੩. ਭੇਸਜ੍ਜਸਿਕ੍ਖਾਪਦਂ

੬੧੮. [ਇਦਂ ਵਤ੍ਥੁ ਮਹਾਵ. ੨੭੦] ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਪਿਲਿਨ੍ਦਵਚ੍ਛੋ ਰਾਜਗਹੇ ਪਬ੍ਭਾਰਂ ਸੋਧਾਪੇਤਿ ਲੇਣਂ ਕਤ੍ਤੁਕਾਮੋ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਯੇਨਾਯਸ੍ਮਾ ਪਿਲਿਨ੍ਦਵਚ੍ਛੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਪਿਲਿਨ੍ਦਵਚ੍ਛਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਯਸ੍ਮਨ੍ਤਂ ਪਿਲਿਨ੍ਦਵਚ੍ਛਂ ਏਤਦਵੋਚ – ‘‘ਕਿਂ, ਭਨ੍ਤੇ, ਥੇਰੋ ਕਾਰਾਪੇਤੀ’’ਤਿ? ‘‘ਪਬ੍ਭਾਰਂ ਮਹਾਰਾਜ, ਸੋਧਾਪੇਮਿ ਲੇਣਂ ਕਤ੍ਤੁਕਾਮੋ’’ਤਿ. ‘‘ਅਤ੍ਥੋ, ਭਨ੍ਤੇ, ਅਯ੍ਯਸ੍ਸ ਆਰਾਮਿਕੇਨਾ’’ਤਿ? ‘‘ਨ ਖੋ, ਮਹਾਰਾਜ, ਭਗਵਤਾ ਆਰਾਮਿਕੋ ਅਨੁਞ੍ਞਾਤੋ’’ਤਿ. ‘‘ਤੇਨ ਹਿ, ਭਨ੍ਤੇ, ਭਗਵਨ੍ਤਂ ਪਟਿਪੁਚ੍ਛਿਤ੍ਵਾ ਮਮ ਆਰੋਚੇਯ੍ਯਾਥਾ’’ਤਿ. ‘‘ਏਵਂ ਮਹਾਰਾਜਾ’’ਤਿ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਚ੍ਚਸ੍ਸੋਸਿ. ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਯਸ੍ਮਤਾ ਪਿਲਿਨ੍ਦਵਚ੍ਛੇਨ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤੋ ਸਮਾਦਪਿਤੋ ਸਮੁਤ੍ਤੇਜਿਤੋ ਸਮ੍ਪਹਂਸਿਤੋ ਉਟ੍ਠਾਯਾਸਨਾ ਆਯਸ੍ਮਨ੍ਤਂ ਪਿਲਿਨ੍ਦਵਚ੍ਛਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ.

੬੧੯. ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਭਗਵਤੋ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਰਾਜਾ, ਭਨ੍ਤੇ, ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਰਾਮਿਕਂ ਦਾਤੁਕਾਮੋ. ਕਥਂ ਨੁ ਖੋ, ਭਨ੍ਤੇ, ਮਯਾ ਪਟਿਪਜ੍ਜਿਤਬ੍ਬ’’ਨ੍ਤਿ? ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਅਨੁਜਾਨਾਮਿ, ਭਿਕ੍ਖਵੇ, ਆਰਾਮਿਕ’’ਨ੍ਤਿ. ਦੁਤਿਯਮ੍ਪਿ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਯੇਨਾਯਸ੍ਮਾ ਪਿਲਿਨ੍ਦਿਵਚ੍ਛੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਪਿਲਿਨ੍ਦਵਚ੍ਛਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਯਸ੍ਮਨ੍ਤਂ ਪਿਲਿਨ੍ਦਵਚ੍ਛਂ ਏਤਦਵੋਚ – ‘‘ਅਨੁਞ੍ਞਾਤੋ, ਭਨ੍ਤੇ, ਭਗਵਤਾ ਆਰਾਮਿਕੋ’’ਤਿ? ‘‘ਏਵਂ, ਮਹਾਰਾਜਾ’’ਤਿ. ‘‘ਤੇਨ ਹਿ, ਭਨ੍ਤੇ, ਅਯ੍ਯਸ੍ਸ ਆਰਾਮਿਕਂ ਦਮ੍ਮੀ’’ਤਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਆਯਸ੍ਮਤੋ ਪਿਲਿਨ੍ਦਵਚ੍ਛਸ੍ਸ ਆਰਾਮਿਕਂ ਪਟਿਸ੍ਸੁਣਿਤ੍ਵਾ ਵਿਸ੍ਸਰਿਤ੍ਵਾ ਚਿਰੇਨ ਸਤਿਂ ਪਟਿਲਭਿਤ੍ਵਾ ਅਞ੍ਞਤਰਂ ਸਬ੍ਬਤ੍ਥਕਂ ਮਹਾਮਤ੍ਤਂ ਆਮਨ੍ਤੇਸਿ – ‘‘ਯੋ ਮਯਾ, ਭਣੇ, ਅਯ੍ਯਸ੍ਸ ਆਰਾਮਿਕੋ ਪਟਿਸ੍ਸੁਤੋ, ਦਿਨ੍ਨੋ ਸੋ ਆਰਾਮਿਕੋ’’ਤਿ? ‘‘ਨ ਖੋ, ਦੇਵ, ਅਯ੍ਯਸ੍ਸ ਆਰਾਮਿਕੋ ਦਿਨ੍ਨੋ’’ਤਿ. ‘‘ਕੀਵਚਿਰਂ ਨੁ ਖੋ, ਭਣੇ, ਇਤੋ ਹਿ ਤਂ ਹੋਤੀ’’ਤਿ? ਅਥ ਖੋ ਸੋ ਮਹਾਮਤ੍ਤੋ ਰਤ੍ਤਿਯੋ ਗਣੇਤ੍ਵਾ [ਵਿਗਣੇਤ੍ਵਾ (ਕ.)] ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਏਤਦਵੋਚ – ‘‘ਪਞ੍ਚ, ਦੇਵ, ਰਤ੍ਤਿਸਤਾਨੀ’’ਤਿ. ‘‘ਤੇਨ ਹਿ, ਭਣੇ, ਅਯ੍ਯਸ੍ਸ ਪਞ੍ਚ ਆਰਾਮਿਕਸਤਾਨਿ ਦੇਹੀ’’ਤਿ. ‘‘ਏਵਂ, ਦੇਵਾ’’ਤਿ ਖੋ ਸੋ ਮਹਾਮਤ੍ਤੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਟਿਸ੍ਸੁਣਿਤ੍ਵਾ ਆਯਸ੍ਮਤੋ ਪਿਲਿਨ੍ਦਵਚ੍ਛਸ੍ਸ ਪਞ੍ਚ ਆਰਾਮਿਕਸਤਾਨਿ ਪਾਦਾਸਿ [ਅਦਾਸਿ (ਸ੍ਯਾ.)], ਪਾਟਿਯੇਕ੍ਕੋ ਗਾਮੋ ਨਿਵਿਸਿ. ਆਰਾਮਿਕਗਾਮਕੋਤਿਪਿ ਨਂ ਆਹਂਸੁ, ਪਿਲਿਨ੍ਦਗਾਮਕੋਤਿਪਿ ਨਂ ਆਹਂਸੁ.

੬੨੦. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਪਿਲਿਨ੍ਦਵਚ੍ਛੋ ਤਸ੍ਮਿਂ ਗਾਮਕੇ ਕੁਲੂਪਕੋ ਹੋਤਿ. ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਂ ਆਦਾਯ ਪਿਲਿਨ੍ਦਗਾਮਕਂ ਪਿਣ੍ਡਾਯ ਪਾਵਿਸਿ. ਤੇਨ ਖੋ ਪਨ ਸਮਯੇਨ ਤਸ੍ਮਿਂ ਗਾਮਕੇ ਉਸ੍ਸਵੋ ਹੋਤਿ. ਦਾਰਕਾ ਅਲਙ੍ਕਤਾ ਮਾਲਾਕਿਤਾ ਕੀਲ਼ਨ੍ਤਿ. ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਪਿਲਿਨ੍ਦਗਾਮਕੇ ਸਪਦਾਨਂ ਪਿਣ੍ਡਾਯ ਚਰਮਾਨੋ ਯੇਨ ਅਞ੍ਞਤਰਸ੍ਸ ਆਰਾਮਿਕਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਤੇਨ ਖੋ ਪਨ ਸਮਯੇਨ ਤਸ੍ਸਾ ਆਰਾਮਿਕਿਨਿਯਾ ਧੀਤਾ ਅਞ੍ਞੇ ਦਾਰਕੇ ਅਲਙ੍ਕਤੇ ਮਾਲਾਕਿਤੇ ਪਸ੍ਸਿਤ੍ਵਾ ਰੋਦਤਿ – ‘‘ਮਾਲਂ ਮੇ ਦੇਥ, ਅਲਙ੍ਕਾਰਂ ਮੇ ਦੇਥਾ’’ਤਿ. ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਤਂ ਆਰਾਮਿਕਿਨਿਂ ਏਤਦਵੋਚ – ‘‘ਕਿਸ੍ਸਾਯਂ ਦਾਰਿਕਾ ਰੋਦਤੀ’’ਤਿ? ‘‘ਅਯਂ, ਭਨ੍ਤੇ, ਦਾਰਿਕਾ ਅਞ੍ਞੇ ਦਾਰਕੇ ਅਲਙ੍ਕਤੇ ਮਾਲਾਕਿਤੇ ਪਸ੍ਸਿਤ੍ਵਾ ਰੋਦਤਿ – ‘ਮਾਲਂ ਮੇ ਦੇਥ, ਅਲਙ੍ਕਾਰਂ ਮੇ ਦੇਥਾ’ਤਿ. ਕੁਤੋ ਅਮ੍ਹਾਕਂ ਦੁਗ੍ਗਤਾਨਂ ਮਾਲਾ ਕੁਤੋ, ਅਲਙ੍ਕਾਰੋ’’ਤਿ? ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਅਞ੍ਞਤਰਂ ਤਿਣਣ੍ਡੁਪਕਂ ਗਹੇਤ੍ਵਾ ਤਂ ਆਰਾਮਿਕਿਨਿਂ ਏਤਦਵੋਚ – ‘‘ਹਨ੍ਦਿਮਂ ਤਿਣਣ੍ਡੁਪਕਂ ਤਸ੍ਸਾ ਦਾਰਿਕਾਯ ਸੀਸੇ ਪਟਿਮੁਞ੍ਚਾ’’ਤਿ. ਅਥ ਖੋ ਸਾ ਆਰਾਮਿਕਿਨੀ ਤਂ ਤਿਣਣ੍ਡੁਪਕਂ ਗਹੇਤ੍ਵਾ ਤਸ੍ਸਾ ਦਾਰਿਕਾਯ ਸੀਸੇ ਪਟਿਮੁਞ੍ਚਿ. ਸਾ ਅਹੋਸਿ ਸੁਵਣ੍ਣਮਾਲਾ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ. ਨਤ੍ਥਿ ਤਾਦਿਸਾ ਰਞ੍ਞੋਪਿ ਅਨ੍ਤੇਪੁਰੇ ਸੁਵਣ੍ਣਮਾਲਾ. ਮਨੁਸ੍ਸਾ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਆਰੋਚੇਸੁਂ – ‘‘ਅਮੁਕਸ੍ਸ, ਦੇਵ, ਆਰਾਮਿਕਸ੍ਸ ਘਰੇ ਸੁਵਣ੍ਣਮਾਲਾ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ. ਨਤ੍ਥਿ ਤਾਦਿਸਾ ਦੇਵਸ੍ਸਾਪਿ ਅਨ੍ਤੇਪੁਰੇ ਸੁਵਣ੍ਣਮਾਲਾ. ਕੁਤੋ ਤਸ੍ਸ ਦੁਗ੍ਗਤਸ੍ਸ! ਨਿਸ੍ਸਂਸਯਂ ਚੋਰਿਕਾਯ ਆਭਤਾ’’ਤਿ!! ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਤਂ ਆਰਾਮਿਕਕੁਲਂ ਬਨ੍ਧਾਪੇਸਿ. ਦੁਤਿਯਮ੍ਪਿ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਂ ਆਦਾਯ ਪਿਲਿਨ੍ਦਗਾਮਕਂ ਪਿਣ੍ਡਾਯ ਪਾਵਿਸਿ. ਪਿਲਿਨ੍ਦਗਾਮਕੇ ਸਪਦਾਨਂ ਪਿਣ੍ਡਾਯ ਚਰਮਾਨੋ ਯੇਨ ਤਸ੍ਸ ਆਰਾਮਿਕਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਟਿਵਿਸ੍ਸਕੇ ਪੁਚ੍ਛਿ – ‘‘ਕਹਂ ਇਮਂ ਆਰਾਮਿਕਕੁਲਂ ਗਤ’’ਨ੍ਤਿ? ‘‘ਏਤਿਸ੍ਸਾ, ਭਨ੍ਤੇ, ਸੁਵਣ੍ਣਮਾਲਾਯ ਕਾਰਣਾ ਰਞ੍ਞਾ ਬਨ੍ਧਾਪਿਤ’’ਨ੍ਤਿ.

੬੨੧. ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਯੇਨ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਨਿਵੇਸਨਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ ਯੇਨਾਯਸ੍ਮਾ ਪਿਲਿਨ੍ਦਵਚ੍ਛੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਪਿਲਿਨ੍ਦਵਚ੍ਛਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਰਾਜਾਨਂ ਮਾਗਧਂ ਸੇਨਿਯਂ ਬਿਮ੍ਬਿਸਾਰਂ ਆਯਸ੍ਮਾ ਪਿਲਿਨ੍ਦਵਚ੍ਛੋ ਏਤਦਵੋਚ – ‘‘ਕਿਸ੍ਸ, ਮਹਾਰਾਜ, ਆਰਾਮਿਕਕੁਲਂ ਬਨ੍ਧਾਪਿਤ’’ਨ੍ਤਿ? ‘‘ਤਸ੍ਸ, ਭਨ੍ਤੇ, ਆਰਾਮਿਕਸ੍ਸ ਘਰੇ ਸੁਵਣ੍ਣਮਾਲਾ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ. ਨਤ੍ਥਿ ਤਾਦਿਸਾ ਅਮ੍ਹਾਕਮ੍ਪਿ ਅਨ੍ਤੇਪੁਰੇ ਸੁਵਣ੍ਣਮਾਲਾ. ਕੁਤੋ ਤਸ੍ਸ ਦੁਗ੍ਗਤਸ੍ਸ! ਨਿਸ੍ਸਂਸਯਂ ਚੋਰਿਕਾਯ ਆਭਤਾ’’ਤਿ!! ਅਥ ਖੋ ਆਯਸ੍ਮਾ ਪਿਲਿਨ੍ਦਵਚ੍ਛੋ ਰਞ੍ਞੋ ਮਾਗਧਸ੍ਸ ਸੇਨਿਯਸ੍ਸ ਬਿਮ੍ਬਿਸਾਰਸ੍ਸ ਪਾਸਾਦਂ ਸੁਵਣ੍ਣਨ੍ਤਿ ਅਧਿਮੁਚ੍ਚਿ. ਸੋ ਅਹੋਸਿ ਸਬ੍ਬਸੋਵਣ੍ਣਮਯੋ. ‘‘ਇਦਂ ਪਨ ਤੇ, ਮਹਾਰਾਜ, ਤਾਵ ਬਹੁਂ ਸੁਵਣ੍ਣਂ ਕੁਤੋ’’ਤਿ? ‘‘ਅਞ੍ਞਾਤਂ, ਭਨ੍ਤੇ, ਅਯ੍ਯਸ੍ਸੇਵੇਸੋ ਇਦ੍ਧਾਨੁਭਾਵੋ’’ਤਿ. ਤਂ ਆਰਾਮਿਕਕੁਲਂ ਮੁਞ੍ਚਾਪੇਸਿ. ਮਨੁਸ੍ਸਾ – ‘‘ਅਯ੍ਯੇਨ ਕਿਰ ਪਿਲਿਨ੍ਦਵਚ੍ਛੇਨ ਸਰਾਜਿਕਾਯ ਪਰਿਸਾਯ ਉਤ੍ਤਰਿਮਨੁਸ੍ਸਧਮ੍ਮਂ ਇਦ੍ਧਿਪਾਟਿਹਾਰਿਯਂ ਦਸ੍ਸਿਤ’’ਨ੍ਤਿ, ਅਤ੍ਤਮਨਾ ਅਭਿਪ੍ਪਸਨ੍ਨਾ ਆਯਸ੍ਮਤੋ ਪਿਲਿਨ੍ਦਵਚ੍ਛਸ੍ਸ ਪਞ੍ਚ ਭੇਸਜ੍ਜਾਨਿ ਅਭਿਹਰਿਂਸੁ, ਸੇਯ੍ਯਥਿਦਂ – ਸਪ੍ਪਿ ਨਵਨੀਤਂ ਤੇਲਂ ਮਧੁ ਫਾਣਿਤਂ. ਪਕਤਿਯਾਪਿ ਚ ਆਯਸ੍ਮਾ ਪਿਲਿਨ੍ਦਵਚ੍ਛੋ ਲਾਭੀ ਹੋਤਿ ਪਞ੍ਚਨ੍ਨਂ ਭੇਸਜ੍ਜਾਨਂ. ਲਦ੍ਧਂ ਲਦ੍ਧਂ ਪਰਿਸਾਯ ਵਿਸ੍ਸਜ੍ਜੇਤਿ. ਪਰਿਸਾ ਚਸ੍ਸ ਹੋਤਿ ਬਾਹੁਲ੍ਲਿਕਾ. ਲਦ੍ਧਂ ਲਦ੍ਧਂ ਕੋਲਮ੍ਬੇਪਿ ਘਟੇਪਿ ਪੂਰੇਤ੍ਵਾ ਪਟਿਸਾਮੇਤਿ, ਪਰਿਸ੍ਸਾਵਨਾਨਿਪਿ ਥਵਿਕਾਯੋਪਿ ਪੂਰੇਤ੍ਵਾ ਵਾਤਪਾਨੇਸੁ ਲਗ੍ਗੇਤਿ. ਤਾਨਿ ਓਲੀਨਵਿਲੀਨਾਨਿ ਤਿਟ੍ਠਨ੍ਤਿ. ਉਨ੍ਦੂਰੇਹਿਪਿ ਵਿਹਾਰਾ ਓਕਿਣ੍ਣਵਿਕਿਣ੍ਣਾ ਹੋਨ੍ਤਿ. ਮਨੁਸ੍ਸਾ ਵਿਹਾਰਚਾਰਿਕਂ ਆਹਿਣ੍ਡਨ੍ਤਾ ਪਸ੍ਸਿਤ੍ਵਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਅਨ੍ਤੋਕੋਟ੍ਠਾਗਾਰਿਕਾ ਇਮੇ ਸਮਣਾ ਸਕ੍ਯਪੁਤ੍ਤਿਯਾ, ਸੇਯ੍ਯਥਾਪਿ ਰਾਜਾ ਮਾਗਧੋ ਸੇਨਿਯੋ ਬਿਮ੍ਬਿਸਾਰੋ’’ਤਿ! ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੂ ਏਵਰੂਪਾਯ ਬਾਹੁਲ੍ਲਾਯ ਚੇਤੇਸ੍ਸਨ੍ਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਤੇ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ, ਭਿਕ੍ਖਵੇ, ਭਿਕ੍ਖੂ ਏਵਰੂਪਾਯ ਬਾਹੁਲ੍ਲਾਯ ਚੇਤੇਨ੍ਤੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤੇ, ਭਿਕ੍ਖਵੇ, ਮੋਘਪੁਰਿਸਾ ਏਵਰੂਪਾਯ ਬਾਹੁਲ੍ਲਾਯ ਚੇਤੇਸ੍ਸਨ੍ਤਿ! ਨੇਤਂ, ਭਿਕ੍ਖਵੇ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੬੨੨. ‘‘ਯਾਨਿ ਖੋ ਪਨ ਤਾਨਿ ਗਿਲਾਨਾਨਂ ਭਿਕ੍ਖੂਨਂ ਪਟਿਸਾਯਨੀਯਾਨਿ ਭੇਸਜ੍ਜਾਨਿ, ਸੇਯ੍ਯਥਿਦਂ – ਸਪ੍ਪਿ ਨਵਨੀਤਂ ਤੇਲਂ ਮਧੁ ਫਾਣਿਤਂ, ਤਾਨਿ ਪਟਿਗ੍ਗਹੇਤ੍ਵਾ ਸਤ੍ਤਾਹਪਰਮਂ ਸਨ੍ਨਿਧਿਕਾਰਕਂ ਪਰਿਭੁਞ੍ਜਿਤਬ੍ਬਾਨਿ. ਤਂ ਅਤਿਕ੍ਕਾਮਯਤੋ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ.

੬੨੩. ਯਾਨਿ ਖੋ ਪਨ ਤਾਨਿ ਗਿਲਾਨਾਨਂ ਭਿਕ੍ਖੂਨਂ ਪਟਿਸਾਯਨੀਯਾਨਿ ਭੇਸ੍ਸਜ੍ਜਾਨੀਤਿ ਸਪ੍ਪਿ ਨਾਮ ਗੋਸਪ੍ਪਿ ਵਾ ਅਜਿਕਾਸਪ੍ਪਿ ਵਾ ਮਹਿਂਸਸਪ੍ਪਿ [ਮਹਿਸਸਪ੍ਪਿ (ਸੀ. ਸ੍ਯਾ.)] ਵਾ ਯੇਸਂ ਮਂਸਂ ਕਪ੍ਪਤਿ ਤੇਸਂ ਸਪ੍ਪਿ. ਨਵਨੀਤਂ ਨਾਮ ਤੇਸਂ ਯੇਵ ਨਵਨੀਤਂ. ਤੇਲਂ ਨਾਮ ਤਿਲਤੇਲਂ ਸਾਸਪਤੇਲਂ ਮਧੁਕਤੇਲਂ ਏਰਣ੍ਡਤੇਲਂ ਵਸਾਤੇਲਂ. ਮਧੁ ਨਾਮ ਮਕ੍ਖਿਕਾਮਧੁ. ਫਾਣਿਤਂ ਨਾਮ ਉਚ੍ਛੁਮ੍ਹਾ ਨਿਬ੍ਬਤ੍ਤਂ.

ਤਾਨਿ ਪਟਿਗ੍ਗਹੇਤ੍ਵਾ ਸਤ੍ਤਾਹਪਰਮਂ ਸਨ੍ਨਿਧਿਕਾਰਕਂ ਪਰਿਭੁਞ੍ਜਿਤਬ੍ਬਾਨੀਤਿ ਸਤ੍ਤਾਹਪਰਮਤਾ ਪਰਿਭੁਞ੍ਜਿਤਬ੍ਬਾਨਿ.

ਤਂ ਅਤਿਕ੍ਕਾਮਯਤੋ ਨਿਸ੍ਸਗ੍ਗਿਯਂ ਹੋਤੀਤਿ ਅਟ੍ਠਮੇ ਅਰੁਣੁਗ੍ਗਮਨੇ ਨਿਸ੍ਸਗ੍ਗਿਯਂ ਹੋਤਿ. ਨਿਸ੍ਸਜ੍ਜਿਤਬ੍ਬਂ ਸਙ੍ਘਸ੍ਸ ਵਾ ਗਣਸ੍ਸ ਵਾ ਪੁਗ੍ਗਲਸ੍ਸ ਵਾ. ਏਵਞ੍ਚ ਪਨ, ਭਿਕ੍ਖਵੇ, ਨਿਸ੍ਸਜ੍ਜਿਤਬ੍ਬਂ…ਪੇ… ਇਦਂ ਮੇ, ਭਨ੍ਤੇ, ਭੇਸਜ੍ਜਂ ਸਤ੍ਤਾਹਾਤਿਕ੍ਕਨ੍ਤਂ ਨਿਸ੍ਸਗ੍ਗਿਯਂ, ਇਮਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀਤਿ…ਪੇ… ਦਦੇਯ੍ਯਾਤਿ…ਪੇ… ਦਦੇਯ੍ਯੁਨ੍ਤਿ…ਪੇ… ਆਯਸ੍ਮਤੋ ਦਮ੍ਮੀਤਿ.

੬੨੪. ਸਤ੍ਤਾਹਾਤਿਕ੍ਕਨ੍ਤੇ ਅਤਿਕ੍ਕਨ੍ਤਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਸਤ੍ਤਾਹਾਤਿਕ੍ਕਨ੍ਤੇ ਵੇਮਤਿਕੋ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਸਤ੍ਤਾਹਾਤਿਕ੍ਕਨ੍ਤੇ ਅਨਤਿਕ੍ਕਨ੍ਤਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਨਧਿਟ੍ਠਿਤੇ ਅਧਿਟ੍ਠਿਤਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਵਿਸ੍ਸਜ੍ਜਿਤੇ ਵਿਸ੍ਸਜ੍ਜਿਤਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਨਟ੍ਠੇ ਨਟ੍ਠਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਵਿਨਟ੍ਠੇ ਵਿਨਟ੍ਠਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਦਡ੍ਢੇ ਦਡ੍ਢਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਵਿਲੁਤ੍ਤੇ ਵਿਲੁਤ੍ਤਸਞ੍ਞੀ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਨਿਸ੍ਸਟ੍ਠਂ ਪਟਿਲਭਿਤ੍ਵਾ ਨ ਕਾਯਿਕੇਨ ਪਰਿਭੋਗੇਨ ਪਰਿਭੁਞ੍ਜਿਤਬ੍ਬਂ, ਨ ਅਜ੍ਝੋਹਰਿਤਬ੍ਬਂ, ਪਦੀਪੇ ਵਾ ਕਾਲ਼ਵਣ੍ਣੇ ਵਾ ਉਪਨੇਤਬ੍ਬਂ, ਅਞ੍ਞੇਨ ਭਿਕ੍ਖੁਨਾ ਕਾਯਿਕੇਨ ਪਰਿਭੋਗੇਨ ਪਰਿਭੁਞ੍ਜਿਤਬ੍ਬਂ, ਨ ਅਜ੍ਝੋਹਰਿਤਬ੍ਬਂ.

ਸਤ੍ਤਾਹਾਨਤਿਕ੍ਕਨ੍ਤੇ ਅਤਿਕ੍ਕਨ੍ਤਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਸਤ੍ਤਾਹਾਨਤਿਕ੍ਕਨ੍ਤੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਸਤ੍ਤਾਹਾਨਤਿਕ੍ਕਨ੍ਤੇ ਅਨਤਿਕ੍ਕਨ੍ਤਸਞ੍ਞੀ, ਅਨਾਪਤ੍ਤਿ.

੬੨੫. ਅਨਾਪਤ੍ਤਿ ਅਨ੍ਤੋਸਤ੍ਤਾਹਂ ਅਧਿਟ੍ਠੇਤਿ, ਵਿਸ੍ਸਜ੍ਜੇਤਿ, ਨਸ੍ਸਤਿ, ਵਿਨਸ੍ਸਤਿ, ਡਯ੍ਹਤਿ, ਅਚ੍ਛਿਨ੍ਦਿਤ੍ਵਾ ਗਣ੍ਹਨ੍ਤਿ, ਵਿਸ੍ਸਾਸਂ ਗਣ੍ਹਨ੍ਤਿ, ਅਨੁਪਸਮ੍ਪਨ੍ਨਸ੍ਸ ਚਤ੍ਤੇਨ ਵਨ੍ਤੇਨ ਮੁਤ੍ਤੇਨ ਅਨਪੇਕ੍ਖੋ ਦਤ੍ਵਾ ਪਟਿਲਭਿਤ੍ਵਾ ਪਰਿਭੁਞ੍ਜਤਿ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਭੇਸਜ੍ਜਸਿਕ੍ਖਾਪਦਂ ਨਿਟ੍ਠਿਤਂ ਤਤਿਯਂ.