੫. ਨਿਸੀਦਨਸਨ੍ਥਤਸਿਕ੍ਖਾਪਦਂ

੫੬੫. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ – ‘‘ਇਚ੍ਛਾਮਹਂ, ਭਿਕ੍ਖਵੇ, ਤੇਮਾਸਂ ਪਟਿਸਲ੍ਲੀਯਿਤੁਂ. ਨਮ੍ਹਿ ਕੇਨਚਿ ਉਪਸਙ੍ਕਮਿਤਬ੍ਬੋ, ਅਞ੍ਞਤ੍ਰ ਏਕੇਨ ਪਿਣ੍ਡਪਾਤਨੀਹਾਰਕੇਨਾ’’ਤਿ. ‘‘ਏਵਂ, ਭਨ੍ਤੇ,’’ਤਿ ਖੋ ਤੇ ਭਿਕ੍ਖੂ ਭਗਵਤੋ ਪਟਿਸ੍ਸੁਣਿਤ੍ਵਾ ਨਾਸ੍ਸੁਧ ਕੋਚਿ ਭਗਵਨ੍ਤਂ ਉਪਸਙ੍ਕਮਤਿ, ਅਞ੍ਞਤ੍ਰ ਏਕੇਨ ਪਿਣ੍ਡਪਾਤਨੀਹਾਰਕੇਨ. ਤੇਨ ਖੋ ਪਨ ਸਮਯੇਨ ਸਾਵਤ੍ਥਿਯਾ ਸਙ੍ਘੇਨ ਕਤਿਕਾ ਕਤਾ ਹੋਤਿ – ‘‘ਇਚ੍ਛਤਾਵੁਸੋ, ਭਗਵਾ ਤੇਮਾਸਂ ਪਟਿਸਲ੍ਲੀਯਿਤੁਂ. ਨ ਭਗਵਾ ਕੇਨਚਿ ਉਪਸਙ੍ਕਮਿਤਬ੍ਬੋ, ਅਞ੍ਞਤ੍ਰ ਏਕੇਨ ਪਿਣ੍ਡਪਾਤਨੀਹਾਰਕੇਨ. ਯੋ ਭਗਵਨ੍ਤਂ ਉਪਸਙ੍ਕਮਤਿ ਸੋ ਪਾਚਿਤ੍ਤਿਯਂ ਦੇਸਾਪੇਤਬ੍ਬੋ’’ਤਿ. ਅਥ ਖੋ ਆਯਸ੍ਮਾ ਉਪਸੇਨੋ ਵਙ੍ਗਨ੍ਤਪੁਤ੍ਤੋ, ਸਪਰਿਸੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਆਚਿਣ੍ਣਂ ਖੋ ਪਨੇਤਂ ਬੁਦ੍ਧਾਨਂ ਭਗਵਨ੍ਤਾਨਂ ਆਗਨ੍ਤੁਕੇਹਿ ਭਿਕ੍ਖੂਹਿ ਸਦ੍ਧਿਂ ਪਟਿਸਮ੍ਮੋਦਿਤੁਂ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਉਪਸੇਨਂ ਵਙ੍ਗਨ੍ਤਪੁਤ੍ਤਂ ਏਤਦਵੋਚ – ‘‘ਕਚ੍ਚਿ ਵੋ, ਉਪਸੇਨ, ਖਮਨੀਯਂ ਕਚ੍ਚਿ ਯਾਪਨੀਯਂ, ਕਚ੍ਚਿਤ੍ਥ ਅਪ੍ਪਕਿਲਮਥੇਨ ਅਦ੍ਧਾਨਂ ਆਗਤਾ’’ਤਿ? ‘‘ਖਮਨੀਯਂ, ਭਗਵਾ, ਯਾਪਨੀਯਂ, ਭਗਵਾ. ਅਪ੍ਪਕਿਲਮਥੇਨ ਚ ਮਯਂ, ਭਨ੍ਤੇ, ਅਦ੍ਧਾਨਂ ਆਗਤਾ’’ਤਿ.

ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਉਪਸੇਨਸ੍ਸ ਵਙ੍ਗਨ੍ਤਪੁਤ੍ਤਸ੍ਸ ਸਦ੍ਧਿਵਿਹਾਰਿਕੋ ਭਿਕ੍ਖੁ ਭਗਵਤੋ ਅਵਿਦੂਰੇ ਨਿਸਿਨ੍ਨੋ ਹੋਤਿ. ਅਥ ਖੋ ਭਗਵਾ ਤਂ ਭਿਕ੍ਖੁਂ ਏਤਦਵੋਚ – ‘‘ਮਨਾਪਾਨਿ ਤੇ, ਭਿਕ੍ਖੁ, ਪਂਸੁਕੂਲਾਨੀ’’ਤਿ? ‘‘ਨ ਖੋ ਮੇ, ਭਨ੍ਤੇ, ਮਨਾਪਾਨਿ ਪਂਸੁਕੂਲਾਨੀ’’ਤਿ. ‘‘ਕਿਸ੍ਸ ਪਨ ਤ੍ਵਂ, ਭਿਕ੍ਖੁ, ਪਂਸੁਕੂਲਿਕੋ’’ਤਿ? ‘‘ਉਪਜ੍ਝਾਯੋ ਮੇ, ਭਨ੍ਤੇ, ਪਂਸੁਕੂਲਿਕੋ. ਏਵਂ ਅਹਮ੍ਪਿ ਪਂਸੁਕੂਲਿਕੋ’’ਤਿ. ਅਥ ਖੋ ਭਗਵਾ ਆਯਸ੍ਮਨ੍ਤਂ ਉਪਸੇਨਂ ਵਙ੍ਗਨ੍ਤਪੁਤ੍ਤਂ ਏਤਦਵੋਚ – ‘‘ਪਾਸਾਦਿਕਾ ਖੋ ਤ੍ਯਾਯਂ, ਉਪਸੇਨ, ਪਰਿਸਾ. ਕਥਂ ਤ੍ਵਂ, ਉਪਸੇਨ, ਪਰਿਸਂ ਵਿਨੇਸੀ’’ਤਿ? ‘‘ਯੋ ਮਂ, ਭਨ੍ਤੇ, ਉਪਸਮ੍ਪਦਂ ਯਾਚਤਿ ਤਮਹਂ [ਤਾਹਂ (ਕ.)] ਏਵਂ ਵਦਾਮਿ – ‘ਅਹਂ ਖੋ, ਆਵੁਸੋ, ਆਰਞ੍ਞਿਕੋ ਪਿਣ੍ਡਪਾਤਿਕੋ ਪਂਸੁਕੂਲਿਕੋ. ਸਚੇ ਤ੍ਵਮ੍ਪਿ ਆਰਞ੍ਞਿਕੋ ਭਵਿਸ੍ਸਸਿ ਪਿਣ੍ਡਪਾਤਿਕੋ ਪਂਸੁਕੂਲਿਕੋ, ਏਵਾਹਂ ਤਂ ਉਪਸਮ੍ਪਾਦੇਸ੍ਸਾਮੀ’ਤਿ. ਸਚੇ ਮੇ ਪਟਿਸ੍ਸੁਣਾਤਿ ਉਪਸਮ੍ਪਾਦੇਮਿ, ਨੋ ਚੇ ਮੇ ਪਟਿਸ੍ਸੁਣਾਤਿ ਨ ਉਪਸਮ੍ਪਾਦੇਮਿ. ਯੋ ਮਂ ਨਿਸ੍ਸਯਂ ਯਾਚਤਿ ਤਮਹਂ [ਤਾਹਂ (ਕ.)] ਏਵਂ ਵਦਾਮਿ – ‘ਅਹਂ ਖੋ, ਆਵੁਸੋ, ਆਰਞ੍ਞਿਕੋ ਪਿਣ੍ਡਪਾਤਿਕੋ ਪਂਸੁਕੂਲਿਕੋ. ਸਚੇ ਤ੍ਵਮ੍ਪਿ ਆਰਞ੍ਞਿਕੋ ਭਵਿਸ੍ਸਸਿ ਪਿਣ੍ਡਪਾਤਿਕੋ ਪਂਸੁਕੂਲਿਕੋ, ਏਵਾਹਂ ਤੇ ਨਿਸ੍ਸਯਂ ਦਸ੍ਸਾਮੀ’ਤਿ. ਸਚੇ ਮੇ ਪਟਿਸ੍ਸੁਣਾਤਿ ਨਿਸ੍ਸਯਂ ਦੇਮਿ, ਨੋ ਚੇ ਮੇ ਪਟਿਸ੍ਸੁਣਾਤਿ ਨ ਨਿਸ੍ਸਯਂ ਦੇਮਿ. ਏਵਂ ਖੋ ਅਹਂ, ਭਨ੍ਤੇ, ਪਰਿਸਂ ਵਿਨੇਮੀ’’ਤਿ.

‘‘ਸਾਧੁ ਸਾਧੁ, ਉਪਸੇਨ. ਸਾਧੁ ਖੋ ਤ੍ਵਂ, ਉਪਸੇਨ, ਪਰਿਸਂ ਵਿਨੇਸਿ. ਜਾਨਾਸਿ ਪਨ ਤ੍ਵਂ, ਉਪਸੇਨ, ਸਾਵਤ੍ਥਿਯਾ ਸਙ੍ਘਸ੍ਸ ਕਤਿਕ’’ਨ੍ਤਿ? ‘‘ਨ ਖੋ ਅਹਂ, ਭਨ੍ਤੇ, ਜਾਨਾਮਿ ਸਾਵਤ੍ਥਿਯਾ ਸਙ੍ਘਸ੍ਸ ਕਤਿਕ’’ਨ੍ਤਿ. ‘‘ਸਾਵਤ੍ਥਿਯਾ ਖੋ, ਉਪਸੇਨ, ਸਙ੍ਘੇਨ ਕਤਿਕਾ ਕਤਾ – ‘ਇਚ੍ਛਤਾਵੁਸੋ, ਭਗਵਾ ਤੇਮਾਸਂ ਪਟਿਸਲ੍ਲੀਯਿਤੁਂ. ਨ ਭਗਵਾ ਕੇਨਚਿ ਉਪਸਙ੍ਕਮਿਤਬ੍ਬੋ, ਅਞ੍ਞਤ੍ਰ ਏਕੇਨ ਪਿਣ੍ਡਪਾਤਨੀਹਾਰਕੇਨ. ਯੋ ਭਗਵਨ੍ਤਂ ਉਪਸਙ੍ਕਮਤਿ ਸੋ ਪਾਚਿਤ੍ਤਿਯਂ ਦੇਸਾਪੇਤਬ੍ਬੋ’ਤਿ. ‘‘ਪਞ੍ਞਾਯਿਸ੍ਸਤਿ, ਭਨ੍ਤੇ, ਸਾਵਤ੍ਥਿਯਾ ਸਙ੍ਘੋ ਸਕਾਯ ਕਤਿਕਾਯ, ਨ ਮਯਂ ਅਪਞ੍ਞਤ੍ਤਂ ਪਞ੍ਞਪੇਸ੍ਸਾਮ ਪਞ੍ਞਤ੍ਤਂ ਵਾ ਨ ਸਮੁਚ੍ਛਿਨ੍ਦਿਸ੍ਸਾਮ, ਯਥਾਪਞ੍ਞਤ੍ਤੇਸੁ ਸਿਕ੍ਖਾਪਦੇਸੁ ਸਮਾਦਾਯ ਵਤ੍ਤਿਸ੍ਸਾਮਾ’’ਤਿ. ‘‘ਸਾਧੁ ਸਾਧੁ, ਉਪਸੇਨ, ਅਪਞ੍ਞਤ੍ਤਂ ਨ ਪਞ੍ਞਪੇਤਬ੍ਬਂ, ਪਞ੍ਞਤ੍ਤਂ ਵਾ ਨ ਸਮੁਚ੍ਛਿਨ੍ਦਿਤਬ੍ਬਂ, ਯਥਾਪਞ੍ਞਤ੍ਤੇਸੁ ਸਿਕ੍ਖਾਪਦੇਸੁ ਸਮਾਦਾਯ ਵਤ੍ਤਿਤਬ੍ਬਂ. ਅਨੁਜਾਨਾਮਿ, ਉਪਸੇਨ, ਯੇ ਤੇ ਭਿਕ੍ਖੂ ਆਰਞ੍ਞਿਕਾ ਪਿਣ੍ਡਪਾਤਿਕਾ ਪਂਸੁਕੂਲਿਕਾ ਯਥਾਸੁਖਂ ਮਂ ਦਸ੍ਸਨਾਯ ਉਪਸਙ੍ਕਮਨ੍ਤੂ’’ਤਿ.

੫੬੬. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਬਹਿਦ੍ਵਾਰਕੋਟ੍ਠਕੇ ਠਿਤਾ ਹੋਨ੍ਤਿ – ‘‘ਮਯਂ ਆਯਸ੍ਮਨ੍ਤਂ ਉਪਸੇਨਂ ਵਙ੍ਗਨ੍ਤਪੁਤ੍ਤਂ ਪਾਚਿਤ੍ਤਿਯਂ ਦੇਸਾਪੇਸ੍ਸਾਮਾ’’ਤਿ. ਅਥ ਖੋ ਆਯਸ੍ਮਾ ਉਪਸੇਨੋ ਵਙ੍ਗਨ੍ਤਪੁਤ੍ਤੋ ਸਪਰਿਸੋ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਤੇ ਭਿਕ੍ਖੂ ਆਯਸ੍ਮਨ੍ਤਂ ਉਪਸੇਨਂ ਵਙ੍ਗਨ੍ਤਪੁਤ੍ਤਂ ਏਤਦਵੋਚੁਂ – ‘‘ਜਾਨਾਸਿ ਤ੍ਵਂ, ਆਵੁਸੋ ਉਪਸੇਨ, ਸਾਵਤ੍ਥਿਯਾ ਸਙ੍ਘਸ੍ਸ ਕਤਿਕ’’ਨ੍ਤਿ. ‘‘ਭਗਵਾਪਿ ਮਂ, ਆਵੁਸੋ, ਏਵਮਾਹ – ‘ਜਾਨਾਸਿ ਪਨ ਤ੍ਵਂ, ਉਪਸੇਨ, ਸਾਵਤ੍ਥਿਯਾ ਸਙ੍ਘਸ੍ਸ ਕਤਿਕ’ਨ੍ਤਿ? ਨ ਖੋ ਅਹਂ, ਭਨ੍ਤੇ, ਜਾਨਾਮਿ ਸਾਵਤ੍ਥਿਯਾ ਸਙ੍ਘਸ੍ਸ ਕਤਿਕ’’ਨ੍ਤਿ. ‘‘ਸਾਵਤ੍ਥਿਯਾ ਖੋ, ਉਪਸੇਨ, ਸਙ੍ਘੇਨ ਕਤਿਕਾ ਕਤਾ – ਇਚ੍ਛਤਾਵੁਸੋ, ਭਗਵਾ ਤੇਮਾਸਂ ਪਟਿਸਲ੍ਲੀਯਿਤੁਂ. ਨ ਭਗਵਾ ਕੇਨਚਿ ਉਪਸਙ੍ਕਮਿਤਬ੍ਬੋ, ਅਞ੍ਞਤ੍ਰ ਏਕੇਨ ਪਿਣ੍ਡਪਾਤਨੀਹਾਰਕੇਨ. ਯੋ ਭਗਵਨ੍ਤਂ ਉਪਸਙ੍ਕਮਤਿ ਸੋ ਪਾਚਿਤ੍ਤਿਯਂ ਦੇਸਾਪੇਤਬ੍ਬੋ’’ਤਿ. ‘‘ਪਞ੍ਞਾਯਿਸ੍ਸਤਿ, ਭਨ੍ਤੇ, ਸਾਵਤ੍ਥਿਯਾ ਸਙ੍ਘੋ ਸਕਾਯ ਕਤਿਕਾਯ, ਨ ਮਯਂ ਅਪਞ੍ਞਤ੍ਤਂ ਪਞ੍ਞਪੇਸ੍ਸਾਮ ਪਞ੍ਞਤ੍ਤਂ ਵਾ ਨ ਸਮੁਚ੍ਛਿਨ੍ਦਿਸ੍ਸਾਮ, ਯਥਾਪਞ੍ਞਤ੍ਤੇਸੁ ਸਿਕ੍ਖਾਪਦੇਸੁ ਸਮਾਦਾਯ ਵਤ੍ਤਿਸ੍ਸਾਮਾਤਿ. ਅਨੁਞ੍ਞਾਤਾਵੁਸੋ, ਭਗਵਤਾ – ‘ਯੇ ਤੇ ਭਿਕ੍ਖੂ ਆਰਞ੍ਞਿਕਾ ਪਿਣ੍ਡਪਾਤਿਕਾ ਪਂਸੁਕੂਲਿਕਾ ਯਥਾਸੁਖਂ ਮਂ ਦਸ੍ਸਨਾਯ ਉਪਸਙ੍ਕਮਨ੍ਤੂ’’’ਤਿ.

ਅਥ ਖੋ ਤੇ ਭਿਕ੍ਖੂ – ‘‘ਸਚ੍ਚਂ ਖੋ ਆਯਸ੍ਮਾ ਉਪਸੇਨੋ ਆਹ – ‘ਨ ਅਪਞ੍ਞਤ੍ਤਂ ਪਞ੍ਞਪੇਤਬ੍ਬਂ, ਪਞ੍ਞਤ੍ਤਂ ਵਾ ਨ ਸਮੁਚ੍ਛਿਨ੍ਦਿਤਬ੍ਬਂ, ਯਥਾਪਞ੍ਞਤ੍ਤੇਸੁ ਸਿਕ੍ਖਾਪਦੇਸੁ ਸਮਾਦਾਯ ਵਤ੍ਤਿਤਬ੍ਬ’’’ਨ੍ਤਿ. ਅਸ੍ਸੋਸੁਂ ਖੋ ਭਿਕ੍ਖੂ – ‘‘ਅਨੁਞ੍ਞਾਤਾ ਕਿਰ ਭਗਵਤਾ – ‘ਯੇ ਤੇ ਭਿਕ੍ਖੂ ਆਰਞ੍ਞਿਕਾ ਪਿਣ੍ਡਪਾਤਿਕਾ ਪਂਸੁਕੂਲਿਕਾ ਯਥਾਸੁਖਂ ਮਂ ਦਸ੍ਸਨਾਯ ਉਪਸਙ੍ਕਮਨ੍ਤੂ’’’ਤਿ. ਤੇ ਭਗਵਨ੍ਤਂ ਦਸ੍ਸਨਂ ਪਿਹੇਨ੍ਤਾ [ਦਸ੍ਸਨਾਯ ਪਿਹਯਮਾਨਾ (ਸ੍ਯਾ.)] ਸਨ੍ਥਤਾਨਿ ਉਜ੍ਝਿਤ੍ਵਾ ਆਰਞ੍ਞਿਕਙ੍ਗਂ ਪਿਣ੍ਡਪਾਤਿਕਙ੍ਗਂ ਪਂਸੁਕੂਲਿਕਙ੍ਗਂ ਸਮਾਦਿਯਿਂਸੁ. ਅਥ ਖੋ ਭਗਵਾ ਸਮ੍ਬਹੁਲੇਹਿ ਭਿਕ੍ਖੂਹਿ ਸਦ੍ਧਿਂ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤੋ ਅਦ੍ਦਸ ਸਨ੍ਥਤਾਨਿ ਤਹਂ ਤਹਂ ਉਜ੍ਝਿਤਾਨਿ. ਪਸ੍ਸਿਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਕਸ੍ਸਿਮਾਨਿ, ਭਿਕ੍ਖਵੇ, ਸਨ੍ਥਤਾਨਿ ਤਹਂ ਤਹਂ ਉਜ੍ਝਿਤਾਨੀ’’ਤਿ? ਅਥ ਖੋ ਤੇ ਭਿਕ੍ਖੂ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ – ‘‘ਤੇਨ ਹਿ, ਭਿਕ੍ਖਵੇ, ਭਿਕ੍ਖੂਨਂ ਸਿਕ੍ਖਾਪਦਂ ਪਞ੍ਞਪੇਸ੍ਸਾਮਿ ਦਸ ਅਤ੍ਥਵਸੇ ਪਟਿਚ੍ਚ – ਸਙ੍ਘਸੁਟ੍ਠੁਤਾਯ, ਸਙ੍ਘਫਾਸੁਤਾਯ,…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੫੬੭. ‘‘ਨਿਸੀਦਨਸਨ੍ਥਤਂ ਪਨ ਭਿਕ੍ਖੁਨਾ ਕਾਰਯਮਾਨੇਨ ਪੁਰਾਣਸਨ੍ਥਤਸ੍ਸ ਸਾਮਨ੍ਤਾ ਸੁਗਤਵਿਦਤ੍ਥਿ ਆਦਾਤਬ੍ਬਾ ਦੁਬ੍ਬਣ੍ਣਕਰਣਾਯ, ਅਨਾਦਾ ਚੇ ਭਿਕ੍ਖੁ ਪੁਰਾਣਸਨ੍ਥਤਸ੍ਸ ਸਾਮਨ੍ਤਾ ਸੁਗਤਵਿਦਤ੍ਥਿਂ ਨਵਂ ਨਿਸੀਦਨਸਨ੍ਥਤਂ ਕਾਰਾਪੇਯ੍ਯ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ.

੫੬੮. ਨਿਸੀਦਨਂ ਨਾਮ ਸਦਸਂ ਵੁਚ੍ਚਤਿ.

ਸਨ੍ਥਤਂ ਨਾਮ ਸਨ੍ਥਰਿਤ੍ਵਾ ਕਤਂ ਹੋਤਿ ਅਵਾਯਿਮਂ.

ਕਾਰਯਮਾਨੇਨਾਤਿ ਕਰੋਨ੍ਤੋ ਵਾ ਕਾਰਾਪੇਨ੍ਤੋ ਵਾ.

ਪੁਰਾਣਸਨ੍ਥਤਂ ਨਾਮ ਸਕਿਂ ਨਿਵਤ੍ਥਮ੍ਪਿ ਸਕਿਂ ਪਾਰੁਤਮ੍ਪਿ.

ਸਾਮਨ੍ਤਾ ਸੁਗਤਵਿਦਤ੍ਥਿ ਆਦਾਤਬ੍ਬਾ ਦੁਬ੍ਬਣ੍ਣਕਰਣਾਯਾਤਿ ਥਿਰਭਾਵਾਯ ਵਟ੍ਟਂ ਵਾ ਚਤੁਰਸ੍ਸਂ ਵਾ ਛਿਨ੍ਦਿਤ੍ਵਾ ਏਕਦੇਸੇ ਵਾ ਸਨ੍ਥਰਿਤਬ੍ਬਂ ਵਿਜਟੇਤ੍ਵਾ ਵਾ ਸਨ੍ਥਰਿਤਬ੍ਬਂ.

ਅਨਾਦਾ ਚੇ ਭਿਕ੍ਖੁ ਪੁਰਾਣਸਨ੍ਥਤਸ੍ਸ ਸਾਮਨ੍ਤਾ ਸੁਗਤਵਿਦਤ੍ਥਿਨ੍ਤਿ ਅਨਾਦਿਯਿਤ੍ਵਾ ਪੁਰਾਣਸਨ੍ਥਤਸ੍ਸ ਸਾਮਨ੍ਤਾ ਸੁਗਤਵਿਦਤ੍ਥਿਂ ਨਵਂ ਨਿਸੀਦਨਸਨ੍ਥਤਂ ਕਰੋਤਿ ਵਾ ਕਾਰਾਪੇਤਿ ਵਾ, ਪਯੋਗੇ ਦੁਕ੍ਕਟਂ, ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤਿ. ਨਿਸ੍ਸਜ੍ਜਿਤਬ੍ਬਂ ਸਙ੍ਘਸ੍ਸ ਵਾ ਗਣਸ੍ਸ ਵਾ ਪੁਗ੍ਗਲਸ੍ਸ ਵਾ. ਏਵਞ੍ਚ ਪਨ, ਭਿਕ੍ਖਵੇ, ਨਿਸ੍ਸਜ੍ਜਿਤਬ੍ਬਂ…ਪੇ… ਇਦਂ ਮੇ, ਭਨ੍ਤੇ, ਨਿਸੀਦਨਸਨ੍ਥਤਂ ਅਨਾਦਿਯਿਤ੍ਵਾ ਪੁਰਾਣਸਨ੍ਥਤਸ੍ਸ ਸਾਮਨ੍ਤਾ ਸੁਗਤਵਿਦਤ੍ਥਿਂ ਕਾਰਾਪਿਤਂ ਨਿਸ੍ਸਗ੍ਗਿਯਂ. ਇਮਾਹਂ ਸਙ੍ਘਸ੍ਸ ਨਿਸ੍ਸਜ੍ਜਾਮੀਤਿ…ਪੇ… ਦਦੇਯ੍ਯਾਤਿ…ਪੇ… ਆਯਸ੍ਮਤੋ ਦਮ੍ਮੀਤਿ.

੫੬੯. ਅਤ੍ਤਨਾ ਵਿਪ੍ਪਕਤਂ ਅਤ੍ਤਨਾ ਪਰਿਯੋਸਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਅਤ੍ਤਨਾ ਵਿਪ੍ਪਕਤਂ ਪਰੇਹਿ ਪਰਿਯੋਸਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਪਰੇਹਿ ਵਿਪ੍ਪਕਤਂ ਅਤ੍ਤਨਾ ਪਰਿਯੋਸਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ. ਪਰੇਹਿ ਵਿਪ੍ਪਕਤਂ ਪਰੇਹਿ ਪਰਿਯੋਸਾਪੇਤਿ, ਨਿਸ੍ਸਗ੍ਗਿਯਂ ਪਾਚਿਤ੍ਤਿਯਂ.

ਅਞ੍ਞਸ੍ਸਤ੍ਥਾਯ ਕਰੋਤਿ ਵਾ ਕਾਰਾਪੇਤਿ ਵਾ, ਆਪਤ੍ਤਿ ਦੁਕ੍ਕਟਸ੍ਸ.

੫੭੦. ਅਨਾਪਤ੍ਤਿ – ਪੁਰਾਣਸਨ੍ਥਤਸ੍ਸ ਸਾਮਨ੍ਤਾ ਸੁਗਤਵਿਦਤ੍ਥਿਂ ਆਦਿਯਿਤ੍ਵਾ ਕਰੋਤਿ, ਅਲਭਨ੍ਤੋ ਥੋਕਤਰਂ ਆਦਿਯਿਤ੍ਵਾ ਕਰੋਤਿ, ਅਲਭਨ੍ਤੋ ਅਨਾਦਿਯਿਤ੍ਵਾ ਕਰੋਤਿ, ਅਞ੍ਞੇਨ ਕਤਂ ਪਟਿਲਭਿਤ੍ਵਾ ਪਰਿਭੁਞ੍ਜਤਿ, ਵਿਤਾਨਂ ਵਾ ਭੂਮਤ੍ਥਰਣਂ ਵਾ ਸਾਣਿਪਾਕਾਰਂ ਵਾ ਭਿਸਿਂ ਵਾ ਬਿਬ੍ਬੋਹਨਂ ਵਾ ਕਰੋਤਿ, ਉਮ੍ਮਤ੍ਤਕਸ੍ਸ ਆਦਿਕਮ੍ਮਿਕਸ੍ਸਾਤਿ.

ਨਿਸੀਦਨਸਨ੍ਥਤਸਿਕ੍ਖਾਪਦਂ ਨਿਟ੍ਠਿਤਂ ਪਞ੍ਚਮਂ.