੨. ਊਨਪਞ੍ਚਬਨ੍ਧਨਸਿਕ੍ਖਾਪਦਂ

੬੦੯. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਕ੍ਕੇਸੁ ਵਿਹਰਤਿ ਕਪਿਲਵਤ੍ਥੁਸ੍ਮਿਂ ਨਿਗ੍ਰੋਧਾਰਾਮੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਰੇਨ ਕੁਮ੍ਭਕਾਰੇਨ ਭਿਕ੍ਖੂ ਪਵਾਰਿਤਾ ਹੋਨ੍ਤਿ – ‘‘ਯੇਸਂ ਅਯ੍ਯਾਨਂ ਪਤ੍ਤੇਨ ਅਤ੍ਥੋ ਅਹਂ ਪਤ੍ਤੇਨਾ’’ਤਿ. ਤੇਨ ਖੋ ਪਨ ਸਮਯੇਨ ਭਿਕ੍ਖੂ ਨ ਮਤ੍ਤਂ ਜਾਨਿਤ੍ਵਾ ਬਹੂ ਪਤ੍ਤੇ ਵਿਞ੍ਞਾਪੇਨ੍ਤਿ. ਯੇਸਂ ਖੁਦ੍ਦਕਾ ਪਤ੍ਤਾ ਤੇ ਮਹਨ੍ਤੇ ਪਤ੍ਤੇ ਵਿਞ੍ਞਾਪੇਨ੍ਤਿ. ਯੇਸਂ ਮਹਨ੍ਤਾ ਪਤ੍ਤਾ ਤੇ ਖੁਦ੍ਦਕੇ ਪਤ੍ਤੇ ਵਿਞ੍ਞਾਪੇਨ੍ਤਿ. ਅਥ ਖੋ ਸੋ ਕੁਮ੍ਭਕਾਰੋ ਭਿਕ੍ਖੂਨਂ ਬਹੂ ਪਤ੍ਤੇ ਕਰੋਨ੍ਤੋ ਨ ਸਕ੍ਕੋਤਿ ਅਞ੍ਞਂ ਵਿਕ੍ਕਾਯਿਕਂ ਭਣ੍ਡਂ ਕਾਤੁਂ, ਅਤ੍ਤਨਾਪਿ ਨ ਯਾਪੇਤਿ, ਪੁਤ੍ਤਦਾਰਾਪਿਸ੍ਸ ਕਿਲਮਨ੍ਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਨ ਮਤ੍ਤਂ ਜਾਨਿਤ੍ਵਾ ਬਹੂ ਪਤ੍ਤੇ ਵਿਞ੍ਞਾਪੇਸ੍ਸਨ੍ਤਿ! ਅਯਂ ਇਮੇਸਂ ਬਹੂ ਪਤ੍ਤੇ ਕਰੋਨ੍ਤੋ ਨ ਸਕ੍ਕੋਤਿ ਅਞ੍ਞਂ ਵਿਕ੍ਕਾਯਿਕਂ ਭਣ੍ਡਂ ਕਾਤੁਂ, ਅਤ੍ਤਨਾਪਿ ਨ ਯਾਪੇਤਿ, ਪੁਤ੍ਤਦਾਰਾਪਿਸ੍ਸ ਕਿਲਮਨ੍ਤੀ’’ਤਿ.

ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੂ ਨ ਮਤ੍ਤਂ ਜਾਨਿਤ੍ਵਾ ਬਹੂ ਪਤ੍ਤੇ ਵਿਞ੍ਞਾਪੇਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਤੇ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੂ ਨ ਮਤ੍ਤਂ ਜਾਨਿਤ੍ਵਾ ਬਹੂ ਪਤ੍ਤੇ ਵਿਞ੍ਞਾਪੇਨ੍ਤੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ ਨ ਮਤ੍ਤਂ ਜਾਨਿਤ੍ਵਾ ਬਹੂ ਪਤ੍ਤੇ ਵਿਞ੍ਞਾਪੇਸ੍ਸਨ੍ਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਨ, ਭਿਕ੍ਖਵੇ, ਪਤ੍ਤੋ ਵਿਞ੍ਞਾਪੇਤਬ੍ਬੋ. ਯੋ ਵਿਞ੍ਞਾਪੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

੬੧੦. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਪਤ੍ਤੋ ਭਿਨ੍ਨੋ ਹੋਤਿ. ਅਥ ਖੋ ਸੋ ਭਿਕ੍ਖੁ – ‘‘ਭਗਵਤਾ ਪਟਿਕ੍ਖਿਤ੍ਤਂ ਪਤ੍ਤਂ ਵਿਞ੍ਞਾਪੇਤੁ’’ਨ੍ਤਿ ਕੁਕ੍ਕੁਚ੍ਚਾਯਨ੍ਤੋ ਨ ਵਿਞ੍ਞਾਪੇਤਿ. ਹਤ੍ਥੇਸੁ ਪਿਣ੍ਡਾਯ ਚਰਤਿ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਹਤ੍ਥੇਸੁ ਪਿਣ੍ਡਾਯ ਚਰਿਸ੍ਸਨ੍ਤਿ, ਸੇਯ੍ਯਥਾਪਿ ਤਿਤ੍ਥਿਯਾ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਨਟ੍ਠਪਤ੍ਤਸ੍ਸ ਵਾ ਭਿਨ੍ਨਪਤ੍ਤਸ੍ਸ ਵਾ ਪਤ੍ਤਂ ਵਿਞ੍ਞਾਪੇਤੁ’’ਨ੍ਤਿ.

੬੧੧. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ – ‘‘ਭਗਵਤਾ ਅਨੁਞ੍ਞਾਤਂ ਨਟ੍ਠਪਤ੍ਤਸ੍ਸ ਵਾ ਭਿਨ੍ਨਪਤ੍ਤਸ੍ਸ ਵਾ ਪਤ੍ਤਂ ਵਿਞ੍ਞਾਪੇਤੁ’’ਨ੍ਤਿ ਅਪ੍ਪਮਤ੍ਤਕੇਨਪਿ ਭਿਨ੍ਨੇਨ ਅਪ੍ਪਮਤ੍ਤਕੇਨਪਿ ਖਣ੍ਡੇਨ ਵਿਲਿਖਿਤਮਤ੍ਤੇਨਪਿ ਬਹੂ ਪਤ੍ਤੇ ਵਿਞ੍ਞਾਪੇਨ੍ਤਿ. ਅਥ ਖੋ ਸੋ ਕੁਮ੍ਭਕਾਰੋ ਭਿਕ੍ਖੂਨਂ ਤਥੇਵ ਬਹੂ ਪਤ੍ਤੇ ਕਰੋਨ੍ਤੋ ਨ ਸਕ੍ਕੋਤਿ ਅਞ੍ਞਂ ਵਿਕ੍ਕਾਯਿਕਂ ਭਣ੍ਡਂ ਕਾਤੁਂ, ਅਤ੍ਤਨਾਪਿ ਨ ਯਾਪੇਤਿ, ਪੁਤ੍ਤਦਾਰਾਪਿਸ੍ਸ ਕਿਲਮਨ੍ਤਿ. ਮਨੁਸ੍ਸਾ ਤਥੇਵ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਨ ਮਤ੍ਤਂ ਜਾਨਿਤ੍ਵਾ ਬਹੂ ਪਤ੍ਤੇ ਵਿਞ੍ਞਾਪੇਸ੍ਸਨ੍ਤਿ! ਅਯਂ ਇਮੇਸਂ ਬਹੂ ਪਤ੍ਤੇ ਕਰੋਨ੍ਤੋ ਨ ਸਕ੍ਕੋਤਿ ਅਞ੍ਞਂ ਵਿਕ੍ਕਾਯਿਕਂ ਭਣ੍ਡਂ ਕਾਤੁਂ, ਅਤ੍ਤਨਾਪਿ ਨ ਯਾਪੇਤਿ, ਪੁਤ੍ਤਦਾਰਾਪਿਸ੍ਸ ਕਿਲਮਨ੍ਤੀ’’ਤਿ.

ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਛਬ੍ਬਗ੍ਗਿਯਾ ਭਿਕ੍ਖੂ ਅਪ੍ਪਮਤ੍ਤਕੇਨਪਿ ਭਿਨ੍ਨੇਨ ਅਪ੍ਪਮਤ੍ਤਕੇਨਪਿ ਖਣ੍ਡੇਨ ਵਿਲਿਖਿਤਮਤ੍ਤੇਨਪਿ ਬਹੂ ਪਤ੍ਤੇ ਵਿਞ੍ਞਾਪੇਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਛਬ੍ਬਗ੍ਗਿਯੇ ਭਿਕ੍ਖੂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਅਪ੍ਪਮਤ੍ਤਕੇਨਪਿ ਭਿਨ੍ਨੇਨ ਅਪ੍ਪਮਤ੍ਤਕੇਨਪਿ ਖਣ੍ਡੇਨ ਵਿਲਿਖਿਤਮਤ੍ਤੇਨਪਿ ਬਹੂ ਪਤ੍ਤੇ ਵਿਞ੍ਞਾਪੇਥਾ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਅਪ੍ਪਮਤ੍ਤਕੇਨਪਿ ਭਿਨ੍ਨੇਨ ਅਪ੍ਪਮਤ੍ਤਕੇਨਪਿ ਖਣ੍ਡੇਨ ਵਿਲਿਖਿਤਮਤ੍ਤੇਨਪਿ ਬਹੂ ਪਤ੍ਤੇ ਵਿਞ੍ਞਾਪੇਸ੍ਸਥ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੬੧੨. ‘‘ਯੋ ਪਨ ਭਿਕ੍ਖੁ ਊਨਪਞ੍ਚਬਨ੍ਧਨੇਨ ਪਤ੍ਤੇਨ ਅਞ੍ਞਂ ਨਵਂ ਪਤ੍ਤਂ ਚੇਤਾਪੇਯ੍ਯ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਤੇਨ ਭਿਕ੍ਖੁਨਾ ਸੋ ਪਤ੍ਤੋ ਭਿਕ੍ਖੁਪਰਿਸਾਯ ਨਿਸ੍ਸਜ੍ਜਿਤਬ੍ਬੋ. ਯੋ ਚ ਤਸ੍ਸਾ ਭਿਕ੍ਖੁਪਰਿਸਾਯ ਪਤ੍ਤਪਰਿਯਨ੍ਤੋ ਸੋ ਤਸ੍ਸ ਭਿਕ੍ਖੁਨੋ ਪਦਾਤਬ੍ਬੋ – ‘ਅਯਂ ਤੇ, ਭਿਕ੍ਖੁ, ਪਤ੍ਤੋ ਯਾਵ ਭੇਦਨਾਯ ਧਾਰੇਤਬ੍ਬੋ’ਤਿ. ਅਯਂ ਤਤ੍ਥ ਸਾਮੀਚੀ’’ਤਿ.

੬੧੩. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਊਨਪਞ੍ਚਬਨ੍ਧਨੋ ਨਾਮ ਪਤ੍ਤੋ ਅਬਨ੍ਧਨੋ ਵਾ ਏਕਬਨ੍ਧਨੋ ਵਾ ਦ੍ਵਿਬਨ੍ਧਨੋ ਵਾ ਤਿਬਨ੍ਧਨੋ ਵਾ ਚਤੁਬਨ੍ਧਨੋ ਵਾ. ਅਬਨ੍ਧਨੋਕਾਸੋ ਨਾਮ ਪਤ੍ਤੋ ਯਸ੍ਸ ਦ੍ਵਙ੍ਗੁਲਾ ਰਾਜਿ ਨ ਹੋਤਿ. ਬਨ੍ਧਨੋਕਾਸੋ ਨਾਮ ਪਤ੍ਤੋ ਯਸ੍ਸ ਦ੍ਵਙ੍ਗੁਲਾ ਰਾਜਿ ਹੋਤਿ. ਨਵੋ ਨਾਮ ਪਤ੍ਤੋ ਵਿਞ੍ਞਤ੍ਤਿਂ ਉਪਾਦਾਯ ਵੁਚ੍ਚਤਿ.

ਚੇਤਾਪੇਯ੍ਯਾਤਿ ਵਿਞ੍ਞਾਪੇਤਿ, ਪਯੋਗੇ ਦੁਕ੍ਕਟਂ. ਪਟਿਲਾਭੇਨ ਨਿਸ੍ਸਗ੍ਗਿਯੋ ਹੋਤਿ. ਸਙ੍ਘਮਜ੍ਝੇ ਨਿਸ੍ਸਜ੍ਜਿਤਬ੍ਬੋ. ਸਬ੍ਬੇਹੇਵ ਅਧਿਟ੍ਠਿਤਪਤ੍ਤਂ ਗਹੇਤ੍ਵਾ ਸਨ੍ਨਿਪਤਿਤਬ੍ਬਂ. ਨ ਲਾਮਕੋ ਪਤ੍ਤੋ ਅਧਿਟ੍ਠਾਤਬ੍ਬੋ – ‘‘ਮਹਗ੍ਘਂ ਪਤ੍ਤਂ ਗਹੇਸ੍ਸਾਮੀ’’ਤਿ. ਸਚੇ ਲਾਮਕਂ ਪਤ੍ਤਂ ਅਧਿਟ੍ਠੇਤਿ – ‘‘ਮਹਗ੍ਘਂ ਪਤ੍ਤਂ ਗਹੇਸ੍ਸਾਮੀ’’ਤਿ, ਆਪਤ੍ਤਿ ਦੁਕ੍ਕਟਸ੍ਸ. ਏਵਞ੍ਚ ਪਨ, ਭਿਕ੍ਖਵੇ, ਨਿਸ੍ਸਜ੍ਜਿਤਬ੍ਬੋ. ਤੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਯਂ ਮੇ, ਭਨ੍ਤੇ, ਪਤ੍ਤੋ ਊਨਪਞ੍ਚਬਨ੍ਧਨੇਨ ਪਤ੍ਤੇਨ ਚੇਤਾਪਿਤੋ ਨਿਸ੍ਸਗ੍ਗਿਯੋ. ਇਮਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀ’’ਤਿ. ਨਿਸ੍ਸਜ੍ਜਿਤ੍ਵਾ ਆਪਤ੍ਤਿ ਦੇਸੇਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਆਪਤ੍ਤਿ ਪਟਿਗ੍ਗਹੇਤਬ੍ਬਾ. ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ ਪਤ੍ਤਗ੍ਗਾਹਾਪਕੋ ਸਮ੍ਮਨ੍ਨਿਤਬ੍ਬੋ – ਯੋ ਨ ਛਨ੍ਦਾਗਤਿਂ ਗਚ੍ਛੇਯ੍ਯ, ਨ ਦੋਸਾਗਤਿਂ ਗਚ੍ਛੇਯ੍ਯ, ਨ ਮੋਹਾਗਤਿਂ ਗਚ੍ਛੇਯ੍ਯ, ਨ ਭਯਾਗਤਿਂ ਗਚ੍ਛੇਯ੍ਯ, ਗਾਹਿਤਾਗਾਹਿਤਞ੍ਚ ਜਾਨੇਯ੍ਯ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬੋ. ਪਠਮਂ ਭਿਕ੍ਖੁ ਯਾਚਿਤਬ੍ਬੋ. ਯਾਚਿਤ੍ਵਾ ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੬੧੪. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਪਤ੍ਤਗ੍ਗਾਹਾਪਕਂ ਸਮ੍ਮਨ੍ਨੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਸਙ੍ਘੋ ਇਤ੍ਥਨ੍ਨਾਮਂ ਭਿਕ੍ਖੁਂ ਪਤ੍ਤਗ੍ਗਾਹਾਪਕਂ ਸਮ੍ਮਨ੍ਨਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਪਤ੍ਤਗ੍ਗਾਹਾਪਕਸ੍ਸ ਸਮ੍ਮੁਤਿ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮ੍ਮਤੋ ਸਙ੍ਘੇਨ ਇਤ੍ਥਨ੍ਨਾਮੋ ਭਿਕ੍ਖੁ ਪਤ੍ਤਗ੍ਗਾਹਾਪਕੋ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੬੧੫. ਤੇਨ ਸਮ੍ਮਤੇਨ ਭਿਕ੍ਖੁਨਾ ਪਤ੍ਤੋ ਗਾਹੇਤਬ੍ਬੋ. ਥੇਰੋ ਵਤ੍ਤਬ੍ਬੋ – ‘‘ਗਣ੍ਹਾਤੁ, ਭਨ੍ਤੇ, ਥੇਰੋ ਪਤ੍ਤ’’ਨ੍ਤਿ. ਸਚੇ ਥੇਰੋ ਗਣ੍ਹਾਤਿ, ਥੇਰਸ੍ਸ ਪਤ੍ਤੋ ਦੁਤਿਯਸ੍ਸ ਗਾਹੇਤਬ੍ਬੋ. ਨ ਚ ਤਸ੍ਸ ਅਨੁਦ੍ਦਯਤਾਯ ਨ ਗਹੇਤਬ੍ਬੋ. ਯੋ ਨ ਗਣ੍ਹੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ. ਅਪਤ੍ਤਕਸ੍ਸ ਨ ਗਾਹੇਤਬ੍ਬੋ. ਏਤੇਨੇਵ ਉਪਾਯੇਨ ਯਾਵ ਸਙ੍ਘਨਵਕਾ ਗਾਹੇਤਬ੍ਬਾ. ਯੋ ਚ ਤਸ੍ਸਾ ਭਿਕ੍ਖੁਪਰਿਸਾਯ ਪਤ੍ਤਪਰਿਯਨ੍ਤੋ, ਸੋ ਤਸ੍ਸ ਭਿਕ੍ਖੁਨੋ ਪਦਾਤਬ੍ਬੋ – ‘‘ਅਯਂ ਤੇ, ਭਿਕ੍ਖੁ, ਪਤ੍ਤੋ ਯਾਵ ਭੇਦਨਾਯ ਧਾਰੇਤਬ੍ਬੋ’’ਤਿ.

ਤੇਨ ਭਿਕ੍ਖੁਨਾ ਸੋ ਪਤ੍ਤੋ ਨ ਅਦੇਸੇ ਨਿਕ੍ਖਿਪਿਤਬ੍ਬੋ, ਨ ਅਭੋਗੇਨ ਭੁਞ੍ਜਿਤਬ੍ਬੋ, ਨ ਵਿਸ੍ਸਜ੍ਜੇਤਬ੍ਬੋ – ‘‘ਕਥਾਯਂ ਪਤ੍ਤੋ ਨਸ੍ਸੇਯ੍ਯ ਵਾ ਵਿਨਸ੍ਸੇਯ੍ਯ ਵਾ ਭਿਜ੍ਜੇਯ੍ਯ ਵਾ’’ਤਿ? ਸਚੇ ਅਦੇਸੇ ਵਾ ਨਿਕ੍ਖਿਪਤਿ ਅਭੋਗੇਨ ਵਾ ਭੁਞ੍ਜਤਿ ਵਿਸ੍ਸਜ੍ਜੇਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ.

ਅਯਂ ਤਤ੍ਥ ਸਾਮੀਚੀਤਿ ਅਯਂ ਤਤ੍ਥ ਅਨੁਧਮ੍ਮਤਾ.

੬੧੬. ਅਬਨ੍ਧਨੇਨ ਪਤ੍ਤੇਨ ਅਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਬਨ੍ਧਨੇਨ ਪਤ੍ਤੇਨ ਏਕਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਬਨ੍ਧਨੇਨ ਪਤ੍ਤੇਨ ਦ੍ਵਿਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਬਨ੍ਧਨੇਨ ਪਤ੍ਤੇਨ ਤਿਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਬਨ੍ਧਨੇਨ ਪਤ੍ਤੇਨ ਚਤੁਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਏਕਬਨ੍ਧਨੇਨ ਪਤ੍ਤੇਨ ਅਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਏਕਬਨ੍ਧਨੇਨ ਪਤ੍ਤੇਨ ਏਕਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਏਕਬਨ੍ਧਨੇਨ ਪਤ੍ਤੇਨ ਦ੍ਵਿਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਏਕਬਨ੍ਧਨੇਨ ਪਤ੍ਤੇਨ ਤਿਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਏਕਬਨ੍ਧਨੇਨ ਪਤ੍ਤੇਨ ਚਤੁਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਦ੍ਵਿਬਨ੍ਧਨੇਨ ਪਤ੍ਤੇਨ ਅਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਦ੍ਵਿਬਨ੍ਧਨੇਨ ਪਤ੍ਤੇਨ ਏਕਬਨ੍ਧਨਂ ਪਤ੍ਤਂ…ਪੇ… ਦ੍ਵਿਬਨ੍ਧਨਂ ਪਤ੍ਤਂ… ਤਿਬਨ੍ਧਨਂ ਪਤ੍ਤਂ… ਚਤੁਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਤਿਬਨ੍ਧਨੇਨ ਪਤ੍ਤੇਨ ਅਬਨ੍ਧਨਂ ਪਤ੍ਤਂ…ਪੇ… ਏਕਬਨ੍ਧਨਂ ਪਤ੍ਤਂ…ਪੇ… ਦ੍ਵਿਬਨ੍ਧਨਂ ਪਤ੍ਤਂ… ਤਿਬਨ੍ਧਨਂ ਪਤ੍ਤਂ… ਚਤੁਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਚਤੁਬਨ੍ਧਨੇਨ ਪਤ੍ਤੇਨ ਅਬਨ੍ਧਨਂ ਪਤ੍ਤਂ…ਪੇ… ਏਕਬਨ੍ਧਨਂ ਪਤ੍ਤਂ… ਦ੍ਵਿਬਨ੍ਧਨਂ ਪਤ੍ਤਂ… ਤਿਬਨ੍ਧਨਂ ਪਤ੍ਤਂ… ਚਤੁਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਅਬਨ੍ਧਨੇਨ ਪਤ੍ਤੇਨ ਅਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਬਨ੍ਧਨੇਨ ਪਤ੍ਤੇਨ ਏਕਬਨ੍ਧਨੋਕਾਸਂ ਪਤ੍ਤਂ…ਪੇ… ਦ੍ਵਿਬਨ੍ਧਨੋਕਾਸਂ ਪਤ੍ਤਂ … ਤਿਬਨ੍ਧਨੋਕਾਸਂ ਪਤ੍ਤਂ… ਚਤੁਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਏਕਬਨ੍ਧਨੇਨ ਪਤ੍ਤੇਨ ਅਬਨ੍ਧਨੋਕਾਸਂ ਪਤ੍ਤਂ…ਪੇ… ਏਕਬਨ੍ਧਨੋਕਾਸਂ ਪਤ੍ਤਂ… ਦ੍ਵਿਬਨ੍ਧਨੋਕਾਸਂ ਪਤ੍ਤਂ… ਤਿਬਨ੍ਧਨੋਕਾਸਂ ਪਤ੍ਤਂ… ਚਤੁਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਦ੍ਵਿਬਨ੍ਧਨੇਨ ਪਤ੍ਤੇਨ ਅਬਨ੍ਧਨੋਕਾਸਂ ਪਤ੍ਤਂ…ਪੇ… ਚਤੁਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਤਿਬਨ੍ਧਨੇਨ ਪਤ੍ਤੇਨ ਅਬਨ੍ਧਨੋਕਾਸਂ ਪਤ੍ਤਂ…ਪੇ… ਚਤੁਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਚਤੁਬਨ੍ਧਨੇਨ ਪਤ੍ਤੇਨ ਅਬਨ੍ਧਨੋਕਾਸਂ ਪਤ੍ਤਂ…ਪੇ… ਏਕਬਨ੍ਧਨੋਕਾਸਂ ਪਤ੍ਤਂ… ਦ੍ਵਿਬਨ੍ਧਨੋਕਾਸਂ ਪਤ੍ਤਂ… ਤਿਬਨ੍ਧਨੋਕਾਸਂ ਪਤ੍ਤਂ… ਚਤੁਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਅਬਨ੍ਧਨੋਕਾਸੇਨ ਪਤ੍ਤੇਨ ਅਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਬਨ੍ਧਨੋਕਾਸੇਨ ਪਤ੍ਤੇਨ ਏਕਬਨ੍ਧਨਂ ਪਤ੍ਤਂ…ਪੇ… ਦ੍ਵਿਬਨ੍ਧਨਂ ਪਤ੍ਤਂ… ਤਿਬਨ੍ਧਨਂ ਪਤ੍ਤਂ… ਚਤੁਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਚਤੁਬਨ੍ਧਨੋਕਾਸੇਨ ਪਤ੍ਤੇਨ ਅਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਚਤੁਬਨ੍ਧਨੋਕਾਸੇਨ ਪਤ੍ਤੇਨ ਏਕਬਨ੍ਧਨਂ ਪਤ੍ਤਂ…ਪੇ… ਦ੍ਵਿਬਨ੍ਧਨਂ ਪਤ੍ਤਂ… ਤਿਬਨ੍ਧਨਂ ਪਤ੍ਤਂ… ਚਤੁਬਨ੍ਧਨਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਅਬਨ੍ਧਨੋਕਾਸੇਨ ਪਤ੍ਤੇਨ ਅਬਨ੍ਧਨੋਕਾਸਂ ਪਤ੍ਤਂ…ਪੇ… ਏਕਬਨ੍ਧਨੋਕਾਸਂ ਪਤ੍ਤਂ… ਦ੍ਵਿਬਨ੍ਧਨੋਕਾਸਂ ਪਤ੍ਤਂ… ਤਿਬਨ੍ਧਨੋਕਾਸਂ ਪਤ੍ਤਂ… ਚਤੁਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਚਤੁਬਨ੍ਧਨੋਕਾਸੇਨ ਪਤ੍ਤੇਨ ਅਬਨ੍ਧਨੋਕਾਸਂ ਪਤ੍ਤਂ…ਪੇ… ਏਕਬਨ੍ਧਨੋਕਾਸਂ ਪਤ੍ਤਂ… ਦ੍ਵਿਬਨ੍ਧਨੋਕਾਸਂ ਪਤ੍ਤਂ… ਤਿਬਨ੍ਧਨੋਕਾਸਂ ਪਤ੍ਤਂ… ਚਤੁਬਨ੍ਧਨੋਕਾਸਂ ਪਤ੍ਤਂ ਚੇਤਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

੬੧੭. ਅਨਾਪਤ੍ਤਿ ਨਟ੍ਠਪਤ੍ਤਸ੍ਸ, ਭਿਨ੍ਨਪਤ੍ਤਸ੍ਸ, ਞਾਤਕਾਨਂ ਪਵਾਰਿਤਾਨਂ, ਅਞ੍ਞਸ੍ਸਤ੍ਥਾਯ, ਅਤ੍ਤਨੋ ਧਨੇਨ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਊਨਪਞ੍ਚਬਨ੍ਧਨਸਿਕ੍ਖਾਪਦਂ ਨਿਟ੍ਠਿਤਂ ਦੁਤਿਯਂ.