੧੧. ਏਕਾਦਸਕਵਾਰੋ
੩੩੧. ਏਕਾਦ ਪੁਗ੍ਗਲਾ ਅਨੁਪਸਮ੍ਪਨ੍ਨਾ ਨ ਉਪਸਮ੍ਪਾਦੇਤਬ੍ਬਾ, ਉਪਸਮ੍ਪਨ੍ਨਾ ਨਾਸੇਤਬ੍ਬਾ. ਏਕਾਦਸ ਪਾਦੁਕਾ ਅਕਪ੍ਪਿਯਾ. ਏਕਾਦਸ ਪਤ੍ਤਾ ਅਕਪ੍ਪਿਯਾ. ਏਕਾਦਸ ਚੀਵਰਾਨਿ ਅਕਪ੍ਪਿਯਾਨਿ. ਏਕਾਦਸ ਯਾਵਤਤਿਯਕਾ. ਭਿਕ੍ਖੁਨੀਨਂ ਏਕਾਦਸ ਅਨ੍ਤਰਾਯਿਕਾ ਧਮ੍ਮਾ ਪੁਚ੍ਛਿਤਬ੍ਬਾ. ਏਕਾਦਸ ਚੀਵਰਾਨਿ ਅਧਿਟ੍ਠਾਤਬ੍ਬਾਨਿ. ਏਕਾਦਸ ਚੀਵਰਾਨਿ ਨ ਵਿਕਪ੍ਪੇਤਬ੍ਬਾਨਿ. ਏਕਾਦਸੇ ਅਰੁਣੁਗ੍ਗਮਨੇ ਨਿਸ੍ਸਗ੍ਗਿਯਂ ਹੋਤਿ. ਏਕਾਦਸ ਗਣ੍ਠਿਕਾ ਕਪ੍ਪਿਯਾ. ਏਕਾਦਸ ਵਿਧਾ [ਵੀਥਾ (ਸ੍ਯਾ.)] ਕਪ੍ਪਿਯਾ. ਏਕਾਦਸ ਪਥਵੀ ਅਕਪ੍ਪਿਯਾ. ਏਕਾਦਸ ਪਥਵੀ ਕਪ੍ਪਿਯਾ. ਏਕਾਦਸ ਨਿਸ੍ਸਯਪਟਿਪ੍ਪਸ੍ਸਦ੍ਧਿਯੋ. ਏਕਾਦਸ ਪੁਗ੍ਗਲਾ ਅਵਨ੍ਦਿਯਾ. ਏਕਾਦਸ ਪਰਮਾਨਿ. ਏਕਾਦਸ ਵਰਾਨਿ ਯਾਚਿਂਸੁ. ਏਕਾਦਸ ਸੀਮਾਦੋਸਾ. ਅਕ੍ਕੋਸਕਪਰਿਭਾਸਕੇ ਪੁਗ੍ਗਲੇ ਏਕਾਦਸਾਦੀਨਵਾ ਪਾਟਿਕਙ੍ਖਾ. [ਅ. ਨਿ. ੧੧.੧੫; ਮਿ. ਪ. ੪.੪.੬] ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਆਸੇਵਿਤਾਯ ਭਾਵਿਤਾਯ ਬਹੁਲੀਕਤਾਯ ਯਾਨੀਕਤਾਯ ਵਤ੍ਥੁਕਤਾਯ ਅਨੁਟ੍ਠਿਤਾਯ ਪਰਿਚਿਤਾਯ ਸੁਸਮਾਰਦ੍ਧਾਯ ਏਕਾਦਸਾਨਿਸਂਸਾ ਪਾਟਿਕਙ੍ਖਾ. ਸੁਖਂ ਸੁਪਤਿ, ਸੁਖਂ ਪਟਿਬੁਜ੍ਝਤਿ, ਨ ਪਾਪਕਂ ਸੁਪਿਨਂ ਪਸ੍ਸਤਿ, ਮਨੁਸ੍ਸਾਨਂ ਪਿਯੋ ਹੋਤਿ, ਅਮਨੁਸ੍ਸਾਨਂ ਪਿਯੋ ਹੋਤਿ, ਦੇਵਤਾ ਰਕ੍ਖਨ੍ਤਿ, ਨਾਸ੍ਸ ਅਗ੍ਗਿ ਵਾ ਵਿਸਂ ਵਾ ਸਤ੍ਥਂ ਵਾ ਕਮਤਿ, ਤੁਵਟ੍ਟਂ ਚਿਤ੍ਤਂ ਸਮਾਧਿਯਤਿ, ਮੁਖਵਣ੍ਣੋ ਵਿਪ੍ਪਸੀਦਤਿ, ਅਸਮ੍ਮੂਲ਼੍ਹੋ ਕਾਲਙ੍ਕਰੋਤਿ, ਉਤ੍ਤਰਿ ਅਪ੍ਪਟਿਵਿਜ੍ਝਨ੍ਤੋ ਬ੍ਰਹ੍ਮਲੋਕੂਪਗੋ ਹੋਤਿ – ਮੇਤ੍ਤਾਯ ਚੇਤੋਵਿਮੁਤ੍ਤਿਯਾ ਆਸੇਵਿਤਾਯ ਭਾਵਿਤਾਯ ਬਹੁਲੀਕਤਾਯ ਯਾਨੀਕਤਾਯ ਵਤ੍ਥੁਕਤਾਯ ਅਨੁਟ੍ਠਿਤਾਯ ਪਰਿਚਿਤਾਯ ਸੁਸਮਾਰਦ੍ਧਾਯ ਇਮੇ ਏਕਾਦਸਾਨਿਸਂਸਾ ਪਾਟਿਕਙ੍ਖਾਤਿ.
ਏਕਾਦਸਕਂ ਨਿਟ੍ਠਿਤਂ.
ਤਸ੍ਸੁਦ੍ਦਾਨਂ –
ਨਾਸੇਤਬ੍ਬਾ ਪਾਦੁਕਾ ਚ, ਪਤ੍ਤਾ ਚ ਚੀਵਰਾਨਿ ਚ;
ਤਤਿਯਾ ਪੁਚ੍ਛਿਤਬ੍ਬਾ ਚ, ਅਧਿਟ੍ਠਾਨਵਿਕਪ੍ਪਨਾ.
ਅਰੁਣਾ ਗਣ੍ਠਿਕਾ ਵਿਧਾ, ਅਕਪ੍ਪਿਯਾ ਚ ਕਪ੍ਪਿਯਂ;
ਨਿਸ੍ਸਯਾਵਨ੍ਦਿਯਾ ਚੇਵ, ਪਰਮਾਨਿ ਵਰਾਨਿ ਚ;
ਸੀਮਾਦੋਸਾ ਚ ਅਕ੍ਕੋਸਾ, ਮੇਤ੍ਤਾਯੇਕਾਦਸਾ ਕਤਾਤਿ.
ਏਕੁਤ੍ਤਰਿਕਨਯੋ.
ਤਸ੍ਸੁਦ੍ਦਾਨਂ –
ਏਕਕਾ ਚ ਦੁਕਾ ਚੇਵ, ਤਿਕਾ ਚ ਚਤੁਪਞ੍ਚਕਾ;
ਛਸਤ੍ਤਟ੍ਠਨਵਕਾ ਚ, ਦਸ ਏਕਾਦਸਾਨਿ ਚ.
ਹਿਤਾਯ ਸਬ੍ਬਸਤ੍ਤਾਨਂ, ਞਾਤਧਮ੍ਮੇਨ ਤਾਦਿਨਾ;
ਏਕੁਤ੍ਤਰਿਕਾ ਵਿਮਲਾ, ਮਹਾਵੀਰੇਨ ਦੇਸਿਤਾਤਿ.
ਏਕੁਤ੍ਤਰਿਕਨਯੋ ਨਿਟ੍ਠਿਤੋ.