੬. ਕੁਟਿਕਾਰਸਿਕ੍ਖਾਪਦਂ
੩੪੨. ਤੇਨ ਸਮਯੇਨ ਬੁਦ੍ਧੋ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਆਲ਼ਵਕਾ ਭਿਕ੍ਖੂ ਸਞ੍ਞਾਚਿਕਾਯੋ ਕੁਟਿਯੋ ਕਾਰਾਪੇਨ੍ਤਿ ਅਸ੍ਸਾਮਿਕਾਯੋ ਅਤ੍ਤੁਦ੍ਦੇਸਿਕਾਯੋ ਅਪ੍ਪਮਾਣਿਕਾਯੋ. ਤਾਯੋ ਨ ਨਿਟ੍ਠਾਨਂ ਗਚ੍ਛਨ੍ਤਿ. ਤੇ ਯਾਚਨਬਹੁਲਾ ਵਿਞ੍ਞਤ੍ਤਿਬਹੁਲਾ ਵਿਹਰਨ੍ਤਿ – ‘‘ਪੁਰਿਸਂ ਦੇਥ, ਪੁਰਿਸਤ੍ਥਕਰਂ ਦੇਥ, ਗੋਣਂ ਦੇਥ, ਸਕਟਂ ਦੇਥ, ਵਾਸਿਂ ਦੇਥ, ਪਰਸੁਂ ਦੇਥ, ਕੁਠਾਰਿਂ ਦੇਥ, ਕੁਦਾਲਂ ਦੇਥ, ਨਿਖਾਦਨਂ ਦੇਥ, ਵਲ੍ਲਿਂ ਦੇਥ, ਵੇਲ਼ੁਂ ਦੇਥ, ਮੁਞ੍ਜਂ ਦੇਥ, ਪਬ੍ਬਜਂ ਦੇਥ, ਤਿਣਂ ਦੇਥ, ਮਤ੍ਤਿਕਂ ਦੇਥਾ’’ਤਿ. ਮਨੁਸ੍ਸਾ ਉਪਦ੍ਦੁਤਾ ਯਾਚਨਾਯ ਉਪਦ੍ਦੁਤਾ ਵਿਞ੍ਞਤ੍ਤਿਯਾ ਭਿਕ੍ਖੂ ਦਿਸ੍ਵਾ ਉਬ੍ਬਿਜ੍ਜਨ੍ਤਿਪਿ ਉਤ੍ਤਸਨ੍ਤਿਪਿ ਪਲਾਯਨ੍ਤਿਪਿ ਅਞ੍ਞੇਨਪਿ ਗਚ੍ਛਨ੍ਤਿ ਅਞ੍ਞੇਨਪਿ ਮੁਖਂ ਕਰੋਨ੍ਤਿ ਦ੍ਵਾਰਮ੍ਪਿ ਥਕੇਨ੍ਤਿ, ਗਾਵਿਮ੍ਪਿ ਦਿਸ੍ਵਾ ਪਲਾਯਨ੍ਤਿ ਭਿਕ੍ਖੂਤਿ ਮਞ੍ਞਮਾਨਾ.
ਅਥ ਖੋ ਆਯਸ੍ਮਾ ਮਹਾਕਸ੍ਸਪੋ ਰਾਜਗਹੇ ਵਸ੍ਸਂਵੁਟ੍ਠੋ ਯੇਨ ਆਲ਼ਵੀ ਤੇਨ ਪਕ੍ਕਾਮਿ. ਅਨੁਪੁਬ੍ਬੇਨ ਯੇਨ ਆਲ਼ਵੀ ਤਦਵਸਰਿ. ਤਤ੍ਰ ਸੁਦਂ ਆਯਸ੍ਮਾ ਮਹਾਕਸ੍ਸਪੋ ਆਲ਼ਵਿਯਂ ਵਿਹਰਤਿ ਅਗ੍ਗਾਲ਼ਵੇ ਚੇਤਿਯੇ. ਅਥ ਖੋ ਆਯਸ੍ਮਾ ਮਹਾਕਸ੍ਸਪੋ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਆਲ਼ਵਿਂ ਪਿਣ੍ਡਾਯ ਪਾਵਿਸਿ. ਮਨੁਸ੍ਸਾ ਆਯਸ੍ਮਨ੍ਤਂ ਮਹਾਕਸ੍ਸਪਂ ਪਸ੍ਸਿਤ੍ਵਾ ਉਬ੍ਬਿਜ੍ਜਨ੍ਤਿਪਿ ਉਤ੍ਤਸਨ੍ਤਿਪਿ ਪਲਾਯਨ੍ਤਿਪਿ ਅਞ੍ਞੇਨਪਿ ਗਚ੍ਛਨ੍ਤਿ ਅਞ੍ਞੇਨਪਿ ਮੁਖਂ ਕਰੋਨ੍ਤਿ ਦ੍ਵਾਰਮ੍ਪਿ ਥਕੇਨ੍ਤਿ. ਅਥ ਖੋ ਆਯਸ੍ਮਾ ਮਹਾਕਸ੍ਸਪੋ ਆਲ਼ਵਿਯਂ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪ੍ਪਟਿਕ੍ਕਨ੍ਤੋ ਭਿਕ੍ਖੂ ਆਮਨ੍ਤੇਸਿ – ‘‘ਪੁਬ੍ਬਾਯਂ, ਆਵੁਸੋ, ਆਲ਼ਵੀ ਸੁਭਿਕ੍ਖਾ ਅਹੋਸਿ ਸੁਲਭਪਿਣ੍ਡਾ ਸੁਕਰਾ ਉਞ੍ਛੇਨ ਪਗ੍ਗਹੇਨ ਯਾਪੇਤੁਂ; ਏਤਰਹਿ ਪਨਾਯਂ ਆਲ਼ਵੀ ਦੁਬ੍ਭਿਕ੍ਖਾ ਦੁਲ੍ਲਭਪਿਣ੍ਡਾ, ਨ ਸੁਕਰਾ ਉਞ੍ਛੇਨ ਪਗ੍ਗਹੇਨ ਯਾਪੇਤੁਂ. ਕੋ ਨੁ ਖੋ, ਆਵੁਸੋ, ਹੇਤੁ ਕੋ ਪਚ੍ਚਯੋ, ਯੇਨਾਯਂ ਆਲ਼ਵੀ ਦੁਬ੍ਭਿਕ੍ਖਾ ਦੁਲ੍ਲਭਪਿਣ੍ਡਾ, ਨ ਸੁਕਰਾ ਉਞ੍ਛੇਨ ਪਗ੍ਗਹੇਨ ਯਾਪੇਤੁ’’ਨ੍ਤਿ? ਅਥ ਖੋ ਤੇ ਭਿਕ੍ਖੂ ਆਯਸ੍ਮਤੋ ਮਹਾਕਸ੍ਸਪਸ੍ਸ ਏਤਮਤ੍ਥਂ ਆਰੋਚੇਸੁਂ.
੩੪੩. ਅਥ ਖੋ ਭਗਵਾ ਰਾਜਗਹੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਆਲ਼ਵੀ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਚਾਰਿਕਂ ਚਰਮਾਨੋ ਯੇਨ ਆਲ਼ਵੀ ਤਦਵਸਰਿ. ਤਤ੍ਰ ਸੁਦਂ ਭਗਵਾ ਆਲ਼ਵਿਯਂ ਵਿਹਰਤਿ ਅਗ੍ਗਾਲ਼ਵੇ ਚੇਤਿਯੇ. ਅਥ ਖੋ ਆਯਸ੍ਮਾ ਮਹਾਕਸ੍ਸਪੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਮਹਾਕਸ੍ਸਪੋ ਭਗਵਤੋ ਏਤਮਤ੍ਥਂ ਆਰੋਚੇਸਿ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਆਲ਼ਵਕੇ ਭਿਕ੍ਖੂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ ਤੁਮ੍ਹੇ, ਭਿਕ੍ਖਵੇ, ਸਞ੍ਞਾਚਿਕਾਯੋ ਕੁਟਿਯੋ ਕਾਰਾਪੇਥ ਅਸ੍ਸਾਮਿਕਾਯੋ ਅਤ੍ਤੁਦ੍ਦੇਸਿਕਾਯੋ ਅਪ੍ਪਮਾਣਿਕਾਯੋ. ਤਾਯੋ ਨ ਨਿਟ੍ਠਾਨਂ ਗਚ੍ਛਨ੍ਤਿ. ਤੇ ਤੁਮ੍ਹੇ ਯਾਚਨਬਹੁਲਾ ਵਿਞ੍ਞਤ੍ਤਿਬਹੁਲਾ ਵਿਹਰਥ – ‘ਪੁਰਿਸਂ ਦੇਥ ਪੁਰਿਸਤ੍ਥਕਰਂ ਦੇਥ…ਪੇ… ਤਿਣਂ ਦੇਥ ਮਤ੍ਤਿਕਂ ਦੇਥਾ’ਤਿ. ਮਨੁਸ੍ਸਾ ਉਪਦ੍ਦੁਤਾ ਯਾਚਨਾਯ ਉਪਦ੍ਦੁਤਾ ਵਿਞ੍ਞਤ੍ਤਿਯਾ ਭਿਕ੍ਖੂ ਦਿਸ੍ਵਾ ਉਬ੍ਬਿਜ੍ਜਨ੍ਤਿਪਿ ਉਤ੍ਤਸਨ੍ਤਿਪਿ ਪਲਾਯਨ੍ਤਿਪਿ ਅਞ੍ਞੇਨਪਿ ਗਚ੍ਛਨ੍ਤਿ ਅਞ੍ਞੇਨਪਿ ਮੁਖਂ ਕਰੋਨ੍ਤਿ ਦ੍ਵਾਰਮ੍ਪਿ ਥਕੇਨ੍ਤਿ, ਗਾਵਿਮ੍ਪਿ ਦਿਸ੍ਵਾ ਪਲਾਯਨ੍ਤਿ ਭਿਕ੍ਖੂਤਿ ਮਞ੍ਞਮਾਨਾ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ‘‘ਕਥਞ੍ਹਿ ਨਾਮ ਤੁਮ੍ਹੇ, ਮੋਘਪੁਰਿਸਾ, ਸਂਯਾਚਿਕਾਯੋ ਕੁਟਿਯੋ ਕਾਰਾਪੇਸ੍ਸਥ ਅਸ੍ਸਾਮਿਕਾਯੋ ਅਤ੍ਤੁਦ੍ਦੇਸਿਕਾਯੋ ਅਪ੍ਪਮਾਣਿਕਾਯੋ! ਤਾਯੋ ਨ ਨਿਟ੍ਠਾਨਂ ਗਚ੍ਛਨ੍ਤਿ. ਤੇ ਤੁਮ੍ਹੇ ਯਾਚਨਬਹੁਲਾ ਵਿਞ੍ਞਤ੍ਤਿਬਹੁਲਾ ਵਿਹਰਿਸ੍ਸਥ – ‘ਪੁਰਿਸਂ ਦੇਥ ਪੁਰਿਸਤ੍ਥਕਰਂ ਦੇਥ…ਪੇ… ਤਿਣਂ ਦੇਥ ਮਤ੍ਤਿਕਂ ਦੇਥਾ’ਤਿ! ਨੇਤਂ ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ…’’ ਵਿਗਰਹਿਤ੍ਵਾ ਧਮ੍ਮਿਂ ਕਥਂ ਕਤ੍ਵਾ ਭਿਕ੍ਖੂ ਆਮਨ੍ਤੇਸਿ –
੩੪੪. ‘‘ਭੂਤਪੁਬ੍ਬਂ, ਭਿਕ੍ਖਵੇ, ਦ੍ਵੇ ਭਾਤਰੋ ਇਸਯੋ ਗਙ੍ਗਂ ਨਦਿਂ ਉਪਨਿਸ੍ਸਾਯ ਵਿਹਰਿਂਸੁ. ਅਥ ਖੋ, ਭਿਕ੍ਖਵੇ, ਮਣਿਕਣ੍ਠੋ ਨਾਗਰਾਜਾ ਗਙ੍ਗਂ ਨਦਿਂ ਉਤ੍ਤਰਿਤ੍ਵਾ ਯੇਨ ਕਨਿਟ੍ਠੋ ਇਸਿ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਕਨਿਟ੍ਠਂ ਇਸਿਂ ਸਤ੍ਤਕ੍ਖਤ੍ਤੁਂ ਭੋਗੇਹਿ ਪਰਿਕ੍ਖਿਪਿਤ੍ਵਾ ਉਪਰਿਮੁਦ੍ਧਨਿ ਮਹਨ੍ਤਂ ਫਣਂ ਕਰਿਤ੍ਵਾ ਅਟ੍ਠਾਸਿ. ਅਥ ਖੋ, ਭਿਕ੍ਖਵੇ, ਕਨਿਟ੍ਠੋ ਇਸਿ ਤਸ੍ਸ ਨਾਗਸ੍ਸ ਭਯਾ ਕਿਸੋ ਅਹੋਸਿ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ. ਅਦ੍ਦਸ ਖੋ, ਭਿਕ੍ਖਵੇ, ਜੇਟ੍ਠੋ ਇਸਿ ਕਨਿਟ੍ਠਂ ਇਸਿਂ ਕਿਸਂ ਲੂਖਂ ਦੁਬ੍ਬਣ੍ਣਂ ਉਪ੍ਪਣ੍ਡੁਪ੍ਪਣ੍ਡੁਕਜਾਤਂ ਧਮਨਿਸਨ੍ਥਤਗਤ੍ਤਂ. ਦਿਸ੍ਵਾਨ ਕਨਿਟ੍ਠਂ ਇਸਿਂ ਏਤਦਵੋਚ – ‘‘ਕਿਸ੍ਸ ਤ੍ਵਂ, ਭੋ, ਕਿਸੋ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ’’ਤਿ? ‘‘ਇਧ, ਭੋ, ਮਣਿਕਣ੍ਠੋ ਨਾਗਰਾਜਾ ਗਙ੍ਗਂ ਨਦਿਂ ਉਤ੍ਤਰਿਤ੍ਵਾ ਯੇਨਾਹਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਮਂ ਸਤ੍ਤਕ੍ਖਤ੍ਤੁਂ ਭੋਗੇਹਿ ਪਰਿਕ੍ਖਿਪਿਤ੍ਵਾ ਉਪਰਿਮੁਦ੍ਧਨਿ ਮਹਨ੍ਤਂ ਫਣਂ ਕਰਿਤ੍ਵਾ ਅਟ੍ਠਾਸਿ. ਤਸ੍ਸਾਹਂ, ਭੋ, ਨਾਗਸ੍ਸ ਭਯਾ [ਭਯਾਮ੍ਹਿ (ਸੀ.)] ਕਿਸੋ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ’’ਤਿ. ‘‘ਇਚ੍ਛਸਿ ਪਨ ਤ੍ਵਂ, ਭੋ, ਤਸ੍ਸ ਨਾਗਸ੍ਸ ਅਨਾਗਮਨ’’ਨ੍ਤਿ? ‘‘ਇਚ੍ਛਾਮਹਂ, ਭੋ, ਤਸ੍ਸ ਨਾਗਸ੍ਸ ਅਨਾਗਮਨ’’ਨ੍ਤਿ. ‘‘ਅਪਿ ਪਨ ਤ੍ਵਂ, ਭੋ, ਤਸ੍ਸ ਨਾਗਸ੍ਸ ਕਿਞ੍ਚਿ ਪਸ੍ਸਸੀ’’ਤਿ? ‘‘ਪਸ੍ਸਾਮਹਂ, ਭੋ, ਮਣਿਮਸ੍ਸ [ਮਣਿਸ੍ਸ (ਸੀ. ਕ.)] ਕਣ੍ਠੇ ਪਿਲਨ੍ਧਨ’’ਨ੍ਤਿ. ‘‘ਤੇਨ ਹਿ ਤ੍ਵਂ, ਭੋ, ਤਂ ਨਾਗਂ ਮਣਿਂ ਯਾਚ – ‘ਮਣਿਂ ਮੇ, ਭੋ, ਦੇਹਿ; ਮਣਿਨਾ ਮੇ ਅਤ੍ਥੋ’’’ਤਿ.
ਅਥ ਖੋ, ਭਿਕ੍ਖਵੇ, ਮਣਿਕਣ੍ਠੋ ਨਾਗਰਾਜਾ ਗਙ੍ਗਂ ਨਦਿਂ ਉਤ੍ਤਰਿਤ੍ਵਾ ਯੇਨ ਕਨਿਟ੍ਠੋ ਇਸਿ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਏਕਮਨ੍ਤਂ ਠਿਤਂ ਖੋ, ਭਿਕ੍ਖਵੇ, ਮਣਿਕਣ੍ਠਂ ਨਾਗਰਾਜਾਨਂ ਕਨਿਟ੍ਠੋ ਇਸਿ ਏਤਦਵੋਚ – ‘‘ਮਣਿਂ ਮੇ, ਭੋ, ਦੇਹਿ; ਮਣਿਨਾ ਮੇ ਅਤ੍ਥੋ’’ਤਿ. ਅਥ ਖੋ, ਭਿਕ੍ਖਵੇ, ਮਣਿਕਣ੍ਠੋ ਨਾਗਰਾਜਾ – ‘ਭਿਕ੍ਖੁ ਮਣਿਂ ਯਾਚਤਿ, ਭਿਕ੍ਖੁਸ੍ਸ ਮਣਿਨਾ ਅਤ੍ਥੋ’ਤਿ ਖਿਪ੍ਪਞ੍ਞੇਵ ਅਗਮਾਸਿ. ਦੁਤਿਯਮ੍ਪਿ ਖੋ, ਭਿਕ੍ਖਵੇ, ਮਣਿਕਣ੍ਠੋ ਨਾਗਰਾਜਾ ਗਙ੍ਗਂ ਨਦਿਂ ਉਤ੍ਤਰਿਤ੍ਵਾ ਯੇਨ ਕਨਿਟ੍ਠੋ ਇਸਿ ਤੇਨੁਪਸਙ੍ਕਮਿ. ਅਦ੍ਦਸ ਖੋ, ਭਿਕ੍ਖਵੇ, ਕਨਿਟ੍ਠੋ ਇਸਿ ਮਣਿਕਣ੍ਠਂ ਨਾਗਰਾਜਾਨਂ ਦੂਰਤੋਵ ਆਗਚ੍ਛਨ੍ਤਂ. ਦਿਸ੍ਵਾਨ ਮਣਿਕਣ੍ਠਂ ਨਾਗਰਾਜਾਨਂ ਏਤਦਵੋਚ – ‘‘ਮਣਿਂ ਮੇ, ਭੋ, ਦੇਹਿ; ਮਣਿਨਾ ਮੇ ਅਤ੍ਥੋ’’ਤਿ. ਅਥ ਖੋ, ਭਿਕ੍ਖਵੇ, ਮਣਿਕਣ੍ਠੋ ਨਾਗਰਾਜਾ – ‘‘ਭਿਕ੍ਖੁ ਮਣਿਂ ਯਾਚਤਿ, ਭਿਕ੍ਖੁਸ੍ਸ ਮਣਿਨਾ ਅਤ੍ਥੋ’’ਤਿ ਤਤੋਵ ਪਟਿਨਿਵਤ੍ਤਿ. ਤਤਿਯਮ੍ਪਿ ਖੋ, ਭਿਕ੍ਖਵੇ, ਮਣਿਕਣ੍ਠੋ ਨਾਗਰਾਜਾ ਗਙ੍ਗਂ ਨਦਿਂ ਉਤ੍ਤਰਤਿ. ਅਦ੍ਦਸ ਖੋ, ਭਿਕ੍ਖਵੇ, ਕਨਿਟ੍ਠੋ ਇਸਿ ਮਣਿਕਣ੍ਠਂ ਨਾਗਰਾਜਾਨਂ ਗਙ੍ਗਂ ਨਦਿਂ ਉਤ੍ਤਰਨ੍ਤਂ. ਦਿਸ੍ਵਾਨ ਮਣਿਕਣ੍ਠਂ ਨਾਗਰਾਜਾਨਂ ਏਤਦਵੋਚ – ‘‘ਮਣਿਂ ਮੇ, ਭੋ, ਦੇਹਿ; ਮਣਿਨਾ ਮੇ ਅਤ੍ਥੋ’’ਤਿ. ਅਥ ਖੋ, ਭਿਕ੍ਖਵੇ, ਮਣਿਕਣ੍ਠੋ ਨਾਗਰਾਜਾ ਕਨਿਟ੍ਠਂ ਇਸਿਂ ਗਾਥਾਹਿ ਅਜ੍ਝਭਾਸਿ –
[ਜਾ. ੧.੩.੭ ਮਣਿਕਣ੍ਠਜਾਤਕੇਪਿ] ‘‘ਮਮਨ੍ਨਪਾਨਂ ਵਿਪੁਲਂ ਉਲ਼ਾਰਂ,
ਉਪ੍ਪਜ੍ਜਤੀਮਸ੍ਸ ਮਣਿਸ੍ਸ ਹੇਤੁ;
ਤਂ ਤੇ ਨ ਦਸ੍ਸਂ ਅਤਿਯਾਚਕੋਸਿ;
ਨ ਚਾਪਿ ਤੇ ਅਸ੍ਸਮਮਾਗਮਿਸ੍ਸਂ.
[ਜਾ. ੧.੩.੮ ਮਣਿਕਣ੍ਠਜਾਤਕੇਪਿ] ‘‘ਸੁਸੂ ਯਥਾ ਸਕ੍ਖਰਧੋਤਪਾਣੀ;
ਤਾਸੇਸਿ ਮਂ ਸੇਲਮਾਯਾਚਮਾਨੋ;
ਤਂ ਤੇ ਨ ਦਸ੍ਸਂ ਅਤਿਯਾਚਕੋਸਿ;
ਨ ਚਾਪਿ ਤੇ ਅਸ੍ਸਮਮਾਗਮਿਸ੍ਸ’’ਨ੍ਤਿ.
ਅਥ ਖੋ, ਭਿਕ੍ਖਵੇ, ਮਣਿਕਣ੍ਠੋ ਨਾਗਰਾਜਾ – ‘‘ਭਿਕ੍ਖੁ ਮਣਿਂ ਯਾਚਤਿ, ਭਿਕ੍ਖੁਸ੍ਸ ਮਣਿਨਾ ਅਤ੍ਥੋ’’ਤਿ ਪਕ੍ਕਾਮਿ. ਤਥਾ ਪਕ੍ਕਨ੍ਤੋਵ [ਤਦਾਪਕ੍ਕਨ੍ਤੋਵ (ਕ.)] ਅਹੋਸਿ, ਨ ਪੁਨ ਪਚ੍ਚਾਗਞ੍ਛਿ. ਅਥ ਖੋ, ਭਿਕ੍ਖਵੇ, ਕਨਿਟ੍ਠੋ ਇਸਿ ਤਸ੍ਸ ਨਾਗਸ੍ਸ ਦਸ੍ਸਨੀਯਸ੍ਸ ਅਦਸ੍ਸਨੇਨ ਭਿਯ੍ਯੋਸੋਮਤ੍ਤਾਯ ਕਿਸੋ ਅਹੋਸਿ ਲੂਖੋ ਦੁਬ੍ਬਣ੍ਣੋ, ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ. ਅਦ੍ਦਸ ਖੋ, ਭਿਕ੍ਖਵੇ, ਜੇਟ੍ਠੋ ਇਸਿ ਕਨਿਟ੍ਠਂ ਇਸਿਂ ਭਿਯ੍ਯੋਸੋਮਤ੍ਤਾਯ ਕਿਸਂ ਲੂਖਂ ਦੁਬ੍ਬਣ੍ਣਂ ਉਪ੍ਪਣ੍ਡੁਪ੍ਪਣ੍ਡੁਕਜਾਤਂ ਧਮਨਿਸਨ੍ਥਤਗਤ੍ਤਂ. ਦਿਸ੍ਵਾਨ ਕਨਿਟ੍ਠਂ ਇਸਿਂ ਏਤਦਵੋਚ – ‘‘ਕਿਸ੍ਸ ਤ੍ਵਂ, ਭੋ, ਭਿਯ੍ਯੋਸੋਮਤ੍ਤਾਯ ਕਿਸੋ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ’’ਤਿ? ‘‘ਤਸ੍ਸਾਹਂ, ਭੋ, ਨਾਗਸ੍ਸ ਦਸ੍ਸਨੀਯਸ੍ਸ ਅਦਸ੍ਸਨੇਨ ਭਿਯ੍ਯੋਸੋਮਤ੍ਤਾਯ ਕਿਸੋ ਲੂਖੋ ਦੁਬ੍ਬਣ੍ਣੋ ਉਪ੍ਪਣ੍ਡੁਪ੍ਪਣ੍ਡੁਕਜਾਤੋ ਧਮਨਿਸਨ੍ਥਤਗਤ੍ਤੋ’’ਤਿ. ਅਥ ਖੋ, ਭਿਕ੍ਖਵੇ, ਜੇਟ੍ਠੋ ਇਸਿ ਕਨਿਟ੍ਠਂ ਇਸਿਂ ਗਾਥਾਯ ਅਜ੍ਝਭਾਸਿ –
[ਜਾ. ੧.੩.੯ ਮਣਿਕਣ੍ਠਜਾਤਕੇਪਿ] ‘‘ਨ ਤਂ ਯਾਚੇ ਯਸ੍ਸ ਪਿਯਂ ਜਿਗੀਸੇ,
ਵਿਦੇਸ੍ਸੋ [ਦੇਸ੍ਸੋ (ਸੀ.), ਦੇਸ੍ਸੋ ਚ (ਸ੍ਯਾ.)] ਹੋਤਿ ਅਤਿਯਾਚਨਾਯ;
ਨਾਗੋ ਮਣਿਂ ਯਾਚਿਤੋ ਬ੍ਰਾਹ੍ਮਣੇਨ;
ਅਦਸ੍ਸਨਞ੍ਞੇਵ ਤਦਜ੍ਝਗਮਾ’’ਤਿ.
ਤੇਸਞ੍ਹਿ ਨਾਮ, ਭਿਕ੍ਖਵੇ, ਤਿਰਚ੍ਛਾਨਗਤਾਨਂ ਪਾਣਾਨਂ ਅਮਨਾਪਾ ਭਵਿਸ੍ਸਤਿ ਯਾਚਨਾ ਅਮਨਾਪਾ ਵਿਞ੍ਞਤ੍ਤਿ. ਕਿਮਙ੍ਗਂ [ਕਿਮਙ੍ਗ (ਸੀ.)] ਪਨ ਮਨੁਸ੍ਸਭੂਤਾਨਂ!
੩੪੫. ‘‘ਭੂਤਪੁਬ੍ਬਂ, ਭਿਕ੍ਖਵੇ, ਅਞ੍ਞਤਰੋ ਭਿਕ੍ਖੁ ਹਿਮਵਨ੍ਤਪਸ੍ਸੇ ਵਿਹਰਤਿ ਅਞ੍ਞਤਰਸ੍ਮਿਂ ਵਨਸਣ੍ਡੇ. ਤਸ੍ਸ ਖੋ, ਭਿਕ੍ਖਵੇ, ਵਨਸਣ੍ਡਸ੍ਸ ਅਵਿਦੂਰੇ ਮਹਨ੍ਤਂ ਨਿਨ੍ਨਂ ਪਲ੍ਲਲਂ. ਅਥ ਖੋ,
ਵਾਸਾਯ ਉਪਗਚ੍ਛਤਿ. ਅਥ ਖੋ, ਭਿਕ੍ਖਵੇ, ਸੋ ਭਿਕ੍ਖੁ ਤਸ੍ਸ ਸਕੁਣਸਙ੍ਘਸ੍ਸ ਸਦ੍ਦੇਨ ਉਬ੍ਬਾਲ਼੍ਹੋ ਯੇਨਾਹਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਮਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਅਹਂ, ਭਿਕ੍ਖਵੇ, ਤਂ ਭਿਕ੍ਖੁਂ ਏਤਦਵੋਚ – ‘ਕਚ੍ਚਿ, ਭਿਕ੍ਖੁ, ਖਮਨੀਯਂ ਕਚ੍ਚਿ ਯਾਪਨੀਯਂ ਕਚ੍ਚਿਸਿ ਅਪ੍ਪਕਿਲਮਥੇਨ ਅਦ੍ਧਾਨਂ ਆਗਤੋ? ਕੁਤੋ ਚ ਤ੍ਵਂ, ਭਿਕ੍ਖੁ, ਆਗਚ੍ਛਸੀ’ਤਿ? ‘ਖਮਨੀਯਂ, ਭਗਵਾ, ਯਾਪਨੀਯਂ, ਭਗਵਾ. ਅਪ੍ਪਕਿਲਮਥੇਨ ਚਾਹਂ, ਭਨ੍ਤੇ, ਅਦ੍ਧਾਨਂ ਆਗਤੋ. ਅਤ੍ਥਿ, ਭਨ੍ਤੇ, ਹਿਮਵਨ੍ਤਪਸ੍ਸੇ ਮਹਾਵਨਸਣ੍ਡੋ. ਤਸ੍ਸ ਖੋ ਪਨ, ਭਨ੍ਤੇ, ਵਨਸਣ੍ਡਸ੍ਸ ਅਵਿਦੂਰੇ ਮਹਨ੍ਤਂ ਨਿਨ੍ਨਂ ਪਲ੍ਲਲਂ. ਅਥ ਖੋ, ਭਨ੍ਤੇ, ਮਹਾਸਕੁਣਸਙ੍ਘੋ ਤਸ੍ਮਿਂ ਪਲ੍ਲਲੇ ਦਿਵਸਂ ਗੋਚਰਂ ਚਰਿਤ੍ਵਾ ਸਾਯਂ ਤਂ ਵਨਸਣ੍ਡਂ ਵਾਸਾਯ ਉਪਗਚ੍ਛਤਿ. ਤਤੋ ਅਹਂ, ਭਗਵਾ, ਆਗਚ੍ਛਾਮਿ – ਤਸ੍ਸ ਸਕੁਣਸਙ੍ਘਸ੍ਸ ਸਦ੍ਦੇਨ ਉਬ੍ਬਾਲ਼੍ਹੋ’ਤਿ. ‘ਇਚ੍ਛਸਿ ਪਨ ਤ੍ਵਂ, ਭਿਕ੍ਖੁ, ਤਸ੍ਸ ਸਕੁਣਸਙ੍ਘਸ੍ਸ ਅਨਾਗਮਨ’ਨ੍ਤਿ? ‘ਇਚ੍ਛਾਮਹਂ, ਭਗਵਾ, ਤਸ੍ਸ ਸਕੁਣਸਙ੍ਘਸ੍ਸ ਅਨਾਗਮਨ’ਨ੍ਤਿ. ‘ਤੇਨ ਹਿ ਤ੍ਵਂ, ਭਿਕ੍ਖੁ, ਤਤ੍ਥ ਗਨ੍ਤ੍ਵਾ ਤਂ ਵਨਸਣ੍ਡਂ ਅਜ੍ਝੋਗਾਹੇਤ੍ਵਾ ਰਤ੍ਤਿਯਾ ਪਠਮਂ ਯਾਮਂ ਤਿਕ੍ਖਤ੍ਤੁਂ ਸਦ੍ਦਮਨੁਸ੍ਸਾਵੇਹਿ – ਸੁਣਨ੍ਤੁ ਮੇ, ਭੋਨ੍ਤੋ ਸਕੁਣਾ, ਯਾਵਤਿਕਾ ਇਮਸ੍ਮਿਂ ਵਨਸਣ੍ਡੇ ਵਾਸਂ ਉਪਗਤਾ, ਪਤ੍ਤੇਨ ਮੇ ਅਤ੍ਥੋ. ਏਕੇਕਂ ਮੇ, ਭੋਨ੍ਤੋ, ਪਤ੍ਤਂ ਦਦਨ੍ਤੂ’ਤਿ. ਰਤ੍ਤਿਯਾ ਮਜ੍ਝਿਮਂ ਯਾਮਂ… ਰਤ੍ਤਿਯਾ ਪਚ੍ਛਿਮਂ ਯਾਮਂ ਤਿਕ੍ਖਤ੍ਤੁਂ ਸਦ੍ਦਮਨੁਸ੍ਸਾਵੇਹਿ – ‘ਸੁਣਨ੍ਤੁ ਮੇ, ਭੋਨ੍ਤੋ ਸਕੁਣਾ, ਯਾਵਤਿਕਾ ਇਮਸ੍ਮਿਂ ਵਨਸਣ੍ਡੇ ਵਾਸਂ ਉਪਗਤਾ, ਪਤ੍ਤੇਨ ਮੇ ਅਤ੍ਥੋ. ਏਕੇਕਂ ਮੇ, ਭੋਨ੍ਤੋ, ਪਤ੍ਤਂ ਦਦਨ੍ਤੂ’ਤਿ.
‘‘ਅਥ ਖੋ, ਭਿਕ੍ਖਵੇ, ਸੋ ਭਿਕ੍ਖੁ ਤਤ੍ਥ ਗਨ੍ਤ੍ਵਾ ਤਂ ਵਨਸਣ੍ਡਂ ਅਜ੍ਝੋਗਾਹੇਤ੍ਵਾ ਰਤ੍ਤਿਯਾ ਪਠਮਂ ਯਾਮਂ ਤਿਕ੍ਖਤ੍ਤੁਂ ਸਦ੍ਦਮਨੁਸ੍ਸਾਵੇਸਿ – ‘ਸੁਣਨ੍ਤੁ ਮੇ, ਭੋਨ੍ਤੋ ਸਕੁਣਾ, ਯਾਵਤਿਕਾ ਇਮਸ੍ਮਿਂ ਵਨਸਣ੍ਡੇ ਵਾਸਂ ਉਪਗਤਾ, ਪਤ੍ਤੇਨ ਮੇ ਅਤ੍ਥੋ. ਏਕੇਕਂ ਮੇ, ਭੋਨ੍ਤੋ, ਪਤ੍ਤਂ ਦਦਨ੍ਤੂ’ਤਿ. ਰਤ੍ਤਿਯਾ ਮਜ੍ਝਿਮ ਯਾਮਂ… ਰਤ੍ਤਿਯਾ ਪਚ੍ਛਿਮਂ ਯਾਮਂ ਤਿਕ੍ਖਤ੍ਤੁਂ ਸਦ੍ਦਮਨੁਸ੍ਸਾਵੇਸਿ – ‘ਸੁਣਨ੍ਤੁ ਮੇ, ਭੋਨ੍ਤੋ ਸਕੁਣਾ, ਯਾਵਤਿਕਾ ਇਮਸ੍ਮਿਂ ਵਨਸਣ੍ਡੇ ਵਾਸਂ ਉਪਗਤਾ, ਪਤ੍ਤੇਨ ਮੇ ਅਤ੍ਥੋ. ਏਕੇਕਂ ਮੇ, ਭੋਨ੍ਤੋ, ਪਤ੍ਤਂ ਦਦਨ੍ਤੂ’ਤਿ. ਅਥ ਖੋ, ਭਿਕ੍ਖਵੇ, ਸੋ ਸਕੁਣਸਙ੍ਘੋ – ‘ਭਿਕ੍ਖੁ ਪਤ੍ਤਂ ਯਾਚਤਿ ਭਿਕ੍ਖੁਸ੍ਸ ਪਤ੍ਤੇਨ ਅਤ੍ਥੋ’ਤਿ ਤਮ੍ਹਾ ਵਨਸਣ੍ਡਾ ਪਕ੍ਕਾਮਿ. ਤਥਾ ਪਕ੍ਕਨ੍ਤੋਵ ਅਹੋਸਿ ਨ ਪੁਨ ਪਚ੍ਚਾਗਞ੍ਛਿ. ਤੇਸਞ੍ਹਿ ਨਾਮ, ਭਿਕ੍ਖਵੇ, ਤਿਰਚ੍ਛਾਨਗਤਾਨਂ ਪਾਣਾਨਂ ਅਮਨਾਪਾ ਭਵਿਸ੍ਸਤਿ ਯਾਚਨਾ ਅਮਨਾਪਾ ਵਿਞ੍ਞਤ੍ਤਿ. ਕਿਮਙ੍ਗਂ ਪਨ ਮਨੁਸ੍ਸਭੂਤਾਨਂ’’!
੩੪੬. ‘‘ਭੂਤਪੁਬ੍ਬਂ, ਭਿਕ੍ਖਵੇ, ਰਟ੍ਠਪਾਲਸ੍ਸ ਕੁਲਪੁਤ੍ਤਸ੍ਸ ਪਿਤਾ ਰਟ੍ਠਪਾਲਂ ਕੁਲਪੁਤ੍ਤਂ ਗਾਥਾਯ ਅਜ੍ਝਭਾਸਿ –
‘ਅਪਾਹਂ ਤੇ ਨ ਜਾਨਾਮਿ, ਰਟ੍ਠਪਾਲ ਬਹੂ ਜਨਾ;
[ਜਾ. ੧.੭.੫੪] ਤੇ ਮਂ ਸਙ੍ਗਮ੍ਮ ਯਾਚਨ੍ਤਿ, ਕਸ੍ਮਾ ਮਂ ਤ੍ਵਂ ਨ ਯਾਚਸੀ’ਤਿ.
[ਜਾ. ੧.੭.੫੫] ‘ਯਾਚਕੋ ਅਪ੍ਪਿਯੋ ਹੋਤਿ, ਯਾਚਂ ਅਦਦਮਪ੍ਪਿਯੋ;
ਤਸ੍ਮਾਹਂ ਤਂ ਨ ਯਾਚਾਮਿ, ਮਾ ਮੇ ਵਿਦੇਸ੍ਸਨਾ ਅਹੂ’ਤਿ.
‘‘ਸੋ ਹਿ ਨਾਮ, ਭਿਕ੍ਖਵੇ, ਰਟ੍ਠਪਾਲੋ ਕੁਲਪੁਤ੍ਤੋ ਸਕਂ ਪਿਤਰਂ ਏਵਂ ਵਕ੍ਖਤਿ. ਕਿਮਙ੍ਗਂ ਪਨ ਜਨੋ ਜਨਂ!
੩੪੭. ‘‘ਗਿਹੀਨਂ, ਭਿਕ੍ਖਵੇ, ਦੁਸ੍ਸਂਹਰਾਨਿ ਭੋਗਾਨਿ ਸਮ੍ਭਤਾਨਿਪਿ ਦੁਰਕ੍ਖਿਯਾਨਿ. ਤਤ੍ਥ ਨਾਮ ਤੁਮ੍ਹੇ, ਮੋਘਪੁਰਿਸਾ, ਏਵਂ ਦੁਸ੍ਸਂਹਰੇਸੁ ਭੋਗੇਸੁ ਸਮ੍ਭਤੇਸੁਪਿ ਦੁਰਕ੍ਖਿਯੇਸੁ ਯਾਚਨਬਹੁਲਾ ਵਿਞ੍ਞਤ੍ਤਿਬਹੁਲਾ ਵਿਹਰਿਸ੍ਸਥ – ‘ਪੁਰਿਸਂ ਦੇਥ, ਪੁਰਿਸਤ੍ਥਕਰਂ ਦੇਥ, ਗੋਣਂ ਦੇਥ, ਸਕਟਂ ਦੇਥ, ਵਾਸਿਂ ਦੇਥ, ਪਰਸੁਂ ਦੇਥ, ਕੁਠਾਰਿਂ ਦੇਥ, ਕੁਦਾਲਂ ਦੇਥ, ਨਿਖਾਦਨਂ ਦੇਥ, ਵਲ੍ਲਿਂ ਦੇਥ, ਵੇਲ਼ੁਂ ਦੇਥ, ਮੁਞ੍ਜਂ ਦੇਥ, ਪਬ੍ਬਜਂ ਦੇਥ, ਤਿਣਂ ਦੇਥ, ਮਤ੍ਤਿਕਂ ਦੇਥਾ’’ਤਿ! ਨੇਤਂ, ਮੋਘਪੁਰਿਸਾ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –
੩੪੮. ‘‘ਸਞ੍ਞਾਚਿਕਾਯ ਪਨ ਭਿਕ੍ਖੁਨਾ ਕੁਟਿਂ ਕਾਰਯਮਾਨੇਨ ਅਸ੍ਸਾਮਿਕਂ ਅਤ੍ਤੁਦ੍ਦੇਸਂ ਪਮਾਣਿਕਾ ਕਾਰੇਤਬ੍ਬਾ. ਤਤ੍ਰਿਦਂ ਪਮਾਣਂ – ਦੀਘਸੋ ਦ੍ਵਾਦਸ ਵਿਦਤ੍ਥਿਯੋ, ਸੁਗਤਵਿਦਤ੍ਥਿਯਾ; ਤਿਰਿਯਂ ਸਤ੍ਤਨ੍ਤਰਾ. ਭਿਕ੍ਖੂ ਅਭਿਨੇਤਬ੍ਬਾ ਵਤ੍ਥੁਦੇਸਨਾਯ. ਤੇਹਿ ਭਿਕ੍ਖੂਹਿ ਵਤ੍ਥੁ ਦੇਸੇਤਬ੍ਬਂ – ਅਨਾਰਮ੍ਭਂ [ਅਨਾਰਬ੍ਭਂ (ਕ.)] ਸਪਰਿਕ੍ਕਮਨਂ. ਸਾਰਮ੍ਭੇ [ਸਾਰਬ੍ਭੇ (ਕ.)] ਚੇ ਭਿਕ੍ਖੁ ਵਤ੍ਥੁਸ੍ਮਿਂ ਅਪਰਿਕ੍ਕਮਨੇ ਸਞ੍ਞਾਚਿਕਾਯ ਕੁਟਿਂ ਕਾਰੇਯ੍ਯ, ਭਿਕ੍ਖੂ ਵਾ ਅਨਭਿਨੇਯ੍ਯ ਵਤ੍ਥੁਦੇਸਨਾਯ, ਪਮਾਣਂ ਵਾ ਅਤਿਕ੍ਕਾਮੇਯ੍ਯ, ਸਙ੍ਘਾਦਿਸੇਸੋ’’ਤਿ.
੩੪੯. ਸਞ੍ਞਾਚਿਕਾ ਨਾਮ ਸਯਂ ਯਾਚਿਤ੍ਵਾ ਪੁਰਿਸਮ੍ਪਿ ਪੁਰਿਸਤ੍ਥਕਰਮ੍ਪਿ ਗੋਣਮ੍ਪਿ ਸਕਟਮ੍ਪਿ ਵਾਸਿਮ੍ਪਿ ਪਰਸੁਮ੍ਪਿ ਕੁਠਾਰਿਮ੍ਪਿ ਕੁਦਾਲਮ੍ਪਿ ਨਿਖਾਦਨਮ੍ਪਿ ਵਲ੍ਲਿਮ੍ਪਿ ਵੇਲ਼ੁਮ੍ਪਿ ਮੁਞ੍ਜਮ੍ਪਿ ਪਬ੍ਬਜਮ੍ਪਿ ਤਿਣਮ੍ਪਿ ਮਤ੍ਤਿਕਮ੍ਪਿ.
ਕੁਟਿ ਨਾਮ ਉਲ੍ਲਿਤ੍ਤਾ ਵਾ ਹੋਤਿ ਅਵਲਿਤ੍ਤਾ ਵਾ ਉਲ੍ਲਿਤ੍ਤਾਵਲਿਤ੍ਤਾ ਵਾ.
ਕਾਰਯਮਾਨੇਨਾਤਿ ਕਰੋਨ੍ਤੋ ਵਾ ਕਾਰਾਪੇਨ੍ਤੋ ਵਾ.
ਅਸ੍ਸਾਮਿਕਨ੍ਤਿ ਨ ਅਞ੍ਞੋ ਕੋਚਿ ਸਾਮਿਕੋ ਹੋਤਿ, ਇਤ੍ਥੀ ਵਾ ਪੁਰਿਸੋ ਵਾ ਗਹਟ੍ਠੋ ਵਾ ਪਬ੍ਬਜਿਤੋ ਵਾ.
ਅਤ੍ਤੁਦ੍ਦੇਸਨ੍ਤਿ ਅਤ੍ਤਨੋ ਅਤ੍ਥਾਯ.
ਪਮਾਣਿਕਾ ਕਾਰੇਤਬ੍ਬਾ. ਤਤ੍ਰਿਦਂ ਪਮਾਣਂ – ਦੀਘਸੋ ਦ੍ਵਾਦਸ ਵਿਦਤ੍ਥਿਯੋ, ਸੁਗਤਵਿਦਤ੍ਥਿਯਾਤਿ ਬਾਹਿਰਿਮੇਨ ਮਾਨੇਨ.
ਤਿਰਿਯਂ ਸਤ੍ਤਨ੍ਤਰਾਤਿ ਅਬ੍ਭਨ੍ਤਰਿਮੇਨ ਮਾਨੇਨ.
ਭਿਕ੍ਖੂ ਅਭਿਨੇਤਬ੍ਬਾ ਵਤ੍ਥੁਦੇਸਨਾਯਾਤਿ ਤੇਨ ਕੁਟਿਕਾਰਕੇਨ ਭਿਕ੍ਖੁਨਾ ਕੁਟਿਵਤ੍ਥੁਂ ਸੋਧੇਤ੍ਵਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਹਂ, ਭਨ੍ਤੇ, ਸਞ੍ਞਾਚਿਕਾਯ ਕੁਟਿਂ ਕਤ੍ਤੁਕਾਮੋ ਅਸ੍ਸਾਮਿਕਂ ਅਤ੍ਤੁਦ੍ਦੇਸਂ. ਸੋਹਂ, ਭਨ੍ਤੇ, ਸਙ੍ਘਂ ਕੁਟਿਵਤ੍ਥੁਓਲੋਕਨਂ ਯਾਚਾਮੀ’’ਤਿ. ਦੁਤਿਯਮ੍ਪਿ ਯਾਚਿਤਬ੍ਬਾ. ਤਤਿਯਮ੍ਪਿ ਯਾਚਿਤਬ੍ਬਾ. ਸਚੇ ਸਬ੍ਬੋ ਸਙ੍ਘੋ ਉਸ੍ਸਹਤਿ ਕੁਟਿਵਤ੍ਥੁਂ ਓਲੋਕੇਤੁਂ, ਸਬ੍ਬੇਨ ਸਙ੍ਘੇਨ ਓਲੋਕੇਤਬ੍ਬਂ. ਨੋ ਚੇ ਸਬ੍ਬੋ ਸਙ੍ਘੋ ਉਸ੍ਸਹਤਿ ਕੁਟਿਵਤ੍ਥੁਂ ਓਲੋਕੇਤੁਂ, ਯੇ ਤਤ੍ਥ ਹੋਨ੍ਤਿ ਭਿਕ੍ਖੂ ਬ੍ਯਤ੍ਤਾ ਪਟਿਬਲਾ ਸਾਰਮ੍ਭਂ ਅਨਾਰਮ੍ਭਂ ਸਪਰਿਕ੍ਕਮਨਂ ਅਪਰਿਕ੍ਕਮਨਂ ਜਾਨਿਤੁਂ ਤੇ ਯਾਚਿਤ੍ਵਾ ਸਮ੍ਮਨ੍ਨਿਤਬ੍ਬਾ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
੩੫੦. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਸਞ੍ਞਾਚਿਕਾਯ ਕੁਟਿਂ ਕਤ੍ਤੁਕਾਮੋ ਅਸ੍ਸਾਮਿਕਂ ਅਤ੍ਤੁਦ੍ਦੇਸਂ. ਸੋ ਸਙ੍ਘਂ ਕੁਟਿਵਤ੍ਥੁਓਲੋਕਨਂ ਯਾਚਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਞ੍ਚ ਇਤ੍ਥਨ੍ਨਾਮਞ੍ਚ ਭਿਕ੍ਖੂ ਸਮ੍ਮਨ੍ਨੇਯ੍ਯ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਕੁਟਿਵਤ੍ਥੁਂ ਓਲੋਕੇਤੁਂ. ਏਸਾ ਞਤ੍ਤਿ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਸਞ੍ਞਾਚਿਕਾਯ ਕੁਟਿਂ ਕਤ੍ਤੁਕਾਮੋ ਅਸ੍ਸਾਮਿਕਂ ਅਤ੍ਤੁਦ੍ਦੇਸਂ. ਸੋ ਸਙ੍ਘਂ ਕੁਟਿਵਤ੍ਥੁਓਲੋਕਨਂ ਯਾਚਤਿ. ਸਙ੍ਘੋ ਇਤ੍ਥਨ੍ਨਾਮਞ੍ਚ ਇਤ੍ਥਨ੍ਨਾਮਞ੍ਚ ਭਿਕ੍ਖੂ ਸਮ੍ਮਨ੍ਨਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਕੁਟਿਵਤ੍ਥੁਂ ਓਲੋਕੇਤੁਂ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਚ ਇਤ੍ਥਨ੍ਨਾਮਸ੍ਸ ਚ ਭਿਕ੍ਖੂਨਂ ਸਮ੍ਮੁਤਿ [ਸਮ੍ਮਤਿ (ਸ੍ਯਾ.)] ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਕੁਟਿਵਤ੍ਥੁਂ ਓਲੋਕੇਤੁਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.
‘‘ਸਮ੍ਮਤਾ ਸਙ੍ਘੇਨ ਇਤ੍ਥਨ੍ਨਾਮੋ ਚ ਇਤ੍ਥਨ੍ਨਾਮੋ ਚ ਭਿਕ੍ਖੂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਕੁਟਿਵਤ੍ਥੁਂ ਓਲੋਕੇਤੁਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.
੩੫੧. ਤੇਹਿ ਸਮ੍ਮਤੇਹਿ ਭਿਕ੍ਖੂਹਿ ਤਤ੍ਥ ਗਨ੍ਤ੍ਵਾ ਕੁਟਿਵਤ੍ਥੁ ਓਲੋਕੇਤਬ੍ਬਂ, ਸਾਰਮ੍ਭਂ ਅਨਾਰਮ੍ਭਂ ਸਪਰਿਕ੍ਕਮਨਂ ਅਪਰਿਕ੍ਕਮਨਂ ਜਾਨਿਤਬ੍ਬਂ. ਸਚੇ ਸਾਰਮ੍ਭਂ ਹੋਤਿ ਅਪਰਿਕ੍ਕਮਨਂ, ‘ਮਾ ਇਧ ਕਰੀ’ਤਿ ਵਤ੍ਤਬ੍ਬੋ. ਸਚੇ ਅਨਾਰਮ੍ਭਂ ਹੋਤਿ ਸਪਰਿਕ੍ਕਮਨਂ, ਸਙ੍ਘਸ੍ਸ ਆਰੋਚੇਤਬ੍ਬਂ – ‘ਅਨਾਰਮ੍ਭਂ ਸਪਰਿਕ੍ਕਮਨ’ਨ੍ਤਿ. ਤੇਨ ਕੁਟਿਕਾਰਕੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਹਂ, ਭਨ੍ਤੇ, ਸਞ੍ਞਾਚਿਕਾਯ ਕੁਟਿਂ ਕਤ੍ਤੁਕਾਮੋ ਅਸ੍ਸਾਮਿਕਂ ਅਤ੍ਤੁਦ੍ਦੇਸਂ. ਸੋਹਂ, ਭਨ੍ਤੇ, ਸਙ੍ਘਂ ਕੁਟਿਵਤ੍ਥੁਦੇਸਨਂ ਯਾਚਾਮੀ’’ਤਿ. ਦੁਤਿਯਮ੍ਪਿ ਯਾਚਿਤਬ੍ਬਾ. ਤਤਿਯਮ੍ਪਿ ਯਾਚਿਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –
੩੫੨. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਸਞ੍ਞਾਚਿਕਾਯ ਕੁਟਿਂ ਕਤ੍ਤੁਕਾਮੋ ਅਸ੍ਸਾਮਿਕਂ ਅਤ੍ਤੁਦ੍ਦੇਸਂ. ਸੋ ਸਙ੍ਘਂ ਕੁਟਿਵਤ੍ਥੁਦੇਸਨਂ ਯਾਚਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਕੁਟਿਵਤ੍ਥੁਂ ਦੇਸੇਯ੍ਯ. ਏਸਾ ਞਤ੍ਤਿ.
‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਸਞ੍ਞਾਚਿਕਾਯ ਕੁਟਿਂ ਕਤ੍ਤੁਕਾਮੋ ਅਸ੍ਸਾਮਿਕਂ ਅਤ੍ਤੁਦ੍ਦੇਸਂ. ਸੋ ਸਙ੍ਘਂ ਕੁਟਿਵਤ੍ਥੁਦੇਸਨਂ ਯਾਚਤਿ. ਸਙ੍ਘੋ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਕੁਟਿਵਤ੍ਥੁਂ ਦੇਸੇਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਕੁਟਿਵਤ੍ਥੁਸ੍ਸ ਦੇਸਨਾ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.
‘‘ਦੇਸਿਤਂ ਸਙ੍ਘੇਨ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਕੁਟਿਵਤ੍ਥੁ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.
੩੫੩. ਸਾਰਮ੍ਭਂ ਨਾਮ ਕਿਪਿਲ੍ਲਿਕਾਨਂ ਵਾ ਆਸਯੋ ਹੋਤਿ, ਉਪਚਿਕਾਨਂ ਵਾ ਆਸਯੋ ਹੋਤਿ, ਉਨ੍ਦੁਰਾਨਂ ਵਾ ਆਸਯੋ ਹੋਤਿ, ਅਹੀਨਂ ਵਾ ਆਸਯੋ ਹੋਤਿ, ਵਿਚ੍ਛਿਕਾਨਂ ਵਾ ਆਸਯੋ ਹੋਤਿ, ਸਤਪਦੀਨਂ ਵਾ ਆਸਯੋ ਹੋਤਿ, ਹਤ੍ਥੀਨਂ ਵਾ ਆਸਯੋ ਹੋਤਿ, ਅਸ੍ਸਾਨਂ ਵਾ ਆਸਯੋ ਹੋਤਿ, ਸੀਹਾਨਂ ਵਾ ਆਸਯੋ ਹੋਤਿ, ਬ੍ਯਗ੍ਘਾਨਂ ਵਾ ਆਸਯੋ ਹੋਤਿ, ਦੀਪੀਨਂ ਵਾ ਆਸਯੋ ਹੋਤਿ, ਅਚ੍ਛਾਨਂ ਵਾ ਆਸਯੋ ਹੋਤਿ, ਤਰਚ੍ਛਾਨਂ ਵਾ ਆਸਯੋ ਹੋਤਿ, ਯੇਸਂ ਕੇਸਞ੍ਚਿ ਤਿਰਚ੍ਛਾਨਗਤਾਨਂ ਪਾਣਾਨਂ ਆਸਯੋ ਹੋਤਿ, ਪੁਬ੍ਬਣ੍ਣਨਿਸ੍ਸਿਤਂ ਵਾ ਹੋਤਿ, ਅਪਰਣ੍ਣਨਿਸ੍ਸਿਤਂ ਵਾ ਹੋਤਿ, ਅਬ੍ਭਾਘਾਤਨਿਸ੍ਸਿਤਂ ਵਾ ਹੋਤਿ, ਆਘਾਤਨਨਿਸ੍ਸਿਤਂ ਵਾ ਹੋਤਿ, ਸੁਸਾਨਨਿਸ੍ਸਿਤਂ ਵਾ ਹੋਤਿ, ਉਯ੍ਯਾਨਨਿਸ੍ਸਿਤਂ ਵਾ ਹੋਤਿ, ਰਾਜਵਤ੍ਥੁਨਿਸ੍ਸਿਤਂ ਵਾ ਹੋਤਿ, ਹਤ੍ਥਿਸਾਲਾਨਿਸ੍ਸਿਤਂ ਵਾ ਹੋਤਿ, ਅਸ੍ਸਸਾਲਾਨਿਸ੍ਸਿਤਂ ਵਾ ਹੋਤਿ, ਬਨ੍ਧਨਾਗਾਰਨਿਸ੍ਸਿਤਂ ਵਾ ਹੋਤਿ, ਪਾਨਾਗਾਰਨਿਸ੍ਸਿਤਂ ਵਾ ਹੋਤਿ, ਸੂਨਨਿਸ੍ਸਿਤਂ ਵਾ ਹੋਤਿ, ਰਚ੍ਛਾਨਿਸ੍ਸਿਤਂ ਵਾ ਹੋਤਿ, ਚਚ੍ਚਰਨਿਸ੍ਸਿਤਂ ਵਾ ਹੋਤਿ, ਸਭਾਨਿਸ੍ਸਿਤਂ ਵਾ ਹੋਤਿ, ਸਂਸਰਣਨਿਸ੍ਸਿਤਂ ਵਾ [ਸਞ੍ਚਰਣਨਿਸ੍ਸਿਤਂ ਵਾ (ਕ.)] ਹੋਤਿ. ਏਤਂ ਸਾਰਮ੍ਭਂ ਨਾਮ.
ਅਪਰਿਕ੍ਕਮਨਂ ਨਾਮ ਨ ਸਕ੍ਕਾ ਹੋਤਿ ਯਥਾਯੁਤ੍ਤੇਨ ਸਕਟੇਨ ਅਨੁਪਰਿਗਨ੍ਤੁਂ ਸਮਨ੍ਤਾ ਨਿਸ੍ਸੇਣਿਯਾ ਅਨੁਪਰਿਗਨ੍ਤੁਂ. ਏਤਂ ਅਪਰਿਕ੍ਕਮਨਂ ਨਾਮ.
ਅਨਾਰਮ੍ਭਂ ਨਾਮ ਨ ਕਿਪਿਲ੍ਲਿਕਾਨਂ ਵਾ ਆਸਯੋ ਹੋਤਿ, ਨ ਉਪਚਿਕਾਨਂ ਵਾ ਆਸਯੋ ਹੋਤਿ, ਨ ਉਨ੍ਦੁਰਾਨਂ ਵਾ ਆਸਯੋ ਹੋਤਿ, ਨ ਅਹੀਨਂ ਵਾ ਆਸਯੋ ਹੋਤਿ, ਨ ਵਿਚ੍ਛਿਕਾਨਂ ਵਾ ਆਸਯੋ ਹੋਤਿ, ਨ ਸਤਪਦੀਨਂ ਵਾ ਆਸਯੋ ਹੋਤਿ…ਪੇ… ਨ ਸਂਸਰਣਨਿਸ੍ਸਿਤਂ ਵਾ ਹੋਤਿ. ਏਤਂ ਅਨਾਰਮ੍ਭਂ ਨਾਮ.
ਸਪਰਿਕ੍ਕਮਨਂ ਨਾਮ ਸਕ੍ਕਾ ਹੋਤਿ ਯਥਾਯੁਤ੍ਤੇਨ ਸਕਟੇਨ ਅਨੁਪਰਿਗਨ੍ਤੁਂ, ਸਮਨ੍ਤਾ ਨਿਸ੍ਸੇਣਿਯਾ ਅਨੁਪਰਿਗਨ੍ਤੁਂ. ਏਤਂ ਸਪਰਿਕ੍ਕਮਨਂ ਨਾਮ.
ਸਞ੍ਞਾਚਿਕਾ ਨਾਮ ਸਯਂ ਯਾਚਿਤ੍ਵਾ ਪੁਰਿਸਮ੍ਪਿ ਪੁਰਿਸਤ੍ਥਕਰਮ੍ਪਿ…ਪੇ… ਮਤ੍ਤਿਕਮ੍ਪਿ.
ਕੁਟਿ ਨਾਮ ਉਲ੍ਲਿਤ੍ਤਾ ਵਾ ਹੋਤਿ ਵਾ ਅਵਲਿਤ੍ਤਾ ਵਾ ਉਲ੍ਲਿਤ੍ਤਾਵਲਿਤ੍ਤਾ ਵਾ.
ਕਾਰੇਯ੍ਯਾਤਿ ਕਰੋਤਿ ਵਾ ਕਾਰਾਪੇਤਿ ਵਾ.
ਭਿਕ੍ਖੂ ਵਾ ਅਨਭਿਨੇਯ੍ਯ, ਵਤ੍ਥੁਦੇਸਨਾਯ ਪਮਾਣਂ ਵਾ ਅਤਿਕ੍ਕਾਮੇਯ੍ਯਾਤਿ ਞਤ੍ਤਿਦੁਤਿਯੇਨ ਕਮ੍ਮੇਨ ਕੁਟਿਵਤ੍ਥੁਂ ਨ ਦੇਸਾਪੇਤ੍ਵਾ, ਆਯਾਮਤੋ ਵਾ ਵਿਤ੍ਥਾਰਤੋ ਵਾ ਅਨ੍ਤਮਸੋ ਕੇਸਗ੍ਗਮਤ੍ਤਮ੍ਪਿ ਅਤਿਕ੍ਕਾਮੇਤ੍ਵਾ ਕਰੋਤਿ ਵਾ ਕਾਰਾਪੇਤਿ ਵਾ, ਪਯੋਗੇ ਪਯੋਗੇ ਦੁਕ੍ਕਟਂ. ਏਕਂ ਪਿਣ੍ਡਂ ਅਨਾਗਤੇ ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਤਸ੍ਮਿਂ ਪਿਣ੍ਡੇ ਆਗਤੇ ਆਪਤ੍ਤਿ ਸਙ੍ਘਾਦਿਸੇਸਸ੍ਸ.
ਸਙ੍ਘਾਦਿਸੇਸੋਤਿ…ਪੇ… ਤੇਨਪਿ ਵੁਚ੍ਚਤਿ ਸਙ੍ਘਾਦਿਸੇਸੋਤਿ.
੩੫੪. ਭਿਕ੍ਖੁ ਕੁਟਿਂ ਕਰੋਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ. ਭਿਕ੍ਖੁ ਕੁਟਿਂ ਕਰੋਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ. ਭਿਕ੍ਖੁ ਕੁਟਿਂ ਕਰੋਤਿ ਅਦੇਸਿਤਵਤ੍ਥੁਕਂ ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ. ਭਿਕ੍ਖੁ ਕੁਟਿਂ ਕਰੋਤਿ ਅਦੇਸਿਤਵਤ੍ਥੁਕਂ ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.
੩੫੫. ਭਿਕ੍ਖੁ ਕੁਟਿਂ ਕਰੋਤਿ ਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ. ਭਿਕ੍ਖੁ ਕੁਟਿਂ ਕਰੋਤਿ ਦੇਸਿਤਵਤ੍ਥੁਕਂ ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ. ਭਿਕ੍ਖੁ ਕੁਟਿਂ ਕਰੋਤਿ ਦੇਸਿਤਵਤ੍ਥੁਕਂ ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ. ਭਿਕ੍ਖੁ ਕੁਟਿਂ ਕਰੋਤਿ ਦੇਸਿਤਵਤ੍ਥੁਕਂ ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
ਭਿਕ੍ਖੁ ਕੁਟਿਂ ਕਰੋਤਿ ਪਮਾਣਾਤਿਕ੍ਕਨ੍ਤਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ. ਭਿਕ੍ਖੁ ਕੁਟਿਂ ਕਰੋਤਿ ਪਮਾਣਾਤਿਕ੍ਕਨ੍ਤਂ ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ. ਭਿਕ੍ਖੁ ਕੁਟਿਂ ਕਰੋਤਿ ਪਮਾਣਾਤਿਕ੍ਕਨ੍ਤਂ ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ. ਭਿਕ੍ਖੁ ਕੁਟਿਂ ਕਰੋਤਿ ਪਮਾਣਾਤਿਕ੍ਕਨ੍ਤਂ ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.
ਭਿਕ੍ਖੁ ਕੁਟਿਂ ਕਰੋਤਿ ਪਮਾਣਿਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ. ਭਿਕ੍ਖੁ ਕੁਟਿਂ ਕਰੋਤਿ ਪਮਾਣਿਕਂ ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ. ਭਿਕ੍ਖੁ ਕੁਟਿਂ ਕਰੋਤਿ ਪਮਾਣਿਕਂ ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ. ਭਿਕ੍ਖੁ ਕੁਟਿਂ ਕਰੋਤਿ ਪਮਾਣਿਕਂ ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
ਭਿਕ੍ਖੁ ਕੁਟਿਂ ਕਰੋਤਿ ਅਦੇਸਿਤਵਤ੍ਥੁਕਂ ਪਮਾਣਾਤਿਕ੍ਕਨ੍ਤਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ. ਭਿਕ੍ਖੁ ਕੁਟਿਂ ਕਰੋਤਿ ਅਦੇਸਿਤਵਤ੍ਥੁਕਂ ਪਮਾਣਾਤਿਕ੍ਕਨ੍ਤਂ ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ. ਭਿਕ੍ਖੁ ਕੁਟਿਂ ਕਰੋਤਿ ਅਦੇਸਿਤਵਤ੍ਥੁਕਂ ਪਮਾਣਾਤਿਕ੍ਕਨ੍ਤਂ ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ. ਭਿਕ੍ਖੁ ਕੁਟਿਂ ਕਰੋਤਿ ਅਦੇਸਿਤਵਤ੍ਥੁਕਂ ਪਮਾਣਾਤਿਕ੍ਕਨ੍ਤਂ ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸਾਨਂ.
ਭਿਕ੍ਖੁ ਕੁਟਿਂ ਕਰੋਤਿ ਦੇਸਿਤਵਤ੍ਥੁਕਂ ਪਮਾਣਿਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ. ਭਿਕ੍ਖੁ ਕੁਟਿਂ ਕਰੋਤਿ ਦੇਸਿਤਵਤ੍ਥੁਕਂ ਪਮਾਣਿਕਂ ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ. ਭਿਕ੍ਖੁ ਕੁਟਿਂ ਕਰੋਤਿ ਦੇਸਿਤਵਤ੍ਥੁਕਂ ਪਮਾਣਿਕਂ ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ. ਭਿਕ੍ਖੁ ਕੁਟਿਂ ਕਰੋਤਿ ਦੇਸਿਤਵਤ੍ਥੁਕਂ ਪਮਾਣਿਕਂ ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
੩੫੬. ਭਿਕ੍ਖੁ ਸਮਾਦਿਸਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.
ਭਿਕ੍ਖੁ ਸਮਾਦਿਸਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
ਭਿਕ੍ਖੁ ਸਮਾਦਿਸਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਪਮਾਣਾਤਿਕ੍ਕਨ੍ਤਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.
ਭਿਕ੍ਖੁ ਸਮਾਦਿਸਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਪਮਾਣਿਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
ਭਿਕ੍ਖੁ ਸਮਾਦਿਸਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਪਮਾਣਾਤਿਕ੍ਕਨ੍ਤਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸਾਨਂ.
ਭਿਕ੍ਖੁ ਸਮਾਦਿਸਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਪਮਾਣਿਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
੩੫੭. ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਨ ਚ ਸਮਾਦਿਸਤਿ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਨ ਚ ਸਮਾਦਿਸਤਿ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਨ ਚ ਸਮਾਦਿਸਤਿ – ‘‘ਪਮਾਣਿਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਪਮਾਣਾਤਿਕ੍ਕਨ੍ਤਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਨ ਚ ਸਮਾਦਿਸਤਿ – ‘‘ਪਮਾਣਿਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਪਮਾਣਿਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਨ ਚ ਸਮਾਦਿਸਤਿ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਪਮਾਣਿਕਾ ਚ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਪਮਾਣਾਤਿਕ੍ਕਨ੍ਤਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ …ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸਾਨਂ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਨ ਚ ਸਮਾਦਿਸਤਿ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਪਮਾਣਿਕਾ ਚ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਪਮਾਣਿਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
੩੫੮. ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਸੁਣਾਤਿ – ‘‘ਕੁਟਿ ਕਿਰ ਮੇ ਕਯਿਰਤਿ ਅਦੇਸਿਤਵਤ੍ਥੁਕਾ ਸਾਰਮ੍ਭਾ ਅਪਰਿਕ੍ਕਮਨਾ’’ਤਿ. ਤੇਨ ਭਿਕ੍ਖੁਨਾ ਸਾਮਂ ਵਾ ਗਨ੍ਤਬ੍ਬਂ ਦੂਤੋ ਵਾ ਪਾਹੇਤਬ੍ਬੋ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਨੋ ਚੇ ਸਾਮਂ ਵਾ ਗਚ੍ਛੇਯ੍ਯ ਦੂਤਂ ਵਾ ਪਹਿਣੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਸਪਰਿਕ੍ਕਮਨਂ. ਸੋ ਸੁਣਾਤਿ – ‘‘ਕੁਟਿ ਕਿਰ ਮੇ ਕਯਿਰਤਿ ਅਦੇਸਿਤਵਤ੍ਥੁਕਾ ਸਾਰਮ੍ਭਾ ਸਪਰਿਕ੍ਕਮਨਾ’’ਤਿ. ਤੇਨ ਭਿਕ੍ਖੁਨਾ ਸਾਮਂ ਵਾ ਗਨ੍ਤਬ੍ਬਂ ਦੂਤੋ ਵਾ ਪਾਹੇਤਬ੍ਬੋ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚਾ’’ਤਿ. ਨੋ ਚੇ ਸਾਮਂ ਵਾ ਗਚ੍ਛੇਯ੍ਯ ਦੂਤਂ ਵਾ ਪਹਿਣੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਅਨਾਰਮ੍ਭਂ ਅਪਰਿਕ੍ਕਮਨਂ. ਸੋ ਸੁਣਾਤਿ – ‘‘ਕੁਟਿ ਕਿਰ ਮੇ ਕਯਿਰਤਿ ਅਦੇਸਿਤਵਤ੍ਥੁਕਾ ਅਨਾਰਮ੍ਭਾ ਅਪਰਿਕ੍ਕਮਨਾ’’ਤਿ. ਤੇਨ ਭਿਕ੍ਖੁਨਾ ਸਾਮਂ ਵਾ ਗਨ੍ਤਬ੍ਬਂ ਦੂਤੋ ਵਾ ਪਾਹੇਤਬ੍ਬੋ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਸਪਰਿਕ੍ਕਮਨਾ ਚਾ’’ਤਿ. ਨੋ ਚੇ ਸਾਮਂ ਵਾ ਗਚ੍ਛੇਯ੍ਯ ਦੂਤਂ ਵਾ ਪਹਿਣੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਅਨਾਰਮ੍ਭਂ ਸਪਰਿਕ੍ਕਮਨਂ. ਸੋ ਸੁਣਾਤਿ – ‘‘ਕੁਟਿ ਕਿਰ ਮੇ ਕਯਿਰਤਿ ਅਦੇਸਿਤਵਤ੍ਥੁਕਾ ਅਨਾਰਮ੍ਭਾ ਸਪਰਿਕ੍ਕਮਨਾ’’ਤਿ. ਤੇਨ ਭਿਕ੍ਖੁਨਾ ਸਾਮਂ ਵਾ ਗਨ੍ਤਬ੍ਬਂ ਦੂਤੋ ਵਾ ਪਾਹੇਤਬ੍ਬੋ – ‘‘ਦੇਸਿਤਵਤ੍ਥੁਕਾ ਹੋਤੂ’’ਤਿ. ਨੋ ਚੇ ਸਾਮਂ ਵਾ ਗਚ੍ਛੇਯ੍ਯ ਦੂਤਂ ਵਾ ਪਹਿਣੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਸੁਣਾਤਿ – ‘‘ਕੁਟਿ ਕਿਰ ਮੇ ਕਯਿਰਤਿ ਦੇਸਿਤਵਤ੍ਥੁਕਾ ਸਾਰਮ੍ਭਾ ਅਪਰਿਕ੍ਕਮਨਾ’’ਤਿ. ਤੇਨ ਭਿਕ੍ਖੁਨਾ ਸਾਮਂ ਵਾ ਗਨ੍ਤਬ੍ਬਂ ਦੂਤੋ ਵਾ ਪਾਹੇਤਬ੍ਬੋ – ‘‘ਅਨਾਰਮ੍ਭਾ ਚ ਹੋਤੁ ਸਪਰਿਕ੍ਕਮਨਾ ਚਾ’’ਤਿ. ਨੋ ਚੇ ਸਾਮਂ ਵਾ ਗਚ੍ਛੇਯ੍ਯ ਦੂਤਂ ਵਾ ਪਹਿਣੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਸਾਰਮ੍ਭਂ ਸਪਰਿਕ੍ਕਮਨਂ. ਸੋ ਸੁਣਾਤਿ – ‘‘ਕੁਟਿ ਕਿਰ ਮੇ ਕਯਿਰਤਿ ਦੇਸਿਤਵਤ੍ਥੁਕਾ ਸਾਰਮ੍ਭਾ ਸਪਰਿਕ੍ਕਮਨਾ’’ਤਿ. ਤੇਨ ਭਿਕ੍ਖੁਨਾ ਸਾਮਂ ਵਾ ਗਨ੍ਤਬ੍ਬਂ ਦੂਤੋ ਵਾ ਪਾਹੇਤਬ੍ਬੋ – ‘‘ਅਨਾਰਮ੍ਭਾ ਹੋਤੂ’’ਤਿ. ਨੋ ਚੇ ਸਾਮਂ ਵਾ ਗਚ੍ਛੇਯ੍ਯ ਦੂਤਂ ਵਾ ਪਹਿਣੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਅਨਾਰਮ੍ਭਂ ਅਪਰਿਕ੍ਕਮਨਂ. ਸੋ ਸੁਣਾਤਿ – ‘‘ਕੁਟਿ ਕਿਰ ਮੇ ਕਯਿਰਤਿ ਦੇਸਿਤਵਤ੍ਥੁਕਾ ਅਨਾਰਮ੍ਭਾ ਅਪਰਿਕ੍ਕਮਨਾ’’ਤਿ. ਤੇਨ ਭਿਕ੍ਖੁਨਾ ਸਾਮਂ ਵਾ ਗਨ੍ਤਬ੍ਬਂ ਦੂਤੋ ਵਾ ਪਾਹੇਤਬ੍ਬੋ – ‘‘ਸਪਰਿਕ੍ਕਮਨਾ ਹੋਤੂ’’ਤਿ. ਨੋ ਚੇ ਸਾਮਂ ਵਾ ਗਚ੍ਛੇਯ੍ਯ ਦੂਤਂ ਵਾ ਪਹਿਣੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
੩੫੯. ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਪਮਾਣਿਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਪਮਾਣਾਤਿਕ੍ਕਨ੍ਤਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਸੁਣਾਤਿ – ‘‘ਕੁਟਿ ਕਿਰ ਮੇ ਕਯਿਰਤਿ ਪਮਾਣਾਤਿਕ੍ਕਨ੍ਤਾ ਸਾਰਮ੍ਭਾ ਅਪਰਿਕ੍ਕਮਨਾ’’ਤਿ. ਤੇਨ ਭਿਕ੍ਖੁਨਾ ਸਾਮਂ ਵਾ ਗਨ੍ਤਬ੍ਬਂ ਦੂਤੋ ਵਾ ਪਾਹੇਤਬ੍ਬੋ – ‘‘ਪਮਾਣਿਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ…ਪੇ… ‘‘ਪਮਾਣਿਕਾ ਚ ਹੋਤੁ ਅਨਾਰਮ੍ਭਾ ਚਾ’’ਤਿ…ਪੇ… ‘‘ਪਮਾਣਿਕਾ ਚ ਹੋਤੁ ਸਪਰਿਕ੍ਕਮਨਾ ਚਾ’’ਤਿ…ਪੇ… ‘‘ਪਮਾਣਿਕਾ ਹੋਤੂ’’ਤਿ. ਨੋ ਚੇ ਸਾਮਂ ਵਾ ਗਚ੍ਛੇਯ੍ਯ ਦੂਤਂ ਵਾ ਪਹਿਣੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਪਮਾਣਿਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਪਮਾਣਿਕਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਸੁਣਾਤਿ – ‘‘ਕੁਟਿ ਕਿਰ ਮੇ ਕਯਿਰਤਿ ਪਮਾਣਿਕਾ ਸਾਰਮ੍ਭਾ ਅਪਰਿਕ੍ਕਮਨਾ’’ਤਿ. ਤੇਨ ਭਿਕ੍ਖੁਨਾ ਸਾਮਂ ਵਾ ਗਨ੍ਤਬ੍ਬਂ ਦੂਤੋ ਵਾ ਪਾਹੇਤਬ੍ਬੋ – ‘‘ਅਨਾਰਮ੍ਭਾ ਚ ਹੋਤੁ ਸਪਰਿਕ੍ਕਮਨਾ ਚਾ’’ਤਿ…ਪੇ… ‘‘ਅਨਾਰਮ੍ਭਾ ਹੋਤੂ’’ਤਿ…ਪੇ… ‘‘ਸਪਰਿਕ੍ਕਮਨਾ ਹੋਤੂ’’ਤਿ…ਪੇ… ਅਨਾਪਤ੍ਤਿ.
੩੬੦. ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਪਮਾਣਿਕਾ ਚ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਪਮਾਣਾਤਿਕ੍ਕਨ੍ਤਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਸੁਣਾਤਿ – ‘‘ਕੁਟਿ ਕਿਰ ਮੇ ਕਯਿਰਤਿ ਅਦੇਸਿਤਵਤ੍ਥੁਕਾ ਪਮਾਣਾਤਿਕ੍ਕਨ੍ਤਾ ਸਾਰਮ੍ਭਾ ਅਪਰਿਕ੍ਕਮਨਾ’’ਤਿ. ਤੇਨ ਭਿਕ੍ਖੁਨਾ ਸਾਮਂ ਵਾ ਗਨ੍ਤਬ੍ਬਂ ਦੂਤੋ ਵਾ ਪਾਹੇਤਬ੍ਬੋ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਪਮਾਣਿਕਾ ਚ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ…ਪੇ… ‘‘ਦੇਸਿਤਵਤ੍ਥੁਕਾ ਚ ਹੋਤੁ ਪਮਾਣਿਕਾ ਚ ਅਨਾਰਮ੍ਭਾ ਚਾ’’ਤਿ…ਪੇ… ‘‘ਦੇਸਿਤਵਤ੍ਥੁਕਾ ਚ ਹੋਤੁ ਪਮਾਣਿਕਾ ਚ ਸਪਰਿਕ੍ਕਮਨਾ ਚਾ’’ਤਿ…ਪੇ… ‘‘ਦੇਸਿਤਵਤ੍ਥੁਕਾ ਚ ਹੋਤੁ ਪਮਾਣਿਕਾ ਚਾ’’ਤਿ. ਨੋ ਚੇ ਸਾਮਂ ਵਾ ਗਚ੍ਛੇਯ੍ਯ ਦੂਤਂ ਵਾ ਪਹਿਣੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਪਮਾਣਿਕਾ ਚ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਪਮਾਣਿਕਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਸੁਣਾਤਿ – ‘‘ਕੁਟਿ ਕਿਰ ਮੇ ਕਯਿਰਤਿ ਦੇਸਿਤਵਤ੍ਥੁਕਾ ਪਮਾਣਿਕਾ ਸਾਰਮ੍ਭਾ ਅਪਰਿਕ੍ਕਮਨਾ’’ਤਿ. ਤੇਨ ਭਿਕ੍ਖੁਨਾ ਸਾਮਂ ਵਾ ਗਨ੍ਤਬ੍ਬਂ ਦੂਤੋ ਵਾ ਪਾਹੇਤਬ੍ਬੋ – ‘‘ਅਨਾਰਮ੍ਭਾ ਚ ਹੋਤੁ ਸਪਰਿਕ੍ਕਮਨਾ ਚਾ’’ਤਿ…ਪੇ… ‘‘ਅਨਾਰਮ੍ਭਾ ਹੋਤੂ’’ਤਿ…ਪੇ… ‘‘ਸਪਰਿਕ੍ਕਮਨਾ ਹੋਤੂ’’ਤਿ…ਪੇ… ਅਨਾਪਤ੍ਤਿ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਤਿਣ੍ਣਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦੁਕ੍ਕਟਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦ੍ਵਿਨ੍ਨਂ ਦੁਕ੍ਕਾਟਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਪਮਾਣਿਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਪਮਾਣਾਤਿਕ੍ਕਨ੍ਤਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਤਿਣ੍ਣਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ ਆਪਤ੍ਤਿ ਕਾਰੁਕਾਨਂ ਦੁਕ੍ਕਟਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਪਮਾਣਿਕਾ ਚ ਹੋਤੁ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਪਮਾਣਿਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਪਮਾਣਿਕਾ ਚ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਪਮਾਣਾਤਿਕ੍ਕਨ੍ਤਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਚਤੁਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਤਿਣ੍ਣਂ ਦੁਕ੍ਕਟਾਨਂ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਤਿਣ੍ਣਂ ਦੁਕ੍ਕਟਾਨਂ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦ੍ਵਿਨ੍ਨਂ ਦੁਕ੍ਕਟਾਨਂ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕਾ ਚ ਹੋਤੁ ਪਮਾਣਿਕਾ ਚ ਅਨਾਰਮ੍ਭਾ ਚ ਸਪਰਿਕ੍ਕਮਨਾ ਚਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਪਮਾਣਿਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
੩੬੧. ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਚੇ ਵਿਪ੍ਪਕਤੇ ਆਗਚ੍ਛਤਿ, ਤੇਨ ਭਿਕ੍ਖੁਨਾ ਸਾ ਕੁਟਿ ਅਞ੍ਞਸ੍ਸ ਵਾ ਦਾਤਬ੍ਬਾ ਭਿਨ੍ਦਿਤ੍ਵਾ ਵਾ ਪੁਨ ਕਾਤਬ੍ਬਾ. ਨੋ ਚੇ ਅਞ੍ਞਸ੍ਸ ਵਾ ਦਦੇਯ੍ਯ ਭਿਨ੍ਦਿਤ੍ਵਾ ਵਾ ਪੁਨ ਕਾਰੇਯ੍ਯ, ਆਪਤ੍ਤਿ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਸਪਰਿਕ੍ਕਮਨਂ. ਸੋ ਚੇ ਵਿਪ੍ਪਕਤੇ ਆਗਚ੍ਛਤਿ, ਤੇਨ ਭਿਕ੍ਖੁਨਾ ਸਾ ਕੁਟਿ ਅਞ੍ਞਸ੍ਸ ਵਾ ਦਾਤਬ੍ਬਾ ਭਿਨ੍ਦਿਤ੍ਵਾ ਵਾ ਪੁਨ ਕਾਤਬ੍ਬਾ. ਨੋ ਚੇ ਅਞ੍ਞਸ੍ਸ ਵਾ ਦਦੇਯ੍ਯ ਭਿਨ੍ਦਿਤ੍ਵਾ ਵਾ ਪੁਨ ਕਾਰੇਯ੍ਯ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ…ਪੇ… ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ…ਪੇ… ਆਪਤ੍ਤਿ ਸਙ੍ਘਾਦਿਸੇਸਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਚੇ ਵਿਪ੍ਪਕਤੇ ਆਗਚ੍ਛਤਿ, ਤੇਨ ਭਿਕ੍ਖੁਨਾ ਸਾ ਕੁਟਿ ਅਞ੍ਞਸ੍ਸ ਵਾ ਦਾਤਬ੍ਬਾ ਭਿਨ੍ਦਿਤ੍ਵਾ ਵਾ ਪੁਨ ਕਾਤਬ੍ਬਾ. ਨੋ ਚੇ ਅਞ੍ਞਸ੍ਸ ਵਾ ਦਦੇਯ੍ਯ ਭਿਨ੍ਦਿਤ੍ਵਾ ਵਾ ਪੁਨ ਕਾਰੇਯ੍ਯ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
੩੬੨. ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਪਮਾਣਾਤਿਕ੍ਕਨ੍ਤਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਚੇ ਵਿਪ੍ਪਕਤੇ ਆਗਚ੍ਛਤਿ, ਤੇਨ ਭਿਕ੍ਖੁਨਾ ਸਾ ਕੁਟਿ ਅਞ੍ਞਸ੍ਸ ਵਾ ਦਾਤਬ੍ਬਾ ਭਿਨ੍ਦਿਤ੍ਵਾ ਵਾ ਪੁਨ ਕਾਤਬ੍ਬਾ. ਨੋ ਚੇ ਅਞ੍ਞਸ੍ਸ ਵਾ ਦਦੇਯ੍ਯ ਭਿਨ੍ਦਿਤ੍ਵਾ ਵਾ ਪੁਨ ਕਾਰੇਯ੍ਯ, ਆਪਤ੍ਤਿ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਪਮਾਣਿਕਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਚੇ ਵਿਪ੍ਪਕਤੇ ਆਗਚ੍ਛਤਿ, ਤੇਨ ਭਿਕ੍ਖੁਨਾ ਸਾ ਕੁਟਿ ਅਞ੍ਞਸ੍ਸ ਵਾ ਦਾਤਬ੍ਬਾ ਭਿਨ੍ਦਿਤ੍ਵਾ ਵਾ ਪੁਨ ਕਾਤਬ੍ਬਾ. ਨੋ ਚੇ ਅਞ੍ਞਸ੍ਸ ਵਾ ਦਦੇਯ੍ਯ ਭਿਨ੍ਦਿਤ੍ਵਾ ਵਾ ਪੁਨ ਕਾਰੇਯ੍ਯ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਪਮਾਣਾਤਿਕ੍ਕਨ੍ਤਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਚੇ ਵਿਪ੍ਪਕਤੇ ਆਗਚ੍ਛਤਿ, ਤੇਨ ਭਿਕ੍ਖੁਨਾ ਸਾ ਕੁਟਿ ਅਞ੍ਞਸ੍ਸ ਵਾ ਦਾਤਬ੍ਬਾ ਭਿਨ੍ਦਿਤ੍ਵਾ ਵਾ ਪੁਨ ਕਾਤਬ੍ਬਾ. ਨੋ ਚੇ ਅਞ੍ਞਸ੍ਸ ਵਾ ਦਦੇਯ੍ਯ ਭਿਨ੍ਦਿਤ੍ਵਾ ਵਾ ਪੁਨ ਕਾਰੇਯ੍ਯ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸਾਨਂ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਪਮਾਣਿਕਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਚੇ ਵਿਪ੍ਪਕਤੇ ਆਗਚ੍ਛਤਿ, ਤੇਨ ਭਿਕ੍ਖੁਨਾ ਸਾ ਕੁਟਿ ਅਞ੍ਞਸ੍ਸ ਵਾ ਦਾਤਬ੍ਬਾ ਭਿਨ੍ਦਿਤ੍ਵਾ ਵਾ ਪੁਨ ਕਾਤਬ੍ਬਾ. ਨੋ ਚੇ ਅਞ੍ਞਸ੍ਸ ਵਾ ਦਦੇਯ੍ਯ ਭਿਨ੍ਦਿਤ੍ਵਾ ਵਾ ਪੁਨ ਕਾਰੇਯ੍ਯ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਾਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ.
ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਕੁਟਿਂ ਮੇ ਕਰੋਥਾ’’ਤਿ. ਤਸ੍ਸ ਕੁਟਿਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਪਮਾਣਿਕਂ ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.
੩੬੩. ਅਤ੍ਤਨਾ ਵਿਪ੍ਪਕਤਂ ਅਤ੍ਤਨਾ ਪਰਿਯੋਸਾਪੇਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.
ਅਤ੍ਤਨਾ ਵਿਪ੍ਪਕਤਂ ਪਰੇਹਿ ਪਰਿਯੋਸਾਪੇਤਿ [ਪਰਿਯੋਸਾਵਾਪੇਤਿ (ਕ.)], ਆਪਤ੍ਤਿ ਸਙ੍ਘਾਦਿਸੇਸਸ੍ਸ.
ਪਰੇਹਿ ਵਿਪ੍ਪਕਤਂ ਅਤ੍ਤਨਾ ਪਰਿਯੋਸਾਪੇਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.
ਪਰੇਹਿ ਵਿਪ੍ਪਕਤਂ ਪਰੇਹਿ ਪਰਿਯੋਸਾਪੇਤਿ [ਪਰਿਯੋਸਾਵਾਪੇਤਿ (ਕ.)], ਆਪਤ੍ਤਿ ਸਙ੍ਘਾਦਿਸੇਸਸ੍ਸ.
੩੬੪. ਅਨਾਪਤ੍ਤਿ ਲੇਣੇ ਗੁਹਾਯ ਤਿਣਕੁਟਿਕਾਯ ਅਞ੍ਞਸ੍ਸਤ੍ਥਾਯ ਵਾਸਾਗਾਰਂ ਠਪੇਤ੍ਵਾ ਸਬ੍ਬਤ੍ਥ, ਅਨਾਪਤ੍ਤਿ ਉਮ੍ਮਤ੍ਤਕਸ੍ਸ ਆਦਿਕਮ੍ਮਿਕਸ੍ਸਾਤਿ.
ਕੁਟਿਕਾਰਸਿਕ੍ਖਾਪਦਂ ਨਿਟ੍ਠਿਤਂ ਛਟ੍ਠਂ.