੭. ਵਿਹਾਰਕਾਰਸਿਕ੍ਖਾਪਦਂ

੩੬੫. ਤੇਨ ਸਮਯੇਨ ਬੁਦ੍ਧੋ ਭਗਵਾ ਕੋਸਮ੍ਬਿਯਂ ਵਿਹਰਤਿ ਘੋਸਿਤਾਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਤੋ ਛਨ੍ਨਸ੍ਸ ਉਪਟ੍ਠਾਕੋ ਗਹਪਤਿ ਆਯਸ੍ਮਨ੍ਤਂ ਛਨ੍ਨਂ ਏਤਦਵੋਚ – ‘‘ਵਿਹਾਰਵਤ੍ਥੁਂ, ਭਨ੍ਤੇ, ਜਾਨਾਹਿ ਅਯ੍ਯਸ੍ਸ ਵਿਹਾਰਂ ਕਾਰਾਪੇਸ੍ਸਾਮੀ’’ਤਿ. ਅਥ ਖੋ ਆਯਸ੍ਮਾ ਛਨ੍ਨੋ ਵਿਹਾਰਵਤ੍ਥੁਂ ਸੋਧੇਨ੍ਤੋ ਅਞ੍ਞਤਰਂ ਚੇਤਿਯਰੁਕ੍ਖਂ ਛੇਦਾਪੇਸਿ ਗਾਮਪੂਜਿਤਂ ਨਿਗਮਪੂਜਿਤਂ ਨਗਰਪੂਜਿਤਂ ਜਨਪਦਪੂਜਿਤਂ ਰਟ੍ਠਪੂਜਿਤਂ. ਮਨੁਸ੍ਸਾ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਸਮਣਾ ਸਕ੍ਯਪੁਤ੍ਤਿਯਾ ਚੇਤਿਯਰੁਕ੍ਖਂ ਛੇਦਾਪੇਸ੍ਸਨ੍ਤਿ ਗਾਮਪੂਜਿਤਂ ਨਿਗਮਪੂਜਿਤਂ ਨਗਰਪੂਜਿਤਂ ਜਨਪਦਪੂਜਿਤਂ ਰਟ੍ਠਪੂਜਿਤਂ! ਏਕਿਨ੍ਦ੍ਰਿਯਂ ਸਮਣਾ ਸਕ੍ਯਪੁਤ੍ਤਿਯਾ ਜੀਵਂ ਵਿਹੇਠੇਨ੍ਤੀ’’ [ਵਿਹੇਠੇਸ੍ਸਨ੍ਤਿ (ਕਤ੍ਥਚਿ)] ਤਿ. ਅਸ੍ਸੋਸੁਂ ਖੋ ਭਿਕ੍ਖੂ ਤੇਸਂ ਮਨੁਸ੍ਸਾਨਂ ਉਜ੍ਝਾਯਨ੍ਤਾਨਂ ਖਿਯ੍ਯਨ੍ਤਾਨਂ ਵਿਪਾਚੇਨ੍ਤਾਨਂ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਛਨ੍ਨੋ ਚੇਤਿਯਰੁਕ੍ਖਂ ਛੇਦਾਪੇਸ੍ਸਤਿ ਗਾਮਪੂਜਿਤਂ…ਪੇ… ਰਟ੍ਠਪੂਜਿਤ’’ਨ੍ਤਿ! ਅਥ ਖੋ ਤੇ ਭਿਕ੍ਖੂ ਆਯਸ੍ਮਨ੍ਤਂ ਛਨ੍ਨਂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ…ਪੇ… ‘‘ਸਚ੍ਚਂ ਕਿਰ ਤ੍ਵਂ, ਛਨ੍ਨ, ਚੇਤਿਯਰੁਕ੍ਖਂ ਛੇਦਾਪੇਸਿ ਗਾਮਪੂਜਿਤਂ…ਪੇ… ਰਟ੍ਠਪੂਜਿਤ’’ਨ੍ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ…ਪੇ… ‘‘ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਚੇਤਿਯਰੁਕ੍ਖਂ ਛੇਦਾਪੇਸ੍ਸਸਿ ਗਾਮਪੂਜਿਤਂ ਨਿਗਮਪੂਜਿਤਂ ਨਗਰਪੂਜਿਤਂ ਜਨਪਦਪੂਜਿਤਂ ਰਟ੍ਠਪੂਜਿਤਂ! ਜੀਵਸਞ੍ਞਿਨੋ ਹਿ, ਮੋਘਪੁਰਿਸ, ਮਨੁਸ੍ਸਾ ਰੁਕ੍ਖਸ੍ਮਿਂ. ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੩੬੬. ‘‘ਮਹਲ੍ਲਕਂ ਪਨ ਭਿਕ੍ਖੁਨਾ ਵਿਹਾਰਂ ਕਾਰਯਮਾਨੇਨ ਸਸ੍ਸਾਮਿਕਂ ਅਤ੍ਤੁਦ੍ਦੇਸਂ ਭਿਕ੍ਖੂ ਅਭਿਨੇਤਬ੍ਬਾ ਵਤ੍ਥੁਦੇਸਨਾਯ. ਤੇਹਿ ਭਿਕ੍ਖੂਹਿ ਵਤ੍ਥੁ ਦੇਸੇਤਬ੍ਬਂ ਅਨਾਰਮ੍ਭਂ ਸਪਰਿਕ੍ਕਮਨਂ. ਸਾਰਮ੍ਭੇ ਚੇ ਭਿਕ੍ਖੁ ਵਤ੍ਥੁਸ੍ਮਿਂ ਅਪਰਿਕ੍ਕਮਨੇ ਮਹਲ੍ਲਕਂ ਵਿਹਾਰਂ ਕਾਰੇਯ੍ਯ ਭਿਕ੍ਖੂ ਵਾ ਅਨਭਿਨੇਯ੍ਯ ਵਤ੍ਥੁਦੇਸਨਾਯ, ਸਙ੍ਘਾਦਿਸੇਸੋ’’ਤਿ.

੩੬੭. ਮਹਲ੍ਲਕੋ ਨਾਮ ਵਿਹਾਰੋ ਸਸ੍ਸਾਮਿਕੋ ਵੁਚ੍ਚਤਿ.

ਵਿਹਾਰੋ ਨਾਮ ਉਲ੍ਲਿਤ੍ਤੋ ਵਾ ਹੋਤਿ ਅਵਲਿਤ੍ਤੋ ਵਾ ਉਲ੍ਲਿਤ੍ਤਾਵਲਿਤ੍ਤੋ ਵਾ.

ਕਾਰਯਮਾਨੇਨਾਤਿ ਕਰੋਨ੍ਤੋ ਵਾ ਕਾਰਾਪੇਨ੍ਤੋ ਵਾ.

ਸਸ੍ਸਾਮਿਕਨ੍ਤਿ ਅਞ੍ਞੋ ਕੋਚਿ ਸਾਮਿਕੋ ਹੋਤਿ ਇਤ੍ਥੀ ਵਾ ਪੁਰਿਸੋ ਵਾ ਗਹਟ੍ਠੋ ਵਾ ਪਬ੍ਬਜਿਤੋ ਵਾ.

ਅਤ੍ਤੁਦ੍ਦੇਸਨ੍ਤਿ ਅਤ੍ਤਨੋ ਅਤ੍ਥਾਯ.

ਭਿਕ੍ਖੂ ਅਭਿਨੇਤਬ੍ਬਾ ਵਤ੍ਥੁਦੇਸਨਾਯਾਤਿ ਤੇਨ ਵਿਹਾਰਕਾਰਕੇਨ ਭਿਕ੍ਖੁਨਾ ਵਿਹਾਰਵਤ੍ਥੁਂ ਸੋਧੇਤ੍ਵਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਹਂ, ਭਨ੍ਤੇ, ਮਹਲ੍ਲਕਂ ਵਿਹਾਰਂ ਕਤ੍ਤੁਕਾਮੋ ਸਸ੍ਸਾਮਿਕਂ ਅਤ੍ਤੁਦ੍ਦੇਸਂ. ਸੋਹਂ, ਭਨ੍ਤੇ, ਸਙ੍ਘਂ ਵਿਹਾਰਵਤ੍ਥੁਓਲੋਕਨਂ ਯਾਚਾਮੀ’’ਤਿ. ਦੁਤਿਯਮ੍ਪਿ ਯਾਚਿਤਬ੍ਬਾ. ਤਤਿਯਮ੍ਪਿ ਯਾਚਿਤਬ੍ਬਾ. ਸਚੇ ਸਬ੍ਬੋ ਸਙ੍ਘੋ ਉਸ੍ਸਹਤਿ ਵਿਹਾਰਵਤ੍ਥੁਂ ਓਲੋਕੇਤੁਂ ਸਬ੍ਬੇਨ ਸਙ੍ਘੇਨ ਓਲੋਕੇਤਬ੍ਬਂ. ਨੋ ਚੇ ਸਬ੍ਬੋ ਸਙ੍ਘੋ ਉਸ੍ਸਹਤਿ ਵਿਹਾਰਵਤ੍ਥੁਂ ਓਲੋਕੇਤੁਂ, ਯੇ ਤਤ੍ਥ ਹੋਨ੍ਤਿ ਭਿਕ੍ਖੂ ਬ੍ਯਤ੍ਤਾ ਪਟਿਬਲਾ ਸਾਰਮ੍ਭਂ ਅਨਾਰਮ੍ਭਂ ਸਪਰਿਕ੍ਕਮਨਂ ਅਪਰਿਕ੍ਕਮਨਂ ਜਾਨਿਤੁਂ ਤੇ ਯਾਚਿਤ੍ਵਾ ਸਮ੍ਮਨ੍ਨਿਤਬ੍ਬਾ. ਏਵਞ੍ਚ ਪਨ, ਭਿਕ੍ਖਵੇ, ਸਮ੍ਮਨ੍ਨਿਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੩੬੮. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਮਹਲ੍ਲਕਂ ਵਿਹਾਰਂ ਕਤ੍ਤੁਕਾਮੋ ਸਸ੍ਸਾਮਿਕਂ ਅਤ੍ਤੁਦ੍ਦੇਸਂ. ਸੋ ਸਙ੍ਘਂ ਵਿਹਾਰਵਤ੍ਥੁਓਲੋਕਨਂ ਯਾਚਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਞ੍ਚ ਇਤ੍ਥਨ੍ਨਾਮਞ੍ਚ ਭਿਕ੍ਖੁ ਸਮ੍ਮਨ੍ਨੇਯ੍ਯ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਵਿਹਾਰਵਤ੍ਥੁਂ ਓਲੋਕੇਤੁਂ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਮਹਲ੍ਲਕਂ ਵਿਹਾਰਂ ਕਤ੍ਤੁਕਾਮੋ ਸਸ੍ਸਾਮਿਕਂ ਅਤ੍ਤੁਦ੍ਦੇਸਂ. ਸੋ ਸਙ੍ਘਂ ਵਿਹਾਰਵਤ੍ਥੁਓਲੋਕਨਂ ਯਾਚਤਿ. ਸਙ੍ਘੋ ਇਤ੍ਥਨ੍ਨਾਮਞ੍ਚ ਇਤ੍ਥਨ੍ਨਾਮਞ੍ਚ ਭਿਕ੍ਖੂ ਸਮ੍ਮਨ੍ਨਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਵਿਹਾਰਵਤ੍ਥੁਂ ਓਲੋਕੇਤੁਂ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਚ ਇਤ੍ਥਨ੍ਨਾਮਸ੍ਸ ਚ ਭਿਕ੍ਖੂਨਂ ਸਮ੍ਮੁਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਵਿਹਾਰਵਤ੍ਥੁਂ ਓਲੋਕੇਤੁਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮ੍ਮਤਾ ਸਙ੍ਘੇਨ ਇਤ੍ਥਨ੍ਨਾਮੋ ਚ ਇਤ੍ਥਨ੍ਨਾਮੋ ਚ ਭਿਕ੍ਖੂ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਵਿਹਾਰਵਤ੍ਥੁਂ ਓਲੋਕੇਤੁਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੩੬੯. ਤੇਹਿ ਸਮ੍ਮਤੇਹਿ ਭਿਕ੍ਖੂਹਿ ਤਤ੍ਥ ਗਨ੍ਤ੍ਵਾ ਵਿਹਾਰਵਤ੍ਥੁ ਓਲੋਕੇਤਬ੍ਬਂ; ਸਾਰਮ੍ਭਂ ਅਨਾਰਮ੍ਭਂ ਸਪਰਿਕ੍ਕਮਨਂ ਅਪਰਿਕ੍ਕਮਨਂ ਜਾਨਿਤਬ੍ਬਂ. ਸਚੇ ਸਾਰਮ੍ਭਂ ਹੋਤਿ ਅਪਰਿਕ੍ਕਮਨਂ, ‘ਮਾਯਿਧ ਕਰੀ’ਤਿ ਵਤ੍ਤਬ੍ਬੋ. ਸਚੇ ਅਨਾਰਮ੍ਭਂ ਹੋਤਿ ਸਪਰਿਕ੍ਕਮਨਂ, ਸਙ੍ਘਸ੍ਸ ਆਰੋਚੇਤਬ੍ਬਂ – ‘ਅਨਾਰਮ੍ਭਂ ਸਪਰਿਕ੍ਕਮਨ’ਨ੍ਤਿ. ਤੇਨ ਵਿਹਾਰਕਾਰਕੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਵੁਡ੍ਢਾਨਂ ਭਿਕ੍ਖੂਨਂ ਪਾਦੇ ਵਨ੍ਦਿਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘‘ਅਹਂ, ਭਨ੍ਤੇ, ਮਹਲ੍ਲਕਂ ਵਿਹਾਰਂ ਕਤ੍ਤੁਕਾਮੋ ਸਸ੍ਸਾਮਿਕਂ ਅਤ੍ਤੁਦ੍ਦੇਸਂ. ਸੋਹਂ, ਭਨ੍ਤੇ, ਸਙ੍ਘਂ ਵਿਹਾਰਵਤ੍ਥੁਦੇਸਨਂ ਯਾਚਾਮੀ’’ਤਿ. ਦੁਤਿਯਮ੍ਪਿ ਯਾਚਿਤਬ੍ਬਾ. ਤਤਿਯਮ੍ਪਿ ਯਾਚਿਤਬ੍ਬਾ. ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨ ਸਙ੍ਘੋ ਞਾਪੇਤਬ੍ਬੋ –

੩੭੦. ‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਮਹਲ੍ਲਕਂ ਵਿਹਾਰਂ ਕਤ੍ਤੁਕਾਮੋ ਸਸ੍ਸਾਮਿਕਂ ਅਤ੍ਤੁਦ੍ਦੇਸਂ. ਸੋ ਸਙ੍ਘਂ ਵਿਹਾਰਵਤ੍ਥੁਦੇਸਨਂ ਯਾਚਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਵਿਹਾਰਵਤ੍ਥੁਂ ਦੇਸੇਯ੍ਯ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਯਂ ਇਤ੍ਥਨ੍ਨਾਮੋ ਭਿਕ੍ਖੁ ਮਹਲ੍ਲਕਂ ਵਿਹਾਰਂ ਕਤ੍ਤੁਕਾਮੋ ਸਸ੍ਸਾਮਿਕਂ ਅਤ੍ਤੁਦ੍ਦੇਸਂ. ਸੋ ਸਙ੍ਘਂ ਵਿਹਾਰਵਤ੍ਥੁਦੇਸਨਂ ਯਾਚਤਿ. ਸਙ੍ਘੋ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਵਿਹਾਰਵਤ੍ਥੁਂ ਦੇਸੇਤਿ. ਯਸ੍ਸਾਯਸ੍ਮਤੋ ਖਮਤਿ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਵਿਹਾਰਵਤ੍ਥੁਸ੍ਸ ਦੇਸਨਾ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਦੇਸਿਤਂ ਸਙ੍ਘੇਨ ਇਤ੍ਥਨ੍ਨਾਮਸ੍ਸ ਭਿਕ੍ਖੁਨੋ ਵਿਹਾਰਵਤ੍ਥੁਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

੩੭੧. ਸਾਰਮ੍ਭਂ ਨਾਮ ਕਿਪਿਲ੍ਲਿਕਾਨਂ ਵਾ ਆਸਯੋ ਹੋਤਿ, ਉਪਚਿਕਾਨਂ ਵਾ ਆਸਯੋ ਹੋਤਿ, ਉਨ੍ਦੂਰਾਨਂ ਵਾ…ਪੇ… ਅਹੀਨਂ ਵਾ ਵਿਚ੍ਛਿਕਾਨਂ ਵਾ ਸਤਪਦੀਨਂ ਵਾ ਹਤ੍ਥੀਨਂ ਵਾ ਅਸ੍ਸਾਨਂ ਵਾ ਸੀਹਾਨਂ ਵਾ ਬ੍ਯਗ੍ਘਾਨਂ ਵਾ ਦੀਪੀਨਂ ਵਾ ਅਚ੍ਛਾਨਂ ਵਾ ਤਰਚ੍ਛਾਨਂ ਵਾ ਆਸਯੋ ਹੋਤਿ, ਯੇਸਂ ਕੇਸਞ੍ਚਿ ਤਿਰਚ੍ਛਾਨਗਤਾਨਂ ਪਾਣਾਨਂ ਆਸਯੋ ਹੋਤਿ, ਪੁਬ੍ਬਣ੍ਣਨਿਸ੍ਸਿਤਂ ਵਾ ਹੋਤਿ, ਅਪਰਣ੍ਣਨਿਸ੍ਸਿਤਂ ਵਾ ਹੋਤਿ, ਅਬ੍ਭਾਘਾਤਨਿਸ੍ਸਿਤਂ ਵਾ ਹੋਤਿ, ਆਘਾਤਨਨਿਸ੍ਸਿਤਂ ਵਾ ਹੋਤਿ, ਸੁਸਾਨਨਿਸ੍ਸਿਤਂ ਵਾ ਹੋਤਿ, ਉਯ੍ਯਾਨਨਿਸ੍ਸਿਤਂ ਵਾ ਹੋਤਿ, ਰਾਜਵਤ੍ਥੁਨਿਸ੍ਸਿਤਂ ਵਾ ਹੋਤਿ, ਹਤ੍ਥਿਸਾਲਾਨਿਸ੍ਸਿਤਂ ਵਾ ਹੋਤਿ, ਅਸ੍ਸਸਾਲਾਨਿਸ੍ਸਿਤਂ ਵਾ ਹੋਤਿ, ਬਨ੍ਧਨਾਗਾਰਨਿਸ੍ਸਿਤਂ ਵਾ ਹੋਤਿ, ਪਾਨਾਗਾਰਨਿਸ੍ਸਿਤਂ ਵਾ ਹੋਤਿ, ਸੂਨਨਿਸ੍ਸਿਤਂ ਵਾ ਹੋਤਿ, ਰਚ੍ਛਾਨਿਸ੍ਸਿਤਂ ਵਾ ਹੋਤਿ, ਚਚ੍ਚਰਨਿਸ੍ਸਿਤਂ ਵਾ ਹੋਤਿ, ਸਭਾਨਿਸ੍ਸਿਤਂ ਵਾ ਹੋਤਿ, ਸਂਸਰਣਨਿਸ੍ਸਿਤਂ ਵਾ ਹੋਤਿ. ਏਤਂ ਸਾਰਮ੍ਭਂ ਨਾਮ.

ਅਪਰਿਕ੍ਕਮਨਂ ਨਾਮ ਨ ਸਕ੍ਕਾ ਹੋਤਿ ਯਥਾਯੁਤ੍ਤੇਨ ਸਕਟੇਨ ਅਨੁਪਰਿਗਨ੍ਤੁਂ, ਸਮਨ੍ਤਾ ਨਿਸ੍ਸੇਣਿਯਾ ਅਨੁਪਰਿਗਨ੍ਤੁਂ. ਏਤਂ ਅਪਰਿਕ੍ਕਮਨਂ ਨਾਮ.

ਅਨਾਰਮ੍ਭਂ ਨਾਮ ਨ ਕਿਪਿਲ੍ਲਿਕਾਨਂ ਵਾ ਆਸਯੋ ਹੋਤਿ…ਪੇ… ਨ ਸਂਸਰਣਨਿਸ੍ਸਿਤਂ ਵਾ ਹੋਤਿ. ਏਤਂ ਅਨਾਰਮ੍ਭਂ ਨਾਮ.

ਸਪਰਿਕ੍ਕਮਨਂ ਨਾਮ ਸਕ੍ਕਾ ਹੋਤਿ ਯਥਾਯੁਤ੍ਤੇਨ ਸਕਟੇਨ ਅਨੁਪਰਿਗਨ੍ਤੁਂ, ਸਮਨ੍ਤਾ ਨਿਸ੍ਸੇਣਿਯਾ ਅਨੁਪਰਿਗਨ੍ਤੁਂ. ਏਤਂ ਸਪਰਿਕ੍ਕਮਨਂ ਨਾਮ.

ਮਹਲ੍ਲਕੋ ਨਾਮ ਵਿਹਾਰੋ ਸਸ੍ਸਾਮਿਕੋ ਵੁਚ੍ਚਤਿ.

ਵਿਹਾਰੋ ਨਾਮ ਉਲ੍ਲਿਤ੍ਤੋ ਵਾ ਹੋਤਿ ਅਵਲਿਤ੍ਤੋ ਵਾ ਉਲ੍ਲਿਤ੍ਤਾਵਲਿਤ੍ਤੋ ਵਾ.

ਕਾਰੇਯ੍ਯਾਤਿ ਕਰੋਤਿ ਵਾ ਕਾਰਾਪੇਤਿ ਵਾ.

ਭਿਕ੍ਖੂ ਵਾ ਅਨਭਿਨੇਯ੍ਯ ਵਤ੍ਥੁਦੇਸਨਾਯਾਤਿ ਞਤ੍ਤਿਦੁਤਿਯੇਨ ਕਮ੍ਮੇਨ ਵਿਹਾਰਵਤ੍ਥੁਂ ਨ ਦੇਸਾਪੇਤ੍ਵਾ ਕਰੋਤਿ ਵਾ ਕਾਰਾਪੇਤਿ ਵਾ, ਪਯੋਗੇ ਦੁਕ੍ਕਟਂ. ਏਕਂ ਪਿਣ੍ਡਂ ਅਨਾਗਤੇ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ. ਤਸ੍ਮਿਂ ਪਿਣ੍ਡੇ ਆਗਤੇ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਸਙ੍ਘਾਦਿਸੇਸੋਤਿ…ਪੇ… ਤੇਨਪਿ ਵੁਚ੍ਚਤਿ – ‘ਸਙ੍ਘਾਦਿਸੇਸੋ’ਤਿ.

੩੭੨. ਭਿਕ੍ਖੁ ਵਿਹਾਰਂ ਕਰੋਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ. ਭਿਕ੍ਖੁ ਵਿਹਾਰਂ ਕਰੋਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ. ਭਿਕ੍ਖੁ ਵਿਹਾਰਂ ਕਰੋਤਿ ਅਦੇਸਿਤਵਤ੍ਥੁਕਂ ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ. ਭਿਕ੍ਖੁ ਵਿਹਾਰਂ ਕਰੋਤਿ ਅਦੇਸਿਤਵਤ੍ਥੁਕਂ ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਭਿਕ੍ਖੁ ਵਿਹਾਰਂ ਕਰੋਤਿ ਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ. ਭਿਕ੍ਖੁ ਵਿਹਾਰਂ ਕਰੋਤਿ ਦੇਸਿਤਵਤ੍ਥੁਕਂ ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ. ਭਿਕ੍ਖੁ ਵਿਹਾਰਂ ਕਰੋਤਿ ਦੇਸਿਤਵਤ੍ਥੁਕਂ ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ. ਭਿਕ੍ਖੁ ਵਿਹਾਰਂ ਕਰੋਤਿ ਦੇਸਿਤਵਤ੍ਥੁਕਂ ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.

੩੭੩. ਭਿਕ੍ਖੁ ਸਮਾਦਿਸਤਿ – ‘‘ਵਿਹਾਰਂ ਮੇ ਕਰੋਥਾ’’ਤਿ. ਤਸ੍ਸ ਵਿਹਾਰਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਭਿਕ੍ਖੁ ਸਮਾਦਿਸਤਿ – ‘‘ਵਿਹਾਰਂ ਮੇ ਕਰੋਥਾ’’ਤਿ. ਤਸ੍ਸ ਵਿਹਾਰਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.

੩੭੪. ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਵਿਹਾਰਂ ਮੇ ਕਰੋਥਾ’’ਤਿ. ਨ ਚ ਸਮਾਦਿਸਤਿ – ‘‘ਦੇਸਿਤਵਤ੍ਥੁਕੋ ਚ ਹੋਤੁ ਅਨਾਰਮ੍ਭੋ ਚ ਸਪਰਿਕ੍ਕਮਨੋ ਚਾ’’ਤਿ. ਤਸ੍ਸ ਵਿਹਾਰਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਵਿਹਾਰਂ ਮੇ ਕਰੋਥਾ’’ਤਿ. ਨ ਚ ਸਮਾਦਿਸਤਿ – ‘‘ਦੇਸਿਤਵਤ੍ਥੁਕੋ ਚ ਹੋਤੁ ਅਨਾਰਮ੍ਭੋ ਚ ਸਪਰਿਕ੍ਕਮਨੋ ਚਾ’’ਤਿ. ਤਸ੍ਸ ਵਿਹਾਰਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.

੩੭੫. ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਵਿਹਾਰਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕੋ ਚ ਹੋਤੁ ਅਨਾਰਮ੍ਭੋ ਚ ਸਪਰਿਕ੍ਕਮਨੋ ਚਾ’’ਤਿ. ਤਸ੍ਸ ਵਿਹਾਰਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਸੁਣਾਤਿ – ‘‘ਵਿਹਾਰੋ ਕਿਰ ਮੇ ਕਯਿਰਤਿ ਅਦੇਸਿਤਵਤ੍ਥੁਕੋ ਸਾਰਮ੍ਭੋ ਅਪਰਿਕ੍ਕਮਨੋ’’ਤਿ. ਤੇਨ ਭਿਕ੍ਖੁਨਾ ਸਾਮਂ ਵਾ ਗਨ੍ਤਬ੍ਬਂ ਦੂਤੋ ਵਾ ਪਾਹੇਤਬ੍ਬੋ – ‘‘ਦੇਸਿਤਵਤ੍ਥੁਕੋ ਚ ਹੋਤੁ ਅਨਾਰਮ੍ਭੋ ਚ ਸਪਰਿਕ੍ਕਮਨੋ ਚਾ’’ਤਿ …ਪੇ… ‘‘ਦੇਸਿਤਵਤ੍ਥੁਕੋ ਚ ਹੋਤੁ ਅਨਾਰਮ੍ਭੋ ਚਾ’’ਤਿ…ਪੇ… ‘‘ਦੇਸਿਤਵਤ੍ਥੁਕੋ ਚ ਹੋਤੁ ਸਪਰਿਕ੍ਕਮਨੋ ਚਾ’’ਤਿ …ਪੇ… ‘‘ਦੇਸਿਤਵਤ੍ਥੁਕੋ ਹੋਤੂ’’ਤਿ. ਨੋ ਚੇ ਸਾਮਂ ਵਾ ਗਚ੍ਛੇਯ੍ਯ ਦੂਤਂ ਵਾ ਪਹਿਣੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸ.

ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਵਿਹਾਰਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕੋ ਚ ਹੋਤੁ ਅਨਾਰਮ੍ਭੋ ਚ ਸਪਰਿਕ੍ਕਮਨੋ ਚਾ’’ਤਿ. ਤਸ੍ਸ ਵਿਹਾਰਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਸੁਣਾਤਿ – ‘‘ਵਿਹਾਰੋ ਕਿਰ ਮੇ ਕਯਿਰਤਿ ਦੇਸਿਤਵਤ੍ਥੁਕੋ ਸਾਰਮ੍ਭੋ ਅਪਰਿਕ੍ਕਮਨੋ’’ਤਿ. ਤੇਨ ਭਿਕ੍ਖੁਨਾ ਸਾਮਂ ਵਾ ਗਨ੍ਤਬ੍ਬਂ ਦੂਤੋ ਵਾ ਪਾਹੇਤਬ੍ਬੋ – ‘‘ਅਨਾਰਮ੍ਭੋ ਚ ਹੋਤੁ ਸਪਰਿਕ੍ਕਮਨੋ ਚਾ’’ਤਿ…ਪੇ… ‘‘ਅਨਾਰਮ੍ਭੋ ਹੋਤੂ’’ਤਿ ‘‘ਸਪਰਿਕ੍ਕਮਨੋ ਹੋਤੂ’’ਤਿ, ਅਨਾਪਤ੍ਤਿ.

੩੭੬. ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਵਿਹਾਰਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕੋ ਚ ਹੋਤੁ ਅਨਾਰਮ੍ਭੋ ਚ ਸਪਰਿਕ੍ਕਮਨੋ ਚਾ’’ਤਿ. ਤਸ੍ਸ ਵਿਹਾਰਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਤਿਣ੍ਣਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦੁਕ੍ਕਟਸ੍ਸ.

ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਵਿਹਾਰਂ ਮੇ ਕਰੋਥਾ’’ਤਿ. ਸਮਾਦਿਸਤਿ ਚ – ‘‘ਦੇਸਿਤਵਤ੍ਥੁਕੋ ਚ ਹੋਤੁ ਅਨਾਰਮ੍ਭੋ ਚ ਸਪਰਿਕ੍ਕਮਨੋ ਚਾ’’ਤਿ. ਤਸ੍ਸ ਵਿਹਾਰਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਕਾਰੁਕਾਨਂ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.

੩੭੭. ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਵਿਹਾਰਂ ਮੇ ਕਰੋਥਾ’’ਤਿ. ਤਸ੍ਸ ਵਿਹਾਰਂ ਕਰੋਨ੍ਤਿ ਅਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਚੇ ਵਿਪ੍ਪਕਤੇ ਆਗਚ੍ਛਤਿ, ਤੇਨ ਭਿਕ੍ਖੁਨਾ ਸੋ ਵਿਹਾਰੋ ਅਞ੍ਞਸ੍ਸ ਵਾ ਦਾਤਬ੍ਬੋ ਭਿਨ੍ਦਿਤ੍ਵਾ ਵਾ ਪੁਨ ਕਾਤਬ੍ਬੋ. ਨੋ ਚੇ ਅਞ੍ਞਸ੍ਸ ਵਾ ਦਦੇਯ੍ਯ ਭਿਨ੍ਦਿਤ੍ਵਾ ਵਾ ਪੁਨ ਕਾਰੇਯ੍ਯ, ਆਪਤ੍ਤਿ ਸਙ੍ਘਾਦਿਸੇਸੇਨ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਭਿਕ੍ਖੁ ਸਮਾਦਿਸਿਤ੍ਵਾ ਪਕ੍ਕਮਤਿ – ‘‘ਵਿਹਾਰਂ ਮੇ ਕਰੋਥਾ’’ਤਿ. ਤਸ੍ਸ ਵਿਹਾਰਂ ਕਰੋਨ੍ਤਿ ਦੇਸਿਤਵਤ੍ਥੁਕਂ ਸਾਰਮ੍ਭਂ ਅਪਰਿਕ੍ਕਮਨਂ. ਸੋ ਚੇ ਵਿਪ੍ਪਕਤੇ ਆਗਚ੍ਛਤਿ, ਤੇਨ ਭਿਕ੍ਖੁਨਾ ਸੋ ਵਿਹਾਰੋ ਅਞ੍ਞਸ੍ਸ ਵਾ ਦਾਤਬ੍ਬੋ ਭਿਨ੍ਦਿਤ੍ਵਾ ਵਾ ਪੁਨ ਕਾਤਬ੍ਬੋ. ਨੋ ਚੇ ਅਞ੍ਞਸ੍ਸ ਵਾ ਦਦੇਯ੍ਯ ਭਿਨ੍ਦਿਤ੍ਵਾ ਵਾ ਪੁਨ ਕਾਰੇਯ੍ਯ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ… ਸਾਰਮ੍ਭਂ ਸਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਅਪਰਿਕ੍ਕਮਨਂ, ਆਪਤ੍ਤਿ ਦੁਕ੍ਕਟਸ੍ਸ…ਪੇ… ਅਨਾਰਮ੍ਭਂ ਸਪਰਿਕ੍ਕਮਨਂ, ਅਨਾਪਤ੍ਤਿ.

੩੭੮. ਅਤ੍ਤਨਾ ਵਿਪ੍ਪਕਤਂ ਅਤ੍ਤਨਾ ਪਰਿਯੋਸਾਪੇਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਅਤ੍ਤਨਾ ਵਿਪ੍ਪਕਤਂ ਪਰੇਹਿ ਪਰਿਯੋਸਾਪੇਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਪਰੇਹਿ ਵਿਪ੍ਪਕਤਂ ਅਤ੍ਤਨਾ ਪਰਿਯੋਸਾਪੇਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਪਰੇਹਿ ਵਿਪ੍ਪਕਤਂ ਪਰੇਹਿ ਪਰਿਯੋਸਾਪੇਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

੩੭੯. ਅਨਾਪਤ੍ਤਿ ਲੇਣੇ ਗੁਹਾਯ ਤਿਣਕੁਟਿਕਾਯ ਅਞ੍ਞਸ੍ਸਤ੍ਥਾਯ ਵਾਸਾਗਾਰਂ ਠਪੇਤ੍ਵਾ ਸਬ੍ਬਤ੍ਥ. ਅਨਾਪਤ੍ਤਿ ਉਮ੍ਮਤ੍ਤਕਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਵਿਹਾਰਕਾਰਸਿਕ੍ਖਾਪਦਂ ਨਿਟ੍ਠਿਤਂ ਸਤ੍ਤਮਂ.