੬. ਏਲ਼ਕਲੋਮਸਿਕ੍ਖਾਪਦਂ

੫੭੧. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਅਞ੍ਞਤਰਸ੍ਸ ਭਿਕ੍ਖੁਨੋ ਕੋਸਲੇਸੁ ਜਨਪਦੇ ਸਾਵਤ੍ਥਿਂ ਗਚ੍ਛਨ੍ਤਸ੍ਸ ਅਨ੍ਤਰਾਮਗ੍ਗੇ ਏਲ਼ਕਲੋਮਾਨਿ ਉਪ੍ਪਜ੍ਜਿਂਸੁ. ਅਥ ਖੋ ਸੋ ਭਿਕ੍ਖੁ ਤਾਨਿ ਏਲ਼ਕਲੋਮਾਨਿ ਉਤ੍ਤਰਾਸਙ੍ਗੇਨ ਭਣ੍ਡਿਕਂ ਬਨ੍ਧਿਤ੍ਵਾ ਅਗਮਾਸਿ. ਮਨੁਸ੍ਸਾ ਤਂ ਭਿਕ੍ਖੁਂ ਪਸ੍ਸਿਤ੍ਵਾ ਉਪ੍ਪਣ੍ਡੇਸੁਂ – ‘‘ਕਿਤ੍ਤਕੇਨ ਤੇ, ਭਨ੍ਤੇ, ਕੀਤਾਨਿ? ਕਿਤ੍ਤਕੋ ਉਦਯੋ ਭਵਿਸ੍ਸਤੀ’’ਤਿ? ਸੋ ਭਿਕ੍ਖੁ ਤੇਹਿ ਮਨੁਸ੍ਸੇਹਿ ਉਪ੍ਪਣ੍ਡਿਯਮਾਨੋ ਮਙ੍ਕੁ ਅਹੋਸਿ. ਅਥ ਖੋ ਸੋ ਭਿਕ੍ਖੁ ਸਾਵਤ੍ਥਿਂ ਗਨ੍ਤ੍ਵਾ ਤਾਨਿ ਏਲ਼ਕਲੋਮਾਨਿ ਠਿਤਕੋਵ ਆਸੁਮ੍ਭਿ. ਭਿਕ੍ਖੂ ਤਂ ਭਿਕ੍ਖੁਂ ਏਤਦਵੋਚੁਂ – ‘‘ਕਿਸ੍ਸ ਤ੍ਵਂ, ਆਵੁਸੋ, ਇਮਾਨਿ ਏਲ਼ਕਲੋਮਾਨਿ ਠਿਤਕੋਵ ਆਸੁਮ੍ਭਸੀ’’ਤਿ? ‘‘ਤਥਾ ਹਿ ਪਨਾਹਂ, ਆਵੁਸੋ, ਇਮੇਸਂ ਏਲ਼ਕਲੋਮਾਨਂ ਕਾਰਣਾ ਮਨੁਸ੍ਸੇਹਿ ਉਪ੍ਪਣ੍ਡਿਤੋ’’ਤਿ. ‘‘ਕੀਵ ਦੂਰਤੋ ਪਨ ਤ੍ਵਂ, ਆਵੁਸੋ, ਇਮਾਨਿ ਏਲ਼ਕਲੋਮਾਨਿ ਆਹਰੀ’’ਤਿ? ‘‘ਅਤਿਰੇਕਤਿਯੋਜਨਂ, ਆਵੁਸੋ’’ਤਿ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਭਿਕ੍ਖੁ ਅਤਿਰੇਕਤਿਯੋਜਨਂ ਏਲ਼ਕਲੋਮਾਨਿ ਆਹਰਿਸ੍ਸਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਤਂ ਭਿਕ੍ਖੁਂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਅਤਿਰੇਕਤਿਯੋਜਨਂ ਏਲ਼ਕਲੋਮਾਨਿ ਆਹਰੀਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਅਤਿਰੇਕਤਿਯੋਜਨਂ ਏਲ਼ਕਲੋਮਾਨਿ ਆਹਰਿਸ੍ਸਸਿ! ਨੇਤਂ ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੫੭੨. ‘‘ਭਿਕ੍ਖੁਨੋ ਪਨੇਵ ਅਦ੍ਧਾਨਮਗ੍ਗਪ੍ਪਟਿਪਨ੍ਨਸ੍ਸ ਏਲ਼ਕਲੋਮਾਨਿ ਉਪ੍ਪਜ੍ਜਯ੍ਯੁਂ. ਆਕਙ੍ਖਮਾਨੇਨ ਭਿਕ੍ਖੁਨਾ ਪਟਿਗ੍ਗਹੇਤਬ੍ਬਾਨਿ. ਪਟਿਗ੍ਗਹੇਤ੍ਵਾ ਤਿਯੋਜਨਪਰਮਂ ਸਹਤ੍ਥਾ ਹਰਿਤਬ੍ਬਾਨਿ [ਹਾਰੇਤਬ੍ਬਾਨਿ (ਸੀ. ਸ੍ਯਾ. ਕ.)], ਅਸਨ੍ਤੇ ਹਾਰਕੇ. ਤਤੋ ਚੇ ਉਤ੍ਤਰਿ ਹਰੇਯ੍ਯ, ਅਸਨ੍ਤੇਪਿ ਹਾਰਕੇ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ.

੫੭੩. ਭਿਕ੍ਖੁਨੋ ਪਨੇਵ ਅਦ੍ਧਾਨਮਗ੍ਗਪ੍ਪਟਿਪਨ੍ਨਸ੍ਸਾਤਿ ਪਨ੍ਥਂ ਗਚ੍ਛਨ੍ਤਸ੍ਸ.

ਏਲ਼ਕਲੋਮਾਨਿ ਉਪ੍ਪਜ੍ਜੇਯ੍ਯੁਨ੍ਤਿ ਉਪ੍ਪਜ੍ਜੇਯ੍ਯੁਂ ਸਙ੍ਘਤੋ ਵਾ ਗਣਤੋ ਵਾ ਞਾਤਿਤੋ ਵਾ ਮਿਤ੍ਤਤੋ ਵਾ ਪਂਸੁਕੂਲਂ ਵਾ ਅਤ੍ਤਨੋ ਵਾ ਧਨੇਨ.

ਆਕਙ੍ਖਮਾਨੇਨਾਤਿ ਇਚ੍ਛਮਾਨੇਨ ਪਟਿਗ੍ਗਹੇਤਬ੍ਬਾਨਿ.

ਪਟਿਗ੍ਗਹੇਤ੍ਵਾ ਤਿਯੋਜਨਪਰਮਂ ਸਹਤ੍ਥਾ ਹਰਿਤਬ੍ਬਾਨੀਤਿ ਤਿਯੋਜਨਪਰਮਤਾ ਸਹਤ੍ਥਾ ਹਰਿਤਬ੍ਬਾਨਿ.

ਅਸਨ੍ਤੇ ਹਾਰਕੇਤਿ ਨਾਞ੍ਞੋ ਕੋਚਿ ਹਾਰਕੋ ਹੋਤਿ ਇਤ੍ਥੀ ਵਾ ਪੁਰਿਸੋ ਵਾ ਗਹਟ੍ਠੋ ਵਾ ਪਬ੍ਬਜਿਤੋ ਵਾ.

ਤਤੋ ਚੇ ਉਤ੍ਤਰਿ ਹਰੇਯ੍ਯ, ਅਸਨ੍ਤੇਪਿ ਹਾਰਕੇਤਿ ਪਠਮਂ ਪਾਦਂ ਤਿਯੋਜਨਂ ਅਤਿਕ੍ਕਾਮੇਤਿ, ਆਪਤ੍ਤਿ ਦੁਕ੍ਕਟਸ੍ਸ. ਦੁਤਿਯਂ ਪਾਦਂ ਅਤਿਕ੍ਕਾਮੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ [ਨਿਸ੍ਸਗ੍ਗਿਯਾਨਿ ਹੋਨ੍ਤਿ (ਸ੍ਯਾ.)]. ਅਨ੍ਤੋਤਿਯੋਜਨੇ ਠਿਤੋ ਬਹਿਤਿਯੋਜਨਂ ਪਾਤੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ [ਨਿਸ੍ਸਗ੍ਗਿਯਾਨਿ ਹੋਨ੍ਤਿ (ਸ੍ਯਾ.)]. ਅਞ੍ਞਸ੍ਸ ਯਾਨੇ ਵਾ ਭਣ੍ਡੇ ਵਾ ਅਜਾਨਨ੍ਤਸ੍ਸ ਪਕ੍ਖਿਪਿਤ੍ਵਾ ਤਿਯੋਜਨਂ ਅਤਿਕ੍ਕਾਮੇਤਿ, ਨਿਸ੍ਸਗ੍ਗਿਯਾਨਿ ਹੋਨ੍ਤਿ. ਨਿਸ੍ਸਜ੍ਜਿਤਬ੍ਬਾਨਿ ਸਙ੍ਘਸ੍ਸ ਵਾ ਗਣਸ੍ਸ ਵਾ ਪੁਗ੍ਗਲਸ੍ਸ ਵਾ. ਏਵਞ੍ਚ ਪਨ, ਭਿਕ੍ਖਵੇ, ਨਿਸ੍ਸਜ੍ਜਿਤਬ੍ਬਾਨਿ…ਪੇ… ਇਮਾਨਿ ਮੇ, ਭਨ੍ਤੇ, ਏਲ਼ਕਲੋਮਾਨਿ ਤਿਯੋਜਨਂ ਅਤਿਕ੍ਕਾਮਿਤਾਨਿ ਨਿਸ੍ਸਗ੍ਗਿਯਾਨਿ. ਇਮਾਨਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀਤਿ…ਪੇ… ਦਦੇਯ੍ਯਾਤਿ…ਪੇ… ਦਦੇਯ੍ਯੁਨ੍ਤਿ…ਪੇ… ਆਯਸ੍ਮਤੋ ਦਮ੍ਮੀਤਿ.

੫੭੪. ਅਤਿਰੇਕਤਿਯੋਜਨੇ ਅਤਿਰੇਕਸਞ੍ਞੀ ਅਤਿਕ੍ਕਾਮੇਤਿ [ਤਿਯੋਜਨਂ ਅਤਿਕ੍ਕਾਮੇਤਿ (ਸ੍ਯਾ.)], ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਤਿਰੇਕਤਿਯੋਜਨੇ ਵੇਮਤਿਕੋ ਅਤਿਕ੍ਕਾਮੇਤਿ [ਤਿਯੋਜਨਂ ਅਤਿਕ੍ਕਾਮੇਤਿ (ਸ੍ਯਾ.)], ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਤਿਰੇਕਤਿਯੋਜਨੇ ਊਨਕਸਞ੍ਞੀ ਅਤਿਕ੍ਕਾਮੇਤਿ [ਤਿਯੋਜਨਂ ਅਤਿਕ੍ਕਾਮੇਤਿ (ਸ੍ਯਾ.)], ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਊਨਕਤਿਯੋਜਨੇ ਅਤਿਰੇਕਸਞ੍ਞੀ, ਆਪਤ੍ਤਿ ਦੁਕ੍ਕਟਸ੍ਸ. ਊਨਕਤਿਯੋਜਨੇ ਵੇਮਤਿਕੋ, ਆਪਤ੍ਤਿ ਦੁਕ੍ਕਟਸ੍ਸ. ਊਨਕਤਿਯੋਜਨੇ ਊਨਕਸਞ੍ਞੀ, ਅਨਾਪਤ੍ਤਿ.

੫੭੫. ਅਨਾਪਤ੍ਤਿ ਤਿਯੋਜਨਂ ਹਰਤਿ, ਊਨਕਤਿਯੋਜਨਂ ਹਰਤਿ, ਤਿਯੋਜਨਂ ਹਰਤਿਪਿ, ਪਚ੍ਚਾਹਰਤਿਪਿ, ਤਿਯੋਜਨਂ ਵਾਸਾਧਿਪ੍ਪਾਯੋ ਗਨ੍ਤ੍ਵਾ ਤਤੋ ਪਰਂ ਹਰਤਿ, ਅਚ੍ਛਿਨ੍ਨਂ ਪਟਿਲਭਿਤ੍ਵਾ ਹਰਤਿ, ਨਿਸ੍ਸਟ੍ਠਂ ਪਟਿਲਭਿਤ੍ਵਾ ਹਰਤਿ, ਅਞ੍ਞਂ ਹਰਾਪੇਤਿ ਕਤਭਣ੍ਡਂ, ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਏਲ਼ਕਲੋਮਸਿਕ੍ਖਾਪਦਂ ਨਿਟ੍ਠਿਤਂ ਛਟ੍ਠਂ.