੨. ਕਾਯਸਂਸਗ੍ਗਸਿਕ੍ਖਾਪਦਂ

੨੬੯. ਤੇਨ ਸਮਯੇਨ ਬੁਦ੍ਧੋ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਉਦਾਯੀ ਅਰਞ੍ਞੇ ਵਿਹਰਤਿ. ਤਸ੍ਸਾਯਸ੍ਮਤੋ ਵਿਹਾਰੋ ਅਭਿਰੂਪੋ ਹੋਤਿ ਦਸ੍ਸਨੀਯੋ ਪਾਸਾਦਿਕੋ, ਮਜ੍ਝੇਗਬ੍ਭੋ, ਸਮਨ੍ਤਾਪਰਿਯਾਗਾਰੋ, ਸੁਪਞ੍ਞਤ੍ਤਂ ਮਞ੍ਚਪੀਠਂ ਭਿਸਿਬਿਮ੍ਬੋਹਨਂ, ਪਾਨੀਯਂ ਪਰਿਭੋਜਨੀਯਂ ਸੁਪਟ੍ਠਿਤਂ, ਪਰਿਵੇਣਂ ਸੁਸਮ੍ਮਟ੍ਠਂ. ਬਹੂ ਮਨੁਸ੍ਸਾ ਆਯਸ੍ਮਤੋ ਉਦਾਯਿਸ੍ਸ ਵਿਹਾਰਪੇਕ੍ਖਕਾ ਆਗਚ੍ਛਨ੍ਤਿ. ਅਞ੍ਞਤਰੋਪਿ ਬ੍ਰਾਹ੍ਮਣੋ ਸਪਜਾਪਤਿਕੋ ਯੇਨਾਯਸ੍ਮਾ ਉਦਾਯੀ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਉਦਾਯਿਂ ਏਤਦਵੋਚ – ‘‘ਇਚ੍ਛਾਮ ਮਯਂ ਭੋਤੋ ਉਦਾਯਿਸ੍ਸ ਵਿਹਾਰਂ ਪੇਕ੍ਖਿਤੁ’’ਨ੍ਤਿ. ‘‘ਤੇਨ ਹਿ, ਬ੍ਰਾਹ੍ਮਣ, ਪੇਕ੍ਖਸ੍ਸੂ’’ਤਿ, ਅਵਾਪੁਰਣਂ [ਅਪਾਪੁਰਣਂ (ਸ੍ਯਾ.)] ਆਦਾਯ ਘਟਿਕਂ ਉਗ੍ਘਾਟੇਤ੍ਵਾ ਕਵਾਟਂ ਪਣਾਮੇਤ੍ਵਾ ਵਿਹਾਰਂ ਪਾਵਿਸਿ. ਸੋਪਿ ਖੋ ਬ੍ਰਾਹ੍ਮਣੋ ਆਯਸ੍ਮਤੋ ਉਦਾਯਿਸ੍ਸ ਪਿਟ੍ਠਿਤੋ ਪਾਵਿਸਿ. ਸਾਪਿ ਖੋ ਬ੍ਰਾਹ੍ਮਣੀ ਤਸ੍ਸ ਬ੍ਰਾਹ੍ਮਣਸ੍ਸ ਪਿਟ੍ਠਿਤੋ ਪਾਵਿਸਿ. ਅਥ ਖੋ ਆਯਸ੍ਮਾ ਉਦਾਯੀ ਏਕਚ੍ਚੇ ਵਾਤਪਾਨੇ ਵਿਵਰਨ੍ਤੋ ਏਕਚ੍ਚੇ ਵਾਤਪਾਨੇ ਥਕੇਨ੍ਤੋ ਗਬ੍ਭਂ ਅਨੁਪਰਿਗਨ੍ਤ੍ਵਾ ਪਿਟ੍ਠਿਤੋ ਆਗਨ੍ਤ੍ਵਾ ਤਸ੍ਸਾ ਬ੍ਰਾਹ੍ਮਣਿਯਾ ਅਙ੍ਗਮਙ੍ਗਾਨਿ ਪਰਾਮਸਿ. ਅਥ ਖੋ ਸੋ ਬ੍ਰਾਹ੍ਮਣੋ ਆਯਸ੍ਮਤਾ ਉਦਾਯਿਨਾ ਸਦ੍ਧਿਂ ਪਟਿਸਮ੍ਮੋਦਿਤ੍ਵਾ ਅਗਮਾਸਿ. ਅਥ ਖੋ ਸੋ ਬ੍ਰਾਹ੍ਮਣੋ ਅਤ੍ਤਮਨੋ ਅਤ੍ਤਮਨਵਾਚਂ ਨਿਚ੍ਛਾਰੇਸਿ – ‘‘ਉਲ਼ਾਰਾ ਇਮੇ ਸਮਣਾ ਸਕ੍ਯਪੁਤ੍ਤਿਯਾ ਯੇ ਇਮੇ ਏਵਰੂਪੇ ਅਰਞ੍ਞੇ ਵਿਹਰਨ੍ਤਿ. ਭਵਮ੍ਪਿ ਉਦਾਯੀ ਉਲ਼ਾਰੋ ਯੋ ਏਵਰੂਪੇ ਅਰਞ੍ਞੇ ਵਿਹਰਤੀ’’ਤਿ.

ਏਵਂ ਵੁਤ੍ਤੇ ਸਾ ਬ੍ਰਾਹ੍ਮਣੀ ਤਂ ਬ੍ਰਾਹ੍ਮਣਂ ਏਤਦਵੋਚ – ‘‘ਕੁਤੋ ਤਸ੍ਸ ਉਲ਼ਾਰਤ੍ਤਤਾ! ਯਥੇਵ ਮੇ ਤ੍ਵਂ ਅਙ੍ਗਮਙ੍ਗਾਨਿ ਪਰਾਮਸਿ ਏਵਮੇਵ ਮੇ ਸਮਣੋ ਉਦਾਯੀ ਅਙ੍ਗਮਙ੍ਗਾਨਿ ਪਰਾਮਸੀ’’ਤਿ. ਅਥ ਖੋ ਸੋ ਬ੍ਰਾਹ੍ਮਣੋ ਉਜ੍ਝਾਯਤਿ ਖਿਯ੍ਯਤਿ ਵਿਪਾਚੇਤਿ – ‘‘ਅਲਜ੍ਜਿਨੋ ਇਮੇ ਸਮਣਾ ਸਕ੍ਯਪੁਤ੍ਤਿਯਾ ਦੁਸ੍ਸੀਲਾ ਮੁਸਾਵਾਦਿਨੋ. ਇਮੇ ਹਿ ਨਾਮ ਧਮ੍ਮਚਾਰਿਨੋ ਸਮਚਾਰਿਨੋ ਬ੍ਰਹ੍ਮਚਾਰਿਨੋ ਸਚ੍ਚਵਾਦਿਨੋ ਸੀਲਵਨ੍ਤੋ ਕਲ੍ਯਾਣਧਮ੍ਮਾ ਪਟਿਜਾਨਿਸ੍ਸਨ੍ਤਿ! ਨਤ੍ਥਿ ਇਮੇਸਂ ਸਾਮਞ੍ਞਂ ਨਤ੍ਥਿ ਇਮੇਸਂ ਬ੍ਰਹ੍ਮਞ੍ਞਂ, ਨਟ੍ਠਂ ਇਮੇਸਂ ਸਾਮਞ੍ਞਂ ਨਟ੍ਠਂ ਇਮੇਸਂ ਬ੍ਰਹ੍ਮਞ੍ਞਂ, ਕੁਤੋ ਇਮੇਸਂ ਸਾਮਞ੍ਞਂ ਕੁਤੋ ਇਮੇਸਂ ਬ੍ਰਹ੍ਮਞ੍ਞਂ, ਅਪਗਤਾ ਇਮੇ ਸਾਮਞ੍ਞਾ ਅਪਗਤਾ ਇਮੇ ਬ੍ਰਹ੍ਮਞ੍ਞਾ. ਕਥਞ੍ਹਿ ਨਾਮ ਸਮਣੋ ਉਦਾਯੀ ਮਮ ਭਰਿਯਾਯ ਅਙ੍ਗਮਙ੍ਗਾਨਿ ਪਰਾਮਸਿਸ੍ਸਤਿ! ਨ ਹਿ ਸਕ੍ਕਾ ਕੁਲਿਤ੍ਥੀਹਿ ਕੁਲਧੀਤਾਹਿ ਕੁਲਕੁਮਾਰੀਹਿ ਕੁਲਸੁਣ੍ਹਾਹਿ ਕੁਲਦਾਸੀਹਿ ਆਰਾਮਂ ਵਾ ਵਿਹਾਰਂ ਵਾ ਗਨ੍ਤੁਂ. ਸਚੇ [ਸਚੇ ਹਿ (ਸ੍ਯਾ.)] ਕੁਲਿਤ੍ਥਿਯੋ ਕੁਲਧੀਤਰੋ [ਕੁਲਧੀਤਾਯੋ (ਸੀ. ਸ੍ਯਾ.)] ਕੁਲਕੁਮਾਰਿਯੋ ਕੁਲਸੁਣ੍ਹਾਯੋ ਕੁਲਦਾਸਿਯੋ ਆਰਾਮਂ ਵਾ ਵਿਹਾਰਂ ਵਾ ਗਚ੍ਛੇਯ੍ਯੁਂ, ਤਾਪਿ ਸਮਣਾ ਸਕ੍ਯਪੁਤ੍ਤਿਯਾ ਦੂਸੇਯ੍ਯੁ’’ਨ੍ਤਿ!

ਅਸ੍ਸੋਸੁਂ ਖੋ ਭਿਕ੍ਖੁ ਤਸ੍ਸ ਬ੍ਰਾਹ੍ਮਣਸ੍ਸ ਉਜ੍ਝਾਯਨ੍ਤਸ੍ਸ ਖਿਯ੍ਯਨ੍ਤਸ੍ਸ ਵਿਪਾਚੇਨ੍ਤਸ੍ਸ. ਯੇ ਤੇ ਭਿਕ੍ਖੂ ਅਪ੍ਪਿਚ੍ਛਾ…ਪੇ… ਤੇ ਉਜ੍ਝਾਯਨ੍ਤਿ ਖਿਯ੍ਯਨ੍ਤਿ ਵਿਪਾਚੇਨ੍ਤਿ – ‘‘ਕਥਞ੍ਹਿ ਨਾਮ ਆਯਸ੍ਮਾ ਉਦਾਯੀ ਮਾਤੁਗਾਮੇਨ ਸਦ੍ਧਿਂ ਕਾਯਸਂਸਗ੍ਗਂ ਸਮਾਪਜ੍ਜਿਸ੍ਸਤੀ’’ਤਿ! ਅਥ ਖੋ ਤੇ ਭਿਕ੍ਖੂ ਆਯਸ੍ਮਨ੍ਤਂ ਉਦਾਯਿਂ ਅਨੇਕਪਰਿਯਾਯੇਨ ਵਿਗਰਹਿਤ੍ਵਾ ਭਗਵਤੋ ਏਤਮਤ੍ਥਂ ਆਰੋਚੇਸੁਂ. ਅਥ ਖੋ ਭਗਵਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਭਿਕ੍ਖੁਸਙ੍ਘਂ ਸਨ੍ਨਿਪਾਤਾਪੇਤ੍ਵਾ ਆਯਸ੍ਮਨ੍ਤਂ ਉਦਾਯਿਂ ਪਟਿਪੁਚ੍ਛਿ – ‘‘ਸਚ੍ਚਂ ਕਿਰ ਤ੍ਵਂ, ਉਦਾਯਿ, ਮਾਤੁਗਾਮੇਨ ਸਦ੍ਧਿਂ ਕਾਯਸਂਸਗ੍ਗਂ ਸਮਾਪਜ੍ਜਸੀ’’ਤਿ? ‘‘ਸਚ੍ਚਂ, ਭਗਵਾ’’ਤਿ. ਵਿਗਰਹਿ ਬੁਦ੍ਧੋ ਭਗਵਾ – ‘‘ਅਨਨੁਚ੍ਛਵਿਕਂ, ਮੋਘਪੁਰਿਸ, ਅਨਨੁਲੋਮਿਕਂ ਅਪ੍ਪਤਿਰੂਪਂ ਅਸ੍ਸਾਮਣਕਂ ਅਕਪ੍ਪਿਯਂ ਅਕਰਣੀਯਂ. ਕਥਞ੍ਹਿ ਨਾਮ ਤ੍ਵਂ, ਮੋਘਪੁਰਿਸ, ਮਾਤੁਗਾਮੇਨ ਸਦ੍ਧਿਂ ਕਾਯਸਂਸਗ੍ਗਂ ਸਮਾਪਜ੍ਜਿਸ੍ਸਸਿ! ਨਨੁ ਮਯਾ, ਮੋਘਪੁਰਿਸ, ਅਨੇਕਪਰਿਯਾਯੇਨ ਵਿਰਾਗਾਯ ਧਮ੍ਮੋ ਦੇਸਿਤੋ ਨੋ ਸਰਾਗਾਯ…ਪੇ… ਕਾਮਪਰਿਲ਼ਾਹਾਨਂ ਵੂਪਸਮੋ ਅਕ੍ਖਾਤੋ. ਨੇਤਂ, ਮੋਘਪੁਰਿਸ, ਅਪ੍ਪਸਨ੍ਨਾਨਂ ਵਾ ਪਸਾਦਾਯ…ਪੇ… ਏਵਞ੍ਚ ਪਨ, ਭਿਕ੍ਖਵੇ, ਇਮਂ ਸਿਕ੍ਖਾਪਦਂ ਉਦ੍ਦਿਸੇਯ੍ਯਾਥ –

੨੭੦. ‘‘ਯੋ ਪਨ ਭਿਕ੍ਖੁ ਓਤਿਣ੍ਣੋ ਵਿਪਰਿਣਤੇਨ ਚਿਤ੍ਤੇਨ ਮਾਤੁਗਾਮੇਨ ਸਦ੍ਧਿਂ ਕਾਯਸਂਸਗ੍ਗਂ ਸਮਾਪਜ੍ਜੇਯ੍ਯ ਹਤ੍ਥਗ੍ਗਾਹਂ ਵਾ ਵੇਣਿਗ੍ਗਾਹਂ ਵਾ ਅਞ੍ਞਤਰਸ੍ਸ ਵਾ ਅਞ੍ਞਤਰਸ੍ਸ ਵਾ ਅਙ੍ਗਸ੍ਸ ਪਰਾਮਸਨਂ, ਸਙ੍ਘਾਦਿਸੇਸੋ’’ਤਿ.

੨੭੧. ਯੋ ਪਨਾਤਿ ਯੋ ਯਾਦਿਸੋ…ਪੇ… ਭਿਕ੍ਖੂਤਿ…ਪੇ… ਅਯਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤੋ ਭਿਕ੍ਖੂਤਿ.

ਓਤਿਣ੍ਣੋ ਨਾਮ ਸਾਰਤ੍ਤੋ ਅਪੇਕ੍ਖਵਾ ਪਟਿਬਦ੍ਧਚਿਤ੍ਤੋ.

ਵਿਪਰਿਣਤਨ੍ਤਿ ਰਤ੍ਤਮ੍ਪਿ ਚਿਤ੍ਤਂ ਵਿਪਰਿਣਤਂ. ਦੁਟ੍ਠਮ੍ਪਿ ਚਿਤ੍ਤਂ ਵਿਪਰਿਣਤਂ. ਮੂਲ਼੍ਹਮ੍ਪਿ ਚਿਤ੍ਤਂ ਵਿਪਰਿਣਤਂ. ਅਪਿਚ, ਰਤ੍ਤਂ ਚਿਤ੍ਤਂ ਇਮਸ੍ਮਿਂ ਅਤ੍ਥੇ ਅਧਿਪ੍ਪੇਤਂ ਵਿਪਰਿਣਤਨ੍ਤਿ.

ਮਾਤੁਗਾਮੋ ਨਾਮ ਮਨੁਸ੍ਸਿਤ੍ਥੀ, ਨ ਯਕ੍ਖੀ ਨ ਪੇਤੀ, ਨ ਤਿਰਚ੍ਛਾਨਗਤਾ. ਅਨ੍ਤਮਸੋ ਤਦਹੁਜਾਤਾਪਿ ਦਾਰਿਕਾ, ਪਗੇਵ ਮਹਤ੍ਤਰੀ.

ਸਦ੍ਧਿਨ੍ਤਿ ਏਕਤੋ.

ਕਾਯਸਂਸਗ੍ਗਂ ਸਮਾਪਜ੍ਜੇਯ੍ਯਾਤਿ ਅਜ੍ਝਾਚਾਰੋ ਵੁਚ੍ਚਤਿ.

ਹਤ੍ਥੋ ਨਾਮ ਕਪ੍ਪਰਂ ਉਪਾਦਾਯਂ ਯਾਵ ਅਗ੍ਗਨਖਾ.

ਵੇਣੀ ਨਾਮ ਸੁਦ੍ਧਕੇਸਾ ਵਾ, ਸੁਤ੍ਤਮਿਸ੍ਸਾ ਵਾ, ਮਾਲਾਮਿਸ੍ਸਾ ਵਾ, ਹਿਰਞ੍ਞਮਿਸ੍ਸਾ ਵਾ, ਸੁਵਣ੍ਣਮਿਸ੍ਸਾ ਵਾ, ਮੁਤ੍ਤਾਮਿਸ੍ਸਾ ਵਾ, ਮਣਿਮਿਸ੍ਸਾ ਵਾ.

ਅਙ੍ਗਂ ਨਾਮ ਹਤ੍ਥਞ੍ਚ ਵੇਣਿਞ੍ਚ ਠਪੇਤ੍ਵਾ ਅਵਸੇਸਂ ਅਙ੍ਗਂ ਨਾਮ.

੨੭੨. ਆਮਸਨਾ, ਪਰਾਮਸਨਾ, ਓਮਸਨਾ, ਉਮ੍ਮਸਨਾ, ਓਲਙ੍ਘਨਾ, ਉਲ੍ਲਙ੍ਘਨਾ, ਆਕਡ੍ਢਨਾ, ਪਤਿਕਡ੍ਢਨਾ, ਅਭਿਨਿਗ੍ਗਣ੍ਹਨਾ, ਅਭਿਨਿਪ੍ਪੀਲ਼ਨਾ, ਗਹਣਂ, ਛੁਪਨਂ.

ਆਮਸਨਾ ਨਾਮ ਆਮਟ੍ਠਮਤ੍ਤਾ.

ਪਰਾਮਸਨਾ ਨਾਮ ਇਤੋਚਿਤੋ ਚ ਸਂਚੋਪਨਾ.

ਓਮਸਨਾ ਨਾਮ ਹੇਟ੍ਠਾ ਓਰੋਪਨਾ.

ਉਮ੍ਮਸਨਾ ਨਾਮ ਉਦ੍ਧਂ ਉਚ੍ਚਾਰਣਾ.

ਓਲਙ੍ਘਨਾ ਨਾਮ ਹੇਟ੍ਠਾ ਓਨਮਨਾ.

ਉਲ੍ਲਙ੍ਘਨਾ ਨਾਮ ਉਦ੍ਧਂ ਉਚ੍ਚਾਰਣਾ.

ਆਕਡ੍ਢਨਾ ਨਾਮ ਆਵਿਞ੍ਛਨਾ [ਆਵਿਞ੍ਜਨਾ (ਸੀ. ਸ੍ਯਾ.)].

ਪਤਿਕਡ੍ਢਨਾ ਨਾਮ ਪਤਿਪ੍ਪਣਾਮਨਾ.

ਅਭਿਨਿਗ੍ਗਣ੍ਹਨਾ ਨਾਮ ਅਙ੍ਗਂ ਗਹੇਤ੍ਵਾ ਨਿਪ੍ਪੀਲ਼ਨਾ.

ਅਭਿਨਿਪ੍ਪੀਲ਼ਨਾ ਨਾਮ ਕੇਨਚਿ ਸਹ ਨਿਪ੍ਪੀਲ਼ਨਾ.

ਗਹਣਂ ਨਾਮ ਗਹਿਤਮਤ੍ਤਂ.

ਛੁਪਨਂ ਨਾਮ ਫੁਟ੍ਠਮਤ੍ਤਂ.

ਸਙ੍ਘਾਦਿਸੇਸੋਤਿ…ਪੇ… ਤੇਨਪਿ ਵੁਚ੍ਚਤਿ ਸਙ੍ਘਾਦਿਸੇਸੋਤਿ.

੨੭੩. ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ ਭਿਕ੍ਖੁ ਚ. ਨਂ ਇਤ੍ਥਿਯਾ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ ਓਮਸਤਿ ਉਮ੍ਮਸਤਿ ਓਲਙ੍ਘੇਤਿ ਉਲ੍ਲਙ੍ਘੇਤਿ ਆਕਡ੍ਢਤਿ ਪਤਿਕਡ੍ਢਤਿ ਅਭਿਨਿਗ੍ਗਣ੍ਹਾਤਿ ਅਭਿਨਿਪ੍ਪੀਲ਼ੇਤਿ ਗਣ੍ਹਾਤਿ ਛੁਪਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਇਤ੍ਥੀ ਚ ਹੋਤਿ ਵੇਮਤਿਕੋ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਇਤ੍ਥਿਯਾ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਤ੍ਥੀ ਚ ਹੋਤਿ ਪਣ੍ਡਕਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਇਤ੍ਥਿਯਾ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਤ੍ਥੀ ਚ ਹੋਤਿ ਪੁਰਿਸਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਇਤ੍ਥਿਯਾ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਇਤ੍ਥੀ ਚ ਹੋਤਿ ਤਿਰਚ੍ਛਾਨਗਤਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਇਤ੍ਥਿਯਾ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਪਣ੍ਡਕੋ ਚ ਹੋਤਿ ਪਣ੍ਡਕਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਪਣ੍ਡਕਸ੍ਸ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ.

ਪਣ੍ਡਕੋ ਚ ਹੋਤਿ ਵੇਮਤਿਕੋ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਪਣ੍ਡਕਸ੍ਸ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਪਣ੍ਡਕੋ ਚ ਹੋਤਿ ਪੁਰਿਸਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਪਣ੍ਡਕਸ੍ਸ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਪਣ੍ਡਕੋ ਚ ਹੋਤਿ ਤਿਰਚ੍ਛਾਨਗਤਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਪਣ੍ਡਕਸ੍ਸ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਪਣ੍ਡਕੋ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਪਣ੍ਡਕਸ੍ਸ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਪੁਰਿਸੋ ਚ ਹੋਤਿ ਪੁਰਿਸਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਪੁਰਿਸਸ੍ਸ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਪੁਰਿਸੋ ਚ ਹੋਤਿ ਵੇਮਤਿਕੋ…ਪੇ… ਪੁਰਿਸੋ ਚ ਹੋਤਿ ਤਿਰਚ੍ਛਾਨਗਤਸਞ੍ਞੀ… ਪੁਰਿਸੋ ਚ ਹੋਤਿ ਇਤ੍ਥਿਸਞ੍ਞੀ… ਪੁਰਿਸੋ ਚ ਹੋਤਿ ਪਣ੍ਡਕਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਪੁਰਿਸਸ੍ਸ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਤਿਰਚ੍ਛਾਨਗਤੋ ਚ ਹੋਤਿ ਤਿਰਚ੍ਛਾਨਗਤਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਤਿਰਚ੍ਛਾਨਗਤਸ੍ਸ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਤਿਰਚ੍ਛਾਨਗਤੋ ਚ ਹੋਤਿ ਵੇਮਤਿਕੋ…ਪੇ… ਤਿਰਚ੍ਛਾਨਗਤੋ ਚ ਹੋਤਿ ਇਤ੍ਥਿਸਞ੍ਞੀ… ਤਿਰਚ੍ਛਾਨਗਤੋ ਚ ਹੋਤਿ ਪਣ੍ਡਕਸਞ੍ਞੀ… ਤਿਰਚ੍ਛਾਨਗਤੋ ਚ ਹੋਤਿ. ਪੁਰਿਸਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਤਿਰਚ੍ਛਾਨਗਤਸ੍ਸ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਏਕਮੂਲਕਂ ਨਿਟ੍ਠਿਤਂ.

੨੭੪. ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਦ੍ਵਿਨ੍ਨਂ ਇਤ੍ਥੀਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸਾਨਂ.

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਵੇਮਤਿਕੋ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਦ੍ਵਿਨ੍ਨਂ ਇਤ੍ਥੀਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਥੁਲ੍ਲਚ੍ਚਯਾਨਂ.

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਪਣ੍ਡਕਸਞ੍ਞੀ…ਪੇ… ਪੁਰਿਸਸਞ੍ਞੀ… ਤਿਰਚ੍ਛਾਨਗਤਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਦ੍ਵਿਨ੍ਨਂ ਇਤ੍ਥੀਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਥੁਲ੍ਲਚ੍ਚਯਾਨਂ.

ਦ੍ਵੇ ਪਣ੍ਡਕਾ ਦ੍ਵਿਨ੍ਨਂ ਪਣ੍ਡਕਾਨਂ ਪਣ੍ਡਕਸਞ੍ਞੀ ਸਾਰਤ੍ਤੋ ਚ ਭਿਕ੍ਖੁ ਚ ਨਂ ਦ੍ਵਿਨ੍ਨਂ ਪਣ੍ਡਕਾਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਥੁਲ੍ਲਚ੍ਚਯਾਨਂ.

ਦ੍ਵੇ ਪਣ੍ਡਕਾ ਦ੍ਵਿਨ੍ਨਂ ਪਣ੍ਡਕਾਨਂ ਵੇਮਤਿਕੋ…ਪੇ… ਪੁਰਿਸਸਞ੍ਞੀ… ਤਿਰਚ੍ਛਾਨਗਤਸਞ੍ਞੀ… ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਦ੍ਵਿਨ੍ਨਂ ਪਣ੍ਡਕਾਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ.

ਦ੍ਵੇ ਪੁਰਿਸਾ ਦ੍ਵਿਨ੍ਨਂ ਪੁਰਿਸਾਨਂ ਪੁਰਿਸਸਞ੍ਞੀ ਸਾਰਤ੍ਤੋ ਚ ਭਿਕ੍ਖੁ ਚ ਨਂ ਦ੍ਵਿਨ੍ਨਂ ਪੁਰਿਸਾਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ.

ਦ੍ਵੇ ਪੁਰਿਸਾ ਦ੍ਵਿਨ੍ਨਂ ਪੁਰਿਸਾਨਂ ਵੇਮਤਿਕੋ…ਪੇ… ਤਿਰਚ੍ਛਾਨਗਤਸਞ੍ਞੀ… ਇਤ੍ਥਿਸਞ੍ਞੀ… ਪਣ੍ਡਕਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਦ੍ਵਿਨ੍ਨਂ ਪੁਰਿਸਾਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ.

ਦ੍ਵੇ ਤਿਰਚ੍ਛਾਨਗਤਾ ਦ੍ਵਿਨ੍ਨਂ ਤਿਰਚ੍ਛਾਨਗਤਾਨਂ ਤਿਰਚ੍ਛਾਨਗਤਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਦ੍ਵਿਨ੍ਨਂ ਤਿਰਚ੍ਛਾਨਗਤਾਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ.

ਦ੍ਵੇ ਤਿਰਚ੍ਛਾਨਗਤਾ ਦ੍ਵਿਨ੍ਨਂ ਤਿਰਚ੍ਛਾਨਗਤਾਨਂ ਵੇਮਤਿਕੋ…ਪੇ… ਇਤ੍ਥਿਸਞ੍ਞੀ… ਪਣ੍ਡਕਸਞ੍ਞੀ … ਪੁਰਿਸਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਦ੍ਵਿਨ੍ਨਂ ਤਿਰਚ੍ਛਾਨਗਤਾਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ.

੨੭੫. ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ.

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਵੇਮਤਿਕੋ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯੇਨ ਦੁਕ੍ਕਟਸ੍ਸ.

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਪਣ੍ਡਕਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਥੁਲ੍ਲਚ੍ਚਯਾਨਂ.

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਪੁਰਿਸਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯੇਨ ਦੁਕ੍ਕਟਸ੍ਸ.

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਤਿਰਚ੍ਛਾਨਗਤਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯੇਨ ਦੁਕ੍ਕਟਸ੍ਸ.

ਇਤ੍ਥੀ ਚ ਪੁਰਿਸੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ.

ਇਤ੍ਥੀ ਚ ਪੁਰਿਸੋ ਚ ਉਭਿਨ੍ਨਂ ਵੇਮਤਿਕੋ…ਪੇ… ਪਣ੍ਡਕਸਞ੍ਞੀ… ਪੁਰਿਸਸਞ੍ਞੀ… ਤਿਰਚ੍ਛਾਨਗਤਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯੇਨ ਦੁਕ੍ਕਟਸ੍ਸ.

ਇਤ੍ਥੀ ਚ ਤਿਰਚ੍ਛਾਨਗਤੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ.

ਇਤ੍ਥੀ ਚ ਤਿਰਚ੍ਛਾਨਗਤੋ ਚ ਉਭਿਨ੍ਨਂ ਵੇਮਤਿਕੋ…ਪੇ… ਪਣ੍ਡਕਸਞ੍ਞੀ… ਪੁਰਿਸਸਞ੍ਞੀ … ਤਿਰਚ੍ਛਾਨਗਤਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯੇਨ ਦੁਕ੍ਕਟਸ੍ਸ.

ਪਣ੍ਡਕੋ ਚ ਪੁਰਿਸੋ ਚ ਉਭਿਨ੍ਨਂ ਪਣ੍ਡਕਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯੇਨ ਦੁਕ੍ਕਟਸ੍ਸ.

ਪਣ੍ਡਕੋ ਚ ਪੁਰਿਸੋ ਚ ਉਭਿਨ੍ਨਂ ਵੇਮਤਿਕੋ…ਪੇ… ਪੁਰਿਸਸਞ੍ਞੀ… ਤਿਰਚ੍ਛਾਨਗਤਸਞ੍ਞੀ… ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ.

ਪਣ੍ਡਕੋ ਚ ਤਿਰਚ੍ਛਾਨਗਤੋ ਚ ਉਭਿਨ੍ਨਂ ਪਣ੍ਡਕਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯੇਨ ਦੁਕ੍ਕਟਸ੍ਸ.

ਪਣ੍ਡਕੋ ਚ ਤਿਰਚ੍ਛਾਨਗਤੋ ਚ ਉਭਿਨ੍ਨਂ ਵੇਮਤਿਕੋ…ਪੇ… ਪੁਰਿਸਸਞ੍ਞੀ… ਤਿਰਚ੍ਛਾਨਗਤਸਞ੍ਞੀ… ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ.

ਪੁਰਿਸੋ ਚ ਤਿਰਚ੍ਛਾਨਗਤੋ ਚ ਉਭਿਨ੍ਨਂ ਪੁਰਿਸਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ.

ਪੁਰਿਸੋ ਚ ਤਿਰਚ੍ਛਾਨਗਤੋ ਚ ਉਭਿਨ੍ਨਂ ਵੇਮਤਿਕੋ…ਪੇ… ਤਿਰਚ੍ਛਾਨਗਤਸਞ੍ਞੀ… ਇਤ੍ਥਿਸਞ੍ਞੀ… ਪਣ੍ਡਕਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ.

ਦੁਮੂਲਕਂ ਨਿਟ੍ਠਿਤਂ.

੨੭੬. ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਇਤ੍ਥਿਯਾ ਕਾਯੇਨ ਕਾਯਪਟਿਬਦ੍ਧਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ…ਪੇ….

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਦ੍ਵਿਨ੍ਨਂ ਇਤ੍ਥੀਨਂ ਕਾਯੇਨ ਕਾਯਪਟਿਬਦ੍ਧਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਥੁਲ੍ਲਚ੍ਚਯਾਨਂ …ਪੇ….

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯੇਨ ਕਾਯਪਟਿਬਦ੍ਧਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯੇਨ ਦੁਕ੍ਕਟਸ੍ਸ…ਪੇ….

ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਇਤ੍ਥਿਯਾ ਕਾਯਪਟਿਬਦ੍ਧੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ…ਪੇ….

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਦ੍ਵਿਨ੍ਨਂ ਇਤ੍ਥੀਨਂ ਕਾਯਪਟਿਬਦ੍ਧੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਥੁਲ੍ਲਚ੍ਚਯਾਨਂ…ਪੇ….

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯਪਟਿਬਦ੍ਧੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਥੁਲ੍ਲਚ੍ਚਯੇਨ ਦੁਕ੍ਕਟਸ੍ਸ…ਪੇ….

ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਇਤ੍ਥਿਯਾ ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦੁਕ੍ਕਟਸ੍ਸ…ਪੇ….

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਦ੍ਵਿਨ੍ਨਂ ਇਤ੍ਥੀਨਂ ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਇਤ੍ਥਿਯਾ ਨਿਸ੍ਸਗ੍ਗਿਯੇਨ ਕਾਯਂ ਆਮਸਤਿ ਆਪਤ੍ਤਿ ਦੁਕ੍ਕਟਸ੍ਸ…ਪੇ….

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਦ੍ਵਿਨ੍ਨਂ ਇਤ੍ਥੀਨਂ ਨਿਸ੍ਸਗ੍ਗਿਯੇਨ ਕਾਯਂ ਆਮਸਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਨਿਸ੍ਸਗ੍ਗਿਯੇਨ ਕਾਯਂ ਆਮਸਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਇਤ੍ਥਿਯਾ ਨਿਸ੍ਸਗ੍ਗਿਯੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ…ਪੇ….

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਦ੍ਵਿਨ੍ਨਂ ਇਤ੍ਥੀਨਂ ਨਿਸ੍ਸਗ੍ਗਿਯੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਨਿਸ੍ਸਗ੍ਗਿਯੇਨ ਕਾਯਪਟਿਬਦ੍ਧਂ ਆਮਸਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਇਤ੍ਥਿਯਾ ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਂ ਆਮਸਤਿ, ਆਪਤ੍ਤਿ ਦੁਕ੍ਕਟਸ੍ਸ…ਪੇ….

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਦ੍ਵਿਨ੍ਨਂ ਇਤ੍ਥੀਨਂ ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਂ ਆਮਸਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਭਿਕ੍ਖੁ ਚ ਨਂ ਉਭਿਨ੍ਨਂ ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਂ ਆਮਸਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

ਭਿਕ੍ਖੁਪੇਯ੍ਯਾਲੋ ਨਿਟ੍ਠਿਤੋ.

੨੭੭. ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਇਤ੍ਥੀ ਚ ਨਂ ਭਿਕ੍ਖੁਸ੍ਸ ਕਾਯੇਨ ਕਾਯਂ ਆਮਸਤਿ ਪਰਾਮਸਤਿ ਓਮਸਤਿ ਉਮ੍ਮਸਤਿ ਓਲਙ੍ਘੇਤਿ ਉਲ੍ਲਙ੍ਘੇਤਿ ਆਕਡ੍ਢਤਿ ਪਤਿਕਡ੍ਢਤਿ ਅਭਿਨਿਗ੍ਗਣ੍ਹਾਤਿ ਅਭਿਨਿਪ੍ਪੀਲ਼ੇਤਿ ਗਣ੍ਹਾਤਿ ਛੁਪਤਿ, ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ…ਪੇ….

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਇਤ੍ਥਿਯੋ ਚ ਨਂ ਭਿਕ੍ਖੁਸ੍ਸ ਕਾਯੇਨ ਕਾਯਂ ਆਮਸਨ੍ਤਿ ਪਰਾਮਸਨ੍ਤਿ ਓਮਸਨ੍ਤਿ ਉਮ੍ਮਸਨ੍ਤਿ ਓਲਙ੍ਘੇਨ੍ਤਿ ਉਲ੍ਲਙ੍ਘੇਨ੍ਤਿ ਆਕਡ੍ਢਨ੍ਤਿ ਪਤਿਕਡ੍ਢਨ੍ਤਿ ਅਭਿਨਿਗ੍ਗਣ੍ਹਨ੍ਤਿ ਅਭਿਨਿਪ੍ਪੀਲ਼ੇਨ੍ਤਿ ਗਣ੍ਹਨ੍ਤਿ ਛੁਪਨ੍ਤਿ, ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦ੍ਵਿਨ੍ਨਂ ਸਙ੍ਘਾਦਿਸੇਸਾਨਂ…ਪੇ….

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਉਭੋ ਚ ਨਂ ਭਿਕ੍ਖੁਸ੍ਸ ਕਾਯੇਨ ਕਾਯਂ ਆਮਸਨ੍ਤਿ ਪਰਾਮਸਨ੍ਤਿ…ਪੇ… ਗਣ੍ਹਨ੍ਤਿ ਛੁਪਨ੍ਤਿ, ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਸਙ੍ਘਾਦਿਸੇਸੇਨ ਦੁਕ੍ਕਟਸ੍ਸ…ਪੇ….

ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਇਤ੍ਥੀ ਚ ਨਂ ਭਿਕ੍ਖੁਸ੍ਸ ਕਾਯੇਨ ਕਾਯਪਟਿਬਦ੍ਧਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ…ਪੇ….

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਇਤ੍ਥਿਯੋ ਚ ਨਂ ਭਿਕ੍ਖੁਸ੍ਸ ਕਾਯੇਨ ਕਾਯਪਟਿਬਦ੍ਧਂ ਆਮਸਨ੍ਤਿ ਪਰਾਮਸਨ੍ਤਿ…ਪੇ… ਗਣ੍ਹਨ੍ਤਿ ਛੁਪਨ੍ਤਿ, ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦ੍ਵਿਨ੍ਨਂ ਥੁਲ੍ਲਚ੍ਚਯਾਨਂ…ਪੇ….

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਉਭੋ ਚ ਨਂ ਭਿਕ੍ਖੁਸ੍ਸ ਕਾਯੇਨ ਕਾਯਪਟਿਬਦ੍ਧਂ ਆਮਸਨ੍ਤਿ ਪਰਾਮਸਨ੍ਤਿ…ਪੇ… ਗਣ੍ਹਨ੍ਤਿ ਛੁਪਨ੍ਤਿ, ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਥੁਲ੍ਲਚ੍ਚਯੇਨ ਦੁਕ੍ਕਟਸ੍ਸ…ਪੇ….

ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਇਤ੍ਥੀ ਚ ਨਂ ਭਿਕ੍ਖੁਸ੍ਸ ਕਾਯਪਟਿਬਦ੍ਧੇਨ ਕਾਯਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਥੁਲ੍ਲਚ੍ਚਯਸ੍ਸ…ਪੇ….

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਇਤ੍ਥਿਯੋ ਚ ਨਂ ਭਿਕ੍ਖੁਸ੍ਸ ਕਾਯਪਟਿਬਦ੍ਧੇਨ ਕਾਯਂ ਆਮਸਨ੍ਤਿ ਪਰਾਮਸਨ੍ਤਿ…ਪੇ… ਗਣ੍ਹਨ੍ਤਿ ਛੁਪਨ੍ਤਿ, ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦ੍ਵਿਨ੍ਨਂ ਥੁਲ੍ਲਚ੍ਚਯਾਨਂ…ਪੇ….

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਉਭੋ ਚ ਨਂ ਭਿਕ੍ਖੁਸ੍ਸ ਕਾਯਪਟਿਬਦ੍ਧੇਨ ਕਾਯਂ ਆਮਸਨ੍ਤਿ ਪਰਾਮਸਨ੍ਤਿ…ਪੇ… ਗਣ੍ਹਨ੍ਤਿ ਛੁਪਨ੍ਤਿ, ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਥੁਲ੍ਲਚ੍ਚਯੇਨ ਦੁਕ੍ਕਟਸ੍ਸ…ਪੇ….

੨੭੮. ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਇਤ੍ਥੀ ਚ ਨਂ ਭਿਕ੍ਖੁਸ੍ਸ ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਂ ਆਮਸਤਿ ਪਰਾਮਸਤਿ…ਪੇ… ਗਣ੍ਹਾਤਿ ਛੁਪਤਿ, ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦੁਕ੍ਕਟਸ੍ਸ…ਪੇ….

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਇਤ੍ਥਿਯੋ ਚ ਨਂ ਭਿਕ੍ਖੁਸ੍ਸ ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਂ ਆਮਸਨ੍ਤਿ ਪਰਾਮਸਨ੍ਤਿ…ਪੇ… ਗਣ੍ਹਨ੍ਤਿ ਛੁਪਨ੍ਤਿ, ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਉਭੋ ਚ ਨਂ ਭਿਕ੍ਖੁਸ੍ਸ ਕਾਯਪਟਿਬਦ੍ਧੇਨ ਕਾਯਪਟਿਬਦ੍ਧਂ ਆਮਸਨ੍ਤਿ ਪਰਾਮਸਨ੍ਤਿ…ਪੇ… ਗਣ੍ਹਨ੍ਤਿ ਛੁਪਨ੍ਤਿ, ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਇਤ੍ਥੀ ਚ ਨਂ ਭਿਕ੍ਖੁਸ੍ਸ ਨਿਸ੍ਸਗ੍ਗਿਯੇਨ ਕਾਯਂ ਆਮਸਤਿ. ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦੁਕ੍ਕਟਸ੍ਸ…ਪੇ….

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਇਤ੍ਥਿਯੋ ਚ ਨਂ ਭਿਕ੍ਖੁਸ੍ਸ ਨਿਸ੍ਸਗ੍ਗਿਯੇਨ ਕਾਯਂ ਆਮਸਨ੍ਤਿ. ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਉਭੋ ਚ ਨਂ ਭਿਕ੍ਖੁਸ੍ਸ ਨਿਸ੍ਸਗ੍ਗਿਯੇਨ ਕਾਯਂ ਆਮਸਨ੍ਤਿ. ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਇਤ੍ਥੀ ਚ ਨਂ ਭਿਕ੍ਖੁਸ੍ਸ ਨਿਸ੍ਸਗ੍ਗਿਯੇਨ ਕਾਯਪਟਿਬਦ੍ਧਂ ਆਮਸਤਿ. ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦੁਕ੍ਕਟਸ੍ਸ…ਪੇ….

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਇਤ੍ਥਿਯੋ ਚ ਨਂ ਭਿਕ੍ਖੁਸ੍ਸ ਨਿਸ੍ਸਗ੍ਗਿਯੇਨ ਕਾਯਪਟਿਬਦ੍ਧਂ ਆਮਸਨ੍ਤਿ. ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਉਭੋ ਚ ਨਂ ਭਿਕ੍ਖੁਸ੍ਸ ਨਿਸ੍ਸਗ੍ਗਿਯੇਨ ਕਾਯਪਟਿਬਦ੍ਧਂ ਆਮਸਨ੍ਤਿ. ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

ਇਤ੍ਥੀ ਚ ਹੋਤਿ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਇਤ੍ਥੀ ਚ ਨਂ ਭਿਕ੍ਖੁਸ੍ਸ ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਂ ਆਮਸਤਿ. ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ, ਨ ਚ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦੁਕ੍ਕਟਸ੍ਸ…ਪੇ….

ਦ੍ਵੇ ਇਤ੍ਥਿਯੋ ਦ੍ਵਿਨ੍ਨਂ ਇਤ੍ਥੀਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਇਤ੍ਥਿਯੋ ਚ ਨਂ ਭਿਕ੍ਖੁਸ੍ਸ ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਂ ਆਮਸਨ੍ਤਿ. ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ, ਨ ਚ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

ਇਤ੍ਥੀ ਚ ਪਣ੍ਡਕੋ ਚ ਉਭਿਨ੍ਨਂ ਇਤ੍ਥਿਸਞ੍ਞੀ ਸਾਰਤ੍ਤੋ ਚ. ਉਭੋ ਚ ਨਂ ਭਿਕ੍ਖੁਸ੍ਸ ਨਿਸ੍ਸਗ੍ਗਿਯੇਨ ਨਿਸ੍ਸਗ੍ਗਿਯਂ ਆਮਸਨ੍ਤਿ. ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ, ਨ ਚ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦ੍ਵਿਨ੍ਨਂ ਦੁਕ੍ਕਟਾਨਂ…ਪੇ….

੨੭੯. ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਸਙ੍ਘਾਦਿਸੇਸਸ੍ਸ.

ਸੇਵਨਾਧਿਪ੍ਪਾਯੋ ਕਾਯੇਨ ਵਾਯਮਤਿ, ਨ ਚ ਫਸ੍ਸਂ ਪਟਿਵਿਜਾਨਾਤਿ, ਆਪਤ੍ਤਿ ਦੁਕ੍ਕਟਸ੍ਸ.

ਸੇਵਨਾਧਿਪ੍ਪਾਯੋ ਨ ਚ ਕਾਯੇਨ ਵਾਯਮਤਿ, ਫਸ੍ਸਂ ਪਟਿਵਿਜਾਨਾਤਿ, ਅਨਾਪਤ੍ਤਿ.

ਸੇਵਨਾਧਿਪ੍ਪਾਯੋ ਨ ਚ ਕਾਯੇਨ ਵਾਯਮਤਿ, ਨ ਚ ਫਸ੍ਸਂ ਪਟਿਵਿਜਾਨਾਤਿ, ਅਨਾਪਤ੍ਤਿ.

ਮੋਕ੍ਖਾਧਿਪ੍ਪਾਯੋ ਕਾਯੇਨ ਵਾਯਮਤਿ, ਫਸ੍ਸਂ ਪਟਿਵਿਜਾਨਾਤਿ, ਅਨਾਪਤ੍ਤਿ.

ਮੋਕ੍ਖਾਧਿਪ੍ਪਾਯੋ ਕਾਯੇਨ ਵਾਯਮਤਿ, ਨ ਚ ਫਸ੍ਸਂ ਪਟਿਵਿਜਾਨਾਤਿ, ਅਨਾਪਤ੍ਤਿ.

ਮੋਕ੍ਖਾਧਿਪ੍ਪਾਯੋ ਨ ਚ ਕਾਯੇਨ ਵਾਯਮਤਿ, ਫਸ੍ਸਂ ਪਟਿਵਿਜਾਨਾਤਿ, ਅਨਾਪਤ੍ਤਿ.

ਮੋਕ੍ਖਾਧਿਪ੍ਪਾਯੋ ਨ ਚ ਕਾਯੇਨ ਵਾਯਮਤਿ, ਨ ਚ ਫਸ੍ਸਂ ਪਟਿਵਿਜਾਨਾਤਿ, ਅਨਾਪਤ੍ਤਿ.

੨੮੦. ਅਨਾਪਤ੍ਤਿ ਅਸਞ੍ਚਿਚ੍ਚ, ਅਸਤਿਯਾ, ਅਜਾਨਨ੍ਤਸ੍ਸ, ਅਸਾਦਿਯਨ੍ਤਸ੍ਸ, ਉਮ੍ਮਤ੍ਤਕਸ੍ਸ, ਖਿਤ੍ਤਚਿਤ੍ਤਸ੍ਸ, ਵੇਦਨਾਟ੍ਟਸ੍ਸ, ਆਦਿਕਮ੍ਮਿਕਸ੍ਸਾਤਿ.

ਵਿਨੀਤਵਤ੍ਥੁਉਦ੍ਦਾਨਗਾਥਾ

ਮਾਤਾ ਧੀਤਾ ਭਗਿਨੀ ਚ, ਜਾਯਾ ਯਕ੍ਖੀ ਚ ਪਣ੍ਡਕੋ;

ਸੁਤ੍ਤਾ ਮਤਾ ਤਿਰਚ੍ਛਾਨਾ, ਦਾਰੁਧਿਤਲਿਕਾਯ ਚ.

ਸਮ੍ਪੀਲ਼ੇ ਸਙ੍ਕਮੋ ਮਗ੍ਗੋ, ਰੁਕ੍ਖੋ ਨਾਵਾ ਚ ਰਜ੍ਜੁ ਚ;

ਦਣ੍ਡੋ ਪਤ੍ਤਂ ਪਣਾਮੇਸਿ, ਵਨ੍ਦੇ ਵਾਯਮਿ ਨਚ੍ਛੁਪੇਤਿ.

ਵਿਨੀਤਵਤ੍ਥੁ

੨੮੧. ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਮਾਤੁਯਾ ਮਾਤੁਪੇਮੇਨ ਆਮਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ – ‘‘ਭਗਵਤਾ ਸਿਕ੍ਖਾਪਦਂ ਪਞ੍ਞਤ੍ਤਂ, ਕਚ੍ਚਿ ਨੁ ਖੋ ਅਹਂ ਸਙ੍ਘਾਦਿਸੇਸਂ ਆਪਤ੍ਤਿਂ ਆਪਨ੍ਨੋ’’ਤਿ? ਭਗਵਤੋ ਏਤਮਤ੍ਥਂ ਆਰੋਚੇਸਿ. ‘‘ਅਨਾਪਤ੍ਤਿ, ਭਿਕ੍ਖੁ, ਸਙ੍ਘਾਦਿਸੇਸਸ੍ਸ; ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਧੀਤੁਯਾ ਧੀਤੁਪੇਮੇਨ ਆਮਸਿ…ਪੇ… ਭਗਿਨਿਯਾ ਭਗਿਨਿਪੇਮੇਨ ਆਮਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਸਙ੍ਘਾਦਿਸੇਸਸ੍ਸ; ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਪੁਰਾਣਦੁਤਿਯਿਕਾਯ ਕਾਯਸਂਸਗ੍ਗਂ ਸਮਾਪਜ੍ਜਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਸਙ੍ਘਾਦਿਸੇਸ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਯਕ੍ਖਿਨਿਯਾ ਕਾਯਸਂਸਗ੍ਗਂ ਸਮਾਪਜ੍ਜਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਸਙ੍ਘਾਦਿਸੇਸਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਪਣ੍ਡਕਸ੍ਸ ਕਾਯਸਂਸਗ੍ਗਂ ਸਮਾਪਜ੍ਜਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਸਙ੍ਘਾਦਿਸੇਸਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਸੁਤ੍ਤਿਤ੍ਥਿਯਾ ਕਾਯਸਂਸਗ੍ਗਂ ਸਮਾਪਜ੍ਜਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਸਙ੍ਘਾਦਿਸੇਸ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਮਤਿਤ੍ਥਿਯਾ ਕਾਯਸਂਸਗ੍ਗਂ ਸਮਾਪਜ੍ਜਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਸਙ੍ਘਾਦਿਸੇਸਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਤਿਰਚ੍ਛਾਨਗਤਿਤ੍ਥਿਯਾ ਕਾਯਸਂਸਗ੍ਗਂ ਸਮਾਪਜ੍ਜਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਸਙ੍ਘਾਦਿਸੇਸਸ੍ਸ; ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਦਾਰੁਧੀਤਲਿਕਾਯ ਕਾਯਸਂਸਗ੍ਗਂ ਸਮਾਪਜ੍ਜਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਸਙ੍ਘਾਦਿਸੇਸਸ੍ਸ; ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

੨੮੨. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਇਤ੍ਥਿਯੋ ਅਞ੍ਞਤਰਂ ਭਿਕ੍ਖੁਂ ਸਮ੍ਪੀਲ਼ੇਤ੍ਵਾ ਬਾਹਾਪਰਮ੍ਪਰਾਯ ਆਨੇਸੁਂ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਸਾਦਿਯਿ ਤ੍ਵਂ, ਭਿਕ੍ਖੂ’’ਤਿ? ‘‘ਨਾਹਂ, ਭਗਵਾ, ਸਾਦਿਯਿ’’ਨ੍ਤਿ. ‘‘ਅਨਾਪਤ੍ਤਿ, ਭਿਕ੍ਖੂ, ਅਸਾਦਿਯਨ੍ਤਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਇਤ੍ਥਿਯਾ ਅਭਿਰੂਲ਼੍ਹਂ ਸਙ੍ਕਮਂ ਸਾਰਤ੍ਤੋ ਸਞ੍ਚਾਲੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਸਙ੍ਘਾਦਿਸੇਸਸ੍ਸ; ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਇਤ੍ਥਿਂ ਪਟਿਪਥੇ ਪਸ੍ਸਿਤ੍ਵਾ ਸਾਰਤ੍ਤੋ ਅਂਸਕੂਟੇਨ ਪਹਾਰਂ ਅਦਾਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਸਙ੍ਘਾਦਿਸੇਸ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਇਤ੍ਥਿਯਾ ਅਭਿਰੂਲ਼੍ਹਂ ਰੁਕ੍ਖਂ ਸਾਰਤ੍ਤੋ ਸਞ੍ਚਾਲੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਸਙ੍ਘਾਦਿਸੇਸਸ੍ਸ; ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਇਤ੍ਥਿਯਾ ਅਭਿਰੂਲ਼੍ਹਂ ਨਾਵਂ ਸਾਰਤ੍ਤੋ ਸਞ੍ਚਾਲੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਸਙ੍ਘਾਦਿਸੇਸਸ੍ਸ; ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਇਤ੍ਥਿਯਾ ਗਹਿਤਂ ਰਜ੍ਜੁਂ ਸਾਰਤ੍ਤੋ ਆਵਿਞ੍ਛਿ [ਆਵਿਞ੍ਜਿ (ਸੀ. ਸ੍ਯਾ.)]. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਸਙ੍ਘਾਦਿਸੇਸਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਇਤ੍ਥਿਯਾ ਗਹਿਤਂ ਦਣ੍ਡਂ ਸਾਰਤ੍ਤੋ ਆਵਿਞ੍ਛਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਸਙ੍ਘਾਦਿਸੇਸਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਸਾਰਤ੍ਤੋ ਇਤ੍ਥਿਂ ਪਤ੍ਤੇਨ ਪਣਾਮੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਸਙ੍ਘਾਦਿਸੇਸਸ੍ਸ; ਆਪਤ੍ਤਿ ਥੁਲ੍ਲਚ੍ਚਯਸ੍ਸਾ’’ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਇਤ੍ਥਿਯਾ ਵਨ੍ਦਨ੍ਤਿਯਾ ਸਾਰਤ੍ਤੋ ਪਾਦਂ ਉਚ੍ਚਾਰੇਸਿ. ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਆਪਤ੍ਤਿਂ ਤ੍ਵਂ, ਭਿਕ੍ਖੁ, ਆਪਨ੍ਨੋ ਸਙ੍ਘਾਦਿਸੇਸ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਅਞ੍ਞਤਰੋ ਭਿਕ੍ਖੁ ਇਤ੍ਥਿਂ ਗਹੇਸ੍ਸਾਮੀਤਿ ਵਾਯਮਿਤ੍ਵਾ ਨ ਛੁਪਿ.

ਤਸ੍ਸ ਕੁਕ੍ਕੁਚ੍ਚਂ ਅਹੋਸਿ…ਪੇ… ‘‘ਅਨਾਪਤ੍ਤਿ, ਭਿਕ੍ਖੁ, ਸਙ੍ਘਾਦਿਸੇਸਸ੍ਸ; ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ.

ਕਾਯਸਂਸਗ੍ਗਸਿਕ੍ਖਾਪਦਂ ਨਿਟ੍ਠਿਤਂ ਦੁਤਿਯਂ.