੭. ਏਲ਼ਕਲੋਮਧੋਵਾਪਨਸਿਕ੍ਖਾਪਦਂ

੫੭੬. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਕ੍ਕੇਸੁ ਵਿਹਰਤਿ ਕਪਿਲਵਤ੍ਥੁਸ੍ਮਿਂ ਨਿਗ੍ਰੋਧਾਰਾਮੇ. ਤੇਨ ਖੋ ਪਨ ਸਮਯੇਨ ਛਬ੍ਬਗ੍ਗਿਯਾ ਭਿਕ੍ਖੂ ਭਿਕ੍ਖੁਨੀਹਿ ਏਲ਼ਕਲੋਮਾਨਿ ਧੋਵਾਪੇਨ੍ਤਿਪਿ ਰਜਾਪੇਨ੍ਤਿਪਿ ਵਿਜਟਾਪੇਨ੍ਤਿਪਿ. ਭਿਕ੍ਖੁਨਿਯੋ ਏਲ਼ਕਲੋਮਾਨਿ ਧੋਵਨ੍ਤਿਯੋ ਰਜਨ੍ਤਿਯੋ ਵਿਜਟੇਨ੍ਤਿਯੋ ਰਿਞ੍ਚਨ੍ਤਿ ਉਦ੍ਦੇਸਂ ਪਰਿਪੁਚ੍ਛਂ ਅਧਿਸੀਲਂ ਅਧਿਚਿਤ੍ਤਂ ਅਧਿਪਞ੍ਞਂ. ਅਥ ਖੋ ਮਹਾਪਜਾਪਤਿ ਗੋਤਮੀ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਂ ਖੋ ਮਹਾਪਜਾਪਤਿਂ ਗੋਤਮਿਂ ਭਗਵਾ ਏਤਦਵੋਚ – ‘‘ਕਚ੍ਚਿ, ਗੋਤਮਿ, ਭਿਕ੍ਖੁਨਿਯੋ ਅਪ੍ਪਮਤ੍ਤਾ ਆਤਾਪਿਨਿਯੋ ਪਹਿਤਤ੍ਤਾ ਵਿਹਰਨ੍ਤੀ’’ਤਿ? ‘‘ਕੁਤੋ, ਭਨ੍ਤੇ, ਭਿਕ੍ਖੁਨੀਨਂ ਅਪ੍ਪਮਾਦੋ! ਅਯ੍ਯਾ ਛਬ੍ਬਗ੍ਗਿਯਾ ਭਿਕ੍ਖੁਨੀਹਿ ਏਲ਼ਕਲੋਮਾਨਿ ਧੋਵਾਪੇਨ੍ਤਿਪਿ ਰਜਾਪੇਨ੍ਤਿਪਿ ਵਿਜਟਾਪੇਨ੍ਤਿਪਿ. ਭਿਕ੍ਖੁਨਿਯੋ ਏਲ਼ਕਲੋਮਾਨਿ ਧੋਵਨ੍ਤਿਯੋ ਰਜਨ੍ਤਿਯੋ ਵਿਜਟੇਨ੍ਤਿਯੋ ਰਿਞ੍ਚਨ੍ਤਿ ਉਦ੍ਦੇਸਂ ਪਰਿਪੁਚ੍ਛਂ ਅਧਿਸੀਲਂ ਅਧਿਚਿਤ੍ਤਂ ਅਧਿਪਞ੍ਞ’’ਨ੍ਤਿ.

ਅਥ ਖੋ ਭਗਵਾ ਮਹਾਪਜਾਪਤਿਂ ਗੋਤਮਿਂ ਧਮ੍ਮਿਯਾ ਕਥਾਯ ਸਨ੍ਦਸ੍ਸੇਸਿ ਸਮਾਦਪੇਸਿ ਸਮੁਤ੍ਤੇਜੇਸਿ ਸਮ੍ਪਹਂਸੇਸਿ. ਅਥ ਖੋ ਮਹਾਪਜਾਪਤਿ ਗੋਤਮੀ ਭਗਵਤਾ ਧਮ੍ਮਿਯਾ ਕਥਾਯ ਸਨ੍ਦਸ੍ਸਿਤਾ ਸਮਾਦਪਿਤਾ ਸਮੁਤ੍ਤੇਜਿਤਾ ਸਮ੍ਪਹਂਸਿਤਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਛਬ੍ਬਗ੍ਗਿਯੇ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਭਿਕ੍ਖੁਨੀਹਿ ਏਲ਼ਕਲੋਮਾਨਿ ਧੋਵਾਪੇਥਪਿ ਰਜਾਪੇਥਪਿ ਵਿਜਟਾਪੇਥਪੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ‘‘ਞਾਤਿਕਾਯੋ ਤੁਮ੍ਹਾਕਂ, ਭਿਕ੍ਖਵੇ, ਅਞ੍ਞਾਤਿਕਾਯੋ’’ਤਿ? ‘‘ਅਞ੍ਞਾਤਿਕਾਯੋ, ਭਗਵਾ’’ਤਿ. ‘‘ਅਞ੍ਞਾਤਕਾ, ਮੋਘਪੁਰਿਸਾ, ਅਞ੍ਞਾਤਿਕਾਨਂ ਨ ਜਾਨਨ੍ਤਿ ਪਤਿਰੂਪਂ ਵਾ ਅਪ੍ਪਤਿਰੂਪਂ ਵਾ ਪਾਸਾਦਿਕਂ ਵਾ ਅਪਾਸਾਦਿਕਂ. ਤਤ੍ਥ ਨਾਮ ਤੁਮ੍ਹੇ, ਮੋਘਪੁਰਿਸਾ, ਅਞ੍ਞਾਤਿਕਾਹਿ ਭਿਕ੍ਖੁਨੀਹਿ ਏਲ਼ਕਲੋਮਾਨਿ ਧੋਵਾਪੇਸ੍ਸਥਪਿ ਰਜਾਪੇਸ੍ਸਥਪਿ ਵਿਜਟਾਪੇਸ੍ਸਥਪਿ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੫੭੭. ‘‘ਯੋ ਪਨ ਭਿਕ੍ਖੁ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਏਲ਼ਕਲੋਮਾਨਿ ਧੋਵਾਪੇਯ੍ਯ ਵਾ ਰਜਾਪੇਯ੍ਯ ਵਾ ਵਿਜਟਾਪੇਯ੍ਯ ਵਾ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ.

੫੭੮. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਅਞ੍ਞਾਤਿਕਾ ਨਾਮ ਮਾਤਿਤੋ ਵਾ ਪਿਤਿਤੋ ਵਾ ਯਾਵ ਸਤ੍ਤਮਾ ਪਿਤਾਮਹਯੁਗਾ ਅਸਮ੍ਬਦ੍ਧਾ.

ਭਿਕ੍ਖੁਨੀ ਨਾਮ ਉਭਤੋਸਙ੍ਘੇ ਉਪਸਮ੍ਪਨ੍ਨਾ.

ਧੋਵਾਤਿ ਆਣਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਧੋਤਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ. ਰਜਾਤਿ ਆਣਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਰਤ੍ਤਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ. ਵਿਜਟੇਹੀਤਿ ਆਣਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਵਿਜਟਿਤਾਨਿ ਨਿਸ੍ਸਗ੍ਗਿਯਾਨਿ ਹੋਨ੍ਤਿ. ਨਿਸ੍ਸਜ੍ਜਿਤਬ੍ਬਾਨਿ ਸਙ੍ਘਸ੍ਸ ਵਾ ਗਣਸ੍ਸ ਵਾ ਪੁਗ੍ਗਲਸ੍ਸ ਵਾ. ਏਵਞ੍ਚ ਪਨ, ਭਿਕ੍ਖਵੇ, ਨਿਸ੍ਸਜ੍ਜਿਤਬ੍ਬਾਨਿ…ਪੇ… ਇਮਾਨਿ ਮੇ, ਭਨ੍ਤੇ, ਏਲ਼ਕਲੋਮਾਨਿ ਅਞ੍ਞਾਤਿਕਾਯ ਭਿਕ੍ਖੁਨਿਯਾ ਧੋਵਾਪਿਤਾਨਿ ਨਿਸ੍ਸਗ੍ਗਿਯਾਨਿ. ਇਮਾਨਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀਤਿ…ਪੇ… ਦਦੇਯ੍ਯਾਤਿ…ਪੇ… ਦਦੇਯ੍ਯੁਨ੍ਤਿ…ਪੇ… ਆਯਸ੍ਮਤੋ ਦਮ੍ਮੀਤਿ.

੫੭੯. ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀ ਏਲ਼ਕਲੋਮਾਨਿ ਧੋਵਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀ ਏਲ਼ਕਲੋਮਾਨਿ ਧੋਵਾਪੇਤਿ ਰਜਾਪੇਤਿ, ਨਿਸ੍ਸਗ੍ਗਿਯੇਨ ਆਪਤ੍ਤਿ ਦੁਕ੍ਕਟਸ੍ਸ. ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀ ਏਲ਼ਕਲੋਮਾਨਿ ਧੋਵਾਪੇਤਿ ਵਿਜਟਾਪੇਤਿ, ਨਿਸ੍ਸਗ੍ਗਿਯੇਨ ਆਪਤ੍ਤਿ ਦੁਕ੍ਕਟਸ੍ਸ. ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀ ਏਲ਼ਕਲੋਮਾਨਿ ਧੋਵਾਪੇਤਿ ਰਜਾਪੇਤਿ ਵਿਜਟਾਪੇਤਿ, ਨਿਸ੍ਸਗ੍ਗਿਯੇਨ ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ.

ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀ ਏਲ਼ਕਲੋਮਾਨਿ ਰਜਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀ ਏਲ਼ਕਲੋਮਾਨਿ ਰਜਾਪੇਤਿ ਵਿਜਟਾਪੇਤਿ, ਨਿਸ੍ਸਗ੍ਗਿਯੇਨ ਆਪਤ੍ਤਿ ਦੁਕ੍ਕਟਸ੍ਸ. ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀ ਏਲ਼ਕਲੋਮਾਨਿ ਰਜਾਪੇਤਿ ਧੋਵਾਪੇਤਿ, ਨਿਸ੍ਸਗ੍ਗਿਯੇਨ ਆਪਤ੍ਤਿ ਦੁਕ੍ਕਟਸ੍ਸ. ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀ ਏਲ਼ਕਲੋਮਾਨਿ ਰਜਾਪੇਤਿ ਵਿਜਟਾਪੇਤਿ ਧੋਵਾਪੇਤਿ, ਨਿਸ੍ਸਗ੍ਗਿਯੇਨ ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ.

ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀ ਏਲ਼ਕਲੋਮਾਨਿ ਵਿਜਟਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀ ਏਲ਼ਕਲੋਮਾਨਿ ਵਿਜਟਾਪੇਤਿ ਧੋਵਾਪੇਤਿ, ਨਿਸ੍ਸਗ੍ਗਿਯੇਨ ਆਪਤ੍ਤਿ ਦੁਕ੍ਕਟਸ੍ਸ. ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀ ਏਲ਼ਕਲੋਮਾਨਿ ਵਿਜਟਾਪੇਤਿ ਰਜਾਪੇਤਿ, ਨਿਸ੍ਸਗ੍ਗਿਯੇਨ ਆਪਤ੍ਤਿ ਦੁਕ੍ਕਟਸ੍ਸ. ਅਞ੍ਞਾਤਿਕਾਯ ਅਞ੍ਞਾਤਿਕਸਞ੍ਞੀ ਏਲ਼ਕਲੋਮਾਨਿ ਵਿਜਟਾਪੇਤਿ ਧੋਵਾਪੇਤਿ ਰਜਾਪੇਤਿ, ਨਿਸ੍ਸਗ੍ਗਿਯੇਨ ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ.

੫੮੦. ਅਞ੍ਞਾਤਿਕਾਯ ਵੇਮਤਿਕੋ…ਪੇ… ਅਞ੍ਞਾਤਿਕਾਯ ਞਾਤਿਕਸਞ੍ਞੀ…ਪੇ… ਅਞ੍ਞਸ੍ਸ ਏਲ਼ਕਲੋਮਾਨਿ ਧੋਵਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਏਕਤੋ ਉਪਸਮ੍ਪਨ੍ਨਾਯ ਧੋਵਾਪੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਞਾਤਿਕਾਯ ਅਞ੍ਞਾਤਿਕਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਞਾਤਿਕਾਯ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਞਾਤਿਕਾਯ ਞਾਤਿਕਸਞ੍ਞੀ, ਅਨਾਪਤ੍ਤਿ.

੫੮੧. ਅਨਾਪਤ੍ਤਿ ਞਾਤਿਕਾਯ ਧਾਵਨ੍ਤਿਯਾ ਅਞ੍ਞਾਤਿਕਾ ਦੁਤਿਯਾ ਹੋਤਿ, ਅਵੁਤ੍ਤਾ ਧੋਵਤਿ, ਅਪਰਿਭੁਤ੍ਤਂ ਕਤਭਣ੍ਡਂ ਧੋਵਾਪੇਤਿ, ਸਿਕ੍ਖਮਾਨਾਯ ਸਾਮਣੇਰਿਯਾ ਉਮ੍ਮਤ੍ਤਕਸ੍ਸ ਆਦਿਕਮ੍ਮਿਕਸ੍ਸਾਤਿ.

ਏਲ਼ਕਲੋਮਧੋਵਾਪਨਸਿਕ੍ਖਾਪਦਂ ਨਿਟ੍ਠਿਤਂ ਸਤ੍ਤਮਂ.