਿਯਪਰਮ੍ਪਰਾ ਖੋ ਪਨਸ੍ਸ ਨ ਸੁਗ੍ਗਹਿਤਾ ਹੋਤਿ ਨ ਸੁਮਨਸਿਕਤਾ ਨ ਸੂਪਧਾਰਿਤਾ. ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਪਣ੍ਡਿਤੋਤ੍ਵੇਵ ਸਙ੍ਖਂ ਗਚ੍ਛਤਿ – ਆਪਤ੍ਤਾਨਾਪਤ੍ਤਿਂ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਜਾਨਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਜਾਨਾਤਿ, ਆਚਰਿਯਪਰਮ੍ਪਰਾ ਖੋ ਪਨਸ੍ਸ ਸੁਗ੍ਗਹਿਤਾ ਹੋਤਿ ਸੁਮਨਸਿਕਤਾ ਸੂਪਧਾਰਿਤਾ. ਅਪਰੇਹਿਪਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਬਾਲੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਆਪਤ੍ਤਾਨਾਪਤ੍ਤਿਂ ਨ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਨ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਨ ਜਾਨਾਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਜਾਨਾਤਿ, ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ ਨ ਵਿਤ੍ਥਾਰੇਨ ਸ੍ਵਾਗਤਾਨਿ ਹੋਨ੍ਤਿ ਨ ਸੁਵਿਭਤ੍ਤਾਨਿ ਨ ਸੁਪ੍ਪਵਤ੍ਤੀਨਿ ਨ ਸੁਵਿਨਿਚ੍ਛਿਤਾਨਿ ਸੁਤ੍ਤਸੋ ਅਨੁਬ੍ਯਞ੍ਜਨਸੋ. ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਪਣ੍ਡਿਤੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਆਪਤ੍ਤਾਨਾਪਤ੍ਤਿਂ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਜਾਨਾਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਜਾਨਾਤਿ, ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ ਵਿਤ੍ਥਾਰੇਨ ਸ੍ਵਾਗਤਾਨਿ ਹੋਨ੍ਤਿ ਸੁਵਿਭਤ੍ਤਾਨਿ ਸੁਪ੍ਪਵਤ੍ਤੀਨਿ ਸੁਵਿਨਿਚ੍ਛਿਤਾਨਿ ਸੁਤ੍ਤਸੋ ਅਨੁਬ੍ਯਞ੍ਜਨਸੋ. ਅਪਰੇਹਿਪਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਬਾਲੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਆਪਤ੍ਤਾਨਾਪਤ੍ਤਿਂ ਨ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਨ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਨ ਜਾਨਾਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਨ ਜਾਨਾਤਿ, ਅਧਿਕਰਣੇ ਚ ਨ ਵਿਨਿਚ੍ਛਯਕੁਸਲੋ ਹੋਤਿ. ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਵਿਨਯਧਰੋ ਪਣ੍ਡਿਤੋ ਤ੍ਵੇਵ ਸਙ੍ਖਂ ਗਚ੍ਛਤਿ – ਆਪਤ੍ਤਾਨਾਪਤ੍ਤਿਂ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਜਾਨਾਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਜਾਨਾਤਿ, ਅਧਿਕਰਣੇ ਚ ਵਿਨਿਚ੍ਛਯਕੁਸਲੋ ਹੋਤਿ.
[ਅ. ਨਿ. ੫.੧੮੧; ਪਰਿ. ੪੪੩] ਪਞ੍ਚ ਆਰਞ੍ਞਿਕਾ – ਮਨ੍ਦਤ੍ਤਾ ਮੋਮੂਹਤ੍ਤਾ ਆਰਞ੍ਞਿਕੋ ਹੋਤਿ, ਪਾਪਿਚ੍ਛੋ ਇਚ੍ਛਾਪਕਤੋ ਆਰਞ੍ਞਿਕੋ ਹੋਤਿ, ਉਮ੍ਮਾਦਾ ਚਿਤ੍ਤਕ੍ਖੇਪਾ ਆਰਞ੍ਞਿਕੋ ਹੋਤਿ, ਵਣ੍ਣਿਤਂ ਬੁਦ੍ਧੇਹਿ ਬੁਦ੍ਧਸਾਵਕੇਹੀਤਿ ਆਰਞ੍ਞਿਕੋ ਹੋਤਿ, ਅਪਿ ਚ ਅਪ੍ਪਿਚ੍ਛਞ੍ਞੇਵ ਨਿਸ੍ਸਾਯ ਸਨ੍ਤੁਟ੍ਠਿਞ੍ਞੇਵ ਨਿਸ੍ਸਾਯ ਸਲ੍ਲੇਖਞ੍ਞੇਵ ਨਿਸ੍ਸਾਯ ਪਵਿਵੇਕਞ੍ਞੇਵ ਨਿਸ੍ਸਾਯ ਇਦਮਤ੍ਥਿਤਞ੍ਞੇਵ [ਇਦਮਟ੍ਠਿਤਞ੍ਞੇਵ (ਸੀ. ਸ੍ਯਾ.)] ਨਿਸ੍ਸਾਯ ਆਰਞ੍ਞਿਕੋ ਹੋਤਿ. ਪਞ੍ਚ ਪਿਣ੍ਡਪਾਤਿਕਾ…ਪੇ… ਪਞ੍ਚ ਪਂਸੁਕੂਲਿਕਾ…ਪੇ… ਪਞ੍ਚ ਰੁਕ੍ਖਮੂਲਿਕਾ…ਪੇ… ਪਞ੍ਚ ਸੋਸਾਨਿਕਾ…ਪੇ… ਪਞ੍ਚ ਅਬ੍ਭੋਕਾਸਿਕਾ…ਪੇ… ਪਞ੍ਚ ਤੇਚੀਵਰਿਕਾ…ਪੇ… ਪਞ੍ਚ ਸਪਦਾਨਚਾਰਿਕਾ…ਪੇ… ਪਞ੍ਚ ਨੇਸਜ੍ਜਿਕਾ…ਪੇ… ਪਞ੍ਚ ਯਥਾਸਨ੍ਥਤਿਕਾ…ਪੇ… ਪਞ੍ਚ ਏਕਾਸਨਿਕਾ…ਪੇ… ਪਞ੍ਚ ਖਲੁਪਚ੍ਛਾਭਤ੍ਤਿਕਾ…ਪੇ… ਪਞ੍ਚ ਪਤ੍ਤਪਿਣ੍ਡਿਕਾ – ਮਨ੍ਦਤ੍ਤਾ ਮੋਮੂਹਤ੍ਤਾ ਪਤ੍ਤਪਿਣ੍ਡਿਕੋ ਹੋਤਿ, ਪਾਪਿਚ੍ਛੋ ਇਚ੍ਛਾਪਕਤੋ ਪਤ੍ਤਪਿਣ੍ਡਿਕੋ ਹੋਤਿ, ਉਮ੍ਮਾਦਾ ਚਿਤ੍ਤਕ੍ਖੇਪਾ ਪਤ੍ਤਪਿਣ੍ਡਿਕੋ ਹੋਤਿ, ਵਣ੍ਣਿਤਂ ਬੁਦ੍ਧੇਹਿ ਬੁਦ੍ਧਸਾਵਕੇਹੀਤਿ ਪਤ੍ਤਪਿਣ੍ਡਿਕੋ ਹੋਤਿ, ਅਪਿ ਚ ਅਪ੍ਪਿਚ੍ਛਞ੍ਞੇਵ ਨਿਸ੍ਸਾਯ ਸਨ੍ਤੁਟ੍ਠਿਞ੍ਞੇਵ ਨਿਸ੍ਸਾਯ ਸਲ੍ਲੇਖਞ੍ਞੇਵ ਨਿਸ੍ਸਾਯ ਪਵਿਵੇਕਞ੍ਞੇਵ ਨਿਸ੍ਸਾਯ ਇਦਮਤ੍ਥਿਤਞ੍ਞੇਵ ਨਿਸ੍ਸਾਯ ਪਤ੍ਤਪਿਣ੍ਡਿਕੋ ਹੋਤਿ.
[ਪਰਿ. ੪੧੭] ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨਾਨਿਸ੍ਸਿਤੇਨ ਵਤ੍ਥਬ੍ਬਂ – ਉਪੋਸਥਂ ਨ ਜਾਨਾਤਿ, ਉਪੋਸਥਕਮ੍ਮਂ ਨ ਜਾਨਾਤਿ, ਪਾਤਿਮੋਕ੍ਖਂ ਨ ਜਾਨਾਤਿ, ਪਾਤਿਮੋਕ੍ਖੁਦ੍ਦੇਸਂ ਨ ਜਾਨਾਤਿ, ਊਨਪਞ੍ਚਵਸ੍ਸੋ ਹੋਤਿ. ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ – ਉਪੋਸਥਂ ਜਾਨਾਤਿ, ਉਪੋਸਥਕਮ੍ਮਂ ਜਾਨਾਤਿ, ਪਾਤਿਮੋਕ੍ਖਂ ਜਾਨਾਤਿ, ਪਾਤਿਮੋਕ੍ਖੁਦ੍ਦੇਸਂ ਜਾਨਾਤਿ, ਪਞ੍ਚਵਸ੍ਸੋ ਵਾ ਹੋਤਿ ਅਤਿਰੇਕਪਞ੍ਚਵਸ੍ਸੋ ਵਾ. ਅਪਰੇਹਿਪਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨਾਨਿਸ੍ਸਿਤੇਨ ਵਤ੍ਥਬ੍ਬਂ – ਪਵਾਰਣਂ ਨ ਜਾਨਾਤਿ, ਪਵਾਰਣਾਕਮ੍ਮਂ ਨ ਜਾਨਾਤਿ, ਪਾਤਿਮੋਕ੍ਖਂ ਨ ਜਾਨਾਤਿ, ਪਾਤਿਮੋਕ੍ਖੁਦ੍ਦੇਸਂ ਨ ਜਾਨਾਤਿ, ਊਨਪਞ੍ਚਵਸ੍ਸੋ ਹੋਤਿ. ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ – ਪਵਾਰਣਂ ਜਾਨਾਤਿ, ਪਵਾਰਣਾਕਮ੍ਮਂ ਜਾਨਾਤਿ, ਪਾਤਿਮੋਕ੍ਖਂ ਜਾਨਾਤਿ, ਪਾਤਿਮੋਕ੍ਖੁਦ੍ਦੇਸਂ ਜਾਨਾਤਿ, ਪਞ੍ਚਵਸ੍ਸੋ ਵਾ ਹੋਤਿ ਅਤਿਰੇਕਪਞ੍ਚਵਸ੍ਸੋ ਵਾ. ਅਪਰੇਹਿਪਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਨਾਨਿਸ੍ਸਿਤੇਨ ਵਤ੍ਥਬ੍ਬਂ – ਆਪਤ੍ਤਾਨਾਪਤ੍ਤਿਂ ਨ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਨ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਨ ਜਾਨਾਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਨ ਜਾਨਾਤਿ, ਊਨਪਞ੍ਚਵਸ੍ਸੋ ਹੋਤਿ. ਪਞ੍ਚਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਅਨਿਸ੍ਸਿਤੇਨ ਵਤ੍ਥਬ੍ਬਂ – ਆਪਤ੍ਤਾਨਾਪਤ੍ਤਿਂ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਜਾਨਾਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਜਾਨਾਤਿ, ਪਞ੍ਚਵਸ੍ਸੋ ਵਾ ਹੋਤਿ ਅਤਿਰੇਕਪਞ੍ਚਵਸ੍ਸੋ ਵਾ. ਪਞ੍ਚਹਙ੍ਗੇਹਿ ਸਮਨ੍ਨਾਗਤਾਯ ਭਿਕ੍ਖੁਨਿਯਾ ਨਾਨਿਸ੍ਸਿਤਾਯ ਵਤ੍ਥਬ੍ਬਂ – ਉਪੋਸਥਂ ਨ ਜਾਨਾਤਿ, ਉਪੋਸਥਕਮ੍ਮਂ ਨ ਜਾਨਾਤਿ, ਪਾਤਿਮੋਕ੍ਖਂ ਨ ਜਾਨਾਤਿ, ਪਾਤਿਮੋਕ੍ਖੁਦ੍ਦੇਸਂ ਨ ਜਾਨਾਤਿ, ਊਨਪਞ੍ਚਵਸ੍ਸਾ ਹੋਤਿ. ਪਞ੍ਚਹਙ੍ਗੇਹਿ ਸਮਨ੍ਨਾਗਤਾਯ ਭਿਕ੍ਖੁਨਿਯਾ ਅਨਿਸ੍ਸਿਤਾਯ ਵਤ੍ਥਬ੍ਬਂ – ਉਪੋਸਥਂ ਜਾਨਾਤਿ, ਉਪੋਸਥਕਮ੍ਮਂ ਜਾਨਾਤਿ, ਪਾਤਿਮੋਕ੍ਖਂ ਜਾਨਾਤਿ, ਪਾਤਿਮੋਕ੍ਖੁਦ੍ਦੇਸਂ ਜਾਨਾਤਿ, ਪਞ੍ਚਵਸ੍ਸਾ ਵਾ ਹੋਤਿ ਅਤਿਰੇਕਪਞ੍ਚਵਸ੍ਸਾ ਵਾ. ਅਪਰੇਹਿਪਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤਾਯ ਭਿਕ੍ਖੁਨਿਯਾ ਨਾਨਿਸ੍ਸਿਤਾਯ ਵਤ੍ਥਬ੍ਬਂ – ਪਵਾਰਣਂ ਨ ਜਾਨਾਤਿ, ਪਵਾਰਣਾਕਮ੍ਮਂ ਨ ਜਾਨਾਤਿ, ਪਾਤਿਮੋਕ੍ਖਂ ਨ ਜਾਨਾਤਿ, ਪਾਤਿਮੋਕ੍ਖੁਦ੍ਦੇਸਂ ਨ ਜਾਨਾਤਿ, ਊਨਪਞ੍ਚਵਸ੍ਸਾ ਹੋਤਿ. ਪਞ੍ਚਹਙ੍ਗੇਹਿ ਸਮਨ੍ਨਾਗਤਾਯ ਭਿਕ੍ਖੁਨਿਯਾ ਅਨਿਸ੍ਸਿਤਾਯ ਵਤ੍ਥਬ੍ਬਂ – ਪਵਾਰਣਂ ਜਾਨਾਤਿ, ਪਵਾਰਣਾਕਮ੍ਮਂ ਜਾਨਾਤਿ, ਪਾਤਿਮੋਕ੍ਖਂ ਜਾਨਾਤਿ, ਪਾਤਿਮੋਕ੍ਖੁਦ੍ਦੇਸਂ ਜਾਨਾਤਿ, ਪਞ੍ਚਵਸ੍ਸਾ ਵਾ ਹੋਤਿ ਅਤਿਰੇਕਪਞ੍ਚਵਸ੍ਸਾ ਵਾ. ਅਪਰੇਹਿਪਿ ਪਞ੍ਚਹਙ੍ਗੇਹਿ ਸਮਨ੍ਨਾਗਤਾਯ ਭਿਕ੍ਖੁਨਿਯਾ ਨਾਨਿਸ੍ਸਿਤਾਯ ਵਤ੍ਥਬ੍ਬਂ – ਆਪਤ੍ਤਾਨਾਪਤ੍ਤਿਂ ਨ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਨ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਨ ਜਾਨਾਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਨ ਜਾਨਾਤਿ, ਊਨਪਞ੍ਚਵਸ੍ਸਾ ਹੋਤਿ. ਪਞ੍ਚਹਙ੍ਗੇਹਿ ਸਮਨ੍ਨਾਗਤਾਯ ਭਿਕ੍ਖੁਨਿਯਾ ਅਨਿਸ੍ਸਿਤਾਯ ਵਤ੍ਥਬ੍ਬਂ – ਆਪਤ੍ਤਾਨਾਪਤ੍ਤਿਂ ਜਾਨਾਤਿ, ਲਹੁਕਗਰੁਕਂ ਆਪਤ੍ਤਿਂ ਜਾਨਾਤਿ, ਸਾਵਸੇਸਾਨਵਸੇਸਂ ਆਪਤ੍ਤਿਂ ਜਾਨਾਤਿ, ਦੁਟ੍ਠੁਲ੍ਲਾਦੁਟ੍ਠੁਲ੍ਲਂ ਆਪਤ੍ਤਿਂ ਜਾਨਾਤਿ, ਪਞ੍ਚਵਸ੍ਸਾ ਵਾ ਹੋਤਿ ਅਤਿਰੇਕਪਞ੍ਚਵਸ੍ਸਾ ਵਾ.
ਪਞ੍ਚ ਆਦੀਨਵਾ ਅਪਾਸਾਦਿਕੇ – ਅਤ੍ਤਾਪਿ ਅਤ੍ਤਾਨਂ ਉਪਵਦਤਿ, ਅਨੁਵਿਚ੍ਚਪਿ ਵਿਞ੍ਞੂ ਗਰਹਨ੍ਤਿ, ਪਾਪਕੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ, ਸਮ੍ਮੂਲ਼੍ਹੋ ਕਾਲਂ ਕਰੋਤਿ, ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜਤਿ. ਪਞ੍ਚਾਨਿਸਂਸਾ ਪਾਸਾਦਿਕੇ – ਅਤ੍ਤਾਪਿ ਅਤ੍ਤਾਨਂ ਨ ਉਪਵਦਤਿ, ਅਨੁਵਿਚ੍ਚਪਿ ਵਿਞ੍ਞੂ ਪਸਂਸਨ੍ਤਿ, ਕਲ੍ਯਾਣੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ, ਅਸਮ੍ਮੂਲ਼੍ਹੋ ਕਾਲਂ ਕਰੋਤਿ, ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ. ਅਪਰੇਪਿ ਪਞ੍ਚ ਆਦੀਨਵਾ ਅਪਾਸਾਦਿਕੇ – ਅਪ੍ਪਸਨ੍ਨਾ ਨ ਪਸੀਦਨ੍ਤਿ, ਪਸਨ੍ਨਾਨਂ ਏਕਚ੍ਚਾਨਂ ਅਞ੍ਞਥਤ੍ਤਂ ਹੋਤਿ, ਸਤ੍ਥੁਸਾਸਨਂ ਅਕਤਂ ਹੋਤਿ, ਪਚ੍ਛਿਮਾ ਜਨਤਾ ਦਿਟ੍ਠਾਨੁਗਤਿਂ ਨਾਪਜ੍ਜਤਿ, ਚਿਤ੍ਤਮਸ੍ਸ ਨ ਪਸੀਦਤਿ. ਪਞ੍ਚਾਨਿਸਂਸਾ ਪਾਸਾਦਿਕੇ – ਅਪ੍ਪਸਨ੍ਨਾ ਪਸੀਦਨ੍ਤਿ, ਪਸਨ੍ਨਾਨਂ ਭਿਯ੍ਯੋਭਾਵਾਯ ਹੋਤਿ, ਸਤ੍ਥੁਸਾਸਨਂ ਕਤਂ ਹੋਤਿ, ਪਚ੍ਛਿਮਾ ਜਨਤਾ ਦਿਟ੍ਠਾਨੁਗਤਿਂ ਆਪਜ੍ਜਤਿ, ਚਿਤ੍ਤਮਸ੍ਸ ਪਸੀਦਤਿ. ਪਞ੍ਚ ਆਦੀਨਵਾ ਕੁਲੂਪਕੇ – ਅਨਾਮਨ੍ਤਚਾਰੇ ਆਪਜ੍ਜਤਿ, ਰਹੋ ਨਿਸਜ੍ਜਾਯ ਆਪਜ੍ਜਤਿ, ਪਟਿਚ੍ਛਨ੍ਨੇ ਆਸਨੇ ਆਪਜ੍ਜਤਿ, ਮਾਤੁਗਾਮਸ੍ਸ ਉਤ੍ਤਰਿਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਨ੍ਤੋ ਆਪਜ੍ਜਤਿ, ਕਾਮਸਙ੍ਕਪ੍ਪਬਹੁਲੋ ਚ ਵਿਹਰਤਿ. ਪਞ੍ਚ ਆਦੀਨਵਾ ਕੁਲੂਪਕਸ੍ਸ ਭਿਕ੍ਖੁਨੋ – ਅਤਿਵੇਲਂ ਕੁਲੇਸੁ ਸਂਸਟ੍ਠਸ੍ਸ ਵਿਹਰਤੋ ਮਾਤੁਗਾਮਸ੍ਸ ਅਭਿਣ੍ਹਦਸ੍ਸਨਂ, ਦਸ੍ਸਨੇ ਸਤਿ ਸਂਸਗ੍ਗੋ, ਸਂਸਗ੍ਗੇ ਸਤਿ ਵਿਸ੍ਸਾਸੋ, ਵਿਸ੍ਸਾਸੇ ਸਤਿ ਓਤਾਰੋ, ਓਤਿਣ੍ਣਚਿਤ੍ਤਸ੍ਸੇਤਂ ਭਿਕ੍ਖੁਨੋ ਪਾਟਿਕਙ੍ਖਂ ਅਨਭਿਰਤੋ ਵਾ ਬ੍ਰਹ੍ਮਚਰਿਯਂ ਚਰਿਸ੍ਸਤਿ ਅਞ੍ਞਤਰਂ ਵਾ ਸਂਕਿਲਿਟ੍ਠਂ ਆਪਤ੍ਤਿਂ ਆਪਜ੍ਜਿਸ੍ਸਤਿ ਸਿਕ੍ਖਂ ਵਾ ਪਚ੍ਚਕ੍ਖਾਯ ਹੀਨਾਯਾਵਤ੍ਤਿਸ੍ਸਤਿ.
[ਪਾਚਿ. ੯੨] ਪਞ੍ਚ ਬੀਜਜਾਤਾਨਿ – ਮੂਲਬੀਜਂ, ਖਨ੍ਧਬੀਜਂ, ਫਲ਼ੁਬੀਜਂ, ਅਗ੍ਗਬੀਜਂ, ਬੀਜਬੀਜਞ੍ਞੇਵ [ਬੀਜਬੀਜਮੇਵ (ਕ.)] ਪਞ੍ਚਮਂ. ਪਞ੍ਚਹਿ ਸਮਣਕਪ੍ਪੇਹਿ ਫਲਂ ਪਰਿਭੁਞ੍ਜਿਤਬ੍ਬਂ – ਅਗ੍ਗਿਪਰਿਜਿਤਂ, ਸਤ੍ਥਪਰਿਜਿਤਂ, ਨਖਪਰਿਜਿਤਂ, ਅਬੀਜਂ, ਨਿਬ੍ਬਤ੍ਤਬੀਜਞ੍ਞੇਵ [ਨਿਬ੍ਬਟ੍ਟਬੀਜਞ੍ਞੇਵ (ਸੀ.), ਨਿਬ੍ਬਟਬੀਜਞ੍ਞੇਵ (ਸ੍ਯਾ.), ਨਿਪ੍ਪਟ੍ਟਬੀਜਞ੍ਞੇਵ (ਕ.)] ਪਞ੍ਚਮਂ. ਪਞ੍ਚ ਵਿਸੁਦ੍ਧਿਯੋ – ਨਿਦਾਨਂ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ, ਅਯਂ ਪਠਮਾ ਵਿਸੁਦ੍ਧਿ; ਨਿਦਾਨਂ ਉਦ੍ਦਿਸਿਤ੍ਵਾ ਚਤ੍ਤਾਰਿ ਪਾਰਾਜਿਕਾਨਿ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ, ਅਯਂ ਦੁਤਿਯਾ ਵਿਸੁਦ੍ਧਿ; ਨਿਦਾਨਂ ਉਦ੍ਦਿਸਿਤ੍ਵਾ ਚਤ੍ਤਾਰਿ ਪਾਰਾਜਿਕਾਨਿ ਉਦ੍ਦਿਸਿਤ੍ਵਾ ਤੇਰਸ ਸਙ੍ਘਾਦਿਸੇਸੇ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ, ਅਯਂ ਤਤਿਯਾ ਵਿਸੁਦ੍ਧਿ; ਨਿਦਾਨਂ ਉਦ੍ਦਿਸਿਤ੍ਵਾ ਚਤ੍ਤਾਰਿ ਪਾਰਾਜਿਕਾਨਿ ਉਦ੍ਦਿਸਿਤ੍ਵਾ ਤੇਰਸ ਸਙ੍ਘਾਦਿਸੇਸੇ ਉਦ੍ਦਿਸਿਤ੍ਵਾ ਦ੍ਵੇ ਅਨਿਯਤੇ ਉਦ੍ਦਿਸਿਤ੍ਵਾ ਅਵਸੇਸਂ ਸੁਤੇਨ ਸਾਵੇਤਬ੍ਬਂ, ਅਯਂ ਚਤੁਤ੍ਥਾ ਵਿਸੁਦ੍ਧਿ; ਵਿਤ੍ਥਾਰੇਨੇਵ ਪਞ੍ਚਮੀ. ਅਪਰਾਪਿ ਪਞ੍ਚ ਵਿਸੁਦ੍ਧਿਯੋ – ਸੁਤ੍ਤੁਦ੍ਦੇਸੋ, ਪਾਰਿਸੁਦ੍ਧਿਉਪੋਸਥੋ, ਅਧਿਟ੍ਠਾਨੁਪੋਸਥੋ, ਪਵਾਰਣਾ, ਸਾਮਗ੍ਗੀਉਪੋਸਥੋਯੇਵ ਪਞ੍ਚਮੋ. ਪਞ੍ਚਾਨਿਸਂਸਾ ਵਿਨਯਧਰੇ – ਅਤ੍ਤਨੋ ਸੀਲਕ੍ਖਨ੍ਧੋ ਸੁਗੁਤ੍ਤੋ ਹੋਤਿ ਸੁਰਕ੍ਖਿਤੋ, ਕੁਕ੍ਕੁਚ੍ਚਪਕਤਾਨਂ ਪਟਿਸਰਣਂ ਹੋਤਿ, ਵਿਸਾਰਦੋ ਸਙ੍ਘਮਜ੍ਝੇ ਵੋਹਰਤਿ, ਪਚ੍ਚਤ੍ਥਿਕੇ ਸਹਧਮ੍ਮੇਨ ਸੁਨਿਗ੍ਗਹਿਤਂ ਨਿਗ੍ਗਣ੍ਹਾਤਿ, ਸਦ੍ਧਮ੍ਮਟ੍ਠਿਤਿਯਾ ਪਟਿਪਨ੍ਨੋ ਹੋਤਿ. ਪਞ੍ਚ ਅਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ. ਪਞ੍ਚ ਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨੀਤਿ.
ਪਞ੍ਚਕਂ ਨਿਟ੍ਠਿਤਂ.
ਤਸ੍ਸੁਦ੍ਦਾਨਂ –
ਆਪਤ੍ਤਿ ਆਪਤ੍ਤਿਕ੍ਖਨ੍ਧਾ, ਵਿਨੀਤਾਨਨ੍ਤਰੇਨ ਚ;
ਪੁਗ੍ਗਲਾ ਛੇਦਨਾ ਚੇਵ, ਆਪਜ੍ਜਤਿ ਚ ਪਚ੍ਚਯਾ.
ਨ ਉਪੇਤਿ ਉਪੇਤਿ ਚ, ਕਪ੍ਪਨ੍ਤੁਸਙ੍ਕਿਤੇਲਞ੍ਚ;
ਵਸਂ ਬ੍ਯਸਨਾ ਸਮ੍ਪਦਾ, ਪਸ੍ਸਦ੍ਧਿ ਪੁਗ੍ਗਲੇਨ ਚ.
ਸੋਸਾਨਿਕਂ ਖਾਯਿਤਞ੍ਚ, ਥੇਯ੍ਯਂ ਚੋਰੋ ਚ ਵੁਚ੍ਚਤਿ;
ਅਵਿਸ੍ਸਜ੍ਜਿ ਅਵੇਭਙ੍ਗਿ, ਕਾਯਤੋ ਕਾਯਵਾਚਤੋ.
ਦੇਸਨਾ ਸਙ੍ਘਂ ਉਦ੍ਦੇਸਂ, ਪਚ੍ਚਨ੍ਤਿਕਥਿਨੇਨ ਚ;
ਕਮ੍ਮਾਨਿ ਯਾਵਤਤਿਯਂ, ਪਾਰਾਜਿਥੁਲ੍ਲਦੁਕ੍ਕਟਂ.
ਅਕਪ੍ਪਿਯਂ ਕਪ੍ਪਿਯਞ੍ਚ, ਅਪੁਞ੍ਞਦੁਵਿਨੋਦਯਾ;
ਸਮ੍ਮਜ੍ਜਨੀ ਅਪਰੇ ਚ, ਭਾਸਂ ਆਪਤ੍ਤਿਮੇਵ ਚ.
ਅਧਿਕਰਣਂ ਵਤ੍ਥੁ ਞਤ੍ਤਿ, ਆਪਤ੍ਤਾ ਉਭਯਾਨਿ ਚ;
ਲਹੁਕਟ੍ਠਮਕਾ ਏਤੇ, ਕਣ੍ਹਸੁਕ੍ਕਾ ਵਿਜਾਨਥ.
ਅਰਞ੍ਞਂ ਪਿਣ੍ਡਪਾਤਞ੍ਚ, ਪਂਸੁਰੁਕ੍ਖਸੁਸਾਨਿਕਾ;
ਅਬ੍ਭੋਕਾਸੋ ਚੀਵਰਞ੍ਚ, ਸਪਦਾਨੋ ਨਿਸਜ੍ਜਿਕੋ.
ਸਨ੍ਥਤਿ ਖਲੁ ਪਚ੍ਛਾਪਿ, ਪਤ੍ਤਪਿਣ੍ਡਿਕਮੇਵ ਚ;
ਉਪੋਸਥਂ ਪਵਾਰਣਂ, ਆਪਤ੍ਤਾਨਾਪਤ੍ਤਿਪਿ ਚ.
ਕਣ੍ਹਸੁਕ੍ਕਪਦਾ ਏਤੇ, ਭਿਕ੍ਖੁਨੀਨਮ੍ਪਿ ਤੇ ਤਥਾ;
ਅਪਾਸਾਦਿਕਪਾਸਾਦਿ, ਤਥੇਵ ਅਪਰੇ ਦੁਵੇ.
ਕੁਲੂਪਕੇ ਅਤਿਵੇਲਂ, ਬੀਜਂ ਸਮਣਕਪ੍ਪਿ ਚ;
ਵਿਸੁਦ੍ਧਿ ਅਪਰੇ ਚੇਵ, ਵਿਨਯਾਧਮ੍ਮਿਕੇਨ ਚ;
ਧਮ੍ਮਿਕਾ ਚ ਤਥਾ ਵੁਤ੍ਤਾ, ਨਿਟ੍ਠਿਤਾ ਸੁਦ੍ਧਿਪਞ੍ਚਕਾਤਿ.
੬. ਛਕ੍ਕਵਾਰੋ
੩੨੬. [ਦੀ. ਨਿ. ੩.੩੨੪] ਛ ਅਗਾਰਵਾ. ਛ ਗਾਰਵਾ. ਛ ਵਿਨੀਤਵਤ੍ਥੂਨਿ. ਛ ਸਾਮੀਚਿਯੋ. ਛ ਆਪਤ੍ਤਿਸਮੁਟ੍ਠਾਨਾ. ਛਚ੍ਛੇਦਨਕਾ ਆਪਤ੍ਤਿਯੋ. ਛਹਾਕਾਰੇਹਿ ਆਪਤ੍ਤਿਂ ਆਪਜ੍ਜਤਿ. ਛਾਨਿਸਂਸਾ ਵਿਨਯਧਰੇ. ਛ ਪਰਮਾਨਿ. ਛਾਰਤ੍ਤਂ ਤਿਚੀਵਰੇਨ ਵਿਪ੍ਪਵਸਿਤਬ੍ਬਂ. ਛ ਚੀਵਰਾਨਿ. ਛ ਰਜਨਾਨਿ. ਛ ਆਪਤ੍ਤਿਯੋ ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਨ੍ਤਿ ਨ ਵਾਚਤੋ. ਛ ਆਪਤ੍ਤਿਯੋ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਨ੍ਤਿ ਨ ਕਾਯਤੋ. ਛ ਆਪਤ੍ਤਿਯੋ ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਨ੍ਤਿ. ਛ ਕਮ੍ਮਾਨਿ. ਛ ਵਿਵਾਦਮੂਲਾਨਿ. ਛ ਅਨੁਵਾਦਮੂਲਾਨਿ. ਛ ਸਾਰਣੀਯਾ ਧਮ੍ਮਾ ਦੀਘਸੋ. ਛ ਵਿਦਤ੍ਥਿਯੋ, ਸੁਗਤਵਿਦਤ੍ਥਿਯਾ, ਤਿਰਿਯਂ ਛ ਵਿਦਤ੍ਥਿਯੋ. ਛ ਨਿਸ੍ਸਯਪਟਿਪ੍ਪਸ੍ਸਦ੍ਧਿਯੋ ਆਚਰਿਯਮ੍ਹਾ. ਛ ਨਹਾਨੇ ਅਨੁਪਞ੍ਞਤ੍ਤਿਯੋ – ਵਿਪ੍ਪਕਤਚੀਵਰਂ ਆਦਾਯ ਪਕ੍ਕਮਤਿ, ਵਿਪ੍ਪਕਤਚੀਵਰਂ ਸਮਾਦਾਯ ਪਕ੍ਕਮਤਿ.
[ਮਹਾਵ. ੮੫ ਆਦਯੋ] ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਅਸੇਕ੍ਖੇਨ ਸੀਲਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਪਞ੍ਞਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ.
ਅਪਰੇਹਿਪਿ ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਅਤ੍ਤਨਾ ਅਸੇਕ੍ਖੇਨ ਸੀਲਕ੍ਖਨ੍ਧੇ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਸੀਲਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਅਸੇਕ੍ਖੇਨ ਸਮਾਧਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਸਮਾਧਿਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਅਸੇਕ੍ਖੇਨ ਪਞ੍ਞਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਪਞ੍ਞਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਅਸੇਕ੍ਖੇਨ ਵਿਮੁਤ੍ਤਿਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਵਿਮੁਤ੍ਤਿਕ੍ਖਨ੍ਧੇ ਸਮਾਦਪੇਤਾ; ਅਤ੍ਤਨਾ ਅਸੇਕ੍ਖੇਨ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨ ਸਮਨ੍ਨਾਗਤੋ ਹੋਤਿ, ਪਰਂ ਅਸੇਕ੍ਖੇ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇ ਸਮਾਦਪੇਤਾ; ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ.
ਅਪਰੇਹਿਪਿ ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਸਦ੍ਧੋ ਹੋਤਿ, ਹਿਰਿਮਾ ਹੋਤਿ, ਓਤ੍ਤਪ੍ਪੀ ਹੋਤਿ, ਆਰਦ੍ਧਵੀਰਿਯੋ ਹੋਤਿ, ਉਪਟ੍ਠਿਤਸ੍ਸਤਿ ਹੋਤਿ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ.
ਅਪਰੇਹਿਪਿ ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਨ ਅਧਿਸੀਲੇ ਸੀਲਵਿਪਨ੍ਨੋ ਹੋਤਿ, ਨ ਅਜ੍ਝਾਚਾਰੇ ਆਚਾਰਵਿਪਨ੍ਨੋ ਹੋਤਿ, ਨ ਅਤਿਦਿਟ੍ਠਿਯਾ ਦਿਟ੍ਠਿਵਿਪਨ੍ਨੋ ਹੋਤਿ, ਬਹੁਸ੍ਸੁਤੋ ਹੋਤਿ, ਪਞ੍ਞਵਾ ਹੋਤਿ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ.
ਅਪਰੇਹਿਪਿ ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਪਟਿਬਲੋ ਹੋਤਿ ਅਨ੍ਤੇਵਾਸਿਂ ਵਾ ਸਦ੍ਧਿਵਿਹਾਰਿਂ ਵਾ ਗਿਲਾਨਂ ਉਪਟ੍ਠਾਤੁਂ ਵਾ ਉਪਟ੍ਠਾਪੇਤੁਂ ਵਾ, ਅਨਭਿਰਤਂ ਵੂਪਕਾਸੇਤੁਂ ਵਾ ਵੂਪਕਾਸਾਪੇਤੁਂ ਵਾ [ਅਨਭਿਰਤਿਂ (ਕ.)], ਉਪ੍ਪਨ੍ਨਂ ਕੁਕ੍ਕੁਚ੍ਚਂ ਧਮ੍ਮਤੋ ਵਿਨੋਦੇਤੁਂ [ਵਿਨੋਦੇਤੁਂ ਵਾ ਵਿਨੋਦਾਪੇਤੁਂ ਵਾ (ਸ੍ਯਾ.) ਮਹਾਵ. ੮੫], ਆਪਤ੍ਤਿਂ ਜਾਨਾਤਿ, ਆਪਤ੍ਤਿਵੁਟ੍ਠਾਨਂ ਜਾਨਾਤਿ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ.
ਅਪਰੇਹਿਪਿ ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਪਟਿਬਲੋ ਹੋਤਿ ਅਨ੍ਤੇਵਾਸਿਂ ਵਾ ਸਦ੍ਧਿਵਿਹਾਰਿਂ ਵਾ ਆਭਿਸਮਾਚਾਰਿਕਾਯ ਸਿਕ੍ਖਾਯ ਸਿਕ੍ਖਾਪੇਤੁਂ, ਆਦਿਬ੍ਰਹ੍ਮਚਾਰਿਯਕਾਯ ਸਿਕ੍ਖਾਯ ਵਿਨੇਤੁਂ, ਅਭਿਧਮ੍ਮੇ ਵਿਨੇਤੁਂ, ਅਭਿਵਿਨਯੇ ਵਿਨੇਤੁਂ, ਉਪ੍ਪਨ੍ਨਂ ਦਿਟ੍ਠਿਗਤਂ ਧਮ੍ਮਤੋ ਵਿਵੇਚੇਤੁਂ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ.
ਅਪਰੇਹਿਪਿ ਛਹਙ੍ਗੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ ਨਿਸ੍ਸਯੋ ਦਾਤਬ੍ਬੋ ਸਾਮਣੇਰੋ ਉਪਟ੍ਠਾਪੇਤਬ੍ਬੋ – ਆਪਤ੍ਤਿਂ ਜਾਨਾਤਿ, ਅਨਾਪਤ੍ਤਿਂ ਜਾਨਾਤਿ, ਲਹੁਕਂ ਆਪਤ੍ਤਿਂ ਜਾਨਾਤਿ, ਗਰੁਕਂ ਆਪਤ੍ਤਿਂ ਜਾਨਾਤਿ, ਉਭਯਾਨਿ ਖੋ ਪਨਸ੍ਸ ਪਾਤਿਮੋਕ੍ਖਾਨਿ ਵਿਤ੍ਥਾਰੇਨ ਸ੍ਵਾਗਤਾਨਿ ਹੋਨ੍ਤਿ ਸੁਵਿਭਤ੍ਤਾਨਿ ਸੁਪ੍ਪਵਤ੍ਤੀਨਿ ਸੁਵਿਨਿਚ੍ਛਿਤਾਨਿ ਸੁਤ੍ਤਸੋ ਅਨੁਬ੍ਯਞ੍ਜਨਸੋ, ਦਸਵਸ੍ਸੋ ਵਾ ਹੋਤਿ ਅਤਿਰੇਕਦਸਵਸ੍ਸੋ ਵਾ.
ਛ ਅਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨਿ, ਛ ਧਮ੍ਮਿਕਾਨਿ ਪਾਤਿਮੋਕ੍ਖਟ੍ਠਪਨਾਨੀਤਿ.
ਛਕ੍ਕਂ ਨਿਟ੍ਠਿਤਂ.
ਤਸ੍ਸੁਦ੍ਦਾਨਂ –
ਅਗਾਰਵਾ ਗਾਰਵਾ ਚ, ਵਿਨੀਤਾ ਸਾਮੀਚਿਪਿ ਚ;
ਸਮੁਟ੍ਠਾਨਾ ਛੇਦਨਾ ਚੇਵ, ਆਕਾਰਾਨਿਸਂਸੇਨ ਚ.
ਪਰਮਾਨਿ ਚ ਛਾਰਤ੍ਤਂ, ਚੀਵਰਂ ਰਜਨਾਨਿ ਚ;
ਕਾਯਤੋ ਚਿਤ੍ਤਤੋ ਚਾਪਿ, ਵਾਚਤੋ ਚਿਤ੍ਤਤੋਪਿ ਚ.
ਕਾਯਵਾਚਾਚਿਤ੍ਤਤੋ ਚ, ਕਮ੍ਮਵਿਵਾਦਮੇਵ ਚ;
ਅਨੁਵਾਦਾ ਦੀਘਸੋ ਚ, ਤਿਰਿਯਂ ਨਿਸ੍ਸਯੇਨ ਚ.
ਅਨੁਪਞ੍ਞਤ੍ਤਿ ਆਦਾਯ, ਸਮਾਦਾਯ ਤਥੇਵ ਚ;
ਅਸੇਕ੍ਖੇ ਸਮਾਦਪੇਤਾ, ਸਦ੍ਧੋ ਅਧਿਸੀਲੇਨ ਚ;